അപ്പോസുത്തലാര് 18 - സാമി സേദിപവുലോസു കൊരിന്ത്യാല് 1 അദ്‌ക്ക് പ്‌റ പവുലോസു ആദാന്‌സ്‌ലിന്ത് കൊരിന്ത്യ പട്ടണാക്ക് പോനാന്. 2 അദ്‌ല് ബെത്ത് പൊന്തോസുഗാറാന് അഗിലാന് എന്നുവ എഗുദാന്‌നാമ് അയാള് പെ്ണ്ട് പ്‌റ്‌സ്‌ക്കില്ലനാമ് കണ്ടാന്. എഗുദാര് ഒട്ടുക്കു റോമ പട്ടണാത്ത്‌ലിന്ത് പോഡൊ എന്റ് ക്‌ളാവുദോസു എന്റ് സൊല്ലുവ റോമ നാഡ് രാജാവു സട്ട എ്ഡ്‌ത്തിന്താന്. അദ്‌നാലെ അയി ഗളിഗേല് ഇദല്ല്യാലിന്ത് ബന്തവാര്‌ത്തെ ഇവാര് ആളാന്‌പെ്ണ്ട്. പവുലോസു അവാര്‌ന കാണ്യ പോനാന്. 3 ഗുഡുസുലു മാഡി ബിക്കുവ ഗിലാസത്തെ അവാര് ഗേന്തിന്താദ്. പവുലോസുമ് അത്തവ ഗിലാസത്തെ ഗേന്തിന്താന്. അദ്‌നാലെ അയാള്‌മ് അവാരോഡ എ്ണേന്ത് അയി ഗിലാസ ഗേന്താന്. അത്തെ അയാള് അയി ഗിലാസ ഗേന്ത് തനാക്ക് പണ സമ്പാരിത്തിന്താന്. 4 ആന ഒയിവു നാളൊട്ടുക്കു അയാള് എഗുദാര് പരേസുവ ബീ്ഡ്‌ക്ക് പോയി എഗുദാരോഡാമ് എവനഗാറാരോഡാമ് ബാദിത്ത് കൊണ്ടു അവാര് ഏസ്സ്‌ന നമ്പ്യ ബേ്ണ്ടി ഓരാഡികൊണ്ടിന്താന്. 5 സീലാസ്‌മ് തിമിത്തോസുമു മക്കെദോന്യാലിന്ത് ബന്താര്. അദ്‌ക്ക് പ്‌റ പവുലോസു ഏദ്‌ഗളിഗേമ് നല്ല സേദിന സൊല്ല്യ പ്‌ഡിത്താന്. അത്തെ അയാള് ഏസ്സ്‌ത്തെ സെരിക്ക്‌മ് ക്‌റ്‌സ്‌ത്ത് എന്റ് എഗുദാര്‌ക്ക് സൊക്കാന കാട്ടി കൊഡുത്താന്. 6 ആന അവാര് പവുലോസുക്കുമു മീ്റി നായ സൊല്ലി അയാള്‌ന മോസ എന്റ് സൊന്നാര്. അദ്‌ക്ക് തഗ്‌ന്ത ബദ്‌ല്‌ത്തെ സൊന്റെ എന്റ് കാട്ട്യ ബേ്ണ്ടി അയാള് തന്ന് സീലെല ദൂളിന കൊഡേന്ത് കൊണ്ടു: <<നിമ്മ കെ്ട്ട് പോവദാന നിമ്മ താനെത്തെ അദ്‌ക്ക് കുറ്റഗാറാര്. അദ്‌ക്ക് എനാക്ക് പൊറുപ്പില്ലെ. ഇന്നി നാന് എഗുദാര് അല്ലാത്ത ബേ്റെ ജാദിഗാള് പട്ട്‌ക്ക് പോന്റെ>> എന്റ് സൊന്നാന് 7 പ്‌റസാരി അയാള് എഗുദാര്‌ന ബ്‌ട്ട് എഗുദാര് പരേസുവ ബീ്ഡ്‌ക്ക് അര്‌ഗെ ഇര്‌ക്കുവ തീത്തോസു ഓസ്‌ത്തോസു എന്നുവ ആള് ബീ്ഡ്‌ക്ക് പോയിന്താന്. അയാള് ഒന്റു എഗുദാര് അല്ലാത്ത ജാദിക്ക് പട്ടവാന്‌മ് സാമിന കുമ്മുഡി നഡാന്തിന്തവാന്‌മ് ആയിന്താന്. 8 എഗുദാര് പരേസുവ ബീ്ഡ് അദിഗാരി ക്‌റ്‌സ്‌പോസുമു അയാള് ബീ്ഡ്‌ലവാര്‌മ് ഒട്ടുക്കു ആണ്ടവാന്‌ന നമ്പ്‌നാര്. കൊരിന്ത്യാല് ഇര്‌ക്കുവ എഞ്ചോ ആള്‌ഗാള്‌മ് പവുലോസു സൊന്ന നായന കേ്ട്ട് നമ്പി നീര്‌ക്ക് മുളുഗുനാര്. 9 ഒന്റു നാള് ജാമാത്ത്‌ല് പവുലോസുക്കു ഒന്റു കനേസ്‌ല് കാട്ട്‌റ്റ്. അയി കനേസ്‌ല്‌ല് ആണ്ടവാന് പവുലോസുക്കു: <<നീ അഞ്ചാദെ, നായ സൊല്ലു, സപ്പെന്റ്‌റ്‌ക്കാദെ, 10 എന്ത്‌ക്കെന്റ് സൊന്ന നാന് നിന്നോഡൊപ്പ ഇര്‌ക്ക്‌ന്റെ, ആര്‌മ് നിനാന അഡിക്കാമ് മാട്ടാര് കൊഡിമേമ് പഡ്‌സമാട്ടാര്. ഈ പട്ടണാത്ത്‌ല് എഞ്ചോ ആള്‌ഗാള് എനാക്ക് ഇര്‌ക്ക്‌ന്റാര്>> എന്റ് സൊന്നാന്. 11 അത്തെ പവുലോസു സാമി സൊല്ലുസുലാക്കാന ആള്‌ഗാള്‌ക്ക് പഡിസികൊണ്ടു ഒണ്ണരെ ബര്‌സ്സ അദ്‌ലിന്താന്. 12 ഗല്ല്യോനു അഗായ ദേസാക്ക് അദിഗാരി ആയി ആണ്ടിന്താന്. അയി ഗളിഗേല് എഗുദാര് ഒന്റായി എ്ണേന്ത് പവുലോസുന പ്‌ഡിത്ത് റോമ കോഡിദിക്ക് എ്ഡ്‌ത്ത് പോനാര്. 13 <<എഗുദാര് സട്ടാക്ക് സെല്ലാത്ത ദിന്‌സ്‌ല് സാമിന കുമ്മുഡി നഡാക്ക്യ ഇയാള് ആള്‌ഗാള്‌ന നത്ത്‌ന്റാന്>> എന്റ് അവാര് സൊന്നാര്. 14 പവുലോസു തിരിക്കി സൊല്ല്യ നെനേക്കാട്ട്യെല്ല ഗല്ല്യോനു എഗുദാര്‌ക്ക്: <<അല്ല എഗുദാരെ, ഈ കാര്യ എന്തൊന്റു തെറ്റൊ കുറ്റഗൊ ആയിന്തദാന നാന് നിമ്മ് സാഡിന പൊറിമോഡ കേ്ട്ടിന്തിറ്‌ക്കുവെ. 15 ആന നിമ്മ സൊല്ലുവ ഈ സാഡില് നായഗാള്‌നാമ്, നിമ്മ് പേര്‌ഗാള്‌നാമ്, നിമ്മ് സട്ടഗാള്‌നാമ് സേത്തിര്‌ന്റ്‌റ്. അദ്‌നാലെ നിമ്മ താനെ ഇദ്‌ക്ക് മുഡിവെ്ഡ്‌ന്. ഇത്തവ കാര്യഗാള്‌ക്ക് മുഡിവു സൊല്ല്യ എനാക്ക് ആഗമാട്ട>> എന്റ് സൊന്നാന്. 16 എന്റിന്ത് ഗല്ല്യോനു അവാര്‌ന കോഡിദിലിന്ത് ബെ്ളിഗെ ഇ്റാക്കി ബ്‌ട്ടാന്. 17 പ്‌റസാരി അവാര് ഒട്ടുക്കു എഗുദാര് സാമിബീ്ഡ് അദിഗാരി സോസുത്തനോസുന പ്‌ഡിത്ത് റോമ കോഡിദിക്ക് മുന്നുക്കു ബെത്ത് അഡിത്താര്. ആന ഗല്ല്യോനു ഇദ്‌ന ഗെരേഗാഗേ ഇല്ലെ. പവുലോസു സ്‌റിയ നാഡ്‌ല അന്തോക്ക്യ പട്ടണാക്ക് തിരിഗി പോന്റാന് 18 പവുലോസു എഞ്ചോ നാള് ഏസ്സ്‌ഗാറാരോഡ കൊരിന്ത്യാല് താനെ ഇന്താന്. പ്‌റസാരി പവുലോസു അവാര്‌ന ബിനാത്തി തള്ളി അദ്‌ലിന്ത് സ്‌റിയ നാഡ്‌ക്ക് കപ്പാല് ഏ്റ്‌നാന്. അഗിലാന്‌മ്, അയാള് പെ്ണ്ട് പ്‌റ്‌സ്‌ക്കില്ലാമ് പവുലോസോഡ ഇന്താര്. പവുലോസു കപ്പാല് ഏ്റുവാദ്‌ക്ക് മുദാല് താന് സാമിക്ക് ഗേവെ എന്റ് സൊല്ലിന്ത ബാക്ക്‌ന ഗേന്ത് തീത്താദ്‌നാലെ അയാള് കെമ്‌കെ്റേല് ബെത്ത് തലേന മൊട്ടി കെരേത്താന്. 19 അവാര് എപസോസു പട്ടണാക്ക് എജ്ജ്‌ന പ്‌റ പവുലോസു അദ്‌ല എഗുദാര് പരേസുവ ബീ്ഡ്‌ക്ക് പോയി എഗുദാരോഡ ബാദിത്താന്. 20 എഗുദാര് പരേസുവ ബീ്ഡ്‌ല ആള്‌ഗാള് ലേസ നാള് ഗുഡി ഇര്‌ക്ക്യ പവുലോസുക്കു സൊല്ലി ഗുഡി പവുലോസു തങ്കാലെ. 21 ആന അദ്‌ലിന്ത് പോവ ഗളിഗേല് പവുലോസു അവാര്‌ക്ക് ഇത്തെ സൊന്നാന്. <<സാമിക്ക് ബ്‌ഡ്യ ആസെ ഇന്തദാന നാന് തിരിഗി ബരുവെ>> എന്റ് സൊല്ലി അയാള് ബിനാത്തി തള്ളി അവാര് പട്ട്‌ലിന്ത് പ്‌റ്‌ന്ത് എപസോസു പട്ടണാത്ത്‌ലിന്ത് കപ്പാല് ഏ്റ്‌നാന്. അഗിലാന്‌നാമ് പ്‌റ്‌സ്‌ക്കില്ലനാമ് അദ്‌ക്ക് താനെ ബ്‌ട്ട്‌തള്ളി പോനാന്. 22 അയാള് കയിസര്യാല് ഇ്റാഗ്‌ന പ്‌റ എര്‌സലേമ് പട്ടണാക്ക് പോനാന്. അയാള് അദ്‌ല ഏസ്സ്‌ഗാറാര് കൂട്ടന കണ്ട് ബിനാത്ത്‌ന പ്‌റ അദ്‌ലിന്ത് അന്തോക്ക്യ പട്ടണാക്ക് പോനാന്. 23 അദ്‌ല് പവുലോസു ലേസ നാള് തങ്ക്‌നാന്. അദ്‌ലിന്ത് അയാള് ഗലാത്ത്യ, പുറുഗ്യ എന്നുവ എ്ഡെഗാള്‌മേലെ പോയി അദ്‌ല ഏസ്സ്‌ഗാറാര്‌ന ഒട്ടുക്കു ദയിരപഡ്‌സ്‌നാന്. അപ്പലോസു കൊരിന്ത്യാല്‌മ് എപസോസുലുമു 24 അലസാണ്ടറിയ ദേസാല് പ്‌റാന്ത അപ്പലോസു എന്നുവ എഗുദാര് ജാദിക്ക് പട്ട ഒരുത്താന് അയി ഗളിഗെ എപസോസുക്കു എജ്ജ്‌നാന്. അയാള് നല്ല ഒന്റു നായഗാറാന്‌മ്, സാമി സൊല്ലുസുലാക്കാന പറ്റി നല്ല അറുവു ഇര്‌ക്ക്‌ന്റവാന്‌മ് ആയിന്താന്. 25 അയാള് ആണ്ടവാന് പഡ്‌സ്‌നാദ്‌ന പറ്റി നലമായി പഡിത്തിന്താന്. ഏസ്സ്‌ന പറ്റി നേരാന കാര്യഗാള്‌ന അയാള് സുഡാരത്തോഡ സൊല്ലിമ് പഡിസിമ് ഗേന്താന്. ആന അയാള്‌ക്ക് നീര്‌ക്ക് മുളുഗുസുവാദ്‌ന പറ്റി തെരിന്തിന്താദ് ഓഗന്നാന് നീര്‌ക്ക് മുളുഗുസുനാദ്‌ന പറ്റി താനെത്തെ. 26 അയാള് എഗുദാര് പരേസുവ ബീ്ഡ്‌ക്ക്‌റാഗ ദയിരത്തോഡ സൊല്ല്യ പ്‌ഡിത്താന്. അഗിലാന്‌മ്, പ്‌റ്‌സ്‌ക്കില്ലാമ് അയാള്‌ന പറ്റി കേ്ട്ടാര്. അദുക്കുള അവാര് അയാള്‌ന തമ്മോഡ ബീ്ഡ്‌ക്ക് കൂട്ടി എ്ഡ്‌ത്ത് പോയി സാമി സൊല്ലി തരുവ ബുദ്ദിനായന പറ്റി ലേസ ഗുഡി തപ്പില്ലാദെ അയാള്‌ക്ക് സൊല്ലി കൊഡുത്താര്. 27 അപ്പലോസു അയി ഗളിഗെ അഗായാക്ക് പോയ മുഡിവാക്ക്‌നാന്. അദുക്കുള എപസോസു പട്ടണാത്ത്‌ല ഏസ്സ്‌ഗാറാര് അയാള്‌ക്ക് ഒന്റു എ്ള്‌ത്ത് എ്ള്‌ദി ഉദാവി ഗേന്താര്. അഗായ നാഡ്‌ല് ഏസ്സ്‌ന നമ്പ്‌നവാര് അപ്പലോസുന തങ്കാരിക്കുഡൊ എന്റ്‌ത്തെ അയി കത്ത്‌ല് എ്ള്‌ദി ബ്‌ട്ടാദ്. സാമിക്ക് ബേ്റ്‌വായിവെന്താദ്‌നാലെ ഏസ്സ്‌ന നമ്പ്‌നവാര്‌ക്ക് അപ്പലോസു അദ്‌ക്ക് പോനാദ് എത്ത്‌റാഗോ ഉവഗരാറ്റ്. 28 സാമി ബൊക്കുലു എ്ള്‌ദിര്‌ക്കുവാദ്‌ന സൊല്ലി കൊഡുത്തു കൊണ്ടു ഏസ്സ്‌ത്തെ ക്‌റ്‌സ്‌ത്ത് എന്റ് അയാള് കാട്ടി കൊഡുത്താന്. അത്തെ അയാള് എല്ലാ ആള്‌ഗാള്‌ക്ക് എദ്‌ക്ക സെരിക്ക്‌മ് തറ്‌ക്കി എഗുദാര്‌ന സോലുസുനാന്. |
New Life Computer Institute