അപ്പോസുത്തലാര് 17 - സാമി സേദിപവുലോസുമു സീലാസ്‌മ് തെസലോനിക്ക്യാല് 1 പവുലോസുമു സീലാസ്‌മ് അമ്പിപൊലിസ് പട്ടണമേലേമ് അപ്പൊലോന്യ പട്ടണമേലേമ് പോയി തെസലോനിക്ക്യ പട്ടണാക്ക് ബന്താര്. അദ്‌ല് എഗുദാര് പരേസുവ ബീ്ഡ് ഇന്ത്‌ദ്. 2 പവുലോസു ഒപ്പ ഗേവ പാസെ അദ്‌ക്ക് പോനാന്. സാമി ബൊക്കുന നോഡി മൂറു ഒയിവു നാള് എഗുദാരോഡ അയാള് ബാദിത്താന്. 3 ക്‌റ്‌സ്‌ത്ത് കജട്ട പഡുഡൊ എന്റ്‌മ് സാവുലിന്ത് ഉജുര്‌ളാഗുഡൊ എന്റ്‌മ് അവാര്‌ക്ക് സൊക്കാന സൊല്ലി കൊഡുത്താന്. <<നാന് നിമാക്ക് സൊല്ലുവ ഈ ഏസ്സ്‌ത്തെ ക്‌റ്‌സ്‌ത്ത്>> എന്റ്‌മ് പവുലോസു അവാര്‌ക്ക് കാട്ടി കൊഡുത്താന്. 4 പവുലോസുമ് സീലാസ്‌മ് സൊന്നാദ് നേരെന്റ് തെരിന്ത ലേസ എഗുദാര് പവുലോസാമ്‌ക്ക് എ്ണേന്താര്. അദേപാസെ താനെ ഇസ്‌റവേല് സാമിന കുമ്മുഡിന്ത എഞ്ചോ എവനഗാറാര്‌മ് ആള്‌ഗാള് മദിസിന്ത എഞ്ചോ പെ്ണ്ണ്‌മക്കാള്‌മ് അവാര്‌ക്ക് എ്ണേന്താര്. 5 ആന എഗുദാര്‌ക്ക് ഇദ് കണ്ണ്‌കഡി ആറ്റ്. അവാര് സന്തേക്ക്‌റാഗ ഇര്‌ക്കുവ കേ്ഡിഗാള്‌ന ബ്‌ളിത്ത് ബരിസ്സി ഒന്റു കൂട്ട ആള്‌ഗാള് മാഡ്‌നാര്. അവാര് പ്‌റ ആള്‌ഗാള്‌കുളാക്ക് കലമ്പാല് മാഡ്‌നാര്. പവുലോസുനാമ് സീലാസ്‌നാമ് പരാന്ത് ആള്‌ഗാള് പട്ട്‌ക്ക് എ്ഡ്‌ത്ത് ബര്യ ബേ്ണ്ടി അവാര് ആസെപട്ടാര്. അദ്‌ക്കായി അവാര് ആസോനു ബീ്ഡ് ബാസന പൊളിത്ത് ഉളാക്ക് നൊഗേന്താര്. 6 ആന അവാര്‌ന അദ്‌ല് കാണത്താദ്‌നാലെ ആസോനുനാമ് ബേ്റെ ലേസ ഏസ്സ്‌ഗാറാര്‌നാമ് മുജുവോഡ പ്‌ഡിത്ത് പട്ടണ തലെവാര്‌ഗാള് പട്ട്‌ക്ക് ഇ്ള്‌ത്തെ്ഡ്‌ത്ത് ബന്താര്. <<ഉലഗാന ഒട്ടുക്കു കലമ്പാല് മാഡ്‌ന്റവാര് ഈങ്ക്‌മ് ബന്ത്‌റ്‌ന്റാര്. 7 ആസോനു അവാര്‌ന തന്ന് ബീ്ഡ്‌കുളാക്ക് ഒളിസി ബെത്ത്‌റ്‌ന്റാന്. ഏസ്സ് എന്നുവ ബേ്റെ ഒന്റു രാജാവു ഇര്‌ന്റാന് എന്റ് സൊല്ലി, അവാരെല്ല റോമ നാഡ് രാജാവു സട്ടന തെ്റിന്ത് തള്ള്‌ന്റാര്>> എന്റ് ആലാത്ത് ക്‌ളാമ്പ്‌നാര്. 8 ഈ നായന കേ്ട്ട് ആള്‌ഗാള്‌മ് പട്ടണ തലെവാര്‌ഗാള്‌മ് സെര്യാന റെച്ചെ മാഡ്‌നാര്. 9 ഈ തലെവാര്‌ഗാള് ആസോനുനാമ് ഒപ്പ ഇന്തവാര്‌നാമ് ബ്‌ഡുവാദ്‌ക്കുള്ള പണ അവാര്‌ന താനെ കെ്ട്ട്യ സൊന്നാര്. അത്തെ പണ അഡേത്ത പ്‌റ അദിഗാരിഗാള് അവാര്‌ന ബെ്റ്‌ദെ ബ്‌ട്ടാര്. പവുലോസുമു സീലാസ്‌മ് ബെ്റോവ പട്ടണാത്ത്‌ല് 10 ജാമാഗാട്ടി അന്നാല് താനെ ഏസ്സ്‌ഗാറാര് പവുലോസുനാമ് സീലാസ്‌നാമ് ബെ്റോവ പട്ടണാക്ക് സൊല്ലി ബ്‌ട്ടാര്. അദ്‌ക്ക് എജ്ജ്‌ന പ്‌റ അവാര് എഗുദാര് പരേസുവ ബീ്ഡ്‌ക്ക് പോനാര്. 11 അദ്‌ലിന്തവാര് തെസലോനിക്ക്യലവാര്‌ന ബ്‌ഡ സൊല്ലുവാദ് എന്ത്‌നാമ് സൊക്കാന കേ്ള്‌ക്ക്യ മനേസ്സുള്ളവാര് ആയിന്താര്. പവുലോസു സൊല്ലുവാദ്‌ന കേ്ള്‌ക്ക്യാമ് അവാര്‌ക്ക് നല്ല ആസെ ഇന്ത്‌ദ്. അദല്ലാദെ പവുലോസു സൊന്നാദ് നേര്‌ത്തേഗ എന്റ് കാണ്യ അവാര് നാള്‌ക്ക്‌മ് സാമി ബൊക്കുല സൊല്ലു സുലാക്കഗാള്‌ന നലമായി പഡിത്ത് നോഡിന്താര്. 12 അത്തെ എഗുദാര്‌ല് എഞ്ചോ ആള്‌ഗാള് ഏസ്സ്‌ന നമ്പ്‌നവാര് ആനാര്. അദല്ലാദെ എഞ്ചോ ഗണ്ടാള്‌മ് മുഗാനിഗാള് ആയിന്ത എഞ്ചോ എവന നാഡ് പെ്ണ്ണ്‌മക്കാള്‌മ് ഏസ്സ്‌ന നമ്പ്‌നാര്. 13 ബെ്റോവ പട്ടണാല്‌മ് പവുലോസു സാമി സൊല്ലുസുലാക്കാന സൊന്നാനെന്റ് തെസലോനിക്ക്യാല എഗുദാര് കേ്ട്ടാര്. അദ്‌നാലെ അവാര് ആങ്ക്‌മ് പോയി ആള്‌ഗാള്‌ന ഗോളിസി കലമ്പാല് മാഡ്യ നോഡുനാര്. 14 സട്ടന അദ്‌ല ഏസ്സ്‌ഗാറാര് പവുലോസുന കഡാലോരാക്ക് സൊല്ലി ബ്‌ട്ടാര്. ആന സീലാസ്‌മ് തിമിത്തോസുമു ബെ്റോവ പട്ടണാത്ത്‌ല് താനെ ഇന്താര്. 15 പവുലോസുന കൂട്ടി പോനവാര് ആദാന്‌സ് പട്ടണ എന്നുവ എ്ഡെ മാട്ട്‌ക്ക് അയാളോഡ പോനാര്. പ്‌റസാരി അവാര് ബെ്റോവ പട്ടണാക്ക് തിരിഗി ബന്താര്. സീലാസ്‌മ് തിമിത്തോസുമു സട്ടന തന്ന് പട്ട്‌ക്ക് എജ്ജുഡൊ എന്റ് പവുലോസു അവാര് കയിക്ക് സൊല്ലി ബ്‌ട്ടാന്. പവുലോസു ആദാന്‌സ് പട്ടണാത്ത്‌ല് നായ സൊല്ലുന്റാന്. 16 സീലാസ്‌മ് തിമിത്തോസുമു ബര്യ ബേ്ണ്ടി പവുലോസു ആദാന്‌സ് പട്ടണാത്ത്‌ല് താനെ കാത്തിന്താന്. അയി പട്ടണാത്ത്‌ല് സെലെഗാള് തുമ്പിന്ത്‌ദ്. അദ്‌ന കണ്ട് അയാള് മനേസ്സ് അത്തേഗേ ബെന്ത്ഡിന്ത്‌ദ്. 17 അദ്‌നാലെ എഗുദാര് പരേസുവ ബീ്ഡ്‌ല് ബെത്ത് എഗുദാരോഡാമ്, സാമിന കുമ്മുഡി നഡാന്തിന്ത എഗുദാരല്ലാത്ത ജാദിഗാളോഡാമ് പവുലോസു നായ നൊഡിന്താന്. അദേപാസെ സന്തേക്ക്‌റാഗ ബന്ത് പോന്റവാര്‌ല് പവുലോസു സൊല്ലുവാദ്‌ന കേ്ള്‌ക്ക്‌ന്റവാരോഡാമ് പവുലോസു നാള്‌ക്ക്‌മ് നായ നൊഡിന്താന്. 18 എപ്പികൂര്യാര് എന്റ്‌മ് ഇസ്‌ത്തോയിഗാറാര് എന്റ്‌മ് സൊല്ലിന്ത ബാത്ത്യനാമ്‌ഗാള്‌ല് ലേസ ആള്‌ഗാള് പവുലോസോഡ തറ്‌ക്ക്‌നാര്. <<ഇയാള് സൊല്ലുവാദ് എന്തെന്റ് ഇയാള്‌ക്ക് താനെ തെരിവാദില്ലെ. ഇയാള് എന്ത്‌ന പറ്റി സൊല്ല്യ ഓരാഡ്‌ന്റാന്?>> എന്റ് അവാര്‌ല് ലേസ ആള്‌ഗാള് കേ്ട്ടാര്. ഏസ്സ്‌നാമ്, ഏസ്സ് ഉജുര്‌ളാഗുവാദ്‌നാമ് പറ്റിത്തെ അയാള് സൊന്റാന്. അദ്‌നാലെ <<അയാള് ബേ്റെ സാമിഗാള്‌ന പറ്റിത്തെ സൊന്റാനാര്‌ക്കൊ?>> എന്റ് അവാര്‌ല് ബേ്റെ ലേസ ആള്‌ഗാള് സൊന്നാര്. 19 അദ്‌നാലെ അവാര് പവുലോസുന കൂട്ട്യെ്ഡ്‌ത്ത് പട്ടണഗാറാര് കൂട്ട കൂഡുവ അര്യോവ ഗുഡ്ഡേക്ക് പോയി ഇത്തെ സൊന്നാര്, <<നീ സൊല്ലുവ ഈ പുദ്യ കാര്യന പറ്റി എമാക്ക് തെരിന്ത്‌റ്‌ക്കുഡൊ എന്റ് ആസെ ഇര്‌ക്ക്‌ന്റ്. 20 നീ സൊല്ലുവ ഈ കാര്യഗാള് എമ്മ ഇന്നാല്‌ത്തെ കേ്ള്‌ക്ക്‌ന്റേമ്. അദ്‌നാലെ അദ്‌ക്ക് ഇര്‌ക്കുവ അര്‌ത്ത എന്ത് എന്റ് തെരിന്തിരിക്ക്യ എമാക്ക് ആസെ ഇര്‌ക്ക്‌ന്റ്.>> 21 (ആദാന്‌സ്‌ഗാറാര്‌ക്ക്‌മ്, അയി പട്ടണാത്ത്‌ല് കുഡി ബന്തിന്ത ബേ്റെ നാഡ്‌ഗാറാര്‌ക്ക്‌മ് ഏദ്‌ഗളിഗേമ് പുദ്യ കാര്യഗാള് സൊല്ല്യാമ്, കേ്ള്‌ക്ക്യാമ്‌ത്തെ ആസെ ഇന്ത്‌ദ്.) 22 അര്യോവ ഗുഡ്ഡേല് കൂഡിന്ത കൂട്ടാക്ക് മുന്നുക്കു നിന്റിന്ത് പവുലോസു ഇത്തെ സൊന്നാന്, <<ആദാന്‌സ്‌ലവാരെ, നിമ്മ എഞ്ചോ സാമിഗാള്‌ന ഏദ് ദിന്‌സ്‌ല്‌മ് നലമായി കുമ്മുഡുന്റവാര് എന്റ് എനാക്ക് തെരിന്റ്. 23 നിമ്മ് പട്ടണമേലെ നഡാന്ത് പോഗാട്ടി നിമ്മ കുമ്മുഡി നഡാക്കുവ എ്ഡെഗാള്‌ന നാന് കണ്ടേന്. അദുക്കുള അദ്‌ല് നിമ്മ പലി കൊഡുക്കുവ മദ്‌ല്‌നാമ് അയി മദ്‌ല്‌ല് <ആര്‌ക്ക്‌മ് തെര്യാത്ത സാമി> എന്റ് എ്ള്‌ദി ബെത്ത്‌റ്‌ക്കുവാദ്‌നാമ് കണ്ടേന്. നിമാക്ക് ആര് എന്റ് തെര്യാദെ താനെ നിമ്മ കുമ്മുഡി നഡാക്കുവ അയി സാമിന പറ്റിത്തെ നാന് നിമാക്ക് സൊല്ലുവാദ്. 24 ലോഗനാമ് അദ്‌ല് ഇര്‌ക്കുവാദ്‌ന ഒട്ടുക്കുമു ഉണ്ടാക്ക്‌ന അയി സാമിത്തെ ബാന്‌നാമ് ബൂമിനാമ് ആളുവാദ്. അയാള് മന്‌സാന് കെ്ട്ട്‌ന കോയാല്‌ഗാള്‌ല് തങ്കുവാദില്ലെ. 25 ഉജുരുനാമ്, മൂസുനാമ്, ബേ്റെ എല്ലാദ്‌നാമ് മന്‌സാന്‌ക്ക് കൊഡുക്കുവാദ് ഈ സാമിത്തെ. അയാള്‌ക്ക് മന്‌സാര്‌ഗാള്‌ലിന്ത് ഒന്റു ഉദാവിമ് ബേ്ഡ. ബേ്ഡ്‌മാനാദെല്ല അയാള്‌ക്ക് ഇര്‌ക്ക്‌ന്റ്. 26 ബൂലോഗാത്ത്‌ല് ഒട്ടുക്കു ഇര്‌ക്ക്യ ബേ്ണ്ടി ഒരുത്താന്‌ലിന്ത് മന്‌സാന് ജാദിന ഒട്ടുക്കു സാമി ഉണ്ടാക്ക്‌നാന്. താന് അവാര്‌ന ഉണ്ടാക്കുവാദ്‌ക്ക് മുദാല് താനെ അവാര് എഞ്ച് കാല ഏദ്‌ലെല്ല പെ്ളേക്കുഡൊ എന്റ്‌മ് എല്ലെ ബെത്താന്. 27 സാമി അത്തെ ഗേന്താദ് അവാര് സാമിന എല്ലാ എ്ഡേല്‌മ് തപ്പി തഡാക്കി നോഡ്യാമ്‌മ് സാമിന പരാക്ക്യാമ്‌മ് ബേ്ണ്ടിത്തെ. അവാര് അത്തെ പരാന്തദാന ഒന്റു സമ്യ സാമിന കാണുവാര്. എന്റാല്‌മ് സാമി നമ്മ് പട്ട്‌ലിന്ത് ദൂരാത്ത്‌ലില്ലെ. 28 <ആന ആരൊ ഒന്റാള് ഇത്തെ സൊല്ലിര്‌ക്ക്‌ന്റാര് നമ്മ ഉണ്ടാനാദ്‌മ്, പെ്ളേക്കുവാദ്‌മ്, ആങ്കീങ്ക് പോവാദ്‌മ് ബരുവാദ്‌മ് സാമി സക്‌തിനാലെത്തെ.><നമ്മ അയാള് മക്കാള്‌ഗാള്‌ത്തെ> എന്റ് നിമ്മ് പാട്ട് എ്ള്‌ദ്‌ന്റവാര് സൊല്ലിര്‌ക്ക്‌ന്റാര്, 29 അത്തെ നമ്മ സാമി പ്‌ള്ളെഗാള് ആയിര്‌ക്കുവാദ്‌നാലെ സെലെഗാള് സാമി എന്റ് നമ്മ എന്നാല്‌ക്ക്‌മ് നെനേക്ക ബേ്ഡ. മന്‌സാന് തന്ന് കയിനാലേമ് ബുദ്ദിനാലേമ് പൊന്നുലുമു ബെ്ള്ളില്‌മ് കല്ല്‌ല്‌മ് ഉണ്ടാക്ക്‌നാദ്‌ത്തെ സെലെഗാള്. 30 മുന്തെ കാലാത്ത്‌ല് ആള്‌ഗാള്‌ക്ക് സാമിന തെര്യാദെ ഇന്ത്‌ദ്. അദ്‌ന സാമി കണാക്കാക്കുവാലെ. ആന ഇന്നാല് സാമി ഉലഗാത്ത്‌ല് ഇര്‌ക്കുവ ആള്‌ഗാള്‌ന ഒട്ടുക്കു തമ്മ ഗേവാദ് പാവ എന്റ് തെരിന്ത് അദ്‌നെല്ല തള്ളി സാമിസാരി ബരുഡൊ എന്റ് സാമി സൊന്റാന്. 31 ഉലഗാത്ത്‌ല് ഇര്‌ക്കുവ ആള്‌ഗാള്‌ന ഒട്ടുക്കു ബിദിക്ക്യ സാമി ഒന്റു നാള് ബെത്ത്‌റ്‌ന്റാന്. ആര്‌ക്ക്‌മ് കുറ്റ സൊല്ല്യ മുഡ്യാത്ത പാസെ ആയിര്‌ക്കു അയി ബിദി. അദ് താന് തെരിന്തെ്ഡ്‌ത്ത മന്‌സാന്‌ന ബെത്ത്‌ത്തെ നഡാത്തുവാന്. അയി മന്‌സാന്‌ന സത്തവാര്‌ലിന്ത് ഉജുര്‌ളാക്ക്‌നാദ്‌നാലെ സാമി അദുക്കുള്ള ഒറേപ്പ്‌മ് ആള്‌ഗാള്‌ക്ക് ഒട്ടുക്കു കൊഡുത്ത്‌റ്‌ന്റാന്.>> 32 സത്തവാര് ഉജുര്‌ളാഗുവാദ്‌ന പറ്റി അയാള് സൊന്നാദ്‌ന അവാര് കേ്ള്‌ക്കാട്ടി ലേസ ആള്‌ഗാള് പവുലോസുന നാണഗെ്ഡ്‌സ്‌നാര്. ആന ബേ്റെ ലേസ ആള്‌ഗാള്: <<ഈ കാര്യന പറ്റി ഇന്നിമ് നിന്ന് നായന കേ്ള്‌ക്ക്‌ന്റേമ്>> എന്റ് അയാള്‌ക്ക് സൊന്നാര്. 33 അത്തെ പവുലോസു അവാര് പട്ട്‌ലിന്ത് പോനാന്. 34 ലേസ ആള്‌ഗാള് പവുലോസോഡ എ്ണേന്ത് ഏസ്സ്‌ന നമ്പ്‌നവാര് ആനാര്. ഈ ഏസ്സ്‌ന നമ്പ്‌നവാര് കൂട്ടാത്ത്‌ല് ഡയോനോസുമു ഇന്താന്. അയാള് അര്യോവ കൂട്ട നഡാത്തുവ കൂട്ടാത്ത്‌ല ഒന്റാളായിന്താന്. ദമാരിസ് എന്നുവ പെ്ണ്ണ്‌പ്‌ളേമ്, ബേ്റെ ലേസ ആള്‌ഗാള്‌മ് ഗുഡി അയി ഏസ്സ്‌ന നമ്പ്‌നവാര് കൂട്ടാത്ത്‌ല് ഇന്താര്. |
New Life Computer Institute