അപ്പോസുത്തലാര് 11 - സാമി സേദിഎര്സലേമ്ല് ഇര്‌ക്കുവ ഏസ്സ്‌ഗാറാര് കൂട്ടാക്ക് പത്ത്‌റോസു സേദി സൊന്റാന് 1 എഗുദാരല്ലാത്ത ജാദിഗാള്‌ക്ക്‌മ് സാമി സൊല്ലുസുലാക്ക കെ്ഡേത്ത്‌ദ് എന്റ് അപ്പോസുത്തലാര്‌മ്, എഗുദാലിര്‌ക്കുവ ഏസ്സ്‌ഗാറാര്‌മ് കേ്ട്ടാര്. 2 പത്ത്‌റോസു എര്‌സലേമ്‌ക്ക് എജ്ജ്‌ഗാട്ടി പരിസേദനെ സാത്ത്‌റ ഗേവ എഗുദാര് അയാള്‌ന ഇത്തെ കുറ്റ സൊന്നാര്, 3 <<പരിസേദനെ സാത്ത്‌റ ഗേഗാത്ത ജാദിഗാള് പട്ട്‌ക്ക് നീ പോയി അവാരൊപ്പ തിന്റ്‌കുഡിത്ത് ഇന്ത് ബന്താദ് എന്ത്‌ക്ക്?>> എന്റ് അവാര് അയാള്‌ന കേ്ട്ടാര്. 4 നഡാന്താദ് എന്ത് എന്റ് പത്ത്‌റോസു അവാര്‌ക്ക് ഒന്റൊന്റായി സൊക്കാന സൊന്നാന്: 5 <<നാന് ഓപ്പ പട്ടണാത്ത്‌ല് പരേസികൊണ്ടു ഇര്‌ക്കാട്ടി എനാക്ക് ഒന്റു തോറ്റ കാട്ട്‌റ്റ്. അയി തോറ്റാത്ത്‌ല് എത്ത്‌റാഗോ ദൊഡ്ഡ ദുപ്പുട്ടിന പാസെ എന്തോ ജാദിന അദ്‌ക്കിര്‌ക്കുവ നാക്ക് താനെനാമ് കെ്ട്ടി ബാന്‌ലിന്ത് അഡി എന്ന് പട്ട്‌ക്ക് ഇ്റാക്കി ബ്ഡുവാദ്‌ന നാന് കണ്ടേന്. ദൊഡ്ഡ ഒന്റു ദുപ്പുട്ടിന പാസെ ഇന്ത അയി ജാദി എന്ന് പട്ട്‌ക്ക് ബന്ത്‌ദ്. 6 നാന് അദ്‌ന സൊക്കാന നോഡുഗാട്ടി അദ്‌ല് ബൂമിലിര്‌ക്കുവ മന്‌സാന് സാക്കുവ ബേ്ണ്ട്‌ഗാള്‌നാമ്, സോലെ ബേ്ണ്ട്‌ഗാള്‌നാമ്, ഊരുന്ത് നഡാക്കുവ ഉജുരുകെ്ളെഗാള്‌നാമ്, ബാന്‌ല പക്കിഗാള്‌നാമ് കണ്ടേന്. 7 അദുക്കുള <പത്ത്‌റോസെ, ഇ്ളാഗി കൊന്റു തിന്ന്> എന്റ് എനാക്ക് സൊല്ലുവ ഒന്റു ജദ്ദന നാന് കേ്ട്ടേന്. 8 ആന നാന് സൊന്നെ, <ആണ്ടവാനെ, എന്നാല്‌ക്ക്‌മ് നാന് ഇദ്‌ന തിന്നാഗേ മാട്ടെ. തിന്ന്യ അയിത്ത്യുള്ളാദ്‌നാമ് തിന്ന ബേ്ഡ എന്റ് സട്ട ബെത്ത്‌റ്‌ക്കുവാദ്‌നാമ് നാന് എന്നാല്‌മ് എന്ന് ബായിക്ക് അണ്ട്‌സാഗെ ഇല്ലെ.> 9 <സാമി നല്ലാദ് മാഡ്‌നാദ്‌ന നീ അയിത്ത്യ എന്റ് നെനേക്കാദെ> എന്റ് പിന്നേമ് അയി ജദ്ദ ബാന്‌ല് ഇന്ത് കേ്ട്ടെ. 10 ഇത്തെ മൂറു ജമ്പ് ജദ്ദ ആറ്റ്. അദ്‌ക്ക് പ്‌റ അദെല്ല ബാന്‌ക്ക് താനെ തിരിക്കി എ്ഡ്‌ത്ത്‌ദ്. 11 അയി സമ്യാല് താനെ കയിസര്യാല് ഇന്ത് സൊല്ലി ബ്‌ട്ട മൂറു ആള് എമ്മ ഇന്ത ബീ്ഡ്‌ക്ക് മുന്നുക്കു എജ്ജ്‌നാര്. 12 സന്തേഗപഡാദെ അവാരോഡൊപ്പ പോയ സാമിനിഗാല് എനാക്ക് സൊല്ലുറ്റു. ഓപ്പാല ഈ ഏസ്സ്‌ഗാറാര് ആറാള്‌മ് എന്നോഡ കയിസര്യാക്ക് ബന്താര്. കൊറ്‌ന്നല്ലോസു ബീ്ഡ്‌ക്ക്‌ത്തെ എമ്മ പോനാദ്. 13 ഒന്റു സാമിദൂദാന് തന്ന് ബീ്ഡ്‌ല് നിന്റ് ഇര്‌ക്കുവാദ്‌ന അയാള് കണ്ടാന് എന്റ് എമാക്ക് സൊന്നാന്. <ഓപ്പാക്ക് ആള് ബ്‌ട്ട് സീമോനു എന്റ് സൊല്ലുവ പത്ത്‌റോസുന ബരുസ്സുഡൊ എന്റ്‌മ്, 14 നിനാനാമ്, നിന്ന് ബീ്ഡ്‌ഗാറാര്‌നാമ് കാപാറ്റുവാദ്‌ക്കുള്ള നായഗാള്‌ന അയാള് നിനാക്ക് സൊല്ലുവാന്> എന്റ് ദൂദാന് തനാക്ക് സൊന്നാന് എന്റ്‌മ് എമാക്ക് സൊന്നാന്. 15 നാന് നായനൊഡ്യ പ്‌ഡിക്കാട്ട്യെല്ല മുദാല് നമാക്ക് ഏ്റ്‌ന പാസെ സാമിനിഗാല് അവാര്‌ക്ക്‌മ് ഏ്റ്‌റ്റ്. 16 അദുക്കുള നാന്: <ഓഗന്നാന് ആള്‌ഗാള്‌ന നീര്‌ല് മുളുഗുസുനാന്. ആന നിമാന സാമിനിഗാല്‌ല് മുളുഗുസുവാന്> എന്റ് ആണ്ടവാന് സൊന്നാദ്‌ന നെനേത്തെ. 17 ആണ്ടവാന് ഏസ്സ് ക്‌റ്‌സ്‌ത്ത്‌ന നമ്പ്‌ഗാട്ടി നമാക്ക് തന്ത അയി ദാനന താനെത്തെ സാമി അവാര്‌ക്ക്‌മ് കൊഡുത്താദ്. അദ്‌നാലെ, സാമിന തഡ്‌ക്ക്യ നാന് ആര്?>> എന്റ് സൊന്നാന്. 18 ഇദ്‌ന കേ്ട്ട പ്‌റ അവാര് കുറ്റ സൊല്ലാലെ. <<പാവ ഗേവാദ്‌ന തെ്റിന്ത് തള്ളി നലമായി പെ്ളേക്ക്യ സാമി എഗുദാരല്ലാത്ത ജാദിഗാള്‌ക്ക്‌മ് ബാഗ്യ കൊഡുത്താനല്ല>> എന്റ് സൊല്ലി അവാര് സാമിന ഉജാത്തി സൊന്നാര്. അന്തോക്ക്യ എന്നുവ നാഡ്‌ല ഏസ്സ്‌ഗാറാര് കൂട്ടാര് 19 തെപാനോസു സത്ത പ്‌റ ബന്ത കൊഡിമെനാലെ ഏസ്സ്‌ഗാറാര് ജില്ലമ്പുല്ലാത്തായി തള്ള്‌നാര്. അവാര്‌ല് പഗ്‌ദ്യാള്‌ഗാള് പൊയിനിക്ക്യ, കുപ്പുറോസു, അന്തോക്ക്യ ദേസഗാള് ബരിദിക്ക് എജ്ജിന്താര്. അവാര് എഗുദാര്‌ക്ക് താനെത്തെ നല്ല സേദി സൊല്ലിന്താര്. 20 കുപ്പുറോസുഗാറാര്‌മ് കൊറേന നാഡ്‌ഗാറാര്‌മ് ആന ബേ്റെ ഏസ്സ്‌ഗാറാര് അന്തോക്ക്യാക്ക് പോയി എവനനായ നൊഡിവ ആള്‌ഗാള്‌ക്ക് ഏസ്സ്‌ന പറ്റി സൊല്ലുവ നല്ല സേദിന സൊന്നാര്. 21 ആണ്ടവാന് സക്‌തി അവാരോഡ ഇന്താദ്‌നാലെ മൊത്തന ആള്‌ഗാള് സാമിന നമ്പി ആണ്ടവാന് സാരി എ്ണേന്താര്. 22 ഈ സേദി എര്‌സലേമ്‌ല ഏസ്സ്‌ഗാറാര് കൂട്ട കേ്ട്ടാര്. അദുക്കുള അവാര് ബറ്‌ണവാസ്‌ന അന്തോക്ക്യാക്ക് സൊല്ലി ബ്‌ട്ടാര്. 23 അയാള് ആങ്ക് എജ്ജി സാമി അവാര്‌ക്ക് കൊഡുത്ത്‌റ്‌ക്കുവ ബരഗാള്‌ന കണ്ട് പിര്യപട്ടാന്. നിമാക്ക് ഏസ്സോഡ ഇര്‌ക്കുവ നമ്പിക്കെ എന്നാല്‌ക്ക്‌മ് കമ്മി ആഗാദെ ഇര്‌ക്കുഡൊ എന്റ്‌മ്, മനേസ്സാറ ആണ്ടവാന്‌ക്ക് ബേ്ണ്ടി പെ്ളേക്കുഡൊ എന്റ്‌മ് അയാള് അവാര്‌ക്ക് സൊന്നാന്. 24 അത്തെ എഞ്ചെഞ്ചോ ആള്‌ഗാള് ആണ്ടവാന് സാരി എ്ണേന്താര്. ബറ്‌ണവാസ് നല്ലവാന്‌മ്, നല്ല നമ്പിക്കെ ഇര്‌ന്റവാന്‌മ്, സാമിനിഗാല് ഇര്‌ക്ക്‌ന്റവാന്‌മ് ആയിന്താന്. 25 അദ്‌ക്ക് പ്‌റ ബറ്‌ണവാസ് സവുലുന പരാന്ത് തറ്‌സോസുക്കു പോനാന്. 26 അയാള്‌ന കണ്ടപ്‌റ ബറ്‌ണവാസ് അയാള്‌ന അന്തോക്ക്യാക്ക് കൂട്ടി എ്ഡ്‌ത്ത് പോനാന്. അവാര് റാഡാള്‌മ് ഒന്റു ബര്‌സ്സ പൂര അദ്‌ല ഏസ്സ്‌ഗാറാര് കൂട്ട പട്ട്‌ക്ക് പോയി എഞ്ചോ ആള്‌ഗാള്‌ന പഡ്‌സ്‌നാര്. അന്തോക്ക്യാല് ബെത്ത്‌ത്തെ മുദാല് ഏസ്സ്‌ഗാറാര്‌ന ക്‌റ്‌സ്‌താനിഗാള് എന്റ് ബ്‌ളിക്ക്യ പ്‌ഡിത്താദ്. 27 അയി കാലാത്ത്‌ല് എര്‌സലേമ്‌ലിന്ത് ലേസ സാമിദാസ്‌ഗാള് അന്തോക്ക്യാക്ക് എജ്ജ്‌നാര്. 28 അവാര്‌ല് അഗവോസു എന്റ് സൊല്ലുവ ഒന്റാള് ഉലഗാത്ത്‌ല് ഒട്ടുക്കു പഞ്ച പ്‌ഡിക്ക്‌മ് എന്റ് സാമിനിഗാല് സക്‌തില് സൊന്നാന് (ക്‌ളാവുദോസു എന്നുവ രാജാവു കാലാത്ത്‌ല് അയാള് സൊന്നാദ് നഡാന്ത്‌ദ്.) 29 എഗുദാല് ഇന്ത ഏസ്സ്‌ഗാറാര്‌ന കയിതാങ്ക്യ തമാക്ക് മുഡിന്തളാവുക്കു എന്തൊന്റു കൊഡുത്തു ബ്‌ഡ്യ അന്തോക്ക്യാല ഏസ്സ് സൊല്ലുപഡി നഡാക്ക്‌ന്റവാര് മുഡിവെ്ഡ്‌ത്താര്. 30 അവാര് അത്തെ ഗേന്ത് കെ്ഡേത്ത പണാന എഗുദാല് ഇര്‌ക്കുവ ഏസ്സ്‌ഗാറാര് കൂട്ടാത്ത്‌ല മൂപ്പനാമ്‌ഗാള്‌ക്ക് കൊഡുക്ക്യ ബറ്‌ണവാസ്‌ക്ക്‌മ് സവുലുക്കുമു കൊഡുത്തു ബ്‌ട്ടാര്. |
New Life Computer Institute