2 തിമിത്തോസു 4 - സാമി സേദി1 സാമി കേ്ട്ട്‌കൊണ്ട്‌റ്‌ക്കാട്ടി താനേമ് രാജാവായി ബന്ത് സത്തവാര്‌നാമ് ഉജുരു ഇര്‌ന്റവാര്‌നാമ് ദെ്ണ്ടണെ ബിദിക്കുവ ക്‌റ്‌സ്‌ത്ത് ഏസ്സ് കേ്ട്ട്‌കൊണ്ട്‌റ്‌ക്കാട്ടി താനേമ് നാന് നിനാക്ക് തരുവ കല്‌പനെ എന്തെന്റ് സൊന്ന, 2 ആള്‌ഗാള്‌ക്ക് സാമി സൊല്ലുസുലാക്കന സൊല്ലി കൊഡുക്കുഡൊ. ഏദ് നേരാമ് ആള്‌ഗാള്‌ക്ക് നീ സാമി സൊല്ലുസുലാക്കന സൊല്ലി കൊഡുക്ക്യ ഒരുക്കത്തോഡ ഇര്‌ക്കുഡൊ. നീ പഡ്‌സ്‌ഗാട്ടി മ്‌ഗ്‌ന്ത പൊറിമോഡ ആള്‌ഗാള് ഗേവ കുറ്റഗാള്‌ന കാട്ടി കൊഡുക്കുഡൊ, ആള്‌ഗാള്‌ന നൊഡിഡൊ, ആള്‌ഗാള്‌ന ദയിരാമ് പഡുസുഡൊ. 3 സത്ത്യന പഡിസി കൊഡുക്കുവാദ്‌ന ആള്‌ഗാള് കേ്ള്‌ക്കാത്ത കാല ബര്‌മ്. അദ്‌ക്ക് ബദ്‌ല അവാര് തമ്മ ആസെപഡുവ പാസെ തമാക്ക് കേ്ള്‌ക്ക്യ ഇമ്പത്തോഡിര്‌ക്കുവ കാര്യഗാള്‌ന പഡുസുവ ബാത്ത്യനാമ്‌ഗാള്ന കണ്ട് അവാര് പട്ട്‌ക്ക് പോയി അവാര് പഡുസുവ കാര്യഗാള്‌ന കേ്ള്‌ക്കുവാര്. 4 അത്തെ അവാര് സത്ത്യന പഡിസി കൊഡുക്കുവാദ്‌ന കേ്ള്‌ക്കാദെ നേരല്ലാത്ത കദെഗാള്‌ന കേ്ള്‌ക്ക്യ മൊഗേവാര്. 5 ആന നീ ഏദ്‌ഗളിഗേമ് സൂസാരിത്ത് നഡാക്കുഡൊ, എല്ലാ കജട്ടനാമ് താങ്കുഡൊ, നല്ല സേദിന സൊല്ലി കൊഡുക്കുഡൊ, സാമി നിനാക്ക് ഗേയ തന്ത്‌റ്‌ക്കുവ ഗിലാസനൊട്ടുക്കു നീ നലമായി ഗേഡൊ. 6 ഈ ഉലഗാത്ത്‌ല എന്ന് പെ്ളേപ്പ്‌മ് എനാക്ക് ഗേയ തന്ത ഗിലാസാമ് തീര്യ പോന്റു. നാന് സട്ടന താനെ സാവെ. 7 ഒരുത്താന് ജൂദുപ്‌ഡിത്ത് ഓഡുഗാട്ടി നലമായി ഓഡുവ പാസെ എനാക്ക് ഗേയ തന്ത കാര്യഗാള്‌നെല്ല സാമിക്ക് ബേ്ണ്ടി നാന് നലമായി ഗേന്തെ, ഇന്നി ഗേന്ത് മുഡിക്ക്യ ഒന്റുമില്ലെ. ഏസ്സോഡ എനാക്കിര്‌ക്കുവ നമ്പിക്കേന ബ്‌ഡാദിന്തെ. 8 നാന് സാമിക്ക് മെച്ച്‌പ്‌ഡിത്ത ദിന്‌സ്‌ല് പെ്ളേത്താദ്‌നാലെ കെ്ഡേക്കുവ ഗിര്യാഡന സാമി എനാക്ക് ബേ്ണ്ടി ബെത്ത്‌റ്‌ന്റാന്. ആള്‌ഗാള്‌ന നേരോഡ ദെ്ണ്ടണെ ബിദിക്കുവ ആണ്ടവാന് താന് ദെ്ണ്ടണെ ബിദിക്കുവ നാള്‌ക്ക് എനാക്ക് അയി ഗിര്യാഡന തരുവാന്. എനാക്ക് താനെ അല്ല ആണ്ടവാന് മറിസി ബരുവാദ്‌ന നെഞ്ചഡെബെത്ത് കാത്ത്‌റ്‌ക്ക്‌ന്റവാര്‌ക്ക് ഒട്ടുക്കുമു കൊഡുക്കുവാന്. തിമിത്തോസു പവുലോസുക്കു ഗേയ ഇര്‌ക്കുവ കാര്യഗാള് 9 എന്ന് പട്ട്‌ക്ക് സട്ടന ബര്യ നിന്നാവാദ് ഓരാഡ്. 10 ദേമാസ് ഈ ഉലഗാത്ത്‌ല് പെ്ളേക്കുവ ദിന്‌സ്‌ല് പെ്ളേക്ക്യ ബേ്ണ്ടി ആസെപട്ടിന്താന്. അദ്‌നാലെത്തെ അയാള് എനാന തള്ളി തെസലോനിക്ക്യാക്ക് പോനാദ്. ക്‌റേസ്‌കേസ് ഗലാത്ത്യാക്ക്‌മ് തീത്തോസു ദല്‌മാത്ത്യാക്ക്‌മ് പോനാന്. 11 ആന ഇന്നാല്‌മ് എന്നോഡ ഇര്‌ക്കുവാദ് ലൂക്കോസുത്തെ. അദ്‌നാലെ നാന് ഗേവ ഗിലാസാല് എനാന കയിതാങ്ക്യ മര്‌ക്കോസുനാമ് നീ ബര്‌ഗാട്ടി കൂട്ടി ബരുഡൊ. 12 തിഗിക്കോസുന നാന് എപസോസുക്കു സൊല്ലി ബ്‌ട്ട്‌റ്‌ക്ക്‌ന്റെ. 13 നീ ബര്‌ഗാട്ടി നാന് തോവാസ് പട്ടണാത്ത്‌ല് കറ്‌സ്‌പോസു എന്റവാന് പട്ട്‌ല് ബെത്തിന്ത പൊദേത്ത് നഡാക്കുവ എന്ന് സീലെന എ്ഡ്‌ത്ത് ബരുഡൊ. അദല്ലാദെ താനെ ബൊക്കുഗാള്‌നാമ്, മുക്ക്യമായി തോലുക്കു എ്ള്‌ദിര്‌ക്കുവ ബൊക്കുഗാള്‌നാമ് എ്ഡ്‌ത്ത് ബരുഡൊ. 14 അലസാണ്ടാര് എന്നുവ തട്ടാന് എനാക്ക് എഞ്ചോ ജമ്പ് തൊന്തറെ മാഡ്‌നാന്. അയാള് ഗേന്താദ്‌ക്ക് ആണ്ടവാന് അയാള്‌ന ദെ്ണ്ടിക്കുഡൊ. 15 അലസാണ്ടാര് നമ്മ സൊല്ലുവ നായാക്ക് മുട്ടി നോഡുന്റവാന് ആയിര്‌ക്കുവാദ്‌നാലെ അയാള്‌ന നീയിമ് സൂസാരിത്ത്‌റ്‌ക്കുഡൊ. 16 എനാന പറ്റി സൊന്ന കുറ്റഗാള്‌ക്ക് ബദ്‌ല് സൊല്ല്യ മുദാല് നാന് കോഡിദി മുന്നുക്കു നില്ല്‌ഗാട്ടി നാന് കുറ്റ ഗേഗാത്തവാന് എന്റ് സൊല്ല്യ എന്ന് സാരി ആര്‌മ് ഇര്‌ക്കാലെ. എല്ലാര്‌മ് എനാന കയിബ്‌ട്ടാര്. അദ്‌ക്ക് സാമി അവാര്‌ന ദെ്ണ്ടിക്കാദിര്‌ക്കുഡൊ. 17 ആന ആണ്ടവാന് എനാക്ക് തൊണെ ഇന്ത് എനാന ബില പഡിസി എന്ന് ഉജുരുക്കു ബന്ത ആവാത്ത്‌ലിന്ത് ആണ്ടവാന് എനാന കാപാറ്റ്‌നാന്. അദ്‌നാലെ എല്ലാ എഗുദാരല്ലാത്ത ജാദിഗാള്‌മ് കേ്ള്‌ക്കുവ ദിന്‌സ്‌ല് നല്ല സേദിന സൊക്കാന സൊന്നേന്. 18 എനാന കെ്ഡ്‌സുവ എല്ലാ കാര്യഗാള്‌ക്ക്‌മ് സിക്ക്‌സാദെ പാദ്‌ഗാപ്പോഡ സാമി ആള്യ പോവ നാഡ്‌ക്ക് ആണ്ടവാന് എത്തുസുവാന്. അയി ആണ്ടവാന്‌ക്ക് പേര്‌പെരിമെ എന്നാല്‌ക്ക്‌മ് ഇര്‌ക്കുഡൊ. ആമേന്. കഡേസി ബിനാത്ത 19 പ്‌റ്‌സ്‌ക്കില്ലനാമ് അക്കിലാവുനാമ് നാന് ബിനാത്ത്‌ന്റെ എന്റ് സൊല്ലുനു. അദേപാസെ ഒനേസിപൊറോസുനാമ് അയാള് ബീ്ഡ്‌ഗാറാര്‌നാമ് നാന് ബിനാത്ത്‌ന്റെ എന്റ് സൊല്ലുനു. 20 എരസ്‌തോസു കൊരിന്ത് പട്ടണാത്ത്‌ല് തങ്ക്‌നാന്. നോയായിന്താദ്‌നാലെ ത്‌റോപിമോസുന നാന് മിലേത്തോസുലു താനെ തള്ളി ബന്തേന്. 21 സളിഗളിഗേക്ക് മുദാല് എന്ന് പട്ട്‌ക്ക് ബര്യ മുഡിവ മാട്ട്‌ക്ക് ഓരാഡ്. ഉവുലോസു നിനാന ബിനാത്ത്‌ന്റാന്. അയാളല്ലാദെ താനെ പൂദോസുമു, ലീനോസുമു, ക്‌ളാവുദ്യാമ്, ബാക്ക്യുള്ള ഏസ്സ്‌ഗാറാര് ഒട്ടുക്കുമു നിനാന ബിനാത്ത്‌ന്റാര്. 22 ആണ്ടവാന് നിന്നോഡ ഇര്‌ക്കുഡൊ. സാമി നിമാക്ക് നല്ലാദ് ഗേഡൊ. |
New Life Computer Institute