2 തിമിത്തോസു 1 - സാമി സേദിപവുലോസു തിമിത്തോസുന ബിനാത്ത്‌ന്റാന് 1-2 എനാക്ക് മെച്ച്‌പ്‌ഡിത്ത മഗാനായിര്‌ക്കുവ തിമിത്തോസെ, ക്‌റ്‌സ്‌ത്ത് ഏസ്സോഡ ഒന്റായിര്‌ക്കുവാദ്‌നാലെ നമാക്ക് കെ്ഡേക്ക്‌മെന്റ് ബാക്ക് തന്ത്‌റ്‌ക്കുവ എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ന പറ്റി സൊല്ല്യ സാമി ആസെപഡി ക്‌റ്‌സ്‌ത്ത് ഏസ്സ് അപ്പോസുത്തലാന് ആയിര്‌ക്കുവ പവുലോസു എ്ള്‌ദുവാദ്. നമ്മ് അപ്പാന് സാമിമ് നമ്മ് ആണ്ടവാന് ക്‌റ്‌സ്‌ത്ത് ഏസ്സ്‌മ് നിനാക്ക് പ്‌ണ്ണ്യാമ് ഗേഡൊ, നിനാന ഗവാമ് പഡുഡൊ, നിനാന നിമ്മ്‌ദ്യായിമ് ബെക്കുഡൊ. നണ്ണിമ് ദയിരപഡുസുവാദ്‌മ് 3 എന്ന് പാട്ടനാമ് കുമ്മുഡി നഡാന്തിന്ത പാസെ <<നാന് കുറ്റഗാറാനല്ല>> എന്റ് സൊല്ലുവ മനേസ്സോഡ നാന്‌മ് കുമ്മുഡി നഡാക്കുവ സാമിക്ക് നണ്ണി സൊന്റെ. നാന് സന്തെറാവെ മൂട്ടില്ലാദെ പരേസ്‌ഗാട്ടി നിനാന നെനേത്ത്‌മ് നാന് സാമിക്ക് പരേസ്‌ന്റെ. 4 നീ കണ്ണനീര് സൂസുനാദ്‌ന നെനേക്കാട്ടി നിനാന ബന്ത് നോഡ്യ എനാക്ക് അറാക്കെ എ്ഡ്‌ക്ക്‌ന്റ്. അത്തെ ബന്ത് കണ്ടദാന എനാക്ക് ദ്‌ഡ്‌ക്കനാവു. 5 നിനാക്കിര്‌ക്കുവ നേര്‌മാന നമ്പിക്കേന നാന് നെനേക്ക്‌ന്റെ. അത്തവ നമ്പിക്കെ മുദാല് നിന്ന് അച്ചി ലോവീസ്‌ക്ക്‌മ് നിന്ന് അവ്വെ ഊനിക്ക്‌ക്ക്‌മ്‌ത്തെ ഇന്ത്‌ദെന്റ് എനാക്ക് തെരിമ്. അയി നമ്പിക്കെ നിനാക്ക്‌മ് ഇര്‌ക്ക്‌ന്റെന്റ് എനാക്ക് ഒറേപ്പിര്‌ക്ക്‌ന്റ്. 6 അദ്‌നാലെ നാന് നിന്ന് തലേക്ക് കയി ബെത്ത് പരേസ്‌ഗാട്ടി നിനാക്ക് കെ്ഡേത്ത ബരഗാള് ഇന്നാല്‌മ്‌ര്‌ക്ക്‌ന്റല്ല. കത്തുവ തീന സേത്തി സേത്തി കത്തുസുവ പാസെ അയി ബരഗാള്‌ന ബെത്ത് ഗേയ മുഡിവ കാര്യഗാള്‌നാമ് സേത്തി സേത്തി ഗേഡൊ. 7 നമാന അഞ്ചിക്കെ പ്‌ഡ്‌സി ഒന്റുമു ഗേയ ബ്‌ഡാദെ ബെക്കുവ നിഗാല്‌നല്ല സാമി നമാക്ക് തന്താദ്. മനേസ്സ്‌ക്ക് ദയിര തര്യാമ് അഡ്‌ത്തവാരോഡ സീവാന്‌ബെത്ത് നഡാക്ക്യാമ് കെ്ട്ട ആസെഗാള്‌ക്ക് ആളാഗാത്തവാനായി ഇര്‌ക്ക്യാമ് കയിതാങ്കുവ നിഗാല്‌നാത്തെ സാമി നമാക്ക് തന്താദ്. 8 അദ്‌നാലെ നമ്മ് ആണ്ടവാന് ഏസ്സ്‌ന പറ്റി ആള്‌ഗാള്‌ക്ക് സൊല്ല്യ നാണപഡാദെ. അയാള് പേര്‌ല് ജെയില്‌ല് ഇര്‌ക്കുവ എനാന പറ്റിമ് നാണപഡാദെ. നീയിമ് എന്നോഡ എ്ണേന്ത് സാമി തന്ത്‌റ്‌ക്കുവ ബിലാത്ത്‌ല് നല്ല സേദിക്ക് ബേ്ണ്ടി കജട്ട പഡുഡൊ. 9 സാമി നമാന കാപാറ്റിമിര്‌ന്റാന്, കവാഡില്ലാദെ പെ്ളേക്ക്യ ബേ്ണ്ടി ബ്‌ളിത്ത്‌മിര്‌ന്റാന്. നമ്മ സാമിക്ക് ബേ്ണ്ടി എന്താറ്റൊന്റു കാര്യഗാള് ഗേന്താദ്‌നാലെ അല്ല സാമി ഇത്തെ ഗേന്താദ്. സാമി ഇത്തെ ഗേഡൊ എന്റ് മുന്നുക്കെ മുഡിവാക്കിന്താദ്‌നാലേമ് സാമി നമാന അത്ത്‌റാക്ക്‌മ് ഗവപട്ട് ഇന്താദ്‌നാലേമ്‌ത്തെ ഇത്തെ ഗേന്താദ്. തനാക്ക് നമ്മോഡിര്‌ക്കുവ ഈ ഗവാന ഏസ്സ് ക്‌റ്‌സ്‌ത്ത്‌ന തന്ത് നമാക്ക് കാട്ടുഡൊ എന്റ് എല്ലാദ്‌നാമ് ദ്‌ട്ട്‌സുവാദ്‌ക്ക് മുദാല് താനെ സാമി മുഡിവാക്കിന്താന്. 10 ആന ഇന്നാല് നമാന കാപാറ്റുവ ക്‌റ്‌സ്‌ത്ത് ഏസ്സ് ബന്ത് ഇദ്‌ന നമാക്ക് ബെ്ളിപഡിസി തന്ത്‌റ്‌ക്ക്‌ന്റാന്. അയാള് സാവുക്കു ആള്‌മാഡുവ അദിഗരാന ഇല്ലാദെ മാഡിമ് നല്ല സേദിനാലെ എന്നാല്‌ക്ക്‌മ് ഇര്‌ക്കുവ പെ്ളേപ്പ്‌ന ബെ്ളിപഡിസിമ് തന്താന്. 11 അയി നല്ല സേദിന പറ്റി സൊല്ലി കൊഡുക്ക്യ ബേ്ണ്ടിത്തെ സാമി എനാന അപ്പോസുത്തലാന്‌മ് ബാത്ത്യാന്‌മ് ആയി എ്ഡ്‌ത്ത് ബെത്ത്‌റ്‌ക്കുവാദ്. 12 അദ്‌നാലെത്തെ നാന് ഇന്നാലീ കജട്ട പഡുവാദ്. എന്റാല്‌മ് അത്തെ കജട്ട പഡുവാദ്‌ല് നാന് നാണപഡുവാദില്ലെ. എന്ത്‌ക്കെന്റ് സൊന്ന നാന് ആര്‌ന നമ്പിര്‌ന്റേന് എന്റ് എനാക്ക് തെരിമ്. ആണ്ടവാന് തിരിഗി ബരമാട്ട്‌ക്ക്, എനാക്ക് ഒപ്പിസി തന്ത്‌റ്‌ക്കുവ ഈ കാര്യന പാദ്‌ഗാത്ത് ബെക്ക്യ അയാള്‌ക്ക് മുഡിമെന്റ് എനാക്ക് ഒറേപ്പിര്‌ക്ക്‌ന്റ്. 13 നീ എന്നോഡിന്ത് കേ്ട്ട നേരാന കാര്യഗാള്‌ന മനേസ്സ്‌ല് ബെത്ത് അദ്‌ക്ക് കെ്ട്ട്‌പട്ട് കൊണ്ടു ഒന്റൊന്റു കാര്യഗാള് ഗേഡൊ. നമ്മ ക്‌റ്‌സ്‌ത്ത് ഏസ്സോഡ ഒന്റായി ഇര്‌ക്കുവാദ്‌നാലെ ക്‌റ്‌സ്‌ത്ത്‌ന നമ്പി കൊണ്ടുമു അഡ്‌ത്തവാനോഡ സീവാന്‌ബെത്ത് കൊണ്ടുമു ബേ്ഡ്‌മ് ഈ കാര്യഗാള് ഗേയ. 14 സാമി നിനാക്ക് ഒപ്പിസി തന്ത്‌റ്‌ക്കുവ ഈ നേരാന കാര്യഗാള്‌ന നമ്മോഡിര്‌ക്കുവ സാമിനിഗാല് പാദ്‌ഗാപ്പ്‌ല് നീ സൂസാരിത്ത് ബെക്കുഡൊ. 15 ആസ്യ നാഡ്‌ല ഏസ്സ്‌ഗാറാര്‌ല് പല ആള്‌ഗാള് എനാന തെ്റിന്ത് പോനാര് എന്റ് നിനാക്ക് തെരിമല്ല. പുഗലോസുമു ഗെറ്‌മ്മൊഗനേസ്‌മ് അയി കൂട്ടാക്ക് പട്ടവാര്‌ത്തെ. 16 എനാന എ്ഡെക്കെ്ഡേക്ക് പല ദിന്‌സ്‌ല് കയിതാങ്ക്‌ന ഒനേസിപൊറോസുക്കുമു അയാള് ബീ്ഡ്‌ലവാര്‌ക്ക്‌മ് ആണ്ടവാന് നല്ലാദ് ഗേഡൊ. നാന് ജെയില്‌ല് ഇര്‌ന്റവാനെന്റ് സൊല്ലി അയാള് എനാന പറ്റി നാണപഡാലെ. 17 ആനാല്‌മ് അയാള് റോമ നാഡ്‌ക്ക് എജ്ജ്‌ന ഉഡനെ എനാന കാണമാട്ട്‌ക്ക് പരാന്ത്‌റ്‌ന്റാന്. 18 ആണ്ടവാന് തിരിഗി ബരുവ നാള് ഒനേസിപൊറോസുന ഗവ പഡുഡൊ എന്റ് നാന് പരേസ്‌ന്റെ. എപസോസുലു ബെത്ത് ഒനേസിപൊറോസു എത്തെല്ല എനാന കയിതാങ്ക്‌നാന് എന്റ്‌മ് നിനാക്ക് തെരിമല്ല. |
New Life Computer Institute