2 തെസെലോനിക്ക്യഗാറാര് 3 - സാമി സേദിഎമാക്ക് ബേ്ണ്ടി പരേസ്‌ന് 1 ഏസ്സ്‌ഗാറാരെ, കഡേസ്യായി നാന് സൊല്ലുവാദ് എന്തെന്റ് സൊന്ന: ആണ്ടവാന് സേദി നിമ്മ് പട്ട്‌ക്ക് എജ്ജ്‌ന പാസെ എല്ലാ സാരിമ് ബേഗ എജ്ജി എല്ലാ ആള്‌ഗാള്‌മ് അദ്‌ന മദ്‌പ്പോഡ തങ്കാരിക്ക്യ എമാക്ക് ബേ്ണ്ടിമ് പരേസ്‌ന്. 2 കെ്ട്ടവാര്‌മ് പോക്കിരിഗാള്‌മ് ആയിര്‌ക്ക്‌ന്റവാര് കയിലിന്ത് എമാന ബ്‌ഡിസ്യ ബേ്ണ്ടിമ് പരേസ്‌ന്. എന്ത്‌ക്കെന്റ് സൊന്ന എമ്മ സൊല്ലുവ ഈ സേദിന എല്ലാ ആള്‌ഗാള്‌മ് നമ്പുഡൊ എന്റില്ലെ. 3 ആന ആണ്ടവാന് നമ്പ്യ മുഡിന്റവാന്‌ത്തെ. അയാള് നിമാന ഒറേപ്പുള്ളവാര് മാഡി കെ്ട്ടവാന് കയിലിന്ത് നിമാന സൂസാരിത്ത് ബെക്കുവാന്. 4 എമ്മ നിമാക്ക് സൊന്ന പാസെത്തെ നിമ്മ ഗേന്റ്‌റ് എന്റ്‌മ് ഇന്നിമ് അദേപാസെത്തെ ഗേവുറു എന്റ്‌മ് ആണ്ടവാന് എമാക്ക് നിമാന പറ്റി ഒറേപ്പ് തന്റാന്. 5 സാമി സീവാന്‌ന പാസെ സീവാനിര്‌ക്കുവ മനേസ്സ്‌മ് ക്‌റ്‌സ്‌ത്ത് കൊഡിമേന പൊറിമോഡ താങ്ക്‌ന പാസെ കൊഡിമേന താങ്കുവ മനേസ്സ്‌മ് ആണ്ടവാന് നിമാക്ക് തര്‌ഡൊ. ഗിലാസ ഗേവ കഡാമെ 6 ഏസ്സ്‌ഗാറാരെ, എമ്മ പഡ്‌സ്‌ന സട്ടപഡി പെ്ളേക്കാദെ കള്ള ബ്‌ന്ത് നഡാക്ക്‌ന്റവാര് ആരാറ്റ നിമ്മ് കൂട്ടാത്ത്‌ല് ഇന്തദാന അയാളോഡ എജേഗാദെ ഇര്‌ക്കുഡൊ എന്റ് നമ്മ് ആണ്ടവാന് ഏസ്സ് ക്‌റ്‌സ്‌ത്ത് തന്ത അദിഗരാത്ത്‌ല് എമ്മ നിമാക്ക് കല്‌പനെ തന്റേമ്. 7 എമ്മ പെ്ളേത്ത് നഡാന്ത പാസെത്തെ നിമ്മാമ് പെ്ളേക്കുഡൊ എന്റ് നിമാക്ക് താനെ തെരിമല്ല. എമ്മ നിമ്മൊപ്പ ഇര്‌ക്കാട്ടി കള്ള ഇല്ലത്തവാര് ആയിന്തേമ്. 8 എമ്മ ബെ്റ്‌ദെ ഇന്ത് തീനി തിന്നാലെ. അദ്‌ക്ക് ബദ്‌ല നിമാക്ക് ആര്‌ക്ക്‌മ് എമ്മ ബാര ആഗാദിര്‌ക്ക്യ ബേ്ണ്ടി ഇ്റ്‌ട്ട്‌പഗാല് എമ്മ പാഡ്‌മ് പട്ടേമ്, കജട്ടാമ് പട്ടേമ്. 9 എമാന കയിതാങ്കുഡൊ എന്റ് നിമാക്ക് സൊല്ല്യ എമാക്ക് അദിഗര ഇര്‌ക്ക്‌ന്റ്. ആന എമ്മ പെ്ളേക്കുവാദ്‌ന കണ്ട് നിമ്മാമ് അദേപാസെ പെ്ളേക്ക്യ ബേ്ണ്ടിത്തെ എമാക്ക് ബേ്ണ്ടി എമ്മ താനെ പാഡ്‌പട്ടാദ്. 10 പാഡ്‌പഡാത്തവാന് തിന്ന ബേ്ഡ എന്റ് എമ്മ നിമ്മ് പട്ട്‌ല് ഇര്‌ക്കാട്ടി നിമാക്ക് സൊല്ലിര്‌ക്ക്‌ന്റേമല്ല. 11 പാഡ്‌പഡാദെ ഊരണ്ടവാന് കാര്യാക്ക് തലെ ഇക്കി കള്ള ബ്‌ന്ത് നഡാക്ക്‌ന്റവാര് ലേസ ആള്‌ഗാള് നിമ്മ് കൂട്ടാത്ത്‌ല് ഇര്‌ക്ക്‌ന്റാര് എന്റ് എമ്മ കേ്ട്ട് കൊണ്ട്‌റ്ക്ക്‌ന്റേമ്. 12 ഇത്തവാള്‌ഗാള് നേറെമൊറെ പാഡ്‌പട്ട് അവനവാന് തീനിക്കുള്ളാദ്‌ന സമ്പാരിക്കുഡൊ എന്റ് ആണ്ടവാന് ഏസ്സ് ക്‌റ്‌സ്‌ത്ത് തന്ത അദിഗരാത്ത്‌ല് എമ്മ കല്‌പനെ ബെത്ത് നിമാക്ക് ബുദ്ദി സൊന്റേമ്. 13 ഏസ്സ്‌ഗാറാരെ, നല്ല കാര്യഗാള് ഗേവാദ്‌ല് നിമ്മ സോറ്റു പോഗാദേന്. 14 ഈ എ്ള്‌ത്ത്‌ല് എമ്മ എ്ള്‌ദിര്‌ക്കുവ കാര്യഗാള്‌ക്ക് കെ്ട്ട്‌പട്ട് നഡാക്കാത്തവാനൊ നഡാക്കാത്തവാളൊ ഇന്തദാന അവാര് നാണഗെ്ഡ്യ ബേ്ണ്ടി നിമ്മ അവാര്‌ക്ക് എ്ണേഗാദെ അവാര്‌ന പ്‌റ്‌ത്ത് ബെയിന്. 15 ആനാല്‌മ് അയാള്‌ന പോട്ടിഗാറാനായി കാണാദെ അയാള് ഏസ്സ്‌ഗാറാന് ആനാദ്‌നാലെ അയാള്‌ക്ക് ബുദ്ദിനായഗാള് സൊല്ലി കൊഡുക്കുഡൊ. കഡേസി നായ 16 നിമ്മ്‌ദ്യായി പെ്ളേസുവ ആണ്ടവാന് താനെ ഏദ്‌ഗളിഗേമ് എല്ലാ ദിന്‌സ്‌ല്‌മ് നിമാന നിമ്മ്‌ദ്യായി പെ്ളേസുഡൊ. ആണ്ടവാന് നിമ്മ എല്ലാരോഡാമ് ഇര്‌ക്കുഡൊ. 17 പവുലോസു എന്റ് സൊല്ലുവ നാന് എന്ന് സൊന്ത കയില് താനെ ഈ ബിനാത്തുവ നായഗാള്‌ന എ്ള്‌ദ്‌ന്റെ, എ്ള്‌ത്ത്‌ഗാള് നാന്‌ത്തെ എ്ള്‌ദ്‌നെ എന്റ് കാട്ടുവാദ്‌ക്കുള്ള അഡ്യാള ഇദ്‌ത്തെ. ഇത്തേത്തെ നാന് എ്ള്‌ദുവാദ്. 18 നമ്മ് ആണ്ടവാന് ഏസ്സ് ക്‌റ്‌സ്‌ത്ത് നിമാക്കൊട്ടുക്കു പ്‌ണ്ണ്യ ഗേഡൊ. |
New Life Computer Institute