2 തെസെലോനിക്ക്യഗാറാര് 2 - സാമി സേദികേ്ഡ്ഗെ്ട്ടവാന് 1 ഏസ്സ്‌ഗാറാരെ, നമ്മ് ആണ്ടവാന് ഏസ്സ് ക്‌റ്‌സ്‌ത്ത് ബരുവാദ്‌ന പറ്റിമ് അയാളോഡ നമ്മ ഒന്റായി എ്ണേവാദ്‌ന പറ്റിമ് നിമാക്ക് സൊല്ല്യ ഇര്‌ക്കുവാദ് എന്തെന്റ് സൊന്ന: 2 ആണ്ടവാന് ബരുവ നാള് ബന്ത്‌റ്‌ന്റ് എന്റ് ഏദാറ്റ നിഗാല് സൊല്ലുറ്റു എന്റൊ, എമ്മ സൊന്നേമ് എന്റൊ, അല്ല പോന എമ്മ അത്തവ എ്ള്‌ത്ത് എ്ള്‌ദ്‌നേമ് എന്റൊ ആരാറ്റ സൊന്നദാന ദ്‌ഡീരന നിമ്മ് മനേസ്സ് പെ്ഡെപെ്ഡേക്കാമ് ബേ്ഡ, അന്തബ്‌ഡാമ് ബേ്ഡ. 3 ഇത്തെ ആര്‌നാമ് ഏദൊന്റു ദിന്‌സ്‌ല് നിമാന ഏമാത്ത്യ ബ്‌ഡാദേന്. മുദാല് ആള്‌ഗാള് സാമ്യോഡ പോട്ടിക്ക് നിന്റ് ബാദിക്ക്‌ന്റവാര് ആവാര്. അദോഡൊപ്പ നാസാക്ക് ബേ്ണ്ടി പ്‌റാന്തവാന്‌മ് കേ്ഡ്‌ഗെ്ട്ടവാന്‌മ് ബെ്ളിപട്ട് ബരുവാന്. 4 അയാള് സാമിബീ്ഡ്‌ല് കുക്കാന്ത് കൊണ്ടു താന്‌ത്തെ സാമി എന്റ് സൊല്ലി നഡിക്കുവാന്. അയാള് സാമിക്കൊ സാമി എന്നുവ പേര്‌ല് കുമ്മുഡുവ ജാദിഗാള്‌ക്കൊ ബ്‌ഡ തനാന താനെ ഉജാത്തുവ എദിരിത്തെ. 5 നാന് നിമ്മോഡൊപ്പ ഇര്‌ക്കാട്ടിതാനെ ഈ കാര്യഗാള്‌ന പറ്റി നിമാക്ക് സൊന്നാദ്‌ന നിമ്മ നെനേക്കുവാദില്ലേഗ? 6 അയാള് സമ്യ ആഗാത്ത മുദാല് ബരുവാദ്‌ന ഇന്നാല് തഡേന്ത്റ്‌ക്കുവാദ് എന്ത് എന്റ് നിമാക്ക് തെരിമ്. 7 സാമ്യോഡ പോട്ടിക്ക് നിന്റ് സൂഗാന ഗേവ പല കെ്ട്ട കാര്യഗാള്‌മ് സെയിത്താന് ഇന്നാല് താനെ ഉലഗാത്ത്‌ല് ഗേന്ത് കൊണ്ടു ഇര്‌ക്ക്‌ന്റാന്. ആന അയി കാര്യഗാള്‌ന തഡ്‌ക്ക്‌ന്റവാന് ബട്ടെന ബ്‌ട്ട് കൊഡുക്കുഡൊ. 8 അദുക്കുള അയി കേ്ഡ്‌ഗെ്ട്ടവാന് ബെ്ളിപഡുവാന്. ആണ്ടവാന് ഏസ്സ് മദ്‌പ്പുള്ള അദിഗരാത്ത്‌ല് ബര്‌ഗാട്ടി അയാള്‌ന അളിത്ത് അയാള് അദിഗരാന ഒന്റുമില്ലാദെ മാഡുവാന്. 9 സെയിത്താന് കൊഡുക്കുവ സക്‌തിനാലെ ഗേവ കാര്യഗാളോഡ അയി കേ്ഡ്‌ഗെ്ട്ടവാന് ബെ്ളിപഡുവാന്. അയാള് തന്ന് പൊയ്യാന സക്‌തില് അഡ്യാളഗാള്‌മ് അദിസ്യഗാള്‌മ് ഗേന്ത് കൊണ്ടു ആള്‌ഗാള്‌ന ബഞ്ചിക്കുവാന്. 10 അത്തെ സത്ത്യമാന സേദിന നമ്പി തപ്പിസി കഡാക്ക്യ മനേസ്സിര്‌ക്കാത്തവാര്ന അയാള് സദിത്ത് പല കെ്ട്ട കാര്യഗാള്‌മ് ഗേന്ത് ഏമാത്തുവാന്. 11 അദ്‌നാലെ സത്ത്യല്ലാത്താദ്‌ന അവാര് നമ്പ്യ ബേ്ണ്ടി അവാര്‌ക്ക് പൊയിന നമ്പുവ മനേസ്സ് സാമി കൊഡുക്കുവാന്. 12 അത്തെ സത്ത്യാന നമ്പാദെ പാവ ഗേവാദ്‌ല് പിര്യപട്ട് നഡാന്തവാര്‌ന ഒട്ടുക്കു സാമിക്ക് ദെ്ണ്ടിക്ക്യ മുഡിമ്. നിമാന കാപാറ്റ്യ ബേ്ണ്ടി തെരിന്തെ്ഡ്‌ത്ത്‌റ്‌ന്റാന് 13 ആണ്ടവാന് സീവാന്‌ബെത്ത് ഏസ്സ്‌ഗാറാര് ആയിര്‌ക്ക്‌ന്റവാരെ, സാമിനിഗാല് നിമാന കവാഡില്ലാത്തവാര് മാഡ്യ ബേ്ണ്ടിമ് നിമ്മ സത്ത്യന നമ്പി തപ്പിസി കഡാക്ക്യ ബേ്ണ്ടിമ്‌ത്തെ മുദാല് താനെ സാമി നിമാന തെരിന്തെ്ഡ്‌ത്ത്‌റ്‌ക്കുവാദ്. അദ്‌നാലെ നിമാക്ക് ബേ്ണ്ടി എമ്മ ഒപ്പ സാമിക്ക് നണ്ണി സൊന്റേമ്. 14 നിമാന കാപാറ്റി നമ്മ് ആണ്ടവാന് ഏസ്സ് ക്‌റ്‌സ്‌ത്ത് മദ്‌പ്പ്‌ക്ക് പങ്ക്‌ഗാറാര് ആയ ബേ്ണ്ടിത്തെ സാമി നിമാന ബ്‌ളിത്ത്‌റ്‌ക്കുവാദ്. അദ്‌ക്ക് ബേ്ണ്ടിത്തെ എമാന ബെത്ത് സാമി നിമാക്ക് ഈ നല്ല സേദിന സൊന്നാദ്. 15 അദ്‌നാലെ ഏസ്സ്‌ഗാറാരെ, എമ്മ നിമാക്ക് സൊല്ലി തന്ത കാര്യഗാള്‌നാമ് കത്ത്‌ല് എ്ള്‌ദി തന്ത കാര്യഗാള്‌നാമ് ബ്‌ഡാദെ അയി സൊല്ലുസുലാക്കഗാള്‌ല് ഒറേപ്പായി നില്ലുഡൊ. 16-17 നമാന സീവാന് പട്ടവാന്‌മ് നമാക്ക് പ്‌ണ്ണ്യ ഗേന്ത് നമാന ദയിരപഡ്‌സ്‌ന്റവാന്‌മ് നമാക്ക് ഏസ്സ് ക്‌റ്‌സ്‌ത്ത്‌ന കാത്ത്‌റ്‌ക്കുവാദ്‌ക്കുള്ള നല്ല നെഞ്ചഡെന തന്തവാന്‌മാന അപ്പാനാന സാമിമ്, നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌മ് നിമ്മ് മനേസ്സ്‌ന ദയിരപഡിസി എല്ലാ നല്ല കാര്യഗാള് ഗേയാമ് സൊല്ല്യാമ് നിമാന ഒറേപ്പുള്ളവാര് മാഡുഡൊ. |
New Life Computer Institute