2 പത്ത്‌റോസു 3 - സാമി സേദിആണ്ടവാന് ബരുവ നാള് ബന്റ് 1-2 എനാക്ക് മെച്ച്‌പ്‌ഡിത്തവാരെ, നാന് ഇന്നാല് നിമാക്ക് എ്ള്‌ദുവ റണ്ടാവാദ് എ്ള്‌ത്ത്‌ത്തെ ഇദ്‌. സാമിക്ക് പട്ട സാമിദാസ്‌ഗാള് എഞ്ചോ ബര്‌സ്സഗാള് മുന്നുക്കു സൊന്ന സൊല്ലു സുലാക്കഗാള്‌നാമ് നിമ്മ് പട്ട്‌ക്ക് ബന്ത അപ്പോസുത്തലാര്‌ന ബെത്ത് ആണ്ടവാന്‌മ് കാപാറ്റ്‌ന്റവാന്‌മ് ആയിര്‌ക്ക്‌ന്റവാന് സൊന്ന കല്‌പനെഗാള്‌നാമ് നിമ്മ നെനേക്ക്യ ബേ്ണ്ടി നാന് ഈ റാഡ് എ്ള്‌ത്ത്‌ന ബെത്ത് നിമ്മ് നേരുള്ള മനേസ്സ്‌ന ബോദ ബര്‌സ്സ്‌ന്റെ. 3 എല്ലാദ്‌ന ബ്‌ഡ മുക്ക്യമായി നിമ്മ ഒന്റു കാര്യ തെരിന്ത്‌റ്‌ക്കുഡൊ. അയി കാര്യ എന്തെന്റ് സൊന്ന, തമ്മ് പിര്യാക്ക് കെ്ട്ട കാര്യഗാള് ഗേന്ത് പെ്ളേത്ത് കൊണ്ടു നാണഗെ്ഡിസി നഡാക്ക്‌ന്റവാര് കഡേസി കാലാക്ക് ബരുവാര്. 4 അവാര് ബന്ത്: <<ഏസ്സ് തിരിഗി ബരുവാന് എന്റ് സൊന്ന ബാക്ക് ഏല് നഡാന്ത്‌ദ്? അച്ച്യച്ചനാമ് സത്ത പ്‌റ എല്ലാദ്‌മ് ആദില് ദ്‌ട്ട്‌സ്‌ഗാട്ടി എത്തെ ഇന്ത്‌ദൊ അദേപാസെ താനെത്തെ ഇന്നാല്‌മ് ഇര്‌ക്ക്‌ന്റ്>> എന്റ് സൊല്ലുവാര്. 5-7 ആന ബാന്‌മ് നീര്‌ലിന്ത്‌മ് നീര്‌ല് ഉണ്ടാന ബൂമിമ് മുദാല് സാമി സൊല്ലുസുലാക്കനാലെത്തെ ഉണ്ടാനാദ്. അത്തെ ഈ നീര്‌ല് താനെ സമ്‌ത്ത്‌റ പൊങ്കി അയി കാലാത്ത്‌ലിന്ത ഉലഗ അളിന്ത് തള്ള്‌ട്ട്. ഇന്നാല്‌ല ബാന്‌നാമ് ബൂമിനാമ് അദേ സാമി സൊല്ലുസുലാക്കാന ബെത്ത് തീക്കിക്ക്യ ബേ്ണ്ടി ഒരിക്കി ബെത്ത്‌റ്‌ക്ക്‌ന്റാന്. സാമിക്ക് അഞ്ചാത്ത ആള്‌ഗാള്‌ന ബിദിക്ക്യാമ് അളിക്ക്യാമ് ബെത്ത്‌റ്‌ക്കുവ നാള്‌ക്ക് ബേ്ണ്ടി ഈ ബൂമിനാമ് ബാന്‌നാമ് സൂസാരിത്ത് ബെത്ത്‌റ്‌ന്റാന്. ഈ കാര്യഗാള്‌നെല്ല അവാര് മനേസ്സാറ മറാന്ത് തള്ള്‌ന്റാര്. 8 ആന എനാക്ക് മെച്ച്‌പ്‌ഡിത്തവാരെ, ആണ്ടവാന്‌ക്ക് ഒന്റു നാള് ആയിര ബര്‌സ്സാന പാസേമ് ആയിര ബര്‌സ്സ ഒന്റു നാള്‌ന പാസേമ് ഇര്‌ക്ക്‌ന്റ് എന്നുവ കാര്യന നിമ്മ മറാക്കദേന്. 9 ആണ്ടവാന് ബാക്ക് തന്താദ്‌ന നഡാത്ത്യ ആണ്ടവാന് ഗളിഗെ മാഡ്‌ന്റാന് എന്റ് ലേസ ആള്‌ഗാള് നെനേക്കുവ പാസെ ആണ്ടവാന് അദ്‌ന നഡാത്ത്യ ഗളിഗെ മാഡുവാദില്ലെ. ആര്‌മ് കെ്ട്ട് പോഗാദെ എല്ലാ ആള്‌ഗാള്‌മ് പാവ ഗേവാദ്‌ന തള്ളി സാമിസാരി തിര്‌ഗുഡൊ എന്റ് നെനേക്കുവാദ്‌നാലെ ആണ്ടവാന് നിമാക്ക് ബേ്ണ്ടി സിവനേന്റ് പൊറുത്ത്‌റ്‌ന്റാന്. 10 ആണ്ടവാന് തിരിഗി ബരുവ നാള് ഒന്റു ത്‌റ്‌ട്ടാന് ബരുവ നാള് പാസെ ബര്‌മ്. അയി നാള്‌ക്ക് ബാന് ദൊഡ്ഡ ജദ്ദോഡ കാണദ്യായി തള്ള്‌മ്. ബാന്‌ലിര്‌ക്കുവ ജാദിഗാള് ഒട്ടുക്കു തീ ബെന്ത് ഉരുഗി പോമു. അദേപാസെ ബൂമിമ് അദ്‌ലിര്‌ക്കുവാദ് ഒട്ടുക്കുമു ബെന്ത് അളിന്ത് തള്ള്‌മ്. 11 അത്തെ ഇദൊട്ടുക്കു അളിന്ത് പോയ ഇര്‌ക്കുവാദ്‌നാലെ നിമ്മ എത്ത്‌റ കുറ്റ സൊല്ല്യ മുഡ്യാത്ത ദിന്‌സ്‌ല് പെ്ളേക്ക്‌ന്റവാര്‌മ് ബക്‌ത്യോഡ പെ്ളേക്ക്‌ന്റവാര്‌മ് ആയിര്‌ക്കുഡൊ? 12 സാമി ബരുവ നാള്‌ക്ക് ബേ്ണ്ടി നിമ്മ കാത്ത് കൊണ്ടുമു അയി നാള് സട്ടന ബര്യ ബേ്ണ്ടി നിമ്മ ഗേവ കാര്യ നലമായിമ് ഗേഡൊ. എന്ത്‌ക്കെന്റ് സൊന്ന അയി നാള് ബര്‌ഗാട്ടി ബാന് തീയില് ബെന്ത് പോഗാട്ടി അദ്‌ലിര്‌ക്കുവാദെല്ല ഒട്ടുക്കു ബെന്ത് ഉരിഗി പോമു. 13 ആന അയാള് ബാക്ക് തന്ത്‌റ്‌ക്കുവ പാസെ നേര്‌മെ ഇര്‌ക്കുവ പുദ്യ ബാന്‌ക്ക്‌മ് പുദ്യ ബൂമിക്ക്‌മ് നമ്മ കാത്ത്‌റ്‌ക്ക്‌ന്റാമ്. 14 അദ്‌നാലെ എനാക്ക് മെച്ച്‌പ്‌ഡിത്തവാരെ, നിമ്മ ഇദ്‌ക്ക് ബേ്ണ്ടി കാത്ത്‌റ്‌ക്കുവാദ്‌നാലെ സാമി കണ്ണ്‌ക്ക് പാവ ഗേഗാത്തവാരായിമ് അഡ്‌ത്തവാര് കുറ്റ സൊല്ലാത്ത ദിന്‌സ്‌ല് പെ്ളേക്ക്‌ന്റവാരായിമ് സാമ്യോഡിര്‌ക്കുവ ഉറാവുല് നിമ്മ്‌ദ്യുള്ളവാര് ആയിര്‌ക്ക്യാമ് നിമ്മ നിമ്മാവാദ് ഓരാഡ്‌ന്. 15 അദ്‌താനേമല്ല, നമ്മ് ആണ്ടവാന് മ്‌ഗ്‌ന്ത പൊറിമോഡ ഇര്‌ക്കുവാദ് ആള്‌ഗാള് തപ്പിസി കഡാക്ക്യ ബേ്ണ്ടിത്തെ എന്നുവ കാര്യന നെനേന്. ഇദ്‌ന താനെത്തെ നമാക്ക് മെച്ച്‌പ്‌ഡിത്തവാന്‌മ് ഏസ്സ്‌ഗാറാന്‌മ് ആയിര്‌ക്കുവ പവുലോസുമ് സാമി തനാക്ക് കൊഡുത്ത അറുവുക്കു തഗ്‌ന്ത പാസെ നിമാക്ക് എ്ള്‌ദിര്‌ക്കുവാദ്. 16 ഇത്തവ കാര്യഗാള്‌ന പറ്റി പവുലോസു താന് എ്ള്‌ദ്‌ന എല്ലാ എ്ള്‌ത്ത്‌ഗാള്‌ല് സൊല്ലിര്‌ക്ക്‌ന്റാന്. അയി എ്ള്‌ത്ത്‌ഗാള്‌ല് നെപ്പ്‌കെ്ഡേസ്യ മുഡ്യാത്ത പല കാര്യഗാള്‌മ് ഇര്‌ക്ക്‌ന്റ്. പഡിപ്പില്ലത്തവാര്‌മ് നമ്പിക്കേല് ഒറേപ്പില്ലത്തവാര്‌മ് സാമി സൊല്ലുലസുലാക്കാത്ത്‌ല് ബേ്റെ സുലാക്കഗാള്‌ന തപ്പായി പഡുസുവ പാസെ അവാര്‌ക്ക് നാസ ബര്യ ബേ്ണ്ടി ഇദ്‌നാമ് അവാര് തപ്പായി പഡ്‌സ്‌ന്റാര്. 17 അദ്‌നാലെ എനാക്ക് മെച്ച്‌പ്‌ഡിത്തവാരെ, ഈ കാര്യന മുദാല് താനെ തെരിന്ത്‌റ്‌ക്കുവാദ്‌നാലെ തപ്പായി പഡ്‌സ്‌ന്റവാര് ബഞ്ചണേക്ക് സിക്കി നിമ്മ് ഒറേപ്പുള്ള നമ്പിക്കേലിന്ത് ബിലാഗി പോഗാദിര്‌ക്ക്യ നിമ്മ സൂസാരിത്തിര്‌ന്. 18 അദോഡൊപ്പ നമ്മ് ആണ്ടവാന്‌മ് കാപാറ്റ്‌ന്റവാന്‌മ് ആയിര്‌ക്കുവ ഏസ്സ് ക്‌റ്‌സ്‌ത്ത്‌ന പറ്റ്യുള്ള അറുവുലുമു അയാള് ഗേവ പ്‌ണ്ണ്യാത്ത്‌ല്‌മ് നിമ്മ പെ്ളേക്ക്‌ന്റവാരാന്. ഇന്നാല്‌ല കാലാത്ത്‌ല്‌മ് ഇന്നി ബരുവ കാലാത്ത്‌ല്‌മ് അയാള്‌ക്ക് മദ്‌പ്പുണ്ടാഡൊ. ആമേന്. |
New Life Computer Institute