2 പത്ത്‌റോസു 2 - സാമി സേദിഉറുട്ടു സൊല്ലുവ സാമിദാസ്‌ഗാള് 1 മുന്തെല കാലാത്ത്‌ല് സാമി സൊന്റെന്റ് സൊല്ലി ഉറുട്ടു സൊല്ലുവ സാമിദാസ്‌ഗാള്‌മ് ഇസ്‌റവേല്‌ഗാറാര് പട്ട്‌ല് ഇന്താര്. അദേപാസെ ഉറുട്ടു സൊല്ലി പഡ്‌സ്‌ന്റവാര്‌ഗാള് നിമ്മ് പട്ട്‌ലിന്ത്‌മ് ഉണ്ടാവാര്. അവാര് സത്ത്യ അല്ലാത്ത കെ്ഡ്‌സുവ കാര്യഗാള്‌ന സൂഗാന പഡുസുവാര്. പാവാക്ക് സിക്കിന്ത തമാന തിരിക്കി എ്ഡ്‌ത്ത പണ്ണാഡിന തള്ളി തമ്മ ബേഗ അളിന്ത് പോവാദ്‌ക്കുള്ള ബട്ടെ അവാര് താനെ മാഡ്‌ന്റാര്. 2 പല ആള്‌ഗാള് അവാര് ഗേവ കെ്ട്ട കാര്യഗാള്‌ന പാസെ ഗേവാര്. അവാര് അത്തെ ഗേവാദ്‌നാലെ സത്ത്യാക്ക് ബേ്ണ്ടി പെ്ളേക്കുവാദ്‌ന പറ്റി ബേ്റാള്‌ഗാള് മോസമായി സൊല്ലുവാര്. 3 അവാര് പണാക്ക് ബേ്ണ്ടി പേരാസെപട്ട്‌കൊണ്ടു ഇല്ലാത്ത കദെന നിമാക്ക് സൊല്ലി നിമാന ബെത്ത് അവാര് പണ സമ്പാരിക്കുവാര്. അവാര്‌ന ദെ്ണ്ടിക്കുവ ദെ്ണ്ടണെന മുന്നുക്കു താനെ സാമി മുഡിവു മാഡിര്‌ന്റാന്. അവാര്‌ക്ക് ബരുവ അളിവുക്കു ഗളിഗെ ആഗമാട്ട. 4 പാവ ഗേന്ത ദൂദനാമ്‌ന ബെ്റ്‌ദെ ബ്‌ഡാദെ സാമി അവാര്‌ന നരഗാക്ക് എ്റിന്ത് ബ്‌ട്ടാന്. ബിദിക്കുവ നാള് മാട്ട്‌ക്ക് പേ്ണ്‌സ്യ അവാര്‌ന ഇ്റ്‌ട്ട് എന്നുവ സങ്കിലിക്കി കെ്ട്ടി ബെത്ത്‌റ്‌ന്റാന്. 5 മുദാല് ഉലഗാത്ത്‌ല് സാമി സൊല്ലുപഡിക്ക് നഡാക്കാദിന്ത ആള്‌ഗാള്‌ന സാമി ബെ്റ്‌ദെ ബ്‌ഡാദെ സമ്‌ത്ത്‌റ പൊങ്കിസി അളിത്താന്. ആന സാമി നേര്‌മെന പറ്റി സൊല്ലി നഡാന്ത നോഗെനാമ് അയാളോഡൊപ്പ ബേ്റെ ഏ്ളാള്‌നാമ് കാപാറ്റ്‌നാന്. 6 അദ്‌താനേമല്ല സാമി സോദോമു എന്റ്‌മ് ഗൊമോറ എന്റ്‌മ് സൊല്ലുവ പട്ടണഗാള്‌ന ദെ്ണ്ടണെ ബിദിത്ത് സുട്ടു ബൂദി മാഡി ഇന്നി സാമിക്ക് അഞ്ചാദെ നഡാക്ക്‌ന്റവാര്‌ക്ക് എന്താമ് എന്റ് കാണ്യ അഡ്യാള മാഡി ബെത്ത്‌റ്‌ന്റാന്. 7 ആന അയി പട്ടണാത്ത്‌ലിന്ത ആള്‌ഗാള് കെ്ട്ടവാരായി സട്ടപഡി നഡാക്കാദെ കണ്ടപഡിക്ക് പെ്ളേക്കുവാദ്‌ന കണ്ട് ദുക്കപട്ട് നേര്‌മെഗാറാനായിന്ത ലോത്തുന സാമി കാപാറ്റ്‌നാന്. 8 അയി നേര്‌മെഗാറാന് കെ്ട്ടവാര് പട്ട്‌ല് പെ്ളേക്കാട്ടി അവാര് നാള്‌ക്ക്‌മ് ഗേവ കെ്ട്ട കാര്യഗാള്‌ന കണ്ട്‌മ് കേ്ട്ട്‌മ് നേര്‌മുള്ള മനേസ്സ്‌ല് അപ്പാര ദുക്കപട്ടാന്. 9 ഈ കാര്യഗാളെല്ല നമാക്ക് കാട്ടി തരുവാദ് എന്തെന്റ് സൊന്ന, സാമി ബക്‌തിഗാറാര്‌ന എത്തെ കജട്ടാത്ത്‌ലിന്ത് കാപാറ്റുഡൊ എന്റ്‌മ് കേ്ഡ്‌ഗെ്ട്ടവാര് ഇന്നാല് ദെ്ണ്ടണെ പട്ട്‌കൊണ്ടു ഇര്‌ക്കാട്ടിതാനെ കഡേസി നാള്‌ല ബിദിക്ക് അവാര്‌ന എത്തെ എ്ഡ്‌ത്ത് പോഡൊ എന്റ്‌മ് ആണ്ടവാനാന സാമിക്ക് തെരിന്റ്. 10 മുക്ക്യമായിമ് കാമാക്ക് കണ്ണില്ലാദെ കണ്ടപഡിക്ക് നഡാക്ക്‌ന്റവാര്‌മ് സാമിക്ക് ഇര്‌ക്കുവ അദിഗരാന ബെലേക്ക് എ്ഡ്‌ക്കത്തവാര്‌മ്‌ത്തെ അവാര്. ആര്‌ക്ക്മ് അഞ്ചത്തവാര്‌മ് തമ്മ് പിര്യാക്ക് പെ്ളേക്ക്‌ന്റവാര്‌മ് ആയിര്‌ക്കുവ ഇവാര് മേലോഗാത്ത്‌ല് മദ്‌പ്പിര്‌ക്ക്‌ന്റവാര്‌ന മോസമായി സൊല്ല്യ ഗുഡി അഞ്ചുവാദില്ലെ. 11 ദൂദാര്‌ഗാള് ഈ ഉറുട്ടു സൊല്ലി പഡ്‌സ്‌ന്റവാര്‌ന ബ്‌ഡ സക്‌തിമ് അദിഗരാമ് ഉള്ളവാര് ആയിന്ത് ഗുഡി ആണ്ടവാന് കണ്ണ്‌ക്ക് മേലോഗാത്ത്‌ല ദൂദാര്‌ഗാള്‌ന പറ്റി മോസമായി സൊല്ലുവാദില്ലെ. 12 ആന ഇവാര് തമാക്ക് തെര്യാത്ത കാര്യഗാള്‌ന പറ്റി ഗുഡി കുറ്റ സൊന്റാര്. അവാര് ബുദ്ദില്ലാത്ത ബേ്ണ്ട്‌ഗാള്‌ന പാസെത്തെ. അയി ബേ്ണ്ട്‌ഗാള് എന്ത് നെനേക്ക്‌ന്റൊ അദ്‌നാത്തെ അയി ബേ്ണ്ട്‌ഗാള് ഗേന്റ്. ഒന്റു ബേ്ണ്ട്‌ന പ്‌ഡിത്ത് എത്തെ കൊല്ലുന്റാമൊ അദേപാസെത്തെ സാമിമ് ഇവാര്‌ന അളിക്കുവാന്. 13 അവാര് അഡ്‌ത്തവാര്‌ക്ക് എന്ത് കൊഡിമെ ഗേന്താരൊ അദേ കൊഡിമെത്തെ അവാര്‌ക്ക്‌മ് ബര്‌മ്. പട്ടപഗാല് തിന്റ്‌കുഡിത്ത് മദിമറാന്ത് നഡാക്കുവാദ്‌ല് അവാര് പിര്യപൊങ്കുന്റാര്. അവാര് നിമ്മ് പട്ട്‌ല് നിമ്മ് പേര്‌ന കെ്ഡ്‌സ്‌ന്റവാര്‌മ് നിമാക്ക് മാനകേ്ഡ് മാഡ്‌ന്റവാര്‌മ്‌ത്തെ. അവാര് നിമ്മോഡ ബിര്‌ന്ത് തിന്ന്‌ഗാട്ടി അവാര്‌ക്കിര്‌ക്കുവ കെ്ട്ടെ്ണ്ണാത്ത്‌ല് അവാര് പിര്യപഡ്‌ന്റാര്. 14 അവാര് പെ്ണ്ണ്‌മക്കാള്‌ന കണ്ടദാന അവാരോഡ എ്ണേന്ത് ബേസ്യാഡി നഡാക്ക്യ ആസെപട്ട് നഡാക്ക്‌ന്റാര്. ഇത്തെ ഒപ്പ പാവ ഗേന്ത് നഡാക്കുവാദ് പറ്റ എന്റ് അവാര് പെ്ളേക്ക്‌ന്റാര്. ദൊഡ്ഡ നമ്പിക്കെ ഇല്ലാത്ത ആള്‌ഗാള്‌ന പാവ ഗേയ സിക്ക്‌സ്‌ന്റാര്. അവാര് ആസെപട്ട കാര്യ എത്തെ കെ്ഡേസുഡൊ എന്റ് അവാര് പഡിത്ത്‌ര്‌ന്റാര്. ഇത്തെ ഗേവാദ്‌നാലെ അവാര് സാമി സാപ്പാക്ക് സിക്കിര്‌ക്ക്‌ന്റാര്. 15 അവാര് നല്ലാദ്‌ക്ക് ബേ്ണ്ടി പെ്ളേക്കുവാദ്‌ന തള്ളി കെ്ട്ടാദ് ഗേന്ത് സമ്പാരിക്ക്യ ആസെപട്ട ബെയോരു മഗാന് ബിലെയാമ് പെ്ളേത്ത പാസെത്തെ ഇവാര് പെ്ളേക്ക്‌ന്റാര്. 16 ആന ബിലെയാമ് ഗേന്ത പാവാക്ക് തഗ്‌ന്ത നൊഡിസി അയാള്‌ക്ക് കെ്ഡേത്ത്‌ദ്. നായനൊഡ്യ മുഡ്യാത്ത കള്‌ദെ മന്‌സാന് നായാത്ത്‌ല് നായനൊഡിന്ത് അയി സാമിദാസ് ബുദ്ദില്ലാദെ ഗേവ കാര്യഗാള്‌ന നില്ല്‌സ്‌റ്റല്ല. 17 അവാര് നീരില്ലാത്ത കെ്ണേ്റ്‌ഗാള്‌ന പാസേമ് മുനി കാറ്റഡിക്കാട്ടി പോവ മഞ്ച് കുറുട്ടുഗാള്‌ന പാസേമ്‌ത്തെ. കണ്ണ്‌ന കുത്തുനാല് കാട്ടാത്ത ഇ്റ്‌ട്ട്‌ത്തെ സാമി അവാര്‌ക്ക് ബേ്ണ്ടി ഒരിക്കി ബെത്ത്‌റ്‌ക്കുവാദ്. 18 എന്ത്‌ക്കെന്റ് സൊന്ന, കാമാക്ക് കണ്ണില്ലാദെ പെ്ളേക്കുവാദ് പാവ അല്ല എന്നുവ അര്‌ത്തില്ലാത്ത പെരിമെനായഗാള്‌ന സൊല്ലി പാവ ഗേന്ത് പെ്ളേക്കുവ പെ്ളേപ്പ്‌ലിന്ത് കന്നപിന്ന തപ്പിസി കഡാന്തവാര്‌ന പിന്നേമ് അദേ പെ്ളേപ്പ്‌ക്ക് അവാര് സിക്ക്‌സ്‌ന്റാര്. 19 തമ്മ താനെഗേ കെ്ഡ്‌സുവ കാര്യഗാള്‌ക്ക് അഡിമെഗാളായിര്‌ക്കുവ ഇവാര് അഡ്‌ത്തവാര്‌മ് എത്തെ ബേ്ഡ്‌മാനാല് പെ്ളേക്ക്‌ല എന്റ് സൊന്റാര്. ഒരുത്താന് ഏദ് കാര്യാക്ക് അഡിമെ ആന്റാനൊ അദ്‌ത്തെ അയാള് പണ്ണാഡി. 20 നമ്മ് ആണ്ടവാന്‌മ് കാപാറ്റ്‌ന്റവാന്‌മ് ആയിര്‌ക്കുവ ഏസ്സ് ക്‌റ്‌സ്‌ത്ത്‌ന തെരിന്ത അറുവുന ബെത്ത് ഉലഗാത്ത്‌ല് ഗേവ കെ്ട്ട കാര്യഗാള്‌ലിന്ത് തപ്പിസി കഡാന്തവാര് പിന്നേമ് അയി കെ്ട്ട കാര്യഗാള് ഗേവാദ്‌ക്ക് സിക്കി അഡിമെപട്ട് പോന ഇന്ന്യുള്ള അവാര് പെ്ളേപ്പ് മുദാല്‌ല പെ്ളേപ്പ്‌ന ബ്‌ഡ അപ്പാര മോസായിര്‌ക്ക്‌മ്. 21 അവാര്‌ന നേര്‌മെഗാറാര് മാഡ്‌ന ബട്ടെന തെരിന്ത പ്‌റ തമാക്ക് ബേ്ണ്ടി ബെത്ത് കൊഡുത്ത ഈ സാമി കല്‌പനെ പഡി നഡാക്കുവാദ്‌ലിന്ത് പിന്ന്‌കാല് മെ്ട്ടുവാദ്‌ന ബ്‌ഡ അദ്‌ന തെര്യാദിന്ത്‌റ്‌ക്കുവാദ്‌ത്തെ അവാര്‌ക്ക് നല്ലാദായിന്ത്‌ദ്. 22 ആന നേര്‌മായിമ് മുന്തെലവാര് സൊല്ലുന പാസെ <<കക്കിന്ത് അദ്‌ന താനെ തിന്നുവ നായിമ്>><<നീരാഡ്‌ന പ്‌റ പിന്നേമ് പോയി സേ്റ്‌ക്ക് ഉമാങ്കുവ പന്റിമ്>> പാസെത്തെ അവാര്. |
New Life Computer Institute