2 കൊരിന്ത്യഗാറാര് 8 - സാമി സേദിമനേസ്സാറ കൊഡുക്കുവ ദറ്‌മ്മ 1 ഏസ്സ്‌ഗാറാരെ, മക്കെദോന്യാല് ഇര്‌ക്കുവ ഏസ്സ്‌ഗാറാര് കൂട്ടഗാള്‌ക്ക് സാമി ഗേന്ത പ്‌ണ്ണ്യന പറ്റി നിമാക്ക് സൊല്ല്യ നാന് ഇന്നാല് ആസെപഡ്‌ന്റെ. 2 മ്‌ഗ്‌ന്ത കൊഡിമെഗാള് ബന്ത് സോദണെ പട്ട ഈ ഏസ്സ്‌ഗാറാര് കൂട്ട ഏ്ളെഗാള് ആയിന്താര്. എന്റിന്ത് ഗുഡി അവാര് മനേസ്സാറ എഞ്ച്‌ക്കൊ ദറ്‌മ്മ കൊഡുക്ക്യ എത്ത്‌റാഗോ പിര്യ ഉള്ളവാര് ആയിന്താര്. 3 ആര്‌മ് സൊല്ലാദെ താനെ തമാക്ക് മുഡിന്തളാവുക്കുമു അദ്‌ക്ക് മീ്റിമ് അവാര് ദറ്‌മ്മ കൊഡുത്താര് എന്റ് എനാക്ക് താനെ തെരിമ്. 4 എഗുദ നാഡ്‌ല സാമിക്ക് പട്ടവാര്‌ക്ക് ദറ്‌മ്മ കൊഡുക്കുവ കാര്യാക്ക് തമാന പങ്ക്‌ഗാറാര് മാഡ്യ ബേ്ണ്ടി അവാര് എമാന ബേ്ണ്ടി കൊണ്ടു കേ്ട്ടാര്. 5 എമ്മ നെനേത്താദ്‌ക്ക്‌മ് അദിഗ അവാര് ദറ്‌മ്മ ഗേന്താര്. അവാര് മുദാല് തമാന താനെ ആണ്ടവാന്‌ക്ക് ഒപ്പുസുനാര്. പ്‌റ സാമി ആസെപഡി എമാക്ക്‌മ് തമാന ഒപ്പുസുനാര്. 6 അദ്‌നാലെ നിമ്മ കൊഡുക്ക്യ നെനേത്ത്‌റ്‌ക്കുവ ദറ്‌മ്മന സേത്തി മുഡിക്ക്യ എമ്മ തീത്തോസുക്കു സൊന്നേമ്. തീത്തോസുത്തെ ഈ കാര്യഗാള് ഗേയ പ്‌ഡിത്താദ്. 7 സാമ്യോഡ ബെത്ത്‌റ്‌ക്കുവ നമ്പിക്കെ, സാമി സേദിന സൊല്ലുവാദ്, സാമിന പറ്റ്യുള്ള അറുവു, എല്ലാ കാര്യഗാള്‌ന നോഡിനഡാത്തുവ സുറുസുറുപ്പുള്ള മനേസ്സ്, എമ്മോഡ ബെത്ത്‌റ്‌ക്കുവ സീവാന്, ഇത്തെ ഈ കാര്യഗാള്‌ലെല്ല നിമ്മ മ്‌ഗ്‌ന്തവാര് ആയിര്‌ക്കുവ പാസെ ദറ്‌മ്മ ഗേവ കാര്യാത്ത്‌ല്‌മ് നിമ്മ മ്‌ഗ്‌ന്തവാര് ആയിര്‌ന്. 8 നാന് നിമാക്ക് ദറ്‌മ്മ ഗേയ ബേ്ണ്ടി കല്‌പനെ ബെത്തല്ല ഇത്തെ സൊല്ലുവാദ്. ബേ്റെ ഏസ്സ്‌ഗാറാര് കൂട്ടഗാള് ദറ്‌മ്മ ഗേവ കാര്യാത്ത്‌ല് സുറുസുറുപ്പു കാട്ടുവ പാസെ നിമ്മ അഡ്‌ത്തവാരോഡ എത്ത്‌റ സീവാന്‌ബെത്ത് നഡാക്ക്‌ന്റ്‌റ് എന്റ് എനാക്ക് തെരിഡൊ. അദ്‌ക്ക് ബേ്ണ്ടിത്തെ നാന് ഇത്തെ സൊല്ലുവാദ്. 9 നമ്മ് ആണ്ടവാന് ഏസ്സ് ക്‌റ്‌സ്‌ത്ത് നമാക്ക് എത്ത്‌റ പ്‌ണ്ണ്യ ഗേന്താന് എന്റ് നിമാക്ക് തെരിമ്. ക്‌റ്‌സ്‌ത്ത് സൊത്തുഗാറാന് ആയിന്താന്. എന്റിന്ത് ഗുഡി നിമാന സൊത്തുഗാറാര് മാഡ്യ ബേ്ണ്ടി അയാള് ഏ്ളെ ആനാന്. 10 പോന ബര്‌സ്സ താനെ ദറ്‌മ്മ ഗേയ പ്‌ഡിത്ത കാര്യന ഇന്നാല് ഗേന്ത് മുഡിക്കുവാദ് നല്ലാദ് ആയിര്‌ക്ക്‌മ് എന്റ്‌ത്തെ നാന് സൊല്ലുവ നായ. എല്ലാ ഏസ്സ്‌ഗാറാര് കൂട്ടഗാള്‌ക്ക് മുദാല് ദറ്‌മ്മ ഗേയാമ് അത്തെ ഗേയ ആസെപട്ട് ബന്താദ്‌മ് നിമ്മാത്തെ. 11 അദ്‌നാലെ ഇന്നാല് ദറ്‌മ്മ സേത്ത്യ പ്‌ഡിത്താദ്‌ന സേത്തി മുഡിന്. അത്തെ നിമാക്ക് മുദാലെ ഇന്ത സുറുസുറുപ്പുക്കു തഗ്‌ന്ത പാസെ നിമ്മ കൊഡുനു. നിമാക്ക് മുഡിന്തളാവുക്കു കൊഡുനു. 12 നിമാക്ക് കൊഡുക്ക്യ മുഡിവാദ്‌ന നിമ്മ പിര്യപിര്യാത്തോഡ കൊഡുനു. അത്തെ കൊഡുത്തദാന സാമിക്ക് മെച്ച്‌പ്‌ഡിക്ക്‌മ്. 13 നിമാന ബുദ്ദിമുട്ടുസി കൊണ്ടു എഗുദാര് നാഡ്‌ല സാമിപ്‌ള്ളെഗാള്‌ക്ക് ദറ്‌മ്മ ഗേഡൊ എന്റല്ല, എല്ലാവാര്‌മ് ഒരേ സമ ഉള്ളവാര് ആയിര്‌ക്കുഡൊ എന്റ്‌ത്തെ നാന് ആസെപഡുവാദ്. 14 ഇന്നാല് നിമാക്ക് മൊത്തനാക്ക് ഇര്‌ക്കുവാദ്‌നാലെ അദ്‌ലിന്ത് അവാര്‌ക്ക് ബേ്ഡ്‌മാനാദ് കൊഡുത്തു കയി താങ്കുഡോമല്ല? നിമ്മ അത്തെ ഗേന്തദാന ഒന്റു സമ്യ നിമ്മ ഇല്ലത്തവാര് ആഗാട്ടി അവാര്‌ക്ക് നിമാന കയിതാങ്ക്യ മുഡിമ്. അത്തെ എല്ലാവാര്‌മ് ഒരേ സമ ഉള്ളവാര് ആല. 15 സാമി സൊല്ലുസുലാക്കാത്ത്‌ല്: <<മൊത്തനാക്ക് പൊറുക്കുനവാന്‌ക്ക് അളാവുക്കു മീ്റി കെ്ഡേക്കാലെ, മായതാനെ പൊറുക്കുനവാന്‌ക്ക് കൊറേവു ഒന്റുമു ഇര്‌ക്കാലെ>> എന്റ് സൊല്ലിര്‌ക്കുവ പാസെത്തെ. തീത്തോസുമു അയാളോഡ ഇര്‌ക്ക്‌ന്റവാര്‌മ് 16 നിമ്മ് കാര്യാത്ത്‌ല് എനാക്ക് ഇര്‌ക്കുവ അദേ സുറുസുറുപ്പുന തീത്തോസു മനേസ്സ്‌ക്ക്‌മ് കൊഡുത്ത സാമിക്ക് നാന് നണ്ണി സൊന്റെ. 17 എന്ത്‌ക്കെന്റ് സൊന്ന എമ്മ സൊന്നാദ്‌ക്ക് താനേമല്ല അയാള് നിമ്മ് പട്ട്‌ക്ക് ബരുവാദ്, നിമ്മ് കാര്യാത്ത്‌ല് അയാള്‌ക്ക് മ്‌ഗ്‌ന്ത സുറുസുറുപ്പു ഇര്‌ക്കുവാദ്‌നാലെ അയാള് തന്ന് പിര്യാക്ക് താനെ നിമ്മ് പട്ട്‌ക്ക് ബര്യ മുഡിവാക്ക്‌നാന്. 18 ഏസ്സ്‌ഗാറാനാന ഒന്റൊരുത്താന്‌ന എമ്മ തീത്തോസോഡ സൊല്ലി ബ്‌ഡ്‌ന്റേമ്. നല്ല സേദിന സൊല്ലി നഡാക്കുവ അയാള്‌ന എല്ലാ ഏസ്സ്‌ഗാറാര് കൂട്ടഗാള്‌മ് മദ്‌സ്‌ന്റാര്. 19 അദ്‌താനേമല്ല, എമ്മ ഈ ദറ്‌മ്മന എ്ഡ്‌ത്ത് പോഗാട്ടി എമ്മോഡൊപ്പ ബര്യ ഏസ്സ്‌ഗാറാര് കൂട്ട അയാള്‌ന തെരിന്തെ്ഡ്‌ത്ത്‌റ്‌ന്റാര്. എമ്മ എ്ഡ്‌ത്ത് പോവ ഈ ദറ്‌മ്മ ആണ്ടവാന്‌ന മദ്‌സുവാദ്‌മ് ദറ്‌മ്മ സേത്തുവ കാര്യാത്ത്‌ല് എമാക്ക് ഇര്‌ക്കുവ സുറുസുറുപ്പുള്ള മനേസ്സ്‌ന കാട്ടുവാദ്‌മ്‌ത്തെ. 20 എമ്മ ഇത്തെല്ല ഗേവാദ് എമ്മ ദറ്‌മ്മ സേത്തുവ കാര്യാത്ത്‌ല് ബേ്റെ ആര്‌മ് എമാന പറ്റി കുറ്റ സൊല്ലാദെ ഇര്‌ക്ക്യ ബേ്ണ്ടിത്തെ. 21 ആണ്ടവാന് കണ്ണ്‌ക്ക് താനേമല്ല, മന്‌സാന് കണ്ണ്‌ക്ക്‌മ് സെരി ആയിര്‌ക്കുവ കാര്യ ഗേഡൊ എന്നുവാദ്‌ത്തെ എമ്മ് ഓരാട്ട. 22 അദ്‌നാലെ അവാരോഡൊപ്പ ബേ്റൊന്റു ഏസ്സ്‌ഗാറാന്‌ന എമ്മ സൊല്ലി ബ്‌ഡ്‌ന്റേമ്. എമ്മ സോദണെ ഗേന്ത ഗളിഗേലെല്ല അയാള് സുറുസുറുപ്പുള്ളവാന് എന്റ് കാട്ടി തന്ത്‌റ്‌ന്റാന്. അദ്‌താനേമല്ല, നിമ്മ സേത്തുവ ഈ ദറ്‌മ്മ കാര്യാത്ത്‌ല് അയാള്‌ക്ക് നല്ല ഒറേപ്പുള്ളാദ്‌നാലെ അയാള്‌നാമ് ഇവാരോഡൊപ്പ സേത്തി ബ്‌ഡ്‌ന്റേമ്. 23 തീത്തോസുന പറ്റി സൊല്ല്യ പോന, നാന് നിമ്മ് പട്ട്‌ല് ഗിലാസ ഗേഗാട്ടി എന്നോഡൊപ്പ നഡാന്തവാന്‌മ് എന്നോഡ എ്ണേന്ത് ഗിലാസ ഗേന്തവാന്‌മ്‌ത്തെ. അയാളോഡ ബരുവ ഏസ്സ്‌ഗാറാര്, ഏസ്സ്‌ഗാറാര് കൂട്ട സൊല്ലി ബ്‌ട്ടവാര്‌മ് ക്‌റ്‌സ്‌ത്ത്‌ന മദ്‌സ്‌ന്റവാര്‌മ്‌ത്തെ. 24 അദ്‌നാലെ നിമാക്ക് ഇര്‌ക്കുവ സീവാന്‌ക്ക് തഗ്‌ന്ത പാസേമ് എമ്മ നിമാന പറ്റി പെരിമെപഡ്‌വ കാര്യഗാള്‌ക്ക് തഗ്‌ന്ത പാസേമ് ഈ ദറ്‌മ്മ സേത്തുവ കാര്യാത്ത്‌ല് നിമ്മ അവാര്‌ക്ക് കാട്ടി കൊഡുക്കുഡൊ. അത്തെ എല്ലാ ഏസ്സ്‌ഗാറാര് കൂട്ടഗാള്‌ക്ക്‌മ് എമ്മ നിമാന പറ്റി സൊല്ലുവാദ് നേര്‌ത്തെ എന്റ് തെരിമ്. |
New Life Computer Institute