2 കൊരിന്ത്യഗാറാര് 12 - സാമി സേദിപവുലോസുക്കു ബന്ത കജട്ടഗാള്‌മ് സാമി പ്‌ണ്ണ്യാമ് 1 അവനവാന്‌ന പറ്റി താനെ പെരിമെപഡുവാദ് ഉവഗര ഇല്ലെ. എന്റാല്‌മ് എനാക്ക് അത്തെ ഗേന്തെ തീരുഡൊ. ആണ്ടവാന് എനാക്ക് തന്ത തോറ്റഗാള്‌നാമ് കാട്ടി തന്ത കാര്യഗാള്‌നാമ് പറ്റി നാന് ഇന്നി സൊല്ല്യ പോന്റെ: 2 ക്‌റ്‌സ്‌ത്തോഡ ഒന്റായി ഇര്‌ക്കുവ ഒന്റു മന്‌സാന്‌ന പറ്റി എനാക്ക് തെരിമ്. അയാള്‌ന പദ്‌നാല് ബര്‌സ്സ മുന്നുക്കു മൂറാവാദ് സൊറുഗ മാട്ട്‌ക്ക് എ്ഡ്‌ത്ത് പോനാന്. സരിഗലത്തോഡഗൊ ഇന്നി സരിഗല ഇല്ലാദെത്തേഗൊ എ്ഡ്‌ത്ത് പോനാദ് എന്റ് എനാക്ക് തെര്യ. ആന സാമിക്ക് തെരിന്റ്. 3 ഈ മന്‌സാന്‌ന മൂറാവാദ് സൊറുഗ എന്റ് സൊല്ലുവ പറ്‌ദീസ മാട്ട്‌ക്ക് എ്ഡ്‌ത്താനെന്റ് എനാക്ക് തെരിമ്, സരിഗലത്തോഡഗൊ അല്ലദെഗൊ എന്റ് എനാക്ക് തെര്യ, ആന സാമിക്ക് തെരിന്റ്. 4 മന്‌സാന്‌ക്ക് സൊല്ലി ഗെലിസ്യ മുഡ്യാത്താദ്‌മ് നാവെ്ഡ്‌ത്ത് സൊല്ല്യ പാഡില്ലാത്താദ്‌മ് ആന കാര്യഗാള്‌ന അയാള് കേ്ട്ടാന്. 5 അയി മന്‌സാന്‌ന പറ്റി നാന് പെരിമെപഡുവെ. ആന എനാന പറ്റി നാന് ഒന്റുക്കുമു തഗ്‌ദില്ലാത്താവാന് എന്നുവ ദിന്‌സ്‌ല്‌ത്തെ പെരിമെപഡുവെ. 6 നാന് പെരിമെപട്ടാല്‌മ് നാന് ബുദ്ദിഗെ്ട്ടവാന് ആഗമാട്ടെ. എന്ത്‌ക്കെന്റ് സൊന്ന നാന് സൊല്ലുവാദ് സത്ത്യത്തെ. നാന് സൊല്ലുവാദ്‌ന കേ്ട്ട്‌മ് നാന് ഗേവാദ്‌ന കണ്ട്‌മ് അല്ലാദെ ആര്‌മ് എനാന പെരിമെപഡുഡൊ എന്റ് നാന് ആസെപഡുവാദില്ലെ. 7 എനാക്ക് ബന്ത അദിസ്യമാന തോറ്റഗാള്‌ന സൊല്ലി നാന് അദിഗ പെരിമെപഡാദിര്‌ക്ക്യ ബേ്ണ്ടി എന്ന് സരിഗലാത്ത്‌ല് ഒന്റു മുള്ളു കുത്തുവ പാസെ ഇര്‌ക്കുവ കജട്ടന നാന് പട്ട്‌കൊണ്ടു ഇര്‌ക്ക്‌ന്റെ. ഇദ് എനാന കജട്ടപഡിസ്യ ബെത്ത്‌റ്‌ക്കുവ സെയിത്താന് ദൂദാന്‌ത്തെ. 8 ഇദ് എനാന ബ്‌ട്ട് പോയ ബേ്ണ്ടി നാന് മൂറു ജമ്പ് ആണ്ടവാന്‌ന ബേ്ണ്ട്‌നെ. 9 ആന <<എന്ന് പ്‌ണ്ണ്യ നിനാക്ക് മദി, മുഡ്യാമാട്ട എന്റ് നീ സൊല്ലുവ ഗളിഗേക്ക് എന്ന് സക്‌തി തെഗേന്ത് ബന്റ്>> എന്റ്‌ത്തെ ആണ്ടവാന് എനാക്ക് സൊന്നാദ്. അദ്‌നാലെ എനാക്ക് ഇര്‌ക്കുവ കൊറേവുന പറ്റി അദിഗ പെരിമെപഡുവെ. എന്ത്‌ക്കെന്റ് സൊന്ന എന്ന് കൊറേവുനാലെ ക്‌റ്‌സ്‌ത്ത്‌ക്ക് അദിഗ സക്‌തി കാട്ട്യ മുഡിമ്. 10 അദ്‌നാലെ ക്‌റ്‌സ്‌ത്ത്‌ക്ക് ബേ്ണ്ടി കൊറേവുള്ളവാന് ആയിര്‌ക്ക്യാമ്, നാണഗെ്ഡ്യാമ്, കജട്ടപഡ്യാമ്, കൊഡിമെപഡ്യാമ്, ബുദ്ദിമുട്ടുപഡ്യാമ് നാന് പിര്യ ഉള്ളവാന്‌ത്തെ. എന്തെക്കെന്റ സൊന്ന കൊറേവു ഉള്ളവാന് ആയിര്‌ക്കാട്ടി താനെ ക്‌റ്‌സ്‌ത്ത് സക്‌തിനാലെ നാന് സക്‌ത്യുള്ളവാന്‌ത്തെ. പവുലോസു കൊരിന്ത്യഗാറാര്‌ന പറ്റി അര്‌ക്കപഡ്‌ന്റാന് 11 നിമ്മാത്തെ എനാന ഒന്റു ബുദ്ദിഗെ്ട്ടവാന്‌ന പാസെ ഗേയ ബെത്താദ്. നിമ്മ എനാന പെരിമെപട്ടിന്ത്‌റ്‌ക്കുഡൊ. എന്ത്‌ക്കെന്റ് സൊന്ന നാന് ഒന്റുമല്ലത്തവാന് ആനാല്‌മ് ദൊഡ്ഡുദൊഡ്ഡ അപ്പോസുത്തലാര് എന്റ് സൊല്ലുന്റവാര്‌ന ബ്‌ഡ നാന് സ്‌ന്നവാനല്ല. 12 നാന് നിമ്മ് പട്ട്‌ല് അഡ്യാളഗാള്‌മ് അദിസ്യഗാള്‌മ് ആന മ്‌ഗ്‌ന്ത കാര്യഗാള് ഗേന്ത്‌റ്‌ന്റെ. ഇദ് നാന് ഒന്റു അപ്പോസുത്തലാന് എന്നുവാദ്‌ക്ക് തെ്ള്‌വു തന്റല്ല? 13 നാന് നിമ്മോഡിന്ത് എന്ന് സിലാവുക്കു ബേ്ണ്ടി ബാങ്കി നിമാന ബുദ്ദിമുട്ടുസാലെ. ആന ബേ്റെ ഏസ്സ്‌ഗാറാര് കൂട്ടാത്ത്‌ലിന്ത് നാന് എന്ന് സിലാവുക്കുള്ളാദ് ബാങ്ക്‌നെ. അദല്ലാദെ നാന് ബേ്റെ എന്ത് കുറ്റ ഗേന്തെ? ഈ കുറ്റന പൊറുക്കുഡോമെ. 14 ഇദാ നോഡുനു, മൂറാവാദ്‌മ് നാന് നിമ്മ് പട്ട്‌ക്ക് ബര്യ ഒരിങ്കിര്‌ന്റെ. നിമാന നാന് ബുദ്ദിമുട്ടുസമാട്ടെ. നിമ്മോഡ ഇര്‌ക്കുവാദ് ഒന്റുമു എനാക്ക് ബേ്ഡ, നിമാനത്തെ എനാക്ക് ബേ്ഡ്‌മ്. അവ്വ്യപ്പാന്‌ക്ക് ബേ്ണ്ടി കൊഡുക്ക്യ സേത്തി ബെക്കുവാദ് മക്കാളല്ല. അവ്വ്യപ്പാന്‌ത്തെ മക്കാള്‌ഗാള്‌ക്ക് ബേ്ണ്ടി കൊഡുക്ക്യ സേത്തി ബെക്കുവാദ്. 15 നിമാന കയിതാങ്ക്യ ബേ്ണ്ടി നാന് എനാക്ക് ഇര്‌ക്കുവാദ്‌ന ഒട്ടുക്കുമു നാന് പിര്യപിര്യാത്ത് സിലാവു മാഡുവെ. അദ്‌താനേമല്ല നിമാന കയിതാങ്ക്യ ബേ്ണ്ടി നാന് എനാന താനേമ് പിര്യപിര്യാത്ത് ഒപ്പിസി തരുവെ. നാന് നിമാന അദിഗ സീവാന്‌പഡുവാദ്‌നാലെ നിമ്മ സെറ്റെന്റാല് എനാന സീവാന്‌പഡുവുറ? 16 നാന് നിമാന ബുദ്ദിമുട്ടുസാലെ എന്റ് നിമ്മ താനെ സമ്മദിക്ക്‌ന്റ്‌റ്. ആന ലേസ ആള്‌ഗാള് എനാന ഓസണെഗാറാന് എന്റ് നെനേത്ത് നിമാന മയാക്കി ഏമാത്ത്‌ന്റവാന് എന്റ് എനാന പറ്റി സൊന്റാര്. 17 നാന് നിമ്മ് പട്ട്‌ക്ക് സൊല്ലി ബ്‌ട്ടവാര്‌ന ബെത്ത് നിമാക്ക് ഇര്‌ക്കുവ എന്താറ്റന നാന് ഏമാത്തി എ്ഡ്‌ത്തേന? 18 നാന് തീത്തോസുന നിമ്മ് പട്ട്‌ക്ക് സൊല്ലി ബ്‌ട്ടെ. അയാളോഡ ബേ്റെ ഒന്റു ഏസ്സ്‌ഗാറാന്‌നാമ് സൊല്ലി ബ്‌ട്ടെ. തീത്തോസു നിമാക്ക് ഇര്‌ക്കുവ എന്തൊന്റുന ഏമാത്തി എ്ഡ്‌ത്താന? ഒന്റേ നെനേവുലുത്തെ എമ്മ റാഡാള്‌മ് ഗേന്റേമല്ല, ഒന്റേ താരേല്‌ത്തെ എമ്മ റാഡാള്‌മ് നഡാക്ക്‌ന്റേമല്ല? 19 എമ്മ ഇന്നാല്‌മ് എമാന നിമ്മ് കണ്ണ്‌ക്ക് കുറ്റ ഇല്ലത്തവാര് എന്റ് ബാദിക്ക്യ ബേ്ണ്ടി ഓരാഡ്‌ന്റേമ് എന്റ് നിമ്മ നെനേക്ക്‌ന്റ്‌റ? ഇല്ലെഗേ ഇല്ലെ. സാമി കണ്ണ്‌ക്ക് എമ്മ എത്തെ നായ നൊഡിഡൊ എന്റ് ക്‌റ്‌സ്‌ത്ത് ആസെപഡ്‌ന്റാനൊ അദേപാസെത്തെ എമ്മ നായനൊഡിവാദ്. എനാക്ക് മെച്ച്‌പ്‌ഡിത്ത എ്ണേവുഗാറാരെ, എമ്മ ഈ ഗേവാദെല്ല നിമ്മ് നമ്പിക്കേല് നിമാന ഒറേപ്പ് മാഡ്യത്തെ. 20 നാന് അദ്‌ക്ക് ബര്‌ഗാട്ടി നാന് ആസെപഡാത്ത ദിന്‌സ്‌ല് നിമാന കാണുവേന് എന്റ്‌മ് നിമ്മ ആസെപഡാത്ത ദിന്‌സ്‌ല് നിമ്മ എനാന കാണുവുറു എന്റ്‌മ് നാന് അഞ്ച്‌ന്റെ. ആങ്കീങ്ക് മല്ല്, കണ്ണ്‌കഡി, മുട്ടുമൊനെ, അവനവാന് കാര്യ താനെ നോഡുവാദ്, അഡ്‌ത്തവാര്‌ന നാണഗെ്ഡ്‌സുവാദ്, നൊണ്ടു സൊല്ലുവാദ്, ആര്‌ക്ക്‌മ് ഒദുങ്കാദെ ഇര്‌ക്കുവാദ്, കലമ്പാല് മാഡിര്‌ക്കുവാദ് എല്ലാ നിമ്മ് പട്ട്‌ല് ഇര്‌ക്കുമൊ എന്റ് നാന് അഞ്ച്‌ന്റെ. 21 എമ്മ ഈ ഗഡി ബര്‌ഗാട്ടി നിമ്മ് മുന്നുക്കു ബെത്ത് സാമി എനാന മാനഗെ്ഡ്‌സുവാനൊ എന്റ്‌മ് നാന് അഞ്ച്‌ന്റെ. കെ്ട്ട പെ്ളേപ്പ്, ബേസ്യാഡി നഡാക്കുവാദ്, കാമാക്ക് കണ്ണില്ലാദെ കണ്ടപഡിക്ക് നഡാക്കുവാദ്‌ഗാള്‌ക്കെല്ല സിക്കി സാമിസാരി തിര്‌ഗാദെ ഇര്‌ക്ക്‌ന്റവാര്‌ന പറ്റി ദുക്കപഡുവ ഗെദി ബരുമൊ എന്റ്‌മ് നാന് അഞ്ച്‌ന്റെ. |
New Life Computer Institute