1 തിമിത്തോസു 6 - സാമി സേദി1 സാമി പേര്‌ക്ക്‌മ് നമ്മ പഡിസി കൊഡുക്കുവ കാര്യഗാള്‌ക്ക്‌മ് മാനകേ്ഡ് ബരാദിര്‌ക്ക്യ ബേ്ണ്ടി പണ്ണ്യഗിലാസ ഗേവ ഏസ്സ്‌ഗാറാര് തമ്മ് പണ്ണാഡിഗാള്‌ന എല്ലാ കാര്യാത്ത്‌ല്‌മ് മദ്‌സുഡൊ. 2 ഏദാറ്റ പണ്ണ്യഗിലാസ ഗേവ ഏസ്സ്‌ഗാറാന്‌ക്ക് ഏസ്സ്‌ഗാറാനായിര്‌ക്കുവ പണ്ണാഡി ഇന്തദാന നമ്മെല്ല ഏസ്സ്‌ഗാറാര്‌ത്തെന്റ് സൊല്ലി പണ്ണാഡി സൊല്ലുപഡിക്ക് നഡാക്കാദിര്‌ക്കാദേന്. അദ്‌ക്ക് ബദ്‌ല താന് ഗിലാസ ഗേവാദ്‌ക്കുള്ള ഉവഗര ഏസ്സ്‌ഗാറാനായിര്‌ക്കുവ തന്ന് പണ്ണാഡിക്ക് കെ്ഡേക്കുവാദ്‌നാലേമ് അയി പണ്ണാഡി തനാക്ക് മെച്ച്‌പ്‌ഡിത്തവാന് ആയിര്‌ക്കുവാദ്‌നാലേമ് അയാള്‌ക്ക് ബേ്ണ്ടി നലമായി ഗിലാസ ഗേഡൊ. ഈ കാര്യഗാള്‌ന നീ അവാര്‌ക്ക് കണ്ടിപ്പായി പഡിസിമ് കൊഡുക്കുഡൊ, സൊല്ലിമ് കൊഡുക്കുഡൊ. പണാക്ക് ബേ്ണ്ടി ആസെപഡുവാദ് 3 നമ്മ് ആണ്ടവാന് ഏസ്സ് ക്‌റ്‌സ്‌ത്ത് സൊന്ന നേര്‌മാന നായാക്ക്‌മ് സാമി പിര്യാക്ക് പെ്ളേക്ക്യ സൊല്ലിര്‌ക്കുവ കാര്യഗാള്‌ക്ക്‌മ് എ്ണേഗാത്ത കാര്യഗാള്‌ന പഡ്‌സ്‌ന്റവാന്, 4 ഒന്റുമു തെര്യാത്തവാന്‌മ് താന്‌ത്തെ ദൊഡ്ഡവാനെന്റ് നെനേത്ത് നഡാക്ക്‌ന്റവാന്‌മ്‌ത്തെ. അയാള് തലേക്ക് സുഗ ഇല്ലത്തവാന്‌ന പാസെ ഒന്റൊന്റു നായഗാള്‌ന സൊല്ലി തറ്‌ക്കി നഡാക്ക്‌ന്റാന്. അദ്‌നാലെ കണ്ണ്‌കഡി, മല്ല്, ആഗാത്ത നായ സൊല്ലി മാനഗെ്ഡ്‌സുവാദ്, ഇല്ലാത്ത കാര്യന ഉണ്ടുമാഡുവാദ് എല്ലാ ബന്റ്. 5 അദോഡൊപ്പ നേര് എന്തെന്റ് തെര്യാത്തളാവുക്കു അവാര് മനേസ്സ് കെ്ട്ട് തള്ള്‌നാദ്‌നാലെ മൂട്ടുമുറില്ലാത്ത തറ്‌ക്കാമ് ബന്റ്. സാമിന പറ്റി പഡിസി നഡാക്കുവാദ് പണ സമ്പാരിക്കുവ ഒന്റു നല്ല ഗിലാസെന്റ് ഇവാര് നെനേക്ക്‌ന്റാര്. 6 ആന ഒന്റൊരുത്താന് തനാക്ക് ഇര്‌ക്കുവാദ് മദി എന്റ് നെനേത്ത് സാമി ആസെപഡുവ പാസെ പെ്ളേക്കുവാദ്‌ത്തെ നേര്‌മാന സൊത്തു. 7 എന്ത്‌ക്കെന്റ് സൊന്ന നമ്മ പ്‌റാക്കാട്ടി ഒന്റുമു എ്ഡ്‌ത്ത് ബരാലെ. സാഗാട്ടി നമാക്ക് ഒന്റുമു എ്ഡ്‌ത്ത് പോയ മുഡ്യാമ്‌മാട്ട. 8 അദ്‌നാലെ നമാക്ക് തിന്ന്യ തീനിമ് ഇക്ക്യ സീലെസിലാപ്പ്‌മ് ഇന്തദാന അദ് മദി എന്റ് നെനേക്കുഡൊ. 9 ആന പണഗാറാനായ ആസെപഡ്‌ന്റവാന് പാവ ഗേവാദ്‌ക്കുള്ള സോദിമേക്ക്‌മ് പല ദിന്‌സ്‌ല സദിക്ക്‌മ് സിക്കുവാന്. അയാള് ബുദ്ദില്ലാത്ത കാര്യഗാള്‌നാമ് നാസ മാഡുവ കാര്യഗാള്‌നാമ് ആസെപഡുവാദ്‌നാലെ അയാള് അഡിമുഡി അളിന്ത് പോവാന്. 10 പണാക്ക് ബേ്ണ്ടി ആസെപഡുവാദ്‌ത്തെ എല്ലാ ദിന്‌സ് കെ്ട്ടാദ് ബര്യ ബെക്കുവ ഒന്റേ ഒന്റു ബട്ടെ. ലേസ ആള്‌ഗാള് മൊത്തന പണാക്ക് ആസെപട്ട് സാമ്യോഡിര്‌ക്കുവ നമ്പിക്കേന ബ്‌ട്ട്‌തള്ളി തമാക്ക് താനെ പല ദിന്‌സ്‌ല കജട്ടഗാള്‌ന ബരിസ്സി ബെക്ക്‌ന്റാര്. തിമിത്തോസുക്കുള്ള ബുദ്ദിനായ 11 ആന നീ സാമിക്ക് പട്ടവാന് ആയിര്‌ക്കുവാദ്‌നാലെ ഈ കാര്യഗാളെല്ല ഒന്റുമു ഗേഗാദിര്‌ക്കുഡൊ. അദ്‌ക്ക് ബദ്‌ല സാമി ഗേയ സൊന്ന പാസെ കാര്യഗാള് ഗേഡൊ, സാമിക്ക് മെച്ച്‌പ്‌ഡിത്ത ദിന്‌സ്‌ല് പെ്ളേക്കുഡൊ, സാമിന മലെന പാസെ നമ്പി നഡാക്കുഡൊ, അഡ്‌ത്തവാരോഡ സീവാന്‌ബെത്ത് നഡാക്കുഡൊ, എല്ലാ കജട്ടഗാള്‌നാമ് പൊറിമോഡ താങ്കുഡൊ, അഡ്‌ത്തവാരോഡ നിദാനത്തോഡ നഡാന്ത്‌പ്‌ഡിത്ത് ഗേഡൊ. ഇദെല്ല നീ മ്‌ഗ്‌ന്ത സുറുസറുപ്പോഡ ഗേഡൊ. 12 ജുദ്ദ ഗേവ ഒന്റു പട്ടളഗാറാന് പിന്ന്‌കാല് മെ്ട്ടാദെ ജുദ്ദ ഗേവ പാസെ നിന്ന് നമ്പിക്കെ പോഗാദിര്‌ക്ക്യ ബേ്ണ്ടി നീ നിന്നാവാദ് ഓരാഡുഡൊ. എഞ്ചോ ആള്‌ഗാള് മുന്നുക്കു നീ ഏസ്സ്‌ന നമ്പ്‌ന്റായി എന്റ് സൊല്ലിര്‌ക്ക്‌ന്റായല്ല? അദ്‌നാലെ നീ എന്നാല്‌ക്ക്‌മ് ഇര്‌ക്കുവ സാഗാത്ത പെ്ളേപ്പ്‌ന കയി ബ്‌ഡാദെ സൂസാരിത്ത് ബെയി. ഈ പെ്ളേപ്പ് കെ്ഡേക്ക്യ ബേ്ണ്ടിത്തെ സാമി നിനാന ബ്‌ളിത്ത്‌റ്‌ക്കുവാദ്. 13 എല്ലാദ്‌ക്ക്‌മ് ഉജുരു കൊഡുക്കുവ സാമി കേ്ട്ട്‌കൊണ്ട്‌റ്‌ക്കാട്ടി താനേമ് പൊന്തിയോസു പീലത്തോസു മുന്നുക്കു താന് ആരെന്റ് ദയിരത്തോഡ സൊന്ന ക്‌റ്‌സ്‌ത്ത് ഏസ്സ് കേ്ട്ട്‌കൊണ്ട്‌റ്‌ക്കാട്ടി താനേമ് നാന് നിനാക്ക് സൊല്ലുവാദ് എന്തെന്റ് സൊന്നദാന, 14 നമ്മ് ആണ്ടവാന് ഏസ്സ് ക്‌റ്‌സ്‌ത്ത് മറിസി ബരുവ നാള് മാട്ട്‌ക്ക് ആര്‌മ് നിനാന പറ്റി കുറ്റകൊറേവു സൊല്ലാത്ത ദിന്‌സ്‌ല് നിനാക്ക് തന്ത്‌റ്‌ക്കുവ ഈ കല്‌പനെഗാള്‌ക്ക് കെ്ട്ട്‌പട്ട് പെ്ളേക്കുഡൊ. 15 സാമി മുഡിവു മാഡിര്‌ക്കുവ അദേ നേരാക്ക് താനെ അയാള് മറിസി ബരുവാന്. അയി സാമി ബാഗ്യകേ്ട്ടവാന്‌മ് ഒന്റേ ഒരുത്താനിന്ത് ആള്‌ന്റവാന്‌മ് എല്ലാ രാജാവുഗാള്‌ക്ക് രാജാവുമു ആണ്ട്‌റ്‌ന്റവാര്‌ഗാള്‌ക്ക് ആണ്ടവാന്‌മ്‌ത്തെ. 16 സാമി എന്നാല്‌ക്ക്‌മ് പെ്ളേത്ത്‌റ്‌ന്റവാന്‌ത്തെ. ആര്‌ക്ക്‌മ് അര്‌ഗെ അണ്ട്യ മുഡ്യാത്തത്ത്‌റ ബെ്ള്‌സാത്ത്‌ല്‌ത്തെ സാമി ഇര്‌ക്കുവാദ്. സാമിന ആര്‌മ് കാണാഗേ ഇല്ലെ. ആര്‌ക്ക്‌മ് സാമിന കാണ്യ മുഡ്യാഗേ മാട്ട. അയി സാമിന എല്ലാ ആള്‌ഗാള് മദ്‌സുഡൊ. അയി സാമി ബില ഉള്ളവാനായി എല്ലാ ആള്‌ഗാള്‌നാമ് എന്നാല്‌ക്ക്‌മ് ആളുഡൊ. ആമേന്. 17 ദൊഡ്ഡവാര് എന്റ് നെനേക്ക ബേ്ഡ എന്റ്‌മ് സട്ടന അളിന്ത് പോവ സൊത്തുലു നെഞ്ചഡെ ബെക്കബേ്ഡ എന്റ്‌മ് ഈ ഉലഗാത്ത്‌ല പെ്ളേപ്പ്‌ഗാറാര്‌ക്ക് നീ സൊല്ലു. ആന നമ്മ പിര്യപിര്യാത്തിര്‌ക്ക്യ ബേ്ണ്ടി നമാക്ക് ബേ്ഡ്‌മാനാദെല്ല എക്കസക്ക തരുവ സാമിനത്തെ നെഞ്ചഡെ ബെക്കുഡൊ എന്റ് അവാര്‌ക്ക് സൊല്ലു. 18 നല്ലാദ് ഗേയാമ്, നല്ല കാര്യഗാള് ഗേവാദ്‌ല് ഗട്ടിഗാറാര് ആയിര്‌ക്ക്യാമ്, ദാന ഗേയാമ്, തമാക്ക് കെ്ഡേക്കുവാദ്‌ന ആങ്കീങ്ക് പങ്കിപജ്‌ന്ത് കൊഡുക്ക്യാമ് മനേസ്സുള്ളവാര് ആയിര്‌ക്ക്യ നീ അവാര്‌ക്ക് സൊല്ലു. 19 ഇത്തെ ഗേവാദ്‌നാലെ ബര്യ പോവ കാലാക്ക് എന്നാല്‌ക്ക്‌മ് അളിന്ത് പോഗാത്ത സൊത്തുന അവാര്‌ക്ക് സേത്തി ബെക്ക്യ മുഡിമ്. അത്തെ അവാര്‌ക്ക് സത്ത്യമാന ഉജുരുന കെ്ഡേസ്യ മുഡിമ്. 20 തിമിത്തോസെ, നീ ഗേയ ബേ്ണ്ടി സാമി നിന്ന് കയിക്ക് ഒപ്പിസി തന്ത്‌റ്‌ക്കുവ കാര്യഗാള്‌ന നീ സൂസാരിത്ത് ഗേഡൊ. സാമിന മദിസ്യ ഉവഗരപഡാത്ത ബുദ്ദില്ലാത്ത നായഗാള്‌ന ഇദ്‌ത്തെ അറുവു എന്റ് ഉറുട്ടുസൊല്ലികൊണ്ടു സില ആള്‌ഗാള് പഡ്‌സ്‌ന്റാര്. ഈ നായഗാള്‌ന നീ കേ്ള്‌ക്കാദെ. 21 സില ആള്‌ഗാള് ഇത്തവ നായഗാള്‌ന കേ്ട്ട് അദേപാസെ ഗേന്ത് നഡാന്ത് തമാക്ക് സാമ്യോഡിര്‌ക്കുവ നമ്പിക്കേന ബ്‌ട്ട് തള്ള്‌നാര്. സാമി നിമാക്ക് നല്ലാദ് ഗേഡൊ. |
New Life Computer Institute