1 തിമിത്തോസു 5 - സാമി സേദിഏസ്സ്ഗാറാര്ക്കുള്ള പൊറുപ്പു 1 ദൊഡ്ഡുദൊഡ്ഡവാരോഡ സിഗീര് സിഗീര നായ സൊല്ലാദെ നിന്ന് അപ്പാന്‌ന പാസെ നെനേത്ത് അവാര്‌ന പഡുസുഡൊ. സ്‌ന്ന്‌സ്‌ന്നവാര്‌ന തമ്പ്യാമ്‌ന പാസെ നെനേത്ത് നഡാക്കുഡൊ. 2 ദൊഡ്ഡുദൊഡ്ഡ പെ്ണ്ണ്‌മക്കാള്‌ഗാള്‌ന സൊന്ത അവ്വേന പാസേമ് സ്‌ന്ന്‌സ്‌ന്ന പെ്ണ്ണ്‌മക്കാള്‌ന പറ്റി ആഗാത്താദൊന്റുമു നെനേക്കാദെ തങ്ക്യാമ്‌ന പാസേമ് നെനേത്ത് നഡാക്കുഡൊ. 3 ആര്‌മ് കയിതാങ്ക്യ ഇല്ലാത്ത മ്‌ണ്ടേസ്യാര്‌ക്ക് ബേ്ഡ്‌മാന കാര്യഗാള്‌ന ഗേന്ത് കൊഡുത്തു അവാര്‌ന പാദ്‌ഗാക്കുഡൊ. 4 ആന ഒന്റു മ്‌ണ്ടേസിക്ക് മഗാനാരൊ മഗളാരൊ പേരനാരൊ പേര്‌ത്ത്യാരൊ ഇന്തദാന എല്ലാദ്‌ക്ക്‌മ് മുദാല് അവാര് തമ്മ് ബീ്ഡ്‌കാര്യഗാള് നോഡുവാദോഡൊപ്പ ഈ മ്‌ണ്ടേസിക്ക് ബേ്ഡ്‌മാന കാര്യഗാള്‌മ് ഗേന്ത് കൊഡുക്കുഡൊ. ഇത്തെ അവാര് തമ്മ് സാമി ബക്‌തിന കാട്ടി കൊഡുക്കുഡൊ. ഇദ്‌ത്തെ സാമി കണ്ണ്‌ക്ക് മെച്ച്‌പ്‌ഡിത്ത കാര്യ. 5 ആര്‌മ് കയിതാങ്ക്യ ഇല്ലാത്ത ഒന്റു മ്‌ണ്ടേസി സാമിന നെഞ്ചഡെബെത്ത് കൊണ്ടു സാമി അവാള്‌ന കയിതാങ്ക്യ ബേ്ണ്ടി ഇ്റ്‌ട്ട്‌പഗാല് പരേസി കൊണ്ട്‌റ്ക്കുഡൊ. 6 ആന തന്ന് പിര്യാക്ക് പെ്ളേക്കുവ മ്‌ണ്ടേസി ഉജുരോഡിന്താല്‌മ് അവാള് സത്തവാള്‌ക്ക് സമാത്തെ. 7 ആര്‌മ് കുറ്റ സൊല്ലാത്ത ദിന്‌സ്‌ല് ഏസ്സ്‌ഗാറാര് പെ്ളേക്ക്യ ബേ്ണ്ടി ഈ കാര്യഗാള്‌നെല്ല ഗുഡി നീ അവാര്‌ക്ക് സൊല്ലുഡൊ. 8 ആന ഒരുത്താന് തന്ന് കൂട്ടകുഡുമാക്ക്‌മ് മുക്ക്യമായി തന്ന് ബീ്ഡ്‌ലവാര്‌ക്ക്‌മ് ബേ്ഡ്‌മാന കാര്യഗാള്‌ന ഗേന്ത് കൊഡുക്കാദിന്തദാന അയാള് തന്ന് നമ്പിക്കേന ബ്‌ട്ട് തള്ള്‌നവാന്‌മ് ഏസ്സ്‌ന നമ്പാത്തവാന്‌ന ബ്‌ഡ ഒന്റേപെ്ട്ട് കെ്ട്ട് തള്ള്‌നവാന്‌മ്‌ത്തെ. 9 അറുവദ് ബയിസ്സ് കളിന്തവാള്‌നത്തെ മ്‌ണ്ടേസ്യാര് കൂട്ടാക്ക് സേത്തുഡൊ. അദല്ലാദെ താനെ അവാള് ഒന്റേ ആളാനോഡിന്തവാള്‌മ്, 10 നല്ല കാര്യഗാള് ഗേന്ത് പേരെ്ഡ്‌ത്തവാള്‌മ് ആയിര്‌ക്കുഡൊ. അയി നല്ല കാര്യഗാള് എന്നുവാദ് മക്കാള്‌ഗാള്‌ന സൊക്കാന നോഡിന്താദ്‌മ്, നട്ടാരുട്ടാര്‌ന പേര്‌ഗെ്ളേത്തിന്താദ്‌മ്, ഏസ്സ്‌ഗാറാര് കാല്‌ന കച്ചിന്താദ്‌മ്, കജട്ടാത്ത്‌ലിന്തവാര്‌ന കയിതാങ്കിന്താദ്‌മ്, പല ദിന്‌സ്‌ല് ആള്‌ഗാള്‌ന കയിതാങ്കി കൊണ്ടേ ഇന്താദ്‌മ്‌ത്തെ. 11 ആന ബയിസ്സാഗാത്ത മ്‌ണ്ടേസ്യാര്‌ന അയി കൂട്ടാക്ക് സേത്ത ബേ്ഡ. എന്ത്‌ക്കെന്റ് സൊന്ന ക്‌റ്‌സ്‌ത്ത് ഏസ്സ്‌ന നമ്പി നഡാക്ക്യ എ്ഡ്‌ത്ത മുഡിവുന ബ്‌ഡ ആസെപാഡ്‌ക്ക് ആളായി അവാര് ആളാന് സേന്ത് പെ്ളേക്ക്യ ആസെപഡുവാര്. 12 അത്തെ അവാര് മുദാലെ്ഡ്‌ത്ത മുഡിവുന ബ്‌ട്ട്‌തള്ളി തമാന താനെ ദെ്ണ്ടണേക്ക് സിക്ക്‌സുവാര്. 13 അവാര്‌ന ഈ കൂട്ടാക്ക് സേത്ത്‌നദാന അവാര് കള്ള ബ്‌ന്ത് നേര മാഡി നഡാക്കുവാര്. അദ് താനേമല്ല ബീ്ഡ് ബീ്ഡ പോയി ബേ്റെ ആള്‌ഗാള് കാര്യാക്ക് തലെ ഇക്കി നൊണ്ടു സൊല്ലിമ് നഡാക്കുവാര്. 14 അദ്‌നാലെ ബയിസ്സാഗാത്ത മ്‌ണ്ടേസ്യാര്‌ഗാള് മറിസി ആളാന് സേന്ത് മക്കാള്‌മറി പ്‌റാത്തി ബീ്ഡ്‌കാര്യഗാള് നോഡി നഡാത്തുഡൊ എന്റ് നാന് ആസെപഡ്‌ന്റെ. അത്തെ ഗേന്തദാന പോട്ടിഗാറാര്‌ക്ക് നമാന പറ്റി കുറ്റ സൊല്ല്യ എ്ഡെ കെ്ഡേക്കാദാമ്. 15 ആന ബയിസ്സാഗാത്ത മ്‌ണ്ടേസ്യാര്‌ല് ലേസ മ്‌ണ്ടേസ്യാര് ഇന്നാല് താനെ സാമിന തെ്റിന്ത് സെയിത്താന് പിന്ന്‌മേലെ പോയിര്‌ന്റാര്. 16 ഏസ്സ്‌ന നമ്പുവ ഒന്റൊരുത്തിക്ക് തന്ന് കുഡുമാക്ക് പട്ട മ്‌ണ്ടേസ്യാര്‌ഗാള് ഇന്തദാന അവാള് താനെ അയി മ്‌ണ്ടേസ്യാര്‌ക്ക് ബേ്ഡ്‌മാന കാര്യഗാള്‌ന ഗേന്ത് കൊഡുക്കുഡൊ. അവാര് കാര്യന നോഡ്യ ഏസ്സ്‌ഗാറാര് കൂട്ടാക്ക് സൊല്ലുവാദ് സെര്യല്ല. അത്തെ ഗേന്തദാന ആര്‌മ് കയിതാങ്ക്യ ഇല്ലാത്ത മ്‌ണ്ടേസ്യാര്‌ന ഏസ്സ്‌ഗാറാര് കൂട്ടാക്ക് നോഡ്യ മുഡിമ്. 17 ഏസ്സ്‌ഗാറാര് കൂട്ടന നലമായി നോഡിനഡാത്തുവ മൂപ്പനാമ്‌ഗാള്‌ന, മുക്ക്യമായി സാമി സൊല്ലുന പഡിസ്യ ബേ്ണ്ടിമ് സൊല്ലി കൊഡുക്ക്യ ബേ്ണ്ടിമ് പാഡ്‌പഡുവ മൂപ്പനാമ്‌ഗാള്‌ന മദിസ്യ ബേ്ണ്ടി അവാര്‌ക്ക് അളാവുക്കു മീ്റി കൂലി കൊഡുക്കുഡൊ. 18 അദ് എന്ത്‌ക്കെന്റ് സൊന്ന: <<അന്നാന ഒക്കുവ ഏര് ബായിന മൂഡി കെ്ട്ടാദേന്>> എന്റ്‌മ് <<ഗിലാസ ഗേന്റവാന്‌ക്ക് കൂലി കൊഡുക്കുഡൊ>> എന്റ്‌മ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്ക്‌ന്റല്ല. 19 ഒന്റു മൂപ്പാന് ഗേന്ത കുറ്റന പറ്റി റാഡാളൊ മൂറാളൊ സൊല്ലാദെ അയാള്‌ന കുറ്റഗാറാനെന്റ് നെനേക്ക ബേ്ഡ. 20 ഇത്തെ കുറ്റ ഗേന്തവാര്‌ന ഏസ്സ്‌ഗാറാര് മുന്നുക്കു ബെത്ത് താനെ നൊഡിഡൊ. അന്നാപ്പ്‌ത്തെ ബേ്റാള്‌ഗാള്‌മ് കുറ്റ ഗേയ അഞ്ചുവാര്. 21 ഈ കാര്യഗാള്‌നെല്ല ആരെന്റ് നോഡാദേമ് ഏദ് കച്ചിക്ക് എ്ണെഗാദേമ് ഗേഡൊ എന്റ് സാമി കേ്ട്ട്‌കൊണ്ട്‌റ്‌ക്കാട്ടി താനേമ് ക്‌റ്‌സ്‌ത്ത് ഏസ്സ് കേ്ട്ട്‌കൊണ്ട്‌റ്‌ക്കാട്ടി താനേമ് സാമി തെരിന്തെ്ഡ്‌ത്ത ദൂദാര്‌ഗാള് കേ്ട്ട്‌കൊണ്ട്‌റ്‌ക്കാട്ടി താനേമ് നാന് നിനാക്ക് കല്‌പനെ തന്റെ. 22 അവെസരപട്ട് ആര്‌നാമ് സാമി ഗിലാസാക്ക് എ്ഡ്‌ത്ത് ബെക്കാദെ. അത്തെ ഗേന്ത് അയാള് ഗേവ പാവാക്ക് നീയിമ് കൂട്ടെ്ണേഗാദെ. നീ പാവ ഗേഗാദെ നിനാന താനെ സൂസാരിത്തിര്. 23 എ്ഡെക്കെ്ഡേക്ക് നിന്ന് ബേ്റ്‌ക്ക് നോയി ബരുവാദ്‌നാലെ ബേ്റ് ജീരണായ ബേ്ണ്ടി നീര്‌ന താനെ കുഡിക്കാദെ ഊറബെത്ത മുന്തിരി സാരാമ് മായ മായ കുഡി. 24 ലേസ ആള്‌ഗാള് ഗേവ പാവ അവാര് നല്ലവാര കെ്ട്ടവാര എന്റ് നോഡാത്ത മുദാല് താനെ എല്ലാ ആള്‌ഗാള്‌മ് കാണുവാര്. ആന ലേസ ആള്‌ഗാള് ഗേവ പാവ പ്‌റാത്തെ തെരിമ്. 25 അദേപാസെത്തെ സില ആള് ഗേവ നല്ല കാര്യഗാള്‌മ് എല്ലാ ആള്‌ഗാള്‌ക്ക് സൊക്കാന കാണ്യ മുഡിമ്. ആന സില ആള്‌ഗാള് ഗേവ നല്ല കാര്യഗാള്‌മ് സട്ടന തെര്യാദെ പോനാല്‌മ് മെല്ല മെല്ല തെരിമ്. |
New Life Computer Institute