1 തിമിത്തോസു 3 - സാമി സേദിഏസ്സ്ഗാറാര് കൂട്ട മൂപ്പനാമ്‌ഗാള് 1 ഇത്തെ ഒന്റു സൊല്ലു ഇര്‌ക്ക്‌ന്റ്: <<ഒന്റൊരുത്താന് ഏസ്സ്‌ഗാറാര് കൂട്ടാക്ക് മൂപ്പാനായ ആസെപഡുവദാന ദൊഡ്ഡൊന്റു ഗിലാസ ഗേയാത്തെ ആസെപഡ്‌ന്റാന്.>> ഈ സൊല്ലു നേര്‌മ് നമ്പ്യ മുഡിവാദ്‌മ്‌ത്തെ. 2 ആന മൂപ്പാന് ആര്‌മ് കുറ്റ സൊല്ലാത്തവാന്‌മ്, ഒന്റേ പെ്ണ്ടോഡ ഇര്‌ക്ക്‌ന്റവാന്‌മ്, കെ്ട്ട ആസേക്ക് ആളാഗാത്തവാന്‌മ്, ആള്‌ഗാള് മദ്‌സ്‌ന്റവാന്‌മ്, ബന്റവാര് പോന്റവാര്‌ന പിര്യപിര്യാത്ത് തീറ്റ്യൂട്ടി ബ്‌ഡ്‌ന്റവാന്‌മ്, നലമായി പഡിസ്യ മുഡിന്റവാന്‌മ് ആയിര്‌ക്കുഡൊ. 3 അയാള് ഊറബെത്ത മുന്തിരി സാരന മൊത്തനാക്ക് കുഡിക്കാത്തവാന്‌മ്, അഡിന്തഡിഗാറാന്‌മ് ആയ പാങ്കില്ലെ. ആന അയാള് പൊറിമെഗാറാന് ആയിര്‌ക്കുഡൊ. ആള്‌ഗാളോഡ തറ്‌ക്കത്തവാന്‌മ് പണാക്ക് ബേ്ണ്ടി ആസെപാഡ് ഇല്ലത്തവാന്‌മ് ആയിര്‌ക്കുഡൊ. 4 അയാള് തന്ന് ബീ്ഡ്‌കാഡ് കാര്യന നലമായി നോഡിനഡാത്ത്‌ന്റവാന്‌മ്, എല്ലാ കാര്യഗാള്‌ല്‌മ് തനാന മദിസി തന്ന് സൊല്ലുപഡിക്ക് നഡാക്ക്യ തന്ന് മക്കാള്‌ഗാള്‌ന പഡ്‌സ്‌ന്റവാന്‌മ് ആയിര്‌ക്കുഡൊ. 5 തന്ന് ബീ്ഡ്‌കാഡ് കാര്യന നോഡി നഡാത്ത്യ മുഡ്യാത്തവാന്‌ക്ക് ഏസ്സ്‌ഗാറാര് കൂട്ടന എത്തെ നോഡി നഡാത്ത്യ മുഡിമ്? 6 ആന ഇന്നാല്‌ത്തെ ഏസ്സ്‌ന നമ്പിര്‌ന്റവാന് മൂപ്പാനായ പാങ്കില്ലെ. എന്ത്‌ക്കെന്റ് സൊന്ന തനാക്ക് പദാവി കെ്ഡേത്താദ്‌നാലെ അയാള് താന് ദൊഡ്ഡവാനെന്റ് പെരിമെപട്ട് സെയിത്താന്‌ക്ക് കെ്ഡേത്ത അദേ ദെ്ണ്ടണേക്ക് സിക്കുവാന്. 7 മൂപ്പാന്‌ന ഏസ്സ്‌ഗാറാര് കൂട്ട താനെ അല്ല, ഏസ്സ്‌ഗാറാരല്ലത്തവാര് ഗുഡി മദ്‌സുഡൊ. അന്നാപ്പ് അയാള്‌ക്ക് കെ്ട്ട പേര് ബരാമ്‌മാട്ട, സെയിത്താന് സദിക്ക് അയാള് സിക്കാമ്‌മാട്ടാന്. മൂപ്പനാമോഡ എ്ണേന്ത് ഏസ്സ്‌ഗാറാര് കൂട്ടാത്ത്‌ല കാര്യഗാള്‌ന നോഡുന്റവാര് 8 അദേപാസെ മൂപ്പനാമോഡ എ്ണേന്ത് ഏസ്സ്‌ഗാറാര് കൂട്ടാത്ത്‌ല കാര്യഗാള്‌ന നോഡുന്റവാര്‌മ് ആള്‌ഗാള് മദ്‌സ്‌ന്റവാര്‌മ്, ഒന്റു നായ സൊന്നദാന അദേപാസെ ഗേന്റവാര്‌മ്, ഊറബെത്ത മുന്തിരി സാര മൊത്തനാക്ക് കുഡിക്കാത്തവാര്‌മ്, പണാക്ക് ആങ്കരാക്കിക്കാത്തവാര്‌മ് ആയിര്‌ക്കുഡൊ. 9 സാമി അവാര്‌ക്ക് കാട്ടി കൊഡുത്ത നമ്പിക്കേന ബ്‌ഡാദെ <<നീ കുറ്റഗാറാനല്ല>> എന്റ് മനേസ്സ് സൊല്ലുവ ദിന്‌സ്‌ല് അവാര് പെ്ളേക്കുഡൊ. 10 ഇത്തവാള്‌ഗാള്‌ന അവാര് നല്ലവാര കെ്ട്ടവാര എന്റ് മുദാല് നിമ്മ സോദണെ ഗേഡൊ. അത്തെ സോദണെ ഗേന്ത് അവാരോഡ കുറ്റകൊറേവു ഒന്റുമു ഇല്ലാദെ പോനത്തെ അവാര്‌ന ഈ ഗിലാസാക്ക് എ്ഡ്‌ത്ത് ബെക്കുഡൊ. 11 അദേപാസെ അവാര് പെ്ണ്ടച്ച്യാമ്‌മ് ആള്‌ഗാള് മദ്‌സ്‌ന്റവാര്‌മ്, നൊണ്ടു സൊല്ലാത്തവാര്‌മ്, കെ്ട്ട ആസേക്ക് ആളാഗാത്തവാര്‌മ്, എല്ലാ കാര്യാത്ത്‌ല്‌മ് നമ്പ്യ മുഡിന്റവാര്‌മ് ആയിര്‌ക്കുഡൊ. 12 ഏസ്സ്‌ഗാറാര് കൂട്ടാത്ത്‌ല മൂപ്പനാമ്‌ഗാള്‌ന കയി താങ്ക്‌നന്റവാന്‌മ് ഒന്റേ പെ്ണ്ടച്ച്യോഡ ഇര്‌ക്ക്‌ന്റവാന് ആയിര്‌ക്കുഡൊ. അയാള് തന്ന് മക്കാള്‌മറിഗാള്‌നാമ് ബീ്ഡ്‌കാഡ്‌നാമ് നലമായി നോഡിനഡാത്ത്‌ന്റവാന്‌മ് ആയിര്‌ക്കുഡൊ. 13 ഇത്തെ ഏസ്സ്‌ഗാറാര് കൂട്ടാത്ത്‌ല മൂപ്പനാമ്‌ഗാള്‌ന കയി താങ്ക്‌ന്റവാര് നലമായി തമ്മ് ഗിലാസാന ഗേവദാന അവാര്‌ക്ക് നല്ല മദ്‌പ്പ്‌മ് കെ്ഡേക്ക്‌മ്. ക്‌റ്‌സ്‌ത്ത് ഏസ്സോഡിര്‌ക്കുവ നമ്പിക്കേന ദയിരത്തോഡ അഡ്‌ത്തവാര്‌ക്ക് സൊല്ലി കൊഡുക്ക്യാമ് അവാര്‌ക്ക് മുഡിമ്. ദൊഡ്ഡ കാര്യ 14-15 നിന്ന് പട്ട്‌ക്ക് സട്ടന ബര്യ നാന് ആസെപഡ്‌ന്റെ. ആന നാന് ബര്യ നാളാനദാന നീ എന്തെല്ല തെരിന്ത്‌റ്‌ക്കുഡൊ എന്നുവ കാര്യഗാള്‌ന നാന് നിനാക്ക് എ്ള്‌ദ്‌ന്റെ. അത്തെ അയി കാര്യഗാള്‌ന തെരിന്തദാന ഉജുരുള്ള സാമിബീ്ഡായിര്‌ക്കുവ ഏസ്സ്‌ഗാറാര് കൂട്ടാത്ത്‌ല ആള്‌ഗാള് എത്തെ പെ്ളേക്കുഡൊ എന്റ്‌മ് നിനാക്ക് തെരിമ്. ഒറേപ്പുള്ള തറേമ് കമ്പ്‌മ് ഒന്റു ബീ്ഡ്‌ന ഒറേപ്പ് മാഡി നില്ല്‌സുവ പാസെ തറേമ് മൂലെകല്ല്‌മ് ആയിര്‌ക്കുവ ഏസ്സ്‌ഗാറാര് കൂട്ട സത്ത്യാന ഒറേപ്പ് മാഡി നില്ല്‌സ്‌ന്റാര്. 16 മറേന്ത്‌റ്‌ക്കുവ ദൊഡ്ഡ കാര്യനത്തെ നമ്മ നമ്പിര്‌ക്കുവാദ് എന്റ് എല്ലാ ആള്‌ഗാള്‌ക്ക്‌മ് സൊല്ല്യ മുഡിമ്. ഏസ്സ് ക്‌റ്‌സ്‌ത്ത് മന്‌സാനായി ബന്താന്. ക്‌റ്‌സ്‌ത്ത് ആരെന്റ് സാമിനിഗാല് കാട്ടി തന്ത്‌ദ്. അയാള് ദൂദാര്‌ഗാള് കണ്ണ്‌ക്ക്‌മ് കാട്ട്‌നാന്. എഗുദരല്ലാത്ത ബേ്റെ ജാദിഗാള് പട്ട്‌ല് അയാള്‌ന പറ്റി സൊന്നാര്. ഉലഗാത്ത്‌ല മന്‌സാര് അയാള്‌ന നമ്പ്‌നാര്. അമ്‌സത്തോഡ അയാള്‌ന മേലോഗാക്ക് എ്ഡ്‌ത്താന്. |
New Life Computer Institute