1 തിമിത്തോസു 2 - സാമി സേദിസാമിന കുമ്മുഡുവ ദിന്‌സ്‌ഗാള്‌ന പറ്റി പവുലോസു സൊന്റാന്. 1 ആന എല്ലാ ആള്‌ഗാള്‌ക്ക് ബേ്ണ്ടി നലമായി പരേസുഡൊ എന്റ്‌മ് എല്ലാ ആള്‌ഗാള്‌നാമ് നെനേത്ത് സാമിക്ക് നണ്ണി സൊല്ലുഡൊ എന്റ്‌മ് നാന് നിമാക്ക് മുദാല് താനെ സൊല്ലുന്റെ. 2 മുക്ക്യമായി രാജാവുഗാള്‌ക്ക്‌മ്, എല്ലാ അദിഗാരിഗാള്‌ക്ക്‌മ് ബേ്ണ്ടി പരേസുഡൊ. അത്തെ പരേസ്‌നദാന നമാക്ക് നിമ്മ്‌ദ്യോഡാമ് അര്‌ക്കില്ലാദേമ് പെ്ളേക്ക്യ മുഡിമ്. അത്തെ നമാക്ക് സാമിക്ക് ബേ്ണ്ടി നലമായി പെ്ളേക്ക്യാമ് അഡ്‌ത്തവാരോഡ നല്ല ദിന്‌സ്‌ല് നഡാന്ത്‌പ്‌ഡിത്ത് ഗേയാമ് മുഡിമ്. 3 ഇത്തെ ഗേവാദ് നല്ലാദ്‌മ് നമാന കാപാറ്റുവ സാമി കണ്ണ്‌ക്ക് മെച്ച്‌പ്‌ഡിത്ത കാര്യാമ്‌ത്തെ. 4 എന്ത്‌ക്കെന്റ് സൊന്ന എല്ലാ മന്‌സാര്‌ഗാള്‌നാമ് കാപാറ്റുഡൊ എന്റ്‌മ് എല്ലാ മന്‌സാര്‌ഗാള്‌മ് സത്ത്യാന തെരിഡൊ എന്റ്‌മ് സാമി ആസെപഡ്‌ന്റാന്. 5 അയി സാമി ഒരുത്താന്‌ത്തെ. സാമിനാമ് മന്‌സാന്‌നാമ് രാജി കൂഡുസുവാദ്‌മ് ഒരുത്താന്‌ത്തെ. അദ് മന്‌സാനായി പ്‌റാന്ത ക്‌റ്‌സ്‌ത്ത് ഏസ്സ്‌ത്തെ. 6 എല്ലാ മന്‌സാര്‌ഗാള്‌ക്ക്‌മ് അവനവാന് ഗേവ പാവാക്ക് കെ്ഡേക്കുവ ദെ്ണ്ടണേക്ക് ബഡ്ഡി അയാള് തനാന താനെ കുരുസുക്കു ഒപ്പുസുനാന്. ഇദെല്ല സാമി മുഡിവാക്കിന്ത സമ്യാത്ത്‌ല് താനെ നഡാന്ത്‌ദ്. എല്ലാ ആള്‌ഗാള്‌നാമ് കാപാറ്റുഡൊ എന്റ് സാമിക്കിര്‌ക്കുവ ആസേക്ക് തെ്ള്‌വുത്തെ ഇദ്. 7 അദ്‌നാലെത്തെ നമ്പിക്കേന പറ്റി സൊല്ലുവ ഈ സത്ത്യ സേദിന എഗുദരല്ലാത്ത ജാദിഗാള്‌ക്ക് പഡിസ്യ അപ്പോസുത്തലാനായിമ് ബാത്ത്യാനായിമ് സാമി എനാന സൊല്ലി ബ്‌ട്ട്‌റ്‌ക്കുവാദ്. നാന് സൊല്ലുവാദ് പൊയ്യല്ല നേര്‌ത്തെ. 8 അദ്‌നാലെ സാമിന കുമ്മുഡുവ പട്ട്‌ലെല്ല സാമിക്ക് ബേ്ണ്ടി പെ്ളേക്കുവ ഗണ്ടാള്‌ഗാള് മൊനേക്ക് തെ്ട്ടാദേമ് തറ്‌ക്കിപ്‌ഡിത്ത് ഗേഗാദേമ് കയിന ഉജാത്തി പരേസുഡൊ. 9 അദേപാസെ പെ്ണ്ണ്‌മക്കാള്‌മ് ബുദ്ദില്ലാത്ത ദിന്‌സ്‌ല് ഉഡുപ്പുസഡ്‌പ്പിക്ക്യ പാങ്കില്ലെ. നാണമാനാക്ക് എ്ണേന്ത ദിന്‌സ്‌ല് ഇക്കി നഡാക്കുഡൊ. തലേന പല ദിന്‌സ്‌ല് കൊണ്ടെ കെ്ട്ടി കൊണ്ടൊ, പൊന്നുലൊ ബെലെപെറ്റ മുത്തുലൊ മാഡിര്‌ക്കുവ തൊനെവര ജാദിഗാള്‌ന ഇക്കി കൊണ്ടൊ, ബെലെപെറ്റ ഉഡുപ്പുസഡ്‌പ്പിക്കി കൊണ്ടൊ അല്ല പെ്ണ്ണ്‌മക്കാള് തൊട്ടു തൊനേന്ത് നഡാക്കുവാദ്. 10 അദ്‌ക്ക് ബദ്‌ല് സാമിക്ക് ബേ്ണ്ടി പെ്ളേക്കുവ പെ്ണ്ണ്‌മക്കാള് ഗേവ പാസെ അഡ്‌ത്തവാര്‌ക്ക് നല്ല കാര്യഗാള് ഗേന്ത് പെ്ളേക്കുഡൊ. 11 ഏസ്സ്‌ഗാറാര് കൂട്ടാത്ത്‌ല് പഡ്‌സ്‌ഗാട്ടി പെ്ണ്ണ്‌മക്കാള് സപ്പാനിന്ത് നിദാനത്തോഡ പഡിക്കുഡൊ. 12 പഡിസ്യാഗൊ ഗണ്ടാള്‌ഗാള്‌ന ആള്യാഗൊ നാന് പെ്ണ്ണ്‌മക്കാള്‌ന ബ്‌ഡുവാദില്ലെ. അവാര് സപ്പെന്റിന്ത് പഡിക്കുഡൊ. 13 അദ് എന്ത്‌ക്കെന്റ് സൊന്ന സാമി ആദാമ്‌നത്തെ മുദാല് ഉണ്ടാക്ക്‌നാദ്. പ്‌റാത്തെ അവ്വേന ഉണ്ടാക്ക്‌നാദ്. 14 ആദാമല്ല സദിക്ക് സിക്ക്‌നാദ്, അവ്വേത്തെ സദിക്ക് സിക്കി സാമി സൊല്ലുക്കു മീ്റി പാവ ഗേന്താദ്. 15 ആന പെ്ണ്ണ്‌മക്കാള് ക്‌റ്‌സ്‌ത്ത്‌ന നമ്പിക്കൊണ്ടുമു അഡ്‌ത്തവാരോഡ സീവാന്‌ബെത്ത് കൊണ്ടേ ഇന്ത് കവാഡില്ലാദേമ് നിദാനത്തോഡാമ് നഡാന്ത്‌പ്‌ഡിത്ത് ഗേന്തദാന മക്കാള് പ്‌റാത്തി തപ്പിസി കഡാക്കുവാര്. |
New Life Computer Institute