1 തെസെലോനിക്ക്യഗാറാര് 5 - സാമി സേദിആണ്ടവാന് ബരുവാദ്‌ക്ക് ബേ്ണ്ടി ഒരുങ്കുഡൊ 1 ഏസ്സ്‌ഗാറാരെ, ആണ്ടവാന് ബരുവ നേരന പറ്റ്യൊ നാള്‌ന പറ്റ്യൊ നിമാക്ക് ഇന്നാല് എ്ള്‌ദുവ തേവില്ലെ. 2 എന്ത്‌ക്കെന്റ് സൊന്ന ഒന്റു ത്‌റ്‌ട്ടാന് ജാമാക്ക് ബരുവ പാസെ ആണ്ടവാന് തിരിഗി ബരുവ നാള് സദിപെ്ട്ട്‌ല് ബര്‌മെന്റ് നിമാക്ക് നലമായി തെരിമല്ല. 3 <<എമ്മ നിമ്മ്‌ദ്യായി ഇര്‌ന്റേമ്, അഞ്ചിക്കില്ലാദെ ഇര്‌ക്ക്‌ന്റേമ്>> എന്റ് ആള്‌ഗാള് സൊല്ലുവാര്. ആന ബേ്റ്‌ഗാറിസിക്ക് പ്‌ള്ളെ്ഡ്‌ക്കുവ ഉറുസ്സു ഇ്ളാഗുവ പാസെ സട്ടന അവാര്‌ക്ക് നാസ ബര്‌മ്. അയി നാസാത്ത്‌ലിന്ത് അവാര്‌ക്ക് തപ്പിസി കഡാക്ക്യ മുഡ്യാമാട്ട. 4 ആന ഏസ്സ്‌ഗാറാരെ, അയി നാള് ഒന്റു ത്‌റ്‌ട്ടാന് ബരുവ പാസെ നിമാക്ക് ബരമാട്ട. എന്ത്‌ക്കെന്റ് സൊന്ന, നിമ്മ ഇ്റ്‌ട്ട്‌ല് ഇര്‌ക്കുവ പാസെ കെ്ട്ടവാരായല്ല പെ്ളേക്കുവാദ്. 5 നിമ്മ എല്ലാവാര്‌മ് ബെ്ള്‌സനാമ് പഗാല്‌നാമ് പാസെ നല്ല ഗുണ ഉള്ളവാര്‌ത്തെ, ജാമനാമ് ഇ്റ്‌ട്ട്‌നാമ് പാസെ കെ്ട്ട ഗുണ ഉള്ളവാരല്ല. 6 അദ്‌നാലെ ബേ്റെ ആള്‌ഗാള്‌ന പാസെ ഉറാങ്ക്‌ന്റവാര് ആഗാദെ ആരേമ്പോഡാമ് ബോദ ഉള്ളവാരായിമ് ഇര്‌ന്. 7 ഉറാങ്ക്‌ന്റവാര് ജാമാക്ക് ഉറാങ്ക്‌ന്റാര്. കുഡിക്ക്‌ന്റവാര്‌മ് ജാമാക്ക്‌ത്തെ കുഡിക്ക്‌ന്റാര്. 8 ആന നമ്മ പഗാല്‌ക്കുള്ളവാര് ആനാദ്‌നാലെ ബോദ ഉള്ളവാരായി ഇര്‌ക്കുഡൊ. ഒന്റു പട്ടളഗാറാന് തന്ന് മാര്‌ന പാദ്‌ഗാക്ക്യ മാര്‌കച്ചെ കെ്ട്ടുവ പാസെ നിമ്മ സീവാനുള്ളവാരായിമ് നമ്പിക്കുള്ളവാരായിമ് ഇര്‌ക്കുഡൊ. അദ്‌താനേമല്ല, അയാള് തലേക്ക് പട്ടള തൊപ്പിന ഇക്കുവ പാസെ ഏസ്സ് നമാന ഒറേപ്പായിമ് കാപാറ്റ്യ ബന്റാന് എന്റ് നിമ്മ നെഞ്ചഡെ ബെത്ത്‌റ്‌ക്കുഡൊ. 9 സാമി മൊനെ ബന്ത് ദെ്ണ്ടിക്കുവ ദെ്ണ്ടണേക്ക് സിക്ക്യ സാമി നമാന തെരിന്തെ്ഡ്‌ക്കാലെ. ആന നമ്മ് ആണ്ടവാന് ഏസ്സ് ക്‌റ്‌സ്‌ത്ത്‌ന ബെത്ത് തപ്പിസി കഡാക്ക്യത്തെ സാമി നമാന തെരിന്തെ്ഡ്‌ത്ത്‌റ്‌ക്കുവാദ്. 10 അദ്‌നാലെ നമ്മ സത്താല്‌മ് സെരി സാഗാദിന്താല്‌മ് സെരി ഏസ്സോഡൊപ്പ പെ്ളേക്ക്യ ബേ്ണ്ടിത്തെ അയാള് നമ്മ് പാവാന തീര്‌ക്ക്യ സത്താദ്. 11 അദ്‌നാലെ നിമ്മ ഒപ്പ ഗേവ പാസെ ആങ്കീങ്ക് ദയിര പഡിസികൊണ്ടുമു നമ്പിക്കേല് ഒറേപ്പുള്ളവാര് മാഡികൊണ്ടുമു ഇര്‌ന്. ഏസ്സ്‌ന നമ്പ്‌ന്റവാര് കഡാമെഗാള് 12 ഏസ്സ്‌ഗാറാരെ, നിമ്മ് കൂട്ടാത്ത്‌ല് നിമാക്ക് ബേ്ണ്ടി പാഡ്‌പഡ്‌ന്റവാര്‌മ് ആണ്ടവാന് കൊഡുത്ത അദിഗരാത്ത്‌ല് നിമാന നഡാത്ത്‌ന്റവാര്‌മ് ബുദ്ദി സൊല്ലി തന്റവാര്‌മ് ആന ആള്‌ഗാള്‌ന നിമ്മ മദിസി നഡാന് എന്റ് നാന് ബേ്ണ്ടികൊള്ളുന്റെ. 13 അവാര് നിമാക്ക് ബേ്ണ്ടി പാഡ്‌പഡുവാദ്‌ന നെനേത്ത് മ്‌ഗ്‌ന്ത സീവാന്‌ബെത്ത് അവാര്‌ന മദിസി നഡാന് എന്റ് എമ്മ നിമാന ബേ്ണ്ടി കൊള്ളുന്റേമ്. നിമ്മ ആങ്കീങ്ക് പിര്യപിര്യാത്തോഡ ഇര്‌ന്. 14 ഏസ്സ്‌ഗാറാരെ, കള്ള ബ്‌ന്ത് നഡാക്ക്‌ന്റവാര്‌ന നിമ്മ മെ്റ്‌ട്ട്‌ന്, ദയിരില്ലത്തവാര്‌ന ദയിരപഡ്‌സ്‌ന്, കുറ്റകൊറേവു ഇര്‌ക്ക്‌ന്റവാര്‌ന കയിതാങ്ക്‌ന്, എല്ലാ ആള്‌ഗാളോഡാമ് മ്‌ഗ്‌ന്ത പൊറിമോഡ ഇര്‌ന്. 15 ആര്‌ക്ക്‌മ് കെ്ട്ടാദ്‌ക്ക് ബദ്‌ല കെ്ട്ടാദ് ഗേഗാദിര്‌ക്ക്യ നോഡുനു. ആന ആങ്കീങ്ക്‌മ് എല്ലാ ആള്‌ഗാള്‌ക്ക്‌മ് ഏദ്‌ഗളിഗേക്ക്‌മ് നല്ലാദ് ഗേയ ഓരാഡ്‌ന്. 16 നിമ്മ ഒപ്പ പിര്യപിര്യാത്തിര്‌ന്, 17 ഒപ്പ പരേസി കൊണ്ട്‌റ്‌ന്, 18 എല്ലാ കാര്യഗാള്‌ക്ക്‌മ് ബേ്ണ്ടി സാമിക്ക് നണ്ണി സൊല്ലുനു. ഇദ്‌ത്തെ ക്‌റ്‌സ്‌ത്ത് ഏസ്സോഡ ഒന്റായി പെ്ളേക്കുവ പെ്ളേപ്പ്‌ല് സാമി നിമ്മോഡിന്ത് ആസെപഡുവാദ്. 19 സാമിനിഗാലോഡ മുട്ടദേന്. 20 സാമി ബെ്ളിപഡിസി തരുവ കാര്യഗാള്‌ന ബെലെ ഇല്ലത്താദ് എന്റ് നെനേക്കാദേന്. 21 എല്ലാദ്‌നാമ് സോദണെ ഗേന്ത് നല്ല കാര്യഗാള്‌ന ഒറേപ്പായിമ് തങ്കാരിക്കുഡൊ. 22 എല്ലാ ദിന്‌സ്‌ല് ഗേവ കെ്ട്ട കാര്യഗാള്‌നാമ് തള്ള്‌ന്. 23 നിമ്മ്‌ദി തരുവ സാമി നിമാന ഒന്റേപെ്ട്ട് സുത്താപ്പുള്ളവാര് മാഡുഡൊ. നമ്മ് ആണ്ടവാന് ഏസ്സ് ക്‌റ്‌സ്‌ത്ത് ബര്‌ഗാട്ടി അയാള് മുന്നുക്കു നിമ്മ് നിഗാല്‌നാമ്, ഉജുരുനാമ്, ഉരുവുനാമ് സെറ്റെ ഗുഡി കുറ്റകൊറേവു ഇല്ലത്തദായി സാമി നിമാന സൂസാരിത്ത് ബെക്കുഡൊ. 24 നിമാന തെരിന്തെ്ഡ്‌ത്ത സാമി നമ്പ്യ മുഡിന്റവാന്‌ത്തെ, അയാള് അദ്‌ന ഗേന്ത് മുഡിക്കുവാന്. 25 ഏസ്സ്‌ഗാറാരെ, എമാക്ക് ബേ്ണ്ടി പരേസ്‌ന്. 26 ഏസ്സ്‌ഗാറാര് ആയിര്‌ക്കുവ നിമ്മ എല്ലാവാര്‌മ് ആങ്കീങ്ക് കാണ്‌ഗാട്ടി കയി കൊഡുത്തു ബിനാത്ത്‌ന്. 27 ഏസ്സ്‌ഗാറാര് ആയിര്‌ക്ക്‌ന്റവാര്‌ക്ക് ഒട്ടുക്കു ഈ എ്ള്‌ത്ത്‌ന പഡിത്ത് കാട്ടുഡൊ എന്റ് ആണ്ടവാന് തന്ത അദിഗരാത്ത്‌ല് നാന് നിമാക്ക് സൊന്റെ. 28 നമ്മ് ആണ്ടവാന് ഏസ്സ് ക്‌റ്‌സ്‌ത്ത് നിമാക്ക് പ്‌ണ്ണ്യ ഗേഡൊ. |
New Life Computer Institute