1 തെസെലോനിക്ക്യഗാറാര് 4 - സാമി സേദിസാമിന പിര്യപഡുസുവ പെ്ളേപ്പ് 1 ഏസ്സ്‌ഗാറാരെ, കഡേഗല നാന് ഒന്റുഗുഡി സൊല്ലുവാദ് എന്തെന്റ് സൊന്ന: സാമി മെച്ചുവാദ്‌ക്ക് തഗ്‌ന്ത ദിന്‌സ്‌ല് എത്തെ പെ്ളേക്കുഡൊ എന്നുവാദ്‌ന നിമ്മ എമ്മോഡിന്ത് പഡിത്ത്‌റ്‌ന്റ്‌റ്. അദേപാസെത്തെ നിമ്മ ഇന്നാല് പെ്ളേക്ക്‌ന്റ്‌റ്. ആന ഇന്നിമ് സേത്തി സേത്തി സാമിക്ക് മെച്ച്‌പ്‌ഡിക്കുവാദ്‌ക്ക് തഗ്‌ന്ത ദിന്‌സ്‌ല് നിമ്മ പെ്ളേക്കുഡൊ എന്റ് ആണ്ടവാന് ഏസ്സ് അദിഗരാത്ത്‌ല് എമ്മ നിമാക്ക് ബുദ്ദി സൊല്ലി ബേ്ണ്ടി കൊള്ളുന്റേമ്. 2 ആണ്ടവാന് ഏസ്സ് അദിഗരാത്ത്‌ല് എമ്മ നിമാക്ക് തന്ത കല്‌പനെഗാള് എന്തെന്റ് നിമാക്ക് തെരിമല്ല. 3 നിമ്മ സുത്താപ്പോഡ പെ്ളേക്കുവാദ്‌ത്തെ സാമിക്ക് മെച്ച്‌പ്‌ഡിത്ത കാര്യ. നിമ്മ കാമാക്ക് കണ്ണില്ലാദെ കണ്ടപഡിക്ക് നഡാക്കുവാദ്‌ന തള്ളി പെ്ളേന്. 4-5 സാമിന തെര്യാത്ത എഗുദാരല്ലാത്ത ജാദിഗാള്‌ത്തെ കാമാക്ക് കണ്ണില്ലാദെ കണ്ടപഡിക്ക് പെ്ളേക്കുവാദ്. നിമ്മ അത്തെ പെ്ളേക്കാദേന്. നിമ്മ ഒന്റൊന്റാള്‌മ് മാനമര്യാദോഡാമ് സുത്താപ്പോഡാമ് പെ്ളേത്ത് അവനവാന്‌ന സൂസാരിത്ത് ബെക്ക്യ പഡിത്ത്‍റ്ക്കുഡൊ. 6 ഈ കാര്യാത്ത്‌ല് ഏസ്സ്‌ഗാറാര് ആയിര്‌ക്കുവ നിമ്മ് കൂട്ടാത്ത്‌ല ആര്‌ക്ക്‌മ് ഇത്തവ ദിന്‌സ് കെ്ട്ട കാര്യഗാളൊ ബഞ്ചിക്കുവ കാര്യഗാളൊ ഗേഗാദേന്. ഇദ്‌ക്കെല്ല പളി എ്ഡ്‌ക്ക്‌ന്റവാന് ആണ്ടവാന്‌ത്തെ എന്റ് എമ്മ മുദാല് താനെ നിമാക്ക് സൊല്ലിര്‌ക്ക്‌ന്റേമ്. 7 സാമി നമാന ബ്‌ളിത്ത്‌റ്‌ക്കുവാദ് കേ്ഡ്‌ഗെ്ട്ടവാരായി പെ്ളേക്ക്യല്ല, സുത്താപ്പുള്ളവാരായി പെ്ളേക്ക്യത്തെ. 8 അദ്‌നാലെ ആരാറ്റ ഈ പഡുസുവ കാര്യഗാള്‌ന ബെലേക്കെ്ഡ്‌ക്കാദെ ഇന്തദാന അയാള് മന്‌സാന്‌ന അല്ല തന്ന് നിഗാല്‌ന നിമാക്ക് തരുവ സാമിനത്തെ ബെലേക്കെ്ഡ്‌ക്കാദെ ഇര്‌ക്കുവാദ്. 9 ഏസ്സ്‌ന നമ്പിര്‌ക്കുവ നിമ്മ ആങ്കീങ്ക് സീവാന്‌ബെത്ത് നഡാക്കുഡൊ എന്നുവാദ്‌ന പറ്റി നിമാക്ക് എ്ള്‌ദി തരുവ തേവില്ലെ. നിമ്മ ആങ്കീങ്ക് സീവാന്‌ബെത്ത് നഡാക്ക്യ സാമി താനെ നിമാന പഡിസിര്‌ന്റാന്. 10 അദ്‌താനേമല്ല മക്കെദോന്യാല ഏസ്സ്‌ഗാറാരോഡ നിമ്മ സീവാന്‌ബെത്ത്‌മ് നഡാക്ക്‌ന്റ്‌റല്ല. ആന ഏസ്സ്‌ഗാറാരെ, നിമ്മ ഇന്നിമ് സേത്തി സേത്തി ഇദേപാസെ സീവാന്‌ബെത്ത് നഡാക്കുഡൊ എന്റ് നിമാന നാന് ബേ്ണ്ടികൊള്ളുന്റെ. 11 എമ്മ നിമാക്ക് സൊല്ലി തന്ത പാസെ അഡ്‌ത്തവാര്‌ക്ക് നിമ്മ തൊന്തറെ മാഡാദേമ്, അഡ്‌ത്തവാര് കാര്യാക്ക് തലെ ഇക്കാദേമ് ഇര്‌ക്കുഡൊ. അദ്‌താനേമല്ല, നിമ്മ തിന്നുവ തീനിക്ക് ബേ്ണ്ടി നിമ്മ താനെ പാഡ്‌പഡുവാദ്‌മ് ആയിര്‌ക്കുഡൊ നിമ്മ് മ്‌ഗ്‌ന്ത ആസെ. 12 അത്തെ ഗേന്ത് നിമ്മ പെ്ളേക്കാട്ടി ഏസ്സ്‌ന നമ്പാത്തവാര് നിമാന മദ്‌സുവാര്, നിമാക്ക് ബേ്ഡ്‌മാന കാര്യാക്ക് ബേ്ണ്ടി നിമ്മ അഡ്‌ത്തവാര്‌ന അണ്ടുവ തേവിമ് ബരമാട്ട. ആണ്ടവാന് ബരാവു 13 ഏസ്സ്‌ഗാറാരെ, സത്തവാര്‌ന പറ്റി നെഞ്ചഡെ ഇല്ലാത്ത ആള്‌ഗാള്‌ത്തെ അവാര്‌ന നെനേത്ത് ദുക്കപഡുവാദ്. ആന നമ്മാഗൊ അവാര്‌ന മറിസിമ് കാണ്‌ല എന്റ് നെഞ്ചഡെ ബെത്ത്‌റ്‌ക്ക്‌ന്റാമ്. അദ്‌നാലെ സത്തവാര്‌ന പറ്റി ദുക്കപഡാദെ അവാര്‌ന പറ്റി നിമ്മ തെരിന്ത്‌റ്‌ക്കുഡൊ എന്റ് എമ്മ ആസെപഡ്‌ന്റേമ്. 14 എന്ത്‌ക്കെന്റ് സൊന്ന ഏസ്സ് സത്തിന്ത് ഉജുര്‌ളാഗ്‌നാന് എന്റ് നമ്മ നമ്പ്‌ന്റാമ്. അത്തെ നമ്പ്‌നദാന ഒറേപ്പായി സാമി സത്തവാര്‌നാമ് ഏസ്സ്‌ന ബെത്ത് ഉജുര്‌ളാക്കി അയാളോഡ ബരുസ്സുവാന് എന്റ് നമ്മ നെഞ്ചഡെ ബെത്ത്‌റ്‌ക്ക്‌ന്റാമ്. 15 ഏസ്സ്‌ന നമ്പി സത്തവാര്‌ത്തെ ആണ്ടവാന് ബരുവ നാള്‌ല് ഉജുരോഡ ഇര്‌ക്കുവ നമാക്ക് മുദാല് അയാള് പട്ട്‌ക്ക് പോവാദ് എന്റ് ആണ്ടവാന് സൊന്ന നായന എമ്മ നിമാക്ക് ഇന്നാല് സൊന്റേമ്. 16 ആണ്ടവാന് അമ്‌സാത്തോഡ സൊല്ലുവ കല്‌പനോഡാമ് മുക്ക്യമാന ദൂദാന് മാഡുവ ജദ്ദത്തോഡാമ് സാമി ആലാക്കുവ ആലാപ്പോഡാമ് മേലോഗാത്ത്‌ലിന്ത് ഇ്റാഗി ബരുവാന്. അദുക്കുള ക്‌റ്‌സ്‌ത്ത്‌ന നമ്പി സത്തവാര് മുദാല് ഉജുര്‌ളാഗുവാര്. 17 പ്‌റ ഇന്നാല് ഉജുരോഡ മിച്ച ഇര്‌ക്കുവ നമ്മ സത്തിന്ത് ഉജുര്‌ളാഗ്‌നവാരോഡൊപ്പ ബാന്‌ല് ആണ്ടവാന്‌ന കാണ്യ മഞ്ച്‌ല് ഒന്റായി പോല. അത്തെ നമ്മ എന്നാല്‌ക്ക്‌മ് ആണ്ടവാനോഡൊപ്പ ഇര്‌ക്ക്‌ല. 18 അദ്‌നാലെ ഈ സൊല്ലു സുലാക്കഗാള്‌ന ആങ്കീങ്ക് സൊല്ലികൊണ്ടു ദയിരപട്ട് ഇര്‌ന്. |
New Life Computer Institute