1 പത്ത്‌റോസു 5 - സാമി സേദിഏസ്സ്ഗാറാര് പെ്ളേപ്പ്‌മ് സാമി കാപാറ്റുവാദ്‌മ് 1 നിമ്മ് കൂട്ടാത്ത്‌ല മൂപ്പനാമ്‌ഗാള്‌ല് ഒന്റു മൂപ്പാന്‌മ് ക്‌റ്‌സ്‌ത്ത് പട്ട കൊഡിമെഗാള്‌ന കണ്ണാറ കണ്ടവാന്‌മ് ബര്യ പോവ മദ്‌പ്പ്‌ക്ക്‌ പങ്ക്‌ഗാറാന്‌മ് ആയിര്‌ക്കുവ നാന് നിമാക്ക് ബുദ്ദിസൊല്ലുവാദ് എന്തെന്റ് സൊന്ന, 2 സാമിന നമ്പി നഡാക്ക്‌ന്റവാര് കൂട്ടന സാമി നിമ്മ് കയിക്ക് നോഡ്യ തന്ത്‌റ്‌ക്ക്‌ന്റാന്. അദ് ആരാറ്റ നത്തുവ നത്ത്‌ക്ക് ബേ്ണ്ടി ഗേഗാദെ സാമി ആസെപഡുവ പാസെ മനേസ്സാറ ഗേന്. ഇത്തെ ഗേഗാട്ടി എന്താറ്റ ഉവഗര കെ്ഡേക്ക്‌മെന്റ് നെനേത്ത് ഗേഗാദെ അവാര്‌ന കയിതാങ്ക്യ ബേ്ണ്ടി ഒരുക്ക ഉള്ളവാര് ആയിര്‌ക്കുഡൊ. 3 നിമ്മ അദ് ഗേഗാട്ടി അവാര്‌ന ആള്യ അദിഗര കെ്ഡേത്ത്‌റ്‌ക്ക്‌ന്റ് എന്റ് നെനേത്ത് ഗേഗാദേന്, അദ്‌ക്ക് ബദ്‌ല അവാര്‌ന നല്ലവാരായി പെ്ളേക്ക്യ ബെക്കുവ ദിന്‌സ്‌ല് നിമ്മ പെ്ളേത്ത് കാട്ടുഡൊ. 4 അത്തെ പെ്ളേത്തദാന നോഡി നഡാത്ത്‌ന്റവാര്‌ക്ക് തലെവാന് ആയിര്‌ക്ക്‌ന്റവാന് ബര്‌ഗാട്ടി എന്നാല്‌ക്ക്‌മ് മദ്‌പ്പിര്‌ക്കുവ ഗിര്യാഡ നിമാക്ക് കെ്ഡേക്ക്‌മ്. 5 അദേപാസെത്തെ ബീ്ണാരെ, മൂപ്പനാമ് സൊല്ലുപഡിക്ക് നഡാന്. നിമ്മ ആങ്കീങ്ക് തണിമോഡ കെ്ട്ട്‌പട്ട് നഡാന്. എന്ത്‌ക്കെന്റ് സൊന്ന, <<പെരിമെനായ സൊല്ലിനഡാക്ക്‌ന്റവാര്‌ന സാമി പോട്ടിഗാറാരായി കണാക്ക് മാഡ്‌ന്റാന്. സാമി കണ്ണ്‌ക്ക് തണിന്ത് പെ്ളേക്ക്‌ന്റവാര്‌ന സാമി അപ്പാര ഗവപഡ്‌ന്റാന്.>> 6 അദ്‌നാലെ സാമി ബെത്ത്‌റ്‌ക്കുവ ഗളിഗേക്ക് നിമാന ദൊഡ്ഡവാന് മാഡ്യ സക്‌തിര്‌ക്കുവ സാമി കയിക്കഡി തണിമോഡ ഇര്‌ന്. 7 നിമ്മ് കാര്യഗാള്‌നെല്ല നോഡുന്റവാന് സാമി ആയിര്‌ക്കുവാദ്‌നാലെ നിമ്മ അര്‌ക്കപഡുവ കാര്യഗാള്‌നെല്ല സാമിക്ക് ഒപ്പുസുനു. 8 നിമ്മ അഡക്കൊദുക്കത്തോഡ ഇര്‌ക്ക്‌ന്റവാര്‌മ് സൂസാരിത്തിര്‌ക്ക്‌ന്റവാര്‌മ് ആയിര്‌ന്. എന്ത്‌ക്കെന്റ് സൊന്ന നിമ്മ് പോട്ടിഗാറാന് സെയിത്താന് മൊരേവ സിങ്കന പാസെ ആര്‌ന പ്‌ഡിത്ത് നുങ്ക്യ എന്റ് നോഡികൊണ്ടു സുറ്റ്യറ്റി നഡാക്ക്‌ന്റാന്. 9 ഉലഗാത്ത്‌ല് എല്ലാ സാരിമ് ഇര്‌ക്കുവ ഏസ്സ്‌ഗാറാര് ഇദേ കൊഡിമെത്തെ പട്ട്‌കൊണ്ടു ഇര്‌ക്ക്‌ന്റാര്. അദ്‌നാലെ നിമ്മ നമ്പിര്‌ക്കുവ നമ്പിക്കേല് ഒറേപ്പുള്ളവാരായി ഇന്ത് നിമ്മ് പോട്ടിഗാറാന് സെയിത്താന്‌ക്ക് അഡിമെപഡാദെ ഇര്‌ക്കുഡൊ. 10 എല്ലാ പ്‌ണ്ണ്യാമ് ഗേവ സാമി ഏസ്സ് ക്‌റ്‌സ്‌ത്ത്‌ന ബെത്ത് എന്നാല്‌ക്ക്‌മ് ദൊഡ്ഡവാര് ആയിര്‌ക്ക്യ ബേ്ണ്ടി നിമാന ബ്‌ളിത്ത്‌റ്‌ന്റാന്. അദ്‌നാലെ നിമാക്ക് ബരുവ അദിഗ കാല ഇര്‌ക്കാത്ത കജട്ടന താങ്ക്‌ന പ്‌റ അയാള് നിമാന കൊറേവില്ലത്തവാര് മാഡിമ് കയി താങ്കിമ് ബില പഡിസിമ് ഒറേപ്പുള്ളവാര് മാഡിമ് ബെക്കുവാന്. 11 സാമി എന്നാല്‌ക്ക്‌മ് എല്ലാദ്‌നാമ് ആളുവ അദിഗര ഉള്ളവാന് ആയിര്‌ക്കുഡൊ. ആമേന്. കഡേസി ബിനാത്തി സൊല്ലുവ നായ 12 ഏസ്സ്‌ഗാറാന്‌മ് എനാക്ക് നമ്പ്യ മുഡിന്റവാന്‌മ് ആന സീലാസ്‌ന ബെത്ത് ഈ എ്ള്‌ത്ത് നാന് സുരുക്കാത്ത്‌ല് എ്ള്‌ദിര്‌ക്ക്‌ന്റെ. നിമാന ദയിരപഡിസ്യാമ് ഇന്നാല് നിമ്മ പെ്ളേക്കുവാദ് സാമി നിമ്മോഡ ബെത്ത്‌റ്‌ക്കുവ നേര്‌മാന ഗവനാലെത്തെന്റ് നിമാക്ക് നാന് സൊല്ല്യാമ്‌ത്തെ ഈ എ്ള്‌ത്ത് എ്ള്‌ദുവാദ്. അദ്‌ല് നിമ്മ ഒറേപ്പുള്ളവാരായിര്‌ക്കുഡൊ. 13 നിമ്മോഡൊപ്പ തെരിന്തെ്ഡ്‌ത്ത ബാവിലോണുല ഏസ്സ്‌ഗാറാര് കൂട്ടാമ് നാന് എന്ന് മഗാന്‌ന പാസെ നോഡുവ മര്‌ക്കോസുമു നിമ്മ നലമായി ഇര്‌ക്ക്‌ന്റ്‌റ എന്റ് കേ്ള്‌ക്ക്‌ന്റാര്. 14 നിമ്മ ആങ്കീങ്ക് കാണ്‌ഗാട്ടി സീവാന്‌ബെത്ത് നിമ്മ മുത്തമിക്കി ബിനാത്ത്‌ന്. ക്‌റ്‌സ്‌ത്ത്‌ന നമ്പി പെ്ളേക്കുവ നിമ്മൊട്ടുക്കു നിമ്മ്‌ദ്യായിര്‌ന്. |
New Life Computer Institute