1 പത്ത്‌റോസു 4 - സാമി സേദിസാമിക്ക് ബേ്ണ്ടി പെ്ളേക്കുഡൊ 1 അദ്‌നാലെ ക്‌റ്‌സ്‌ത്ത് സരിഗലാത്ത്‌ല് കജട്ട പട്ടാദ്‌നാലെ നിമ്മാമ് അത്തവ കജട്ടപാഡ്‌ഗാള്‌ന താങ്ക്യ ഒരുക്ക ഉള്ളവാര് ആയിര്‌ക്കുഡൊ. അത്തവ കജട്ടപാഡ്‌ഗാള്‌ന താങ്ക്‌ന്റവാര് പാവാക്ക് സിക്കാദെ പെ്ളേക്കുവാര്. 2 അദ്‌നാലെ ഇന്നി നിമ്മ ബൂമില് നിമ്മ് പിര്യാക്ക് പെ്ളേക്കാദെ നിമ്മ എത്തെ പെ്ളേക്കുഡൊ എന്റ് സാമി ആസെപഡ്‌ന്റാനൊ അദേപാസെ നിമ്മ പെ്ളേക്കുഡൊ. 3 സാമി സൊല്ലുപഡിക്ക് നഡാക്കാത്ത ആള്‌ഗാള് ഗേവ കാര്യഗാള്‌ന ഗേന്ത് കൊണ്ടു നിമ്മ മുന്നുക്കു പെ്ളേത്തിന്ത്‌റ്. അത്തെ പെ്ളേത്ത്‌റ്‌ക്കാട്ടി ബേസ്യാഡി നഡാക്കുവാദ്‌ല്‌മ്, ആസെപാഡ് പട്ട് നഡാക്കുവാദ്‌ല്‌മ്, ബോദേ്റുവ ജാദിഗാള്‌ന കുഡിക്കുവാദ്‌ല്‌മ്, കുഡിത്ത്‌കൂത്താഡി നഡാക്കുവാദ്‌ല്‌മ്, കൂട്ട കൂഡി കുഡിത്ത് പിര്യാക്കിക്കി നഡാക്കുവാദ്‌ല്‌മ്, കുമ്മുഡ ബേ്ഡ എന്റ് സൊല്ലിര്‌ക്കുവ സെലെന കുമ്മുഡുവ കാര്യാല്‌മ് നിമ്മ എഞ്ചോ കാല മദിമറാന്തിന്താദ് മദി. 4 ആന അയി ഗളിഗേല് നിമ്മോഡൊപ്പ ഇന്ത പള്യ എ്ണേവുഗാറാര് ഇന്നാല് നിമ്മ അവാരോഡൊപ്പ എ്ണേന്ത് കെ്ട്ട കാര്യഗാള് ഗേഗാത്താദ്‌ന കണ്ട് അദിസ്യപട്ട് നിമാന കുറ്റ സൊന്റാര്. 5 സത്തവാര്‌നാമ് ഉജുരോഡ ഇര്‌ക്ക്‌ന്റവാര്‌നാമ് ദെ്ണ്ടിക്ക്യ ഒരിങ്കിര്‌ക്കുവ സാമി മുന്നുക്കു അവാര് താനെ കണാക്ക് കൊഡുക്കുവാദ്‌ക്കായി ബര്‌മ്. 6 അദ്‌ക്ക് ബേ്ണ്ടിത്തെ സത്തവാര് ഉജുരോഡ ഇര്‌ക്കാട്ടിതാനെ അവാര്‌ക്ക് നല്ല സേദിന സൊന്നാദ്. എല്ലാ ആള്‌ഗാള്‌ക്ക് കെ്ഡേക്കുവ ദെ്ണ്ടണെന പാസെ അവാര്‌മ് സത്താര്. ആന അവാര് നിഗാല്‌നാലെ സാമ്യോഡ പെ്ളേക്ക്‌ന്റാര്. സാമി ബരാത്ത്‌ല് ഗേവ നല്ല ഗിലാസഗാറാന് 7 ആന ഈ ഉലഗാത്ത്‌ലിര്‌ക്കുവാദെല്ല അളിവാദ്‌ക്കുള്ള കാല അഡ്‌ത്ത്‌റ്‌ന്റ്. അദ്‌നാലെ നിമ്മ സൂസാരിത്തിര്‌ന്റവാര്‌മ് അഡക്കൊദുക്കത്തോഡ ഇര്‌ക്ക്‌ന്റവാര്‌മ് ആയി പരേസി കൊണ്ടേ ഇര്‌ന്. 8 നിമ്മ ആങ്കീങ്ക് ഉജുരുക്കുജുര സീവാന്‌ബെത്ത് നഡാക്ക്‌ന്റവാര് ആയിര്‌ന്. അദ്‌ത്തെ എല്ലാദ്‌ക്ക്‌മ് ബ്‌ഡ മുക്ക്യമാന കാര്യ. എന്ത്‌ക്കെന്റ് സൊന്ന നിമ്മ അത്തെ സീവാന്‌ബെത്ത് നഡാക്കാട്ടി സീവാന്‌ബെത്ത് നഡാക്ക്‌ന്റവാര് എത്ത്‌റ ദൊഡ്ഡ പാവ ഗേന്താല്‌മ് അദ്‌ന നിമാക്ക് പൊറുക്ക്യ മുഡിമ്. 9 നിമ്മ ആങ്കീങ്ക് ഒന്റൊന്റാള് ബീ്ഡ്‌ക്ക് പോഗാട്ടി ങ്കൊറുങ്കൊറുക്കാദെ മനേസ്സാറ തങ്കാരിക്കുഡൊ. 10 സാമിക്ക് പല ദിന്‌സ് ബരഗാള് ഇര്‌ക്ക്‌ന്റ്, അദ്‌ന നലമായി നോഡി നഡാത്ത്‌ന്റവാര് ആയിര്‌ക്കുവ നിമാക്ക് ഒന്റൊന്റാള്‌ക്ക്‌മ് കെ്ഡേത്ത അയി ബരഗാള്‌ന ബെത്ത് കൊണ്ടു അഡ്‌ത്തവാര്‌ക്ക് നല്ലാദ് ഗേന്. 11 നായ സൊല്ല്യ ബര കെ്ഡേസ്‌നവാന് സാമി സൊല്ലുസുലാക്കാത്ത്‌ല് എന്ത്‌ന സൊല്ലിര്‌ക്ക്‌ന്റൊ അദ്‌ന താനെത്തെ സൊല്ലുഡൊ. അഡ്‌ത്തവാര്‌ക്ക് ഉവഗര ഗേയ ബര കെ്ഡേസ്‌നവാന് സാമി കൊഡുത്ത സക്‌തിക്ക് തഗ്‌ന്ത പാസെ ഗിലാസ ഗേഡൊ. അത്തെ നിമ്മ ഗേവ എന്ത് കാര്യഗാള്‌മ് അദ്‌ന ഗേയ കയിതാങ്കുവ ഏസ്സ് ക്‌റ്‌സ്‌ത്ത് പേര്‌ല് സാമി ദൊഡ്ഡവാന് ആഡൊ. സാമി എന്നാല്‌ക്ക്‌മ് പേര്‌പെരിമേമ് എല്ലാദ്‌നാമ് ആളുവ അദിഗരാമ് ഉള്ളവാന് ആയിര്‌ക്കുഡൊ. ആമേന്. ഏസ്സ്‌ഗാറാന് ആനാദ്‌ക്കുള്ള കജട്ടഗാള് 12 എനാക്ക് മെച്ച്‌പ്‌ഡിത്തവാരെ, നിമ്മ പട്ട് പോവ കജട്ടഗാള്‌ന പറ്റി അദിസ്യപഡാദേന്, നിമ്മ് നമ്പിക്കേന സോദണെ ഗേയ ബേ്ണ്ടി ബരുവ കജട്ടഗാള് തീമേലെ പോവ പാസെ ഇര്‌ക്കുവാദ്‌നാലെ അദ് ആര്‌ക്ക്‌മ് ബരാത്ത കാര്യ എന്റ് നെനേക്കാദേന്. 13 ആന ക്‌റ്‌സ്‌ത്ത് പട്ട കൊഡിമെഗാള്‌ക്ക് നിമ്മ പങ്ക്‌ഗാറാര് ആവാദ്‌നാലെ നിമ്മ പിര്യപൊങ്കുന്. അത്തെ നിമ്മ കൊഡിമെ പട്ടദാന ക്‌റ്‌സ്‌ത്ത് തനാക്കിര്‌ക്കുവ മദ്‌പ്പ്‌ല് തിരിഗി ബര്‌ഗാട്ടി നിമാക്ക്‌മ് ദൊഡ്ഡ പിര്യ ബര്‌മ്. 14 ക്‌റ്‌സ്‌ത്ത്‌ന നമ്പി നഡാക്കുവാദ്‌നാലെ നിമ്മ നാണഗെ്ട്ടദാന നിമ്മ ബാഗ്യകേ്ട്ടവാര്‌ത്തെ. എന്ത്‌ക്കെന്റ് സൊന്ന മദ്‌പ്പുള്ള നിഗാലാന സാമിനിഗാല് നിമ്മ് മനേസ്സ്‌കുളാക്ക് ഇര്‌ക്ക്‌ന്റല്ല. 15 നിമ്മ കൊലെഗാറാനായൊ, ത്‌റ്‌ട്ടാനായൊ, കെ്ട്ട കാര്യ ഗേന്റവാനായൊ, മല്ലുണ്ടാക്ക്‌ന്റവാനായൊ കജട്ട പഡുവ ഗെദി നിമാക്ക് ബര്യ പാങ്കില്ലെ. 16 അദ്‌ക്ക് ബദ്‌ല ഏസ്സ്‌ഗാറാനായി കജട്ട താങ്കുവ ഗെദി ബന്തദാന നാണപഡുവ തേവില്ലെ, ഏസ്സ്‌ഗാറാന് ആനാദ്‌നാലെ സാമിക്ക് നണ്ണിത്തെ സൊല്ലുഡൊ. 17 നായ കേ്ള്‌ക്കുവ സമ്യ അഡ്‌ത്ത്‌റ്‌ക്ക്‌ന്റ്. അദ് മുദാല് സാമിക്ക് പട്ടവാര്‌നാത്തെ കേ്ള്‌ക്കുവാദ്. അത്തെ നമ്മ് പട്ട്‌ലിന്ത്‌ത്തെ നായ കേ്ള്‌ക്കുവാദ് തുഡാങ്കുവദാന സാമി സൊല്ലുവ നല്ല സേദിന നമ്പാത്തവാര് ഗെദി എന്താമ്? 18 <<നേര്‌മെഗാറാര് ഗുഡി തപ്പിസി കഡാക്കുവാദ് ബുദ്ദിമുട്ടുള്ള കാര്യായിന്തദാന സാമി സൊല്ലുപഡി നഡാക്കാദെ പാവ ഗേന്റവാര് ഗെദി എന്താമ്?>> 19 അദ്‌നാലെ സാമി പിര്യാക്ക് കജട്ട പഡുവാദ്‌ന താങ്ക്‌ന്റവാര് നല്ലാദ് ഗേന്ത് കൊണ്ടു സൊന്ന പാസെ ഗേന്റവാനായി ദ്‌ട്ട്‌സ്‌നവാന് കയിക്ക് തമ്മ് നിഗാല് കുട്ടിന ഒപ്പുസുഡൊ. |
New Life Computer Institute