1 പത്ത്‌റോസു 3 - സാമി സേദിആളാന്പെ്ണ്ട് 1-2 അദേപാസെ പെ്ണ്ടച്ച്യാമെ, നിമ്മ് സൊന്ത ആളനച്ചനാമ്‌ക്ക് കെ്ട്ട്‌പട്ട് നഡാന്. അത്തെ നഡാന്ത നിമ്മ് കൂട്ടാത്ത്‌ല് സാമി സൊല്ലുസുലാക്ക പഡി നഡാക്കാത്തവാര് ഇന്തദാന തമ്മ് പെ്ണ്ടച്ച്യാമ് സാമിക്ക് അഞ്ചി സുത്താപ്പോഡ പെ്ളേക്കുവാദ്‌ന കണ്ട് ഒന്റുമു സൊല്ലാദെ താനെ നിമാക്കിര്‌ക്കുവ നല്ല ഗുണനാലെ അവാര്‌ന സാമിസാരി തിരിക്ക്യ മുഡിമ്. 3 തലേന മൂത്തഡിത്ത് നഡാക്കുവാദൊ, തങ്കനഗെഗാള്‌ന ഇക്കി നഡാക്കുവാദൊ, അളഗളാഗ അലങ്കരിക്കുവ ഉഡുപ്പുന ഇക്കി നഡാക്കുവാദൊ ഇത്തെ ഉദ്ദാക്കിര്‌ക്കുവ അളാഗല്ല നിമ്മളാഗ്, 4 അദ്‌ക്ക് ബദ്‌ല ഈ അളാഗ് നിമ്മ് നെഞ്ച്‌കുളാക്കിന്ത് ബരുഡൊ. അദ് എന്നാല്‌ക്ക്‌മ് മങ്കാത്ത മര്യാദിമ് തണിമേമ് ഇര്‌ക്കുവ മനേസ്സ്‌ത്തെ. അദ്‌ത്തെ സാമി കണ്ണ്‌ക്ക് ദൊഡ്ഡ കാര്യ. 5 ഇത്തേത്തെ മുന്നുക്കു സാമിന നെഞ്ചഡെ ബെത്തിന്ത സാമിക്ക് പട്ട പെ്ണ്ണ്‌മക്കാള് സൊന്ത ആളനാമ്‌ക്ക് കെ്ട്ട്‌പട്ട് തമാന താനെ അളാഗ്‌മാഡിന്താദ്. 6 അദേപാസെ സാറാമ് തന്ന് ആളാന് അവുറഗാമ്‌ന പണ്ണാഡി എന്റ് ബ്‌ളിത്ത് ആളാന്‌ക്ക് കെ്ട്ട്‌പട്ട് നഡാന്തിന്താള്. നിമ്മ നല്ലാദ് ഗേന്ത് കൊണ്ടു നിമാന അഞ്ചിക്കെപ്‌ഡ്‌സുവ ഏദ് കാര്യാക്ക്‌മ് നിമ്മ അഞ്ചാദിന്തദാന സാറാക്ക് നിമ്മ നേര്‌മാന പ്‌ള്ളെഗാളാവുറു. 7 അദേപാസെ ആളനച്ചനാമെ, നിമ്മ് പരേസാക്ക് തഡേസ ബരാദിര്‌ക്ക്യ ബേ്ണ്ടി നിമ്മ് പെ്ണ്ടച്ച്യാമോഡ ബുദ്ദ്യോഡ നഡാന്ത്‌പ്‌ഡിത്ത് ഗേന്. എന്ത്‌ക്കെന്റ് സൊന്ന പെ്ണ്ണ്‌മക്കാള് നിമാന ബ്‌ഡ ബില ഇല്ലത്തവാര്‌ത്തെ. സാമി ദാന ഗേന്ത്‌റ്‌ക്കുവ ഉജുരുക്കു നിമാന പാസെ അവാര്‌മ് ഉരിമെഗാറാര് ആയിര്‌ക്കുവാദ്‌നാലെ നിമ്മ അവാര്‌ക്ക് കൊഡുക്കുവ മദ്‌പ്പ്‌ന കൊഡുക്കുഡൊ. നല്ലാദ് ഗേയ ബേ്ണ്ടി കജട്ടപഡ്‌ന് 8 സുരുക്കാത്ത്‌ല് സൊന്ന: നമ്മൊട്ടുക്കു ഒത്തിമോഡ പെ്ളേക്ക്‌ന്റവാര്‌മ്, ബേ്റ്‌വേന്റവാര്‌മ്, അണ്ണാര്‌തമ്പ്യാര്‌ന പാസെ സീവാന്‌ബെത്ത് നഡാക്ക്‌ന്റവാര്‌മ്, ഗവപഡ്‌ന്റവാര്‌മ്, തണിമെ ഇര്‌ക്ക്‌ന്റവാര്‌മ് ആയി നഡാന്. 9 നിമാക്ക് കെ്ട്ടാദ് ഗേന്റവാര്‌ക്ക് കെ്ട്ടാദ് ഗേഗാദേന്. നിമാന നൊഡിന്റവാര്‌ന നിമ്മ നൊഡ്യാദേന്. അദ്‌ക്ക് ബദ്‌ല അവാര്‌ക്ക് നല്ലാദ് ബരുഡൊ എന്റ് സൊല്ലുനു. എന്ത്‌ക്കെന്റ് സൊന്ന സാമി തരുവ ബാക്ക്‌വരഗാള്‌ക്ക് പങ്ക്‌ഗാറാര് ആയ ബേ്ണ്ടിത്തെ നിമാന ബ്‌ളിത്ത്‌റ്‌ക്കുവാദ്. 10 എന്ത്‌ക്കെന്റ് സൊന്ന സാമി സൊല്ലുസുലാക്കാത്ത്‌ല് ഇത്തെ എ്ള്‌ദിര്‌ക്ക്‌ന്റ്, <<സുഗസുഗാത്ത് പെ്ളേക്ക്യാമ്, പിര്യപിര്യാത്ത്‌റ്‌ക്കുവ നാള്‌ഗാള്‌ന കാണ്യാമ് ആസെപഡ്‌ന്റവാന്, കെ്ട്ട നായ സൊല്ലാദേമ് പൊയി സൊല്ലാദേമ് തന്ന് ബായിന അഡാക്കി ബെക്കുഡൊ. 11 അയാള് കെ്ട്ട കാര്യഗാള് ഗേഗാദെ നല്ല കാര്യഗാള് ഗേഡൊ. അഡ്‌ത്തവാരോഡ പിര്യപിര്യാത്തിന്ത് അദേപാസെ താനെ പിര്യാത്തിര്‌ക്ക്യ അയാള് ഓരാഡി കൊണ്ട്‌റ്‌ക്കുഡൊ. 12 ആണ്ടവാന് നേര്‌മെഗാറാര്‌ന നോഡികൊണ്ടു ഇര്‌ക്ക്‌ന്റാന്. അവാര് പരേസന സാമി കാദ് കൊഡുത്തു കേ്ള്‌ക്ക്‌ന്റാന്. ആന കെ്ട്ടാദ് ഗേന്റവാര്‌ക്ക് ആണ്ടവാന് ന്‌ഡി തിരിഗിര്‌ന്റാന്.>> 13 നല്ല കാര്യഗാള് ഗേവാദ്‌ല് നിമ്മ ബെജെഗാറാര് ആയിന്തദാന ആര് നിമാന കൊഡിമെപഡുസുവാര്? 14 ആന നേര്‌മുള്ള കാര്യ ഗേന്ത് ഗുഡി കജട്ട ബന്തദാന നിമ്മ ബാഗ്യകേ്ട്ടവാര്‌ത്തെ. <<അവാര് നിമാന അഞ്ച്‌സുവാദ്‌ന കണ്ട് നിമ്മ അഞ്ചാമ് ബേ്ഡ, അദ്‌റാമ് ബേ്ഡ.>> 15-16 ആണ്ടവാനാന ക്‌റ്‌സ്‌ത്ത്‌ന നിമ്മ് മനേസ്സ്‌ല് മദ്‌സുഡൊ. നിമാക്കിര്‌ക്കുവ നെഞ്ചഡെന പറ്റി കേ്ള്‌വി കേ്ള്‌ക്ക്‌ന്റവാരോഡെല്ല തണിമോഡാമ് മര്യാദോഡാമ് ബദ്‌ല് സൊല്ല്യ നിമ്മ ഏദ്‌ഗളിഗേമ് ഒരിങ്കിര്‌ക്കുഡൊ. ക്‌റ്‌സ്‌ത്ത് സൊല്ലുപഡിക്ക് പെ്ളേക്കുവാദ്‌നാലെ നിമ്മ ഗേവ നല്ല കാര്യഗാള്‌ന പറ്റി കുറ്റ സൊന്റവാര് തമ്മ സൊന്ന കുറ്റന നെനേത്ത് നാണഗെ്ട്ട് പോയ ബേ്ണ്ടി നിമ്മ് മനേസ്സ് സുത്താപ്പുള്ളാദ് ആയിര്‌ക്കുഡൊ. 17 നിമ്മ നല്ലാദ് ഗേന്താദ്‌നാലെ കജട്ട പഡുവാദ് സാമിക്ക് പിര്യര്‌ക്കുവ കാര്യ ആയിന്തദാന കെ്ട്ടാദ് ഗേന്ത് കജട്ട പഡുവാദ്‌ന ബ്‌ഡ അദ് നല്ലാദ്‌ത്തെ. 18 എന്ത്‌ക്കെന്റ് സൊന്ന നേര്‌മല്ലത്തവാര് ആയിര്‌ക്കുവ നിമാന സാമി പട്ട്‌ക്ക് എ്ഡ്‌ത്ത് പോയ ബേ്ണ്ടി നേര്‌മെഗാറാനാന ക്‌റ്‌സ്‌ത്ത് നിമ്മ് പാവാക്ക് ബേ്ണ്ടി ഒന്റു ജമ്പ് സത്താന്. അയാള് സരിഗലാത്ത്‌ല് സത്താല്‌മ് നിഗാല്‌നാലെ പെ്ളേക്ക്‌ന്റാന്. 19 ജെയില്‌ക്ക് ഇക്കി ബെത്തിന്ത നിഗാല്‌ഗാള്‌ക്ക് നിഗാല്‌നാലെ അയാള് പോയി നല്ല സേദിന സൊന്നാന്. 20 ഈ നിഗാല്‌ഗാള് മുന്നുക്കു നോഗെ കാലാത്ത്‌ല് ദൊഡ്ഡ പെ്ട്ടി മാഡികൊണ്ട്‌റ്‌ക്കുവ ഗളിഗേല് സാമി പൊറിമോഡ കാത്തിന്ത്‌മ് സൊല്ലുപേസ് കേ്ള്‌ക്കത്തവാര് ആയിന്താര്. അവാര്‌ല് ലേസ ആള്‌ഗാള്, എന്റ് സൊന്ന എ്ട്ടാള്‌ത്തെ നീര്‌ലിന്ത് തപ്പിസി കഡാന്താദ്. 21 അവാര് നീര്‌മേലെ തപ്പിസി കഡാന്താദ്‌ക്ക് സമാത്തെ ഇന്നാല് നീര്‌ക്ക് മുളുഗുവ മുളുക്ക. അദ് നിമാന കാപാറ്റ്‌ന്റ്. ഈ മുളുക്ക എന്നുവാദ് സരിഗലാത്ത്‌ല എ്ള്‌ക്ക്‌ന കച്ചി തള്ളുവ മുളുക്കല്ല. ഏസ്സ് ക്‌റ്‌സ്‌ത്ത് ഉജുര്‌ളാഗ്‌നാദ്‌ന ബെത്ത് സാമി കണ്ണ്‌ക്ക് നല്ല മനേസ്സുള്ളവാര് ആയ ഗേവ ഒപ്പന്താത്തെ. 22 അയാള് മേലോഗാക്ക് പോയി സാമി ബല സാരി ഇര്‌ക്ക്‌ന്റാന്. ദൂദാര്‌ഗാള്‌മ് അദിഗരഗാള്‌മ് സക്‌തിഗാള്‌മ് അയാള് കാല്‌കഡി ആയിര്‌ക്ക്‌ന്റാര്. |
New Life Computer Institute