1 ഓഗന്നാന് 4 - സാമി സേദിഏദ് നിഗാലെന്റ് സോദണെ ഗേഡൊ 1 എനാക്ക് മെച്ച്‌പ്‌ഡിത്തവാരെ, സാമിനിഗാല് സൊന്റെന്റ് ഉറുട്ടു സൊല്ലുവ എഞ്ചോ ആള്‌ഗാള് ഇന്നാല് ഉലഗാത്ത്‌ല് തുമ്പിര്‌ന്റാര്. അദ്‌നാലെ സാമിനിഗാല് സൊല്ലിത്തെ സൊല്ലുവാദ് എന്റ് സൊല്ലുന്റവാര്‌ന ഒട്ടുക്കു നമ്പാദെ അവാരോഡ ഇര്‌ക്കുവ നിഗാല്‌ഗാളെല്ല സാമി നിഗാല്‌ത്തേഗ അല്ലാഗ എന്റ് സോദണെ ഗേന്ത് കണ്ട്‌പ്‌ഡിക്കുഡൊ. 2 അത്തെ സോദണെ ഗേഗാട്ടി ആരാരെല്ല സാമിനിഗാല്‌ല് സൊല്ലുന്റാര് എന്നുവാദ്‌ന നമാക്ക് കാണ്യ മുഡിമ്. സാമിനിഗാല് സൊല്ല്യ സൊല്ലുഗാട്ടി സൊല്ലുന്റവാര് ഏസ്സ് ക്‌റ്‌സ്‌ത്ത് മന്‌സാനായി പ്‌റാന്ത് ബന്ത് ഗേന്ത കാര്യഗാള്‌ന ബെത്ത്‌ത്തെ സാമിന പറ്റി സൊല്ലുവാര്. 3 ഏസ്സ് ക്‌റ്‌സ്‌ത്ത് മന്‌സാനായി പ്‌റാന്ത് ബന്ത് ഗേന്ത കാര്യഗാള്‌ന ബെത്ത് സാമിന പറ്റി സൊല്ലാത്തവാര്‌ല് ഇര്‌ക്കുവ നിഗാല് സാമി നിഗാലല്ല. അദ് ക്‌റ്‌സ്‌ത്ത് എന്റ് സൊല്ലി ആള്‌ഗാള്‌ന ഏമാത്ത്‌ന്റവാന് നിഗാല്‌ത്തെ. അവാന് ബരുവാനെന്റ് നിമ്മ കേ്ട്ട്‌റ്‌ക്ക്‌ന്റ്‌റല്ല. അയാള്‌ന പാസെ ഇര്‌ക്കുവ ആള്‌ഗാള് ഇന്നാല് താനെ ഉലഗാത്ത്‌ല് ഇര്‌ക്ക്‌ന്റാര്. 4 ആന പ്‌ള്ളെഗാളെ, സാമിനിഗാല്‌ല് സാമിപ്‌ള്ളെഗാള് ആയിര്‌ക്കുവ നിമ്മ അയാള്‌ന പാസെ ഇര്‌ക്കുവ ആള്‌ഗാള്‌ന സോലുസിര്‌ക്ക്‌ന്റ്‌റ്. എന്ത്‌ക്കെന്റ് സൊന്ന നിമ്മോഡിര്‌ക്കുവ സാമിനിഗാല് അവാരോഡിര്‌ക്കുവ നിഗാല്‌ന ബ്‌ഡ ദൊഡ്ഡവാന്‌ത്തെ. 5 ക്‌റ്‌സ്‌ത്ത് എന്റ് സൊല്ലി ഏമാത്ത്‌ന്റവാന്‌ന പാസെ ഇര്‌ക്കുവ ആള്‌ഗാളെല്ല ഈ ഉലഗാക്ക് പട്ടവാര്. അദ്‌നാലെ അവാര് ഈ ഉലഗാത്ത്‌ല കാര്യഗാള്‌ന പറ്റി സൊന്റാര്. ഉലഗാത്ത്‌ലവാര് അവാര് സൊല്ലുവാദ്‌ന കേ്ള്‌ക്ക്‌ന്റാര്. 6 ആന എമ്മ സാമിക്ക് പട്ടവാര്‌ത്തെ. സാമിന തെരിന്റവാരെല്ല എമ്മ സൊല്ലുവാദ്‌ന കേ്ള്‌ക്ക്‌ന്റാര്. സാമിന തെര്യാത്തവാര് എമ്മ സൊല്ലുവാദ്‌ന കേ്ള്‌ക്കുവാദില്ലെ. ഇദ്‌ന നോഡി സാമിനിഗാല്‌ന ബെത്ത് സൊന്റവാര് ആരെന്റ്‌മ് സാമിനിഗാല് സൊന്റെന്റ് ഉറുട്ടു സൊല്ലുന്റവാര് ആരെന്റ്‌മ് നമാക്ക് കാണ്യ മുഡിമ്. സാമിത്തെ സീവാന് 7 പൊന്നനാമെ, സീവാന് സാമിലിന്ത് കെ്ഡേക്കുവാദ്‌നാലെ നമ്മ ആങ്കീങ്ക് സീവാന്‌ബെത്ത് നഡാക്കുഡൊ. സീവാന്‌ബെത്ത് നഡാക്ക്‌ന്റവാരെല്ല സാമിനിഗാല്‌ല് പ്‌റാന്തവാര്‌മ് സാമിന തെരിന്റവാര്‌മ്‌ത്തെ. 8 സാമി സീവാന്‌ത്തെ. സാമി സീവാന്‌ത്തെന്റ് തെര്യാത്താവാര്‌ക്ക് ആങ്കീങ്ക് സീവാന്‌ബെത്ത് നഡാക്ക്യ മുഡിവാദില്ലെ. 9 അപ്പാന് സാമി നമാക്ക് എന്നാല്‌ക്ക്‌മ് ഇര്‌ക്കുവ പെ്ളേപ്പ് തര്യ ബേ്ണ്ടി തന്ന് ഒന്റേ ഒന്റു മഗാന്‌ന ഉലഗാക്ക് സൊല്ലി ബ്‌ട്ട് താന് നമ്മോഡ ബെത്ത്‌റ്‌ക്കുവ സീവാന്‌ന നമാക്ക് കാട്ടി തന്താന്. 10 നമ്മ സാമ്യോഡ സീവാന്‌ബെത്ത്‌റ്‌ക്കാലെ. ആന സാമി നമ്മോഡ സീവാന്‌ബെത്തിന്താദ്‌നാലെ നമ്മ ഗേന്ത പാവാക്ക് പൊറിമെ കെ്ഡേക്ക്യ ബേ്ണ്ടി തന്ന് മഗാന്‌ന സൊല്ലി ബ്‌ട്ടാന്. ഇദ്‌ത്തെ നേര്‌മാന സീവാന്. 11 പൊന്നനാമെ, സാമി നമ്മോഡ ഇത്ത്‌റാക്ക്‌മ് സീവാന്‌ബെത്ത്‌റ്‌ക്കുവദാന നമ്മാമ് ആങ്കീങ്ക് സീവാന്‌ബെത്ത് നഡാക്കുഡല്ല? 12 സാമിന ആര്‌മ് കാണാഗേ ഇല്ലെ. ആന നമ്മ ആങ്കീങ്ക് സീവാന്‌ബെത്ത് നഡാക്കുവാദാന സാമി നമ്മോഡ ഇര്‌ക്കുവാന്. അദേപാസെ നമ്മ ആങ്കീങ്ക് സീവാന്‌ബെത്ത് നഡാന്ത് സാമിക്കിര്‌ക്കുവ സീവാന് എത്ത്‌റാക്കെന്റ് നേര്‌മായിമ് നമാക്ക് കാണ്യ മുഡിമ്. 13 ഇത്തെ നമ്മ സാമ്യോഡാമ് സാമി നമ്മോഡാമ് ഒന്റായി ഇര്‌ക്ക്‌ന്റാമ് എന്റ് നമാക്ക് തെരിമ്. അദ്‌ക്ക് ബേ്ണ്ടിത്തെ സാമി തന്ന് നിഗാല്‌ന നമാക്ക് തന്ത്‌റ്‌ക്കുവാദ്. 14 അപ്പാന് സാമി ഉലഗാത്ത്‌ല ആള്‌ഗാള്‌നൊട്ടുക്കു കാപാറ്റ്യ തന്ന് മഗാന്‌ന സൊല്ലി ബ്‌ട്ട്‌റ്‌ക്കുവാദ്‌ന എമ്മ കണ്ടേമ്. അദ്‌ന എമ്മ ആള്‌ഗാള്‌ക്ക് സൊല്ലുന്റേമ്. 15 അദ്‌നാലെ ഏസ്സ് ക്‌റ്‌സ്‌ത്ത് മന്‌സാനായി പ്‌റാന്ത് ബന്ത് ഗേന്ത കാര്യഗാള്‌ന സൊല്ലി നഡാക്ക്‌ന്റവാരോഡ സാമി എ്ണേവു ബെത്ത്‌റ്‌ക്ക്‌ന്റാന്. അദേപാസെ അയാള്‌മ് സാമ്യോഡ എ്ണേവു ബെത്ത്‌റ്‌ക്ക്‌ന്റാന്. 16 ഇത്തെ സാമിക്ക് നമ്മോഡ ഇര്‌ക്കുവ സീവാന്‌ന നമാക്ക് തെരിന്താദ്‌നാലെ നമ്മ അയാള്‌ന നമ്പിമ് ഇര്‌ക്ക്‌ന്റാമ്. സാമി സീവാന് ആയിര്‌ക്കുവാദ്‌നാലെ സാമ്യോഡാമ് മന്‌സാനോഡാമ് സീവാന്‌ബെത്ത് നഡാക്ക്‌ന്റവാനോഡ സാമിമ് അയാള് സാമ്യോഡാമ് എ്ണേവു ബെത്ത്‌റ്‌ക്ക്‌ന്റാന്. 17 ഇത്തെ സാമ്യോഡ എ്ണേവുഗാറാരായി നമ്മ ആങ്കീങ്ക് സീവാന്‌ബെത്ത് നഡാന്ത് സാമിക്കിര്‌ക്കുവ സീവാന് എത്ത്‌റാക്കെന്റ് തെരിന്തദാന ബിദി സൊല്ലുവ നാള് നമ്മ സാമി മുന്നുക്കു ദയിരത്തോഡ ഇര്‌ക്ക്‌ല. 18 നമ്മ ആങ്കീങ്ക് സീവാന്‌ബെത്ത് നഡാന്ത് സാമിക്കിര്‌ക്കുവ സീവാന് എത്ത്‌റാക്കെന്റ് തെരിന്തദാന നമ്മ സാമിന അഞ്ചബേ്ഡ. നമാക്ക് സാമ്യോഡിര്‌ക്കുവ സീവാന്‌ക്ക് കൊറേവു ഒന്റുമു ഇല്ലാദെ പോന നമ്മ് അഞ്ചിക്കേന ഇല്ലദെ മാഡ്‌ല. സാമി ദെ്ണ്ടിക്കുവാനെന്റ് അഞ്ച്‌ന്റവാന് സാമി സീവാന്‌ന സൊക്കാന തെര്യാദിര്‌ക്ക്‌ന്റാന്. 19 മുദാല് സാമി നമ്മോഡ സീവാന്‌ബെത്തിന്താദ്‌നാലെത്തെ നമ്മാമ് സീവാന്‌ബെത്ത് നഡാക്കുവാദ്. 20 നാന് സാമ്യോഡ സീവാന്‌ബെത്ത് നഡാക്ക്‌ന്റെന്റ് സൊല്ലിന്ത് അഡ്‌ത്തവാന്‌ന തൊറേന്ത് നഡാക്ക്‌ന്റവാന് പൊയി സൊല്ലുന്റവാന്‌ത്തെ. താന് കണ്ണാറ കാണ്‌ന്റവാനോഡ സീവാന്‌ബെത്ത് നഡാക്കാത്തവാന്‌ക്ക് കാണ്യ മുഡ്യാത്ത സാമ്യോഡ എത്തെ സീവാന്‌ബെത്ത് നഡാക്ക്യ മുഡിമ്? 21 സാമ്യോഡ സീവാന്‌ബെത്ത് നഡാക്ക്‌ന്റവാന് അഡ്‌ത്തവാനോഡാമ് സീവാന്‌ബെത്ത് നഡാക്കുഡൊ. ഇദ്‌ത്തെ സാമി നമാക്ക് ബെത്ത് തന്ത്‌റ്‌ക്കുവ സട്ട. |
New Life Computer Institute