1 കൊരിന്ത്യഗാറാര് 9 - സാമി സേദിഅപ്പോസുത്തലാന് ഉരിമെഗാള് 1 എന്ന് കാര്യഗാള്‌ന നോഡ്യ എനാക്ക് ഉരിമെ ഇല്ലേഗ? നാനൊന്റു അപ്പോസുത്തലാന് അല്ലാഗ? നാന് നമ്മ് ആണ്ടവാന് ഏസ്സ്‌ന കാണാലെഗ? നാന് ആണ്ടവാന്‌ക്ക് ബേ്ണ്ടി ഗിലാസ ഗേന്താദ്‌ക്കുള്ള പല നിമ്മാത്തെ. 2 ബേ്റെ ആള്‌ഗാള്‌ക്ക് നാന് അപ്പോസുത്തലാന് അല്ലാദെ പോനാല്‌മ് നിമാക്ക് നാന് അപ്പോസുത്തലാന്‌ത്തെ. എന്ത്‌ക്കെന്റ് സൊന്ന ആണ്ടവാന്‌ക്ക് എ്ണേന്ത്‌റ്‌ക്കുവ നിമ്മാത്തെ നാന് ഒന്റു അപ്പോസുത്തലാന് എന്നുവാദ്‌ക്ക് അഡ്യാള. 3 എനാന ബിദിക്ക്‌ന്റവാര്‌ക്ക് നാന് ബദ്‌ലായി സൊല്ലുവ നായ ഇദ്‌ത്തെ. 4 എമാക്ക് തിന്ന്യാമ് കുഡിക്ക്യാമ് അദിഗര ഇല്ലേഗ? 5 ബേ്റെ അപ്പോസുത്തലാര്‌മ് ആണ്ടവാന് തമ്പ്യാമ്‌മ് പത്ത്‌റോസുമു ഗേവ പാസെ ഏസ്സ്‌ഗാറിസി ആന പെ്ണ്ടച്ച്യോഡ നഡാക്ക്യ എമാക്ക് ഉരിമില്ലേഗ? 6 അല്ല, ഗിലാസ ഗേഗാദിര്‌ക്ക്യ എനാക്ക്‌മ് ബറ്‌ണവാസ്‌ക്ക്‌മ് താനെത്ത അദിഗര ഇല്ലെന്റ്‌റ്‌ക്ക്‌ന്റ? 7 സൊന്ത സിലാവുലു ജുദ്ദ ഗേയ നില്ലുവ പട്ടളഗാറാന് ഇര്‌ക്ക്‌ന്റാന? മുന്തിരി ദോട്ട ഗേന്ത് അയി ബെ്ള്ളാമെന തിന്നത്തവാന് ഇര്‌ക്ക്‌ന്റാന? ആഡ് കൂട്ടന മേസി അയി ആഡ്‌ഗാള്‌ന ബെത്ത് പെ്ളേക്കാത്ത മാട്ട്യാന് ഇര്‌ക്ക്‌ന്റാന? 8 നാന് ഇദ് മന്‌സാര് പെ്ളേപ്പ്‌ല് നഡാക്കുവ കാര്യനത്തേഗൊ സൊല്ലി കാട്ട്‌നാദ്? മോസെ ബെത്ത സാമി സട്ടാത്ത്‌ല് സൊല്ലിര്‌ക്കുവാദ്‌മ് ഈ കാര്യനത്തേഗൊ? 9 <<അന്നാന ഒക്കുവ ഏര് ബായിന മൂഡി കെ്ട്ടാദേന്>> എന്റ് മോസെ ബെത്ത സാമി സട്ടാത്ത്‌ല് എ്ള്‌ദിര്‌ക്ക്‌ന്റല്ല? ഏര്‌ക്ക് ബേ്ണ്ടി നെനേത്ത്‌ത്തെ സാമി ഇത്തെ സൊല്ലിര്‌ക്കുവാദ? 10 സത്ത്യാത്ത്‌ല് നമാന നെനേത്ത്‌ത്തെ ഇത്തെ സൊല്ലിര്‌ക്കുവാദ്. എന്ത്‌ക്കെന്റ് സൊന്ന ഏരോട്ട്‌ന്റവാന്‌മ് അന്നാന അറ്‌ക്ക്‌ന്റവാന്‌മ് തമാക്കുള്ള പങ്ക് കെ്ഡേക്കുമെന്റുള്ള നെഞ്ചഡെബെത്ത് ഗിലാസ ഗേയ ബേ്ണ്ടിത്തെ അത്തെ എ്ള്‌ദിര്‌ക്കുവാദ്. 11 നിമ്മ സാമി ബക്‌ത്യോഡ പെ്ളേക്ക്യ ബേ്ണ്ടി ബേ്ഡ്‌മാന കാര്യഗാള്‌ന നിമാക്ക് ഗേന്ത് തന്തിന്ത് എമ്മ് സരിഗലന പാദ്‌ഗാക്ക്യ ബേ്ഡ്‌മാന കാര്യഗാള് നിമ്മോഡിന്ത് കേ്ട്ടദാന അദ്‌ല് എന്തൊന്റു തപ്പ് ഇര്‌ക്ക്‌ന്റ? 12 നിമാന നഡാത്തുവ ബേ്റെ ആള്‌ഗാള്‌ക്ക് ഇത്തെ കേ്ള്‌ക്ക്യ ഉരിമെ ഇന്തദാന എമാക്ക് എത്ത്‌റ അദിഗ ഉരിമെ ഇര്‌ക്ക്‌മ്? ആന അയി ഉരിമേക്ക് തഗ്‌ന്ത പഡി എമ്മ ഗേഗാലെ. അദ്‌ക്ക് ബദ്‌ല ക്‌റ്‌സ്‌ത്ത്‌ന പറ്റ്യുള്ള നല്ല സേദിക്ക് തഡേസ ഒന്റുമു ബരാദിര്‌ക്ക്യ ബേ്ണ്ടി എമ്മ എല്ലാദ്‌നാമ് താങ്ക്‌നേമ്. 13 സാമിബീ്ഡ്‌ല സാത്ത്‌റഗാള്‌ന കളിക്ക്‌ന്റവാര് അദ്‌ലിന്ത് കെ്ഡേക്കുവ നേര്‌സെഗാള്‌ന ബെത്ത് പെ്ളേക്ക്‌ന്റാര് എന്റ്‌മ് പലി കൊഡുക്കുവ മദ്‌ല്‌ല് ഗിലാസ ഗേന്റവാര്‌ക്ക് പലി കൊഡുത്ത ജാദില് പങ്ക് ഇര്‌ക്ക്‌ന്റ് എന്റ്‌മ് നിമാക്ക് തെരിമല്ല? 14 അദേപാസെ നല്ല സേദിന സൊല്ലി നഡാക്ക്‌ന്റവാര് അയി ഗിലാസാത്ത്‌ലിന്ത് കെ്ഡേക്കുവാദ്‌ന ബെത്ത് പെ്ളേക്കുഡൊ എന്റ് ആണ്ടവാന് കല്‌പനെ ബെത്ത്‌റ്‌ന്റാന്. 15 എന്റാല്‌മ് നാന് ഈ അദിഗരഗാള് ഒന്റുനാമ് കാട്ടാലെ. എന്തൊന്റു കെ്ഡേക്ക്‌മ് എന്റ് നെഞ്ചഡെ ബെത്തല്ല ഈ കാര്യന എ്ള്‌ദുവാദ്‌മ്. ഇത്തെ പെ്ളേക്കുവ എന്ന് പെ്ളേപ്പ്‌ന പറ്റി എനാക്ക് പെരിമെപഡുവാദ്‌ക്കുള്ള നായ ഇര്‌ക്ക്‌ന്റ്. അദ്‌ന ആരാറ്റ ഇല്ലെന്റ് സൊന്നദാന സാവാദ്‌ത്തെ എനാക്ക് നല്ലാദ്. 16 നാന് നല്ല സേദിന സൊല്ലുവ ആള് എന്നുവാദ്‌നാലെ എനാക്ക് പെരിമെപഡ്യ ഒന്റുമില്ലെ. അദ്‌ന സൊല്ല്യ സാമി എനാന നത്ത്‌ന്റാന്. നാന് നല്ല സേദിന സൊല്ലാദിന്ത അവ്വോ, എനാക്ക് കജട്ടാത്തെ! 17 നാന് എന്ന് മനേസ്സാറ ഈ ഗിലാസ ഗേവദാന എനാക്ക് കൂലി കെ്ഡേക്കുവാദ്‌ക്കുള്ള തഗ്‌ദി ഇര്‌ക്ക്‌ന്റ്. ഇദ് നാന് എന്ന് പിര്യാക്ക് തെരിന്തെ്ഡ്‌ത്താദല്ല. ആന സാമി ഈ കാര്യ ഗേയ തന്താദ്‌നാലെ നാന് അദ്‌ന ഗേയ കഡാമെ പട്ടവാന്‌ത്തെ. 18 അന്നാപ്പ് എനാക്കുള്ള കൂലി എന്ത്? നാന് നല്ല സേദിന സൊല്ലുഗാട്ടി നല്ല സേദിന സൊല്ലുവ ആള്‌ഗാള്‌ക്കുള്ള അദിഗരാന കാട്ടുവാദില്ലെ. അദ്‌ക്ക് ബദ്‌ല സിലാവുക്കു ഒന്റുമു ബാങ്കാദെത്തെ നാന് നല്ല സേദിന സൊല്ലുവാദ്. ഈ ദിന്‌സ്‌ല് ഗേവാദ്‌ല് ഇര്‌ക്കുവ പിര്യാത്തെ എന്ന് കൂലി. 19 നാന് ആര്‌ക്ക്‌മ് അഡിമ്യല്ലത്തവാന് ആയിന്ത് ഗുഡി മുഡിന്തളാവുക്കു മൊത്തന ആള്‌ഗാള്‌ന കെ്ഡേസ്യ ബേ്ണ്ടി നാന് എനാന താനെ എല്ലാ ആള്‌ഗാള്‌ക്ക്‌മ് അഡിമെ മാഡിര്‌ന്റെ. 20 എഗുദാര്‌ന ക്‌റ്‌സ്‌ത്ത്‌ക്ക് കെ്ഡേസ്യ ബേ്ണ്ടി എഗുദാര് പട്ട്‌ല് നാന് എഗുദാര്‌ന പാസെ പെ്ളേത്തെ. മോസെ ബെത്ത സാമി സട്ടാക്ക് കെ്ട്ട്‌പട്ട് ഇര്‌ന്റവാര്‌ന ക്‌റ്‌സ്‌ത്ത്‌ക്ക് കെ്ഡേസ്യ ബേ്ണ്ടി നാന് അയി സട്ടാക്ക് കെ്ട്ട്‌പട്ട് ഇര്‌ന്റവാര്‌ന പാസെ പെ്ളേത്തെ. 21 അദേപാസെ സാമിസട്ട കെ്ഡേക്കാത്ത ജാദിഗാള്‌ന ക്‌റ്‌സ്‌ത്ത്‌ക്ക് കെ്ഡേസ്യ ബേ്ണ്ടി അവാര് പട്ട്‌ല് സാമിസട്ട കെ്ഡേക്കാത്തവാന്‌ന പാസെ പെ്ളേത്തെ. ഇദ്‌ക്ക് അര്‌ത്ത നാന് സാമി സട്ടപഡി നഡാക്കാത്തവാന് എന്റല്ല, നേര്‌മായിമ് നാന് ക്‌റ്‌സ്‌ത്ത് സട്ടപഡി പെ്ളേക്ക്‌ന്റവാന്‌ത്തെ. 22 മനേസ്സ്‌ല് ഒറേപ്പില്ലത്തവാര്‌ന കെ്ഡേസ്യ ബേ്ണ്ടി അവാര് പട്ട്‌ല് നാന് അവാര്‌ന പാസെ ആനേന്. എത്തെന്റാല് മാഡി ലേസ ആള്‌ഗാള്‌ന കാപാറ്റ്യ ബേ്ണ്ടി നാന് എല്ലാ ആള്‌ഗാള്‌ക്ക് ബേ്ണ്ടി എല്ലാ ആള്‌ഗാള്‌ന പാസെ ആനേന്. 23 നല്ല സേദില് ഒന്റു പങ്ക്‌ഗാറാനായി അയി നല്ല സേദിന പജാത്ത്യ ബേ്ണ്ടി നാന് ഇദെല്ല ഗേന്റെ. 24 ഓട്ട പന്തായാത്ത്‌ല് ഓഡ്യ നില്ല്‌ന്റവാര് എല്ലാവാര്‌മ് ഓഡുന്റാര്. ആന ഒരുത്താന്‌ത്തെ സമ്മാന കെ്ഡേസ്‌ന്റാനല്ല? നിമ്മാമ് സമ്മാന കെ്ഡേക്കുവാദ്‌ക്ക് തഗ്‌ന്ത ദിന്‌സ്‌ല് ഓഡുനു. 25 ഓട്ട ഓഡുന്റവാന് തന്ന് സരിഗലന സാമാറ്‌ത്ത്യുള്ളാദ് മാഡ്യ ബേ്ണ്ടി എല്ലാ ദിന്‌സ്‌ല്‌മ് പത്ത്യ ഇര്‌ക്ക്‌ന്റാന്. ആന അവാര്‌ക്ക് കെ്ഡേക്കുവാദൊ അളിന്ത് പോവ ഗിര്യാഡത്തെ. ആന നമാക്ക് കെ്ഡേക്ക്യ പോവാദൊ അളിന്ത് പോഗാത്ത ഗിര്യാഡത്തെ. 26 അദ്‌നാലെ എത്തുവ പട്ട്‌ന നോഡി കൊണ്ടുത്തെ നാന് ഒന്റൊന്റു കാല്‌മ് എ്ഡ്‌ത്ത് ബെക്കുവാദ്. ഗുറി നോഡാദെ അല്ല നാന് അമ്പ് ബെക്കുവാദ്. 27 അഡ്‌ത്തവാര്‌ക്ക് നല്ല സേദിന സൊന്ന പ്‌റ നാന് താനെ അയി സമ്മാന കെ്ഡേസ്യ തഗ്‌ദില്ലാത്താവാന് ആഗാദിര്‌ക്ക്യ ബേ്ണ്ടി എന്ന് സരിഗലന അഡാക്കി ഒദുക്കി നാന് അഡിമെ മാഡ്‌ന്റെ. |
New Life Computer Institute