1 കൊരിന്ത്യഗാറാര് 7 - സാമി സേദികല്യണ മുഡിക്കുവാദ്‌ന പറ്റി 1 നിമ്മ എനാക്ക് എ്ള്‌ദി ബ്‌ട്ട കാര്യഗാള്‌ന പറ്റി നാന് സൊല്ലുവ നായ എന്തെന്റ് സൊന്ന: പെ്ണ്ണ്‌മക്കാള്‌ന അണ്ണാദെ ഇര്‌ക്കുവാദ്‌ത്തെ മന്‌സാന്‌ക്ക് നല്ലാദ്. 2 എന്റാല്‌മ് കണ്ടപഡിക്ക് നഡാക്കുവ പളാക്ക മന്‌സാന്‌ക്ക് ഇര്‌ക്കുവാദ്‌നാലെ ഒന്റൊന്റാള്‌ക്ക് സൊന്ത പെ്ണ്ടച്ചിമ് ഒന്റൊന്റു പെ്ണ്ണ്‌മക്കാള്‌ക്ക് സൊന്ത ആളാന്‌മ് ഇര്‌ക്കുഡൊ. 3 പെ്ണ്ടച്ചിക്ക് ഇര്‌ക്കുവ ആസേന ആളാന്‌ക്ക്‌മ് ആളാന്‌ക്ക് ഇര്‌ക്കുവ ആസേന പെ്ണ്ടച്ചിക്ക്‌മ് ഗേന്ത് കൊഡുക്കുവാദ്‌ക്കുള്ള കഡാമെ അവാര് റാഡാള്‌ക്ക്‌മ് ഇര്‌ക്ക്‌ന്റ്. 4 പെ്ണ്ട് സരിഗലാക്കുള്ള അദിഗര പെ്ണ്ടച്ചിക്കില്ലെ ആളാന്‌ക്ക്‌ത്തെ, അദേപാസെ ആളാന് സരിഗലാക്കുള്ള അദിഗര ആളാന്‌ക്കില്ലെ പെ്ണ്ടച്ചിക്ക്‌ത്തെ. 5 നിമ്മ ആളാന് പെ്ണ്ടമ് ഒന്റുലു ഉറാങ്കുവാദ്‌ന തള്ളാഗേ ബേ്ഡ. സെറ്റെ ഗളിഗെ പരേസ്യ ബേ്ണ്ടി ആങ്കീങ്ക് സമ്മദത്തോഡത്തെ പ്‌റ്‌ന്ത്‌റ്‌ക്കുഡൊ. നിമ്മ് സരിഗലാത്ത്‌ല ആസെഗാള്‌ന അഡാക്ക്യ മുഡ്യാത്താദ്‌നാലെ സെയിത്താന് നിമാന സോദണെ ഗേഗാദിര്‌ക്ക്യ ബേ്ണ്ടി പ്‌റ നിമ്മ ഒന്റായി ഇര്‌ന്. 6 നിമ്മ സെറ്റെ നേര പ്‌റ്‌ന്ത്‌റ്‌ക്കുഡൊ എന്നുവാദ് എനാക്ക് സമ്മദത്തെ. ആന അദ് കണ്ടിപ്പായിമ് ഗേഡൊ എന്റ് നാന് സൊല്ലുവാദില്ലെ. 7 എല്ലാ മന്‌സാര്‌ഗാള്‌മ് എനാന പാസെ ഒണ്ടി മന്‌സാനായി പെ്ളേക്കുഡൊ എന്റ്‌ത്തെ നാന് ആസെപഡുവാദ്. ആനാല്‌മ് ഒന്റൊന്റാള്‌മ് എത്തെ പെ്ളേക്കുഡൊ എന്റ് സാമി ബര കൊഡുത്ത്‌റ്ക്ക്‌ന്റാന്. ഒന്റാള്‌ക്ക് ഒന്റു ബര, ബേ്റൊന്റാള്‌ക്ക് ബേ്റൊന്റു ബര. 8 കല്യണ മുഡിക്കത്തവാര്‌ക്ക്‌മ് മ്‌ണ്ടേസ്യാര്‌ക്ക്‌മ് എനാക്ക് സൊല്ല്യ ഇര്‌ക്കുവ കാര്യ എന്തെന്റ് സൊന്ന: എനാന പാസെ ഒണ്ടി മന്‌സാനായി ഇര്‌ക്കുവാദ്‌ത്തെ അവാര്‌ക്ക് നല്ലാദ്. 9 ആന തമ്മ് സരിഗല ആസേന അഡാക്കി ബെക്ക്യ മുഡ്യാത്തവാര് കല്യണ മുഡിക്കുഡൊ. അവാര് ഉരിഗി നഡാക്കുവാദ്‌ന ബ്‌ഡ കല്യണ മുഡിക്കുവാദ്‌ത്തെ അവാര്‌ക്ക് നല്ലാദ്. 10 കല്യണ മുഡിന്തവാര്‌ക്ക് നാനല്ല ആണ്ടവാന് താനെ കല്‌പനെ ബെക്കുവാദ്: പെ്ണ്ട് ആളാന്‌ന തള്ളി പ്‌റ ബേ്ഡ. 11 പ്‌റ്‌ന്തദാന ബേ്റെ കല്യണ മുഡിക്കാദെ പെ്ളേക്കുഡൊ, അല്ലാദെ പോന ആളനോഡ രാജി കൂഡുഡൊ. ആളാന്‌മ് പെ്ണ്ട്‌ന ബ്‌ഡ്യ പാങ്കില്ലെ. 12 ആന ഇന്നി നിമ്മ് കൂട്ടാത്ത്‌ല് ഇര്‌ക്കുവ ബേ്റ് ആള്‌ഗാള്‌ക്ക് ആണ്ടവാനല്ല നാന് താനെത്തെ സൊല്ലുവാദ് എന്തെന്റ് സൊന്ന ഒന്റു ഏസ്സ്‌ഗാറാന്‌ക്ക് ഏസ്സ്‌ന നമ്പാത്ത പെ്ണ്ടച്ചി ഇന്തദാന അവാള് അയാളോഡ ഒന്റായിര്‌ക്ക്യ മനേസ്സിന്ത അവാള്‌ന ബ്‌ഡ ബേ്ഡ. 13 അദേപാസെ ഒന്റു ഏസ്സ്‌ഗാറിസിക്ക് ഏസ്സ്‌ന നമ്പാത്ത ആളാന് ഇന്ത അയാള്‌ക്ക് അവാളോഡ ഇര്‌ക്ക്യ മനേസ്സിന്തദാന അവാള് അയാള്‌ന ബ്‌ഡ ബേ്ഡ. 14 എന്ത്‌ക്കെന്റ് സൊന്ന, ഏസ്സ്‌ഗാറാന് അല്ലാത്ത ആളാന് പെ്ണ്ടച്ചിനാലെ സാമിക്ക് ബേ്ണ്ടി അലാക്ക പ്‌റ്‌ത്ത് ബെത്ത്‌റ്‌ന്റവാന്‌മ് സുത്താപ്പുള്ളവാന് ആയിര്‌ക്ക്‌ന്റാന്. അദേപാസെ ഏസ്സ്‌ഗാറിസി അല്ലാത്ത പെ്ണ്ട് ആളാന്‌നാലെ സാമിക്ക് ബേ്ണ്ടി അലാക്ക പ്‌റ്‌ത്ത് ബെത്ത്‌റ്‌ന്റവാള്‌മ് സുത്താപ്പുള്ളവാള്‌മ് ആയിര്‌ക്ക്‌ന്റാള്. അല്ലാദെ പോന നിമ്മ് മക്കാള് സാമിക്ക് ബേ്ണ്ടി അലാക്ക പ്‌റ്‌ത്ത് ബെക്കാത്തവാര്‌മ് സുത്താപ്പില്ലാത്തവാര്‌മ് ആയിര്‌ക്കുവാര്. ആന ഇന്നാല് അവാര് സാമിക്ക് ബേ്ണ്ടി അലാക്ക പ്‌റ്‌ത്ത് ബെത്ത്‌റ്‌ന്റവാര്‌മ് സുത്താപ്പുള്ളവാര്‌മ് ആയിര്‌ക്ക്‌ന്റാര്. 15 ആന ഏസ്സ്‌ന നമ്പാത്ത ഒന്റൊരുത്താന് പ്‌റ്‌ന്ത് പോയ ആസെപട്ടദാന പ്‌റ്‌ന്ത് പോഡൊ. ഈ കാര്യാത്ത്‌ല് ഏസ്സ്‌ഗാറാനൊ ഏസ്സ്‌ഗാറിസ്യൊ ആളാന് പെ്ണ്ടായി പെ്ളേക്കുവ കെ്ട്ട്‌മനാക്ക് പട്ടവാരല്ല. ആന സാമി നമാന നിമ്മ്‌ദ്യായി പെ്ളേക്ക്യത്തെ ബ്‌ളിത്ത്‌റ്‌ന്റാന് എന്റ് നെനേന്. 16 പെ്ണ്ണെ, നിന്ന്‌നാലെ നിന്ന് ആളാന് ഏസ്സ്‌ന നമ്പ്‌നാലൊ? ആര്‌ക്ക് തെരിമ്? അദേപാസെ ആളാനെ, നിന്ന്‌നാലെ നിന്ന് പെ്ണ്ട് ഏസ്സ്‌ന നമ്പ്‌നാലൊ? ആര്‌ക്ക് തെരിമ്? 17 ആന ആണ്ടവാന് നിമ്മ് പെ്ളേപ്പ്‌ല് നിമാക്ക് തന്തിന്ത കഡാമെഗാള്‌നാമ് താനെ ഗേന്ത് കൊണ്ടുമു സാമി നിമാന ബ്‌ളിത്ത ഗളിഗേല് നിമ്മ ആര് ആയിന്ത്‌റൊ അദേ ആള് ആയി താനെത്തെ ഇര്‌ക്കുഡൊ. ഈ സട്ടനാത്തെ നാന് എല്ലാ ഏസ്സ്‌ഗാറാര് കൂട്ടാത്ത്‌ല്‌മ് പഡുസുവാദ്. 18 സാമി ബ്‌ളിത്ത ഗളിഗേല് ഒരുത്താന് പരിസേദനെ സാത്ത്‌റ ഗേന്തവാനായിന്തദാന അയാള് അദ്‌ന മാറ്റ ബേ്ഡ. സാമി ബ്‌ളിത്ത ഗളിഗേല് പരിസേദനെ സാത്ത്‌റ ഗേഗാത്തവാന് ആയിന്തദാന അയാള് പരിസേദനെ സാത്ത്‌റ ഗേഗാമ് ബേ്ഡ. 19 ഒരുത്താന് പരിസേദനെ സാത്ത്‌റ ഗേന്താനൊ ഗേഗാദിന്താനൊ എന്നുവാദല്ല മുക്ക്യമാന കാര്യ, സാമി സട്ടപഡി നഡാക്കുവാദ്‌ത്തെ മുക്ക്യമാന കാര്യ. 20 ഒന്റൊന്റാള്‌മ് സാമി ബ്‌ളിക്കാട്ടി ആര് ആയിന്ത്‌റൊ അദേ ആള് ആയി താനെത്തെ നിമ്മ ഇര്‌ക്കുഡൊ. 21 സാമി നിനാന ബ്‌ളിക്കാട്ടി നീ ഒന്റു അഡിമെ ആയിന്തായ? നീ അര്‌ക്കപഡാദെ. അഡിമ്യല്ലത്തവാന് ആയിര്‌ക്ക്യ സദുവു കെ്ഡേത്തദാന അദ്‌ന ഉവഗരപഡിസ്യ നോഡു. 22 എന്ത്‌ക്കെന്റ് സൊന്ന ഏസ്സ്‌ഗാറാന് ആന ഒന്റു അഡിമെ ആണ്ടവാന് ഏസ്സ് കണ്ണ്‌ക്ക് അഡിമ്യല്ല. അദേപാസെ ആണ്ടവാന് ബ്‌ളിക്കാട്ടി അഡിമെ അല്ലത്തവാന് ആന ഏസ്സ്‌ഗാറാന് ഇന്നാല് ക്‌റ്‌സ്‌ത്ത്‌ക്ക് അഡിമേത്തെ. 23 സാമി നിമാന ബെലേക്ക് ബാങ്കിര്‌ന്റാന്, അദ്‌നാലെ നിമ്മ മന്‌സാര് നായാക്ക് അഡിമെഗാള് ആഗദേന്. 24 ഏസ്സ്‌ഗാറാരെ, സാമി നിമാന ബ്‌ളിക്കാട്ടി നിമ്മ ആര് ആയിന്ത്‌റൊ അദേ ആളായി താനെ സാമ്യോഡൊപ്പ ഇര്‌ക്കുഡൊ. 25 കുമാരി ആയിര്‌ക്കുവ പെ്ണ്ണ്‌മക്കാള്‌ന പറ്റി നിമ്മ എ്ള്‌ദിന്ത്‌റല്ല, അദ്‌ന പറ്റി ആണ്ടവാന്‌ലിന്ത് എനാക്ക് കല്‌പനെ ഒന്റുമു കെ്ഡേക്കാലെ. എന്റാല്‌മ് ആണ്ടവാന്‌ക്ക് കറ്‌മ്മ പ്‌ഡിത്ത് നമ്പ്യ മുഡിന്റവാന് ആയിര്‌ക്കുവ നാന് അദ്‌ന പറ്റ്യുള്ള എന്ന് നായന നിമാക്ക് സൊന്റെ. 26 ഇന്നാല് പഡുവ കജട്ടന നോഡ്യ പോനദാന കല്യണ മുഡിക്കത്തവാര് അത്തെത്താനെ ഇര്‌ക്കുവാദ്‌ത്തെ നല്ലാദെന്റ് നാന് നെനേക്ക്‌ന്റെ. 27 നീ പെ്ണ്ണ് സേന്ത്‌റ്‌ക്കുവദാന പെ്ണ്ട്‌ന ബ്‌ട്ട് പ്‌റ ബേ്ഡ. പെ്ണ്ണെ്ഡ്‌ക്കാത്ത ഒരുത്താന് പെ്ണ്ണെ്ഡ്‌ക്ക്യ നോഡ ബേ്ഡ. 28 ആന നീ പെ്ണ്ണെ്ഡ്‌ത്ത നീ ഗേവാദ് പാവല്ല, ഒന്റു ബീ്ണി ആളാന് എ്ഡ്‌ത്ത അവാള് ഗേവാദ്‌മ് പാവല്ല. എന്റാല്‌മ് ആളാന്‌പെ്ണ്ടായി പെ്ളേക്ക്‌ന്റവാര്‌ക്ക് ബരുവ കജട്ടഗാള് നിമാക്ക് ബര ബേ്ഡ എന്റ്‌ത്തെ നാന് ആസെപഡ്‌ന്റെ. 29 ഏസ്സ്‌ഗാറാരെ, നാന് സൊല്ലി ബരുവ അര്‌ത്ത എന്തെന്റ് സൊന്ന, ഇന്നി അദിഗ നാള് ഇല്ലെ, അദ്‌നാലെ ഇന്നാലിന്ത് പെ്ണ്ടച്ച്യാമ് ഇര്‌ക്ക്‌ന്റവാര് പെ്ണ്ടച്ച്യാമ് ഇല്ലത്തവാര്‌ന പാസെ പെ്ളേക്കുഡൊ. 30 കേ്യ്‌ന്റവാര് കേ്യത്തവാര്‌ന പാസേമ്, പിര്യപഡ്‌ന്റവാര് പിര്യപഡാത്തവാര്‌ന പാസേമ്, ബെലേക്ക് ബാങ്ക്‌നവാര് അദ് തമാക്ക് സൊന്തല്ലത്താദ്‌ന പാസേമ് ആയിര്‌ക്കുഡൊ. 31 ഈ ഉലഗാത്ത്‌ല സുഗഗാള്‌നാമ് ദുക്കഗാള്‌നാമ് അനിബോഗിക്ക്‌ന്റവാര് അദ്‌ക്ക് അഡിമെപഡാദെ ഇര്‌ക്കുഡൊ. എന്ത്‌ക്കെന്റ് സൊന്ന ഈ ഉലഗ ഇദേ ദിന്‌സ്‌ല് ഇര്‌ക്കാദെ ഇല്ലാദായി തള്ള്‌മല്ല. 32 നിമ്മ ഒന്റു കാര്യനാമ് നെനേത്ത് എ്ണ്ണഗെ്ഡാത്തവാര് ആയിര്‌ക്കുഡൊ എന്റ് നാന് ആസെപഡ്‌ന്റെ. പെ്ണ്ണ് സേരാത്തവാന് ആണ്ടവാന്‌ന എത്തെ പിര്യപഡുസുഡൊ എന്റ് നെനേത്ത് ആണ്ടവാന്‌ക്കുള്ള കാര്യന നെനേക്ക്‌ന്റാന്. 33 പെ്ണ്ണ് സേന്തവാന് പെ്ണ്ട്‌ന എത്തെ പിര്യപഡ്‌സുഡൊ എന്റ് നെനേത്ത് ഉലഗാത്ത്‌ല കാര്യഗാള്‌ന പറ്റി നെനേക്ക്‌ന്റാന്. 34 പെ്ണ്ട് കാര്യാമ് ആണ്ടവാന് കാര്യാമ് അയാള്‌ന ആങ്കീങ്ക് ഗ്‌ണ്ണഗ്‌ണ്ണ മാഡി ബലേക്ക്‌ന്റ്. അദേപാസെ ആളാന് സേന്തവാള്‌മ് ആളാന് സേരാത്തവാള്‌മ് റാഡ് ദിന്‌സ്‌ല് ഇര്‌ക്ക്‌ന്റവാര്‌ത്തെ. ആളാന് സേരാത്തവാള് സരിഗലാത്ത്‌ല്‌മ് നിഗാല്‌ല്‌മ് സുത്താപ്പോഡ ഇര്‌ക്ക്യ ബേ്ണ്ടി ആണ്ടവാന്‌ക്ക് ഗേവ കാര്യഗാള്‌ന പറ്റി നെനേക്ക്‌ന്റാള്. ആന ആളാന് സേന്തവാള് ആളാന്‌ന എത്തെ പിര്യപഡ്‌സുഡൊ എന്റ് നെനേത്ത് ഈ ഉലഗാത്ത്‌ലിര്‌ക്കുവ കാര്യഗാള്‌ന പറ്റി നെനേക്ക്‌ന്റാള്. 35 നിമ്മ നല്ലാദായാത്തെ നാന് ഈ കാര്യഗാള്‌ന നിമാക്ക് സൊല്ലുവാദ്, അല്ലാദെ അദ് നിമാക്ക് ഒന്റു സിക്കാല് മാഡി ബെക്ക്യല്ല. ആണ്ടവാന്‌ക്ക് പട്ട ആള്‌ഗാള്‌ക്ക് തഗ്‌ന്ത പാസെ നിമ്മ പെ്ളേക്ക്യ ബേ്ണ്ടിമ് നിമാന ആങ്കീങ്ക് ഗ്‌ണ്ണഗ്‌ണ്ണ ബലിക്കുവ നെനേവുഗാള്‌ന ബ്‌ട്ട് ആണ്ടവാനോഡ ഇര്‌ക്കുവ ഉറാവുല് ഒറേത്ത് നില്ല്യ ബേ്ണ്ടിമ്‌ത്തെ ഇത്തെ സൊല്ലുവാദ്. 36 ആളാന് എ്ഡ്‌ക്കുവ ബയിസ്സ് മുഡിന്ത്‌റ്‌ക്കുവ തന്ന് മഗാള്‌ക്ക് ആളാന് സേത്തി കൊഡുക്കാദെ ഇന്നിമ് അത്തെത്താനെ ബെത്ത്‌റ്‌ക്കുവാദ് സെര്യല്ല എന്റ് ഒന്റപ്പാന് നെനേത്തദാന അയാള് തന്ന് മഗാള്‌ക്ക് ആളാന് സേത്തി കൊഡുക്കുഡൊ. അദ് പാവല്ല. 37 അഡ്‌ത്തവാര് നത്തുവാദ്‌ന കേ്ള്‌ക്കാദെ താന് ആസെപഡുവ കാര്യന ഗേയ അദിഗരാമ് മനേസ്സ്‌ല് ഒറേത്ത മുഡിവു ഇര്‌ക്ക്‌ന്റവാന് തന്ന് കുമാര്യാന മഗാള്‌ന കല്യണമാഡി കൊഡുക്കാദെ പാദ്‌ഗാത്ത് ബെക്ക്യ മുഡിവു എഡ്‌ത്തദാന അദ്‌മ് നല്ലാദ്‌ത്തെ. 38 അത്തെ ഒരുത്താന് തന്ന് കുമാര്യാന മഗാള്‌ന കല്യണമാഡി കൊഡുക്കുവാദ് നല്ലാദ്‌ത്തെ. കല്യണമാഡി കൊഡുക്കാദെ ബെക്കുവാദ് അദ്‌ന ബ്‌ഡ നല്ലാദ്. 39 ഒരുത്തി തന്ന് ആളാന് പെ്ളേത്ത്‌റ്‌ക്കുവ കാല മാട്ട്‌ക്ക് തന്ന് ആളാനോഡ ഇര്‌ക്കുവ കെ്ട്ട്‌മനാക്ക് അഡി ഇര്‌ക്കുഡൊ. അയാള് സത്തദാന അവാള്‌ക്ക് തന്ന് ആളാനോഡ ഇര്‌ക്കുവ കെ്ട്ട്‌മനാക്ക് അഡി ഇര്‌ക്കുവ തേവില്ലെ. അവാള്‌ക്ക് തനാക്ക് പ്‌ഡിത്തവാന്‌ന നോഡി എ്ഡ്‌ക്ക്‌ല. ആന അയാള് ഏസ്സ്‌ഗാറാന് ആയിര്‌ക്കുഡൊ. 40 ആന അവാള് മറിസി ആളാന് സേരാദെ അത്തെത്താനെ പെ്ളേക്കുവാദ് നല്ലാദ് എന്റ്‌ത്തെ എനാക്ക് സൊല്ല്യ ഇര്‌ക്കുവ നായ, എനാക്ക്‌മ് സാമിനിഗാല് ഇര്‌ക്ക്‌ന്റ് എന്റ് നെനേക്ക്‌ന്റെ. |
New Life Computer Institute