1 കൊരിന്ത്യഗാറാര് 6 - സാമി സേദിഏസ്സ്ഗാറാര് അല്ലാത്തവാര് പട്ട്‌ക്ക് നായ തീര്‌ക്ക്യ പോഗ ബേ്ഡ 1 നിമ്മ് കൂട്ടാത്ത്‌ല് ഒരുത്താന്‌ക്ക് ബേ്റെ ഒന്റൊരുത്താനോഡ മല്ല് ബന്തദാന സാമിക്ക് പട്ടവാര് പട്ട്‌ക്ക് പോഗാദെ ഉലഗാക്ക് പട്ടവാര് പട്ട്‌ക്ക് പോയി മല്ല് തീര്‌ക്ക്യ നോഡുന്റുറ? 2 സാമിക്ക് പട്ടവാര് ഉലഗാത്ത്‌ല ജനഗാള്‌ന ബിദിക്കുവാര് എന്റ് നിമാക്ക് തെരിവാദില്ലേഗ? അത്തെ ഉലഗാന ബിദിക്കുവ നിമാക്ക് സ്‌ന്ന സ്‌ന്ന കാര്യന നായനൊഡിന്ത് തീര്‌ക്ക്യ മുഡ്യാമാട്ടാഗ? 3 നമ്മ ദൂദാര്‌ഗാള്‌ന ബിദിക്ക്‌ല എന്റ് നിമാക്ക് തെരിവാദില്ലേഗ? അത്ത്യാന ഈ ഉലഗാത്ത്‌ല സ്‌ന്ന സ്‌ന്ന കാര്യഗാള്‌ന ബിദിക്ക്യ നിമാക്ക് കണ്ടിപ്പായിമ് മുഡിമ്. 4 അന്നാപ്പ് നിമാക്ക് ഇത്തവ മല്ല്‌ഗാള് ബര്‌ഗാട്ടി അദ്‌ന തീര്‌ക്ക്യ ഏസ്സ്‌ഗാറാര് കൂട്ട മദ്‌പ്പ് കൊഡുക്കത്തവാര് പട്ട്‌ക്ക് എന്ത്‌ക്ക് പോന്റുറു? 5 നിമാന നാണഗെ്ഡിസ്യ നാന് ഇത്തെ കേ്ള്‌ക്ക്‌ന്റെ: ഇത്തവ മല്ല്‌ഗാള്‌ന സൊല്ലി തീര്‌ക്ക്യ തിരമെ ഇര്‌ക്കുവ ബുദ്ദിസാലിഗാള് ആരാറ്റ നിമ്മ് കൂട്ടാത്ത്‌ല് ഇല്ലേഗ? 6 ഒന്റു ഏസ്സ്‌ഗാറാന് ബേ്റൊന്റു ഏസ്സ്‌ഗാറാനോഡ നായാക്ക് ബേ്ണ്ടി പോന്റുറു. അദ്‌മ് ഏസ്സ്‌ഗാറാര് അല്ലാത്തവാര് പട്ട്‌ക്ക്‌ത്തെ പോന്റുറു. 7 ഇത്തവ ദിന്‌സ്‌ല് നിമാക്ക് ആങ്കീങ്ക് മല്ല്‌ഗാള് ഇര്‌ക്കുവാദ് നിമ്മ ഒന്റേപെ്ട്ട് സോറ്റു പോനുറു എന്റ് കാട്ട്‌ന്റ്. നിമാന ഒരുത്താന് കൊഡിമെപഡുസുവാദ്‌നാമ് ഏമാത്തുവാദ്‌നാമ് നിമാക്ക് താങ്ക്യമുഡ്യാത്താദ് എന്ത്‌ക്ക്? 8 ആന അദ്‌ക്ക് ബദ്‌ല നിമ്മ താനെ ഏസ്സ്‌ഗാറാര്‌ക്ക് പട്ട നിമ്മ് ആള്‌ഗാള്‌ന ഏമാത്ത്‌ന്റ്‌റ്, കൊഡിമേമ് പഡ്‌സ്‌ന്റ്‌റ്. 9-10 കേ്ഡ്‌ഗെ്ട്ടവാര് ആര്‌മ് സാമി ആളുവ ആള്‌ഗാള് കൂട്ടാക്ക് എജേഗമാട്ടാര് എന്റ് നിമാക്ക് താനെ തെരിമല്ല. നിമ്മ നിമാന താനെ സദിക്കാദിര്‌ന്: കണ്ടപഡിക്ക് നഡാക്ക്‌ന്റവാര്, സെലെന കുമ്മുഡുന്റവാര്, ബേസ്യാഡ്‌ന്റവാര്, ഗണ്ട് ഗണ്ടോഡാമ് പെ്ണ്ണ് പെ്ണ്ണോഡാമ് ഉറാങ്ക്‌ന്റവാര്, ത്‌റ്‌ട്ടാര്, ആസെപാഡ്‌ഗാറാര്, കുഡിഗാറാര്, നൊണ്ടു സൊന്റവാര്, പ്‌ഡിങ്കിപറ്‌ക്ക്‌ന്റവാര് ഇത്തവാള്‌ഗാള് സാമി ആളുവ നാഡ്‌ക്ക് ഉരിമെഗാറാര് ആഗമാട്ടാര്. 11 നിമ്മ് കൂട്ടാത്ത്‌ല്‌മ് ലേസ ആള്‌ഗാള് ഇത്തവാള്‌ഗാള് ആയിന്ത്‌റ്. എന്റാല്‌മ് ആണ്ടവാന് ഏസ്സ് ക്‌റ്‌സ്‌ത്ത് പേര്‌ല്‌മ് സാമിനിഗാല് നമാക്ക് ഗേന്ത കാര്യഗാള്‌നാലേമ് നിമ്മ പാവ തീന്തവാര്‌മ് നേര്‌മെഗാറാര്‌മ് സാമിക്ക് ബേ്ണ്ടി അലാക്ക പ്‌റ്‌ത്ത്‌റ്‌ക്കുവ സുത്താപ്പുള്ളവാര്‌മ് ആന്‌റ്. നിമ്മ് സരിഗല സാമി നിഗാല് ബീ്ഡ് 12 <<എനാക്ക് എന്ത് ഗേയാമ് തഡേസ ഇല്ലെ>> എന്റ് സിലപ്പ നിമ്മ സൊല്ലുവുറു. ആന <<എല്ലാമ് നിമാക്ക് നല്ലാദല്ല>> എന്റ് നാന് സൊല്ലുവെ. <<എനാക്ക് എന്ത് ഗേയാമ് തഡേസ ഇല്ലെ>> എന്റ് നിമ്മ സൊല്ലുവുറു. ആന എനാന അഡിമെ മാഡുവ ഏദ് കാര്യാക്ക്‌മ് നാന് എ്ണേഗമാട്ടെ. 13 <<തീനി ബേ്റ്‌ക്ക്‌മ് ബേ്റ് തീനിക്ക്‌മ് ഉള്ളാദ്‌ത്തെ>> എന്റ് സിലപ്പ നിമ്മ സൊല്ലുവുറു. ആന സാമി ഇദ് റാഡ്‌നാമ് ഇല്ലാദെ മാഡുവാന്. സരിഗല ബേസ്യാഡി നഡാക്ക്യുള്ളാദല്ല, ആണ്ടവാന്‌ക്കുള്ളാദ്‌ത്തെ, ആണ്ടവാനൊ സരിഗലന പാദ്‌ഗാക്ക്‌ന്റവാന്‌ത്തെ. 14 ആണ്ടവാന് ഏസ്സ്‌ന സാമി ഉജുര്‌ളാക്ക്‌ന പാസെ നമാനാമ് തന്ന് സക്‌തില് ഉജുര്‌ളാക്കുവാന്. 15 നിമ്മ് സരിഗല ക്‌റ്‌സ്‌ത്ത് സരിഗലാത്ത്‌ല ഒന്റൊന്റു മൂട്ടുമുറിഗാളെന്റ് നിമാക്ക് തെരിവാദില്ലേഗ? അത്തെ ക്‌റ്‌സ്‌ത്ത് സരിഗലാത്ത്‌ല മൂട്ടുമുറി ആന എനാന ബേസ്യാഡി നഡാക്ക്‌ന്റവാള് സരിഗലാത്ത്‌ല മൂട്ടുമുറി മാഡ്യ മുഡിമ? അത്തെ മാഡ്യ മുഡ്യാഗേ മാട്ട. 16 ബേസ്യോഡ ഒന്റായി ഉറാങ്ക്‌ന്റവാന് അവാളോഡ എ്ണേന്ത് ഒന്റു സരിഗല ആന്റാന് എന്റ് നിമാക്ക് തെരിവാദില്ലേഗ? <<റാഡാള്‌മ് ഒന്റേ സരിഗല ആന്റാര്>> എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്ക്‌ന്റ്. 17 ആന ആണ്ടവാനോഡ എ്ണേന്റവാന് ആണ്ടവാനോഡ ഒന്റായി ഒന്റേ നിഗാല് ആന്റാന്. 18 അദ്‌നാലെ ബേസ്യാഡി നഡാക്കുവാദ്‌ന തെ്റിന്ത് തള്ള്‌ന്. മന്‌സാന് സരിഗലന കെ്ഡ്‌സുവ ഇത്ത്‌റ ദൊഡ്ഡ പാവ ബേ്റെ ഇല്ലെ. എന്ത്‌ക്കെന്റ് സൊന്ന ബേസ്യാഡി നഡാക്കുവ പാവ നമ്മ് സിരിഗലാക്ക് താനെ ഗേവ പാവത്തെ. 19 സാമി ദാന ഗേന്ത സാമിനിഗാല് ഇര്‌ക്കുവ ബീ്ഡ്‌ത്തെ നിമ്മ് സരിഗല എന്റ്‌മ് നിമാന സാമി ബെലേക്ക് ബാങ്കിര്‌ക്കുവാദ്‌നാലെ നിമ്മ നിമാക്കുള്ളവാര് താനെ അല്ല എന്റ്‌മ് നിമാക്ക് തെരിവാദില്ലേഗ? 20 അദ്‌നാലെ സാമിന പെരിമെപഡുസുവ ദിന്‌സ്‌ല് നിമ്മ് സരിഗലാത്ത്‌ല് നിമ്മ പെ്ളേന്. |
New Life Computer Institute