1 കൊരിന്ത്യഗാറാര് 5 - സാമി സേദിഏസ്സ്ഗാറാര് കൂട്ടാത്ത്‌ല് പാവ ഗേന്റവാര്‌ന മുഡിക്കി ബ്‌ഡ്‌ഡൊ 1 നിമ്മ് കൂട്ട കുള്ളുക്കു കാമാക്ക് കണ്ണില്ലാദെ കണ്ടപഡി നഡാക്ക്‌ന്റവാര് ഇര്‌ക്ക്‌ന്റാര് എന്നുവ സേദി എനാക്ക് കെ്ഡേത്ത്‌റ്‌ക്ക്‌ന്റ്. ഒരുത്താന് തന്ന് എ്ള്യവെന ഗുഡി ബെത്ത് നഡാക്ക്‌ന്റാനെന്റ. സാമിന തെര്യാത്ത ജാദിഗാള്‌ല് ഗുഡി ഗേഗാത്ത കാര്യത്തെ ഇദ്. 2 എന്റിന്ത് ഗുഡി നിമ്മ പെരിമെപഡ്‌ന്റ്‌റ്. നിമ്മ് പട്ട്‌ല് നഡാക്കുവ ഈ കെ്ട്ട കാര്യന നെനേത്ത് നിമ്മ സങ്കഡപട്ട് ഈ കാര്യ ഗേന്തവാന്‌ന നിമ്മ കൂഡുവ കൂട്ടാത്ത്‌ലിന്ത് മുഡിക്കി ബ്‌ട്ടിന്ത്‌റ്‌ക്കുഡൊ. 3 നാന് നിമ്മോഡൊപ്പ ഇല്ലാദെ ഇന്താല്‌മ് എന്നുജുരുകെ്ളെ നിമ്മോഡത്തെ ഇര്‌ക്ക്‌ന്റ്. ആണ്ടവാന് ഏസ്സ് തന്ത അദിഗരാത്ത്‌ല് നാന് നിമ്മോഡൊപ്പ ഇര്‌ക്ക്‌ന്റവാനായി ഈ കെ്ട്ട കാര്യ ഗേന്തവാന്‌ക്ക് ബിദി മുഡിത്ത്‌റ്‌ന്റെ. 4 അത്തെ ആണ്ടവാന് ഏസ്സ് സക്‌ത്യോഡൊപ്പ നിമ്മാമ് എന്ന് ഉജുരുകെ്ളേമ് ഒന്റായി കൂഡി ബരുഡൊ. 5 അത്തെ നമ്മ് ആണ്ടവാന് ഏസ്സ് ബിദിക്ക്യ ബരുവ നാള്‌ല് ഉജുരുകെ്ളെ തപ്പിസി കഡാക്ക്യ ബേ്ണ്ടി അയാള്‌ന നിമ്മ സെയിത്താന് കയിക്ക് കൊഡുനു. സെയിത്താന് അയാള് സരിഗലന ദെ്ണ്ടിക്കുഡൊ. 6 നിമ്മ ബക്‌തിഗാറാര് എന്റ് പെരിമെപഡുവാദ്‌ല് എന്ത് അര്‌ത്ത ഇര്‌ക്ക്‌ന്റ്? <<ഒന്റു സൊട്ടു പുളിമാവു മാവുനൊട്ടുക്കു പുളിത്ത മാവു മാഡ്‌ന്റ്>> എന്റ് നിമാക്ക് തെരിവാദില്ലേഗ? 7 നിമ്മ ഒട്ടുക്കു പുളിക്കാത്ത മാവുന പാസെത്തെ. അയി കെ്ട്ട കാര്യ ഗേന്തവാന് പുളിത്ത മാവുന പാസെത്തെ. നിമ്മ ഒട്ടുക്കു പുളിത്ത മാവു ആഗാദിര്‌ക്ക്യ ബേ്ണ്ടി പുളിത്ത മാവായിര്‌ക്കുവ അയി കെ്ട്ട കാര്യ ഗേന്തവാന്‌ന നിമ്മ് കൂട്ടാത്ത്‌ലിന്ത് മുഡിക്കി ബ്‌ഡ്‌ന്. അത്തെ നിമ്മ പുദ്യ മാവു ആവുറു. നിമ്മ അത്തേത്തെ ആയിര്‌ക്ക്‌ന്റ്‌റല്ല? എന്ത്‌ക്കെന്റ് സൊന്ന ക്‌റ്‌സ്‌ത്ത് നമ്മ് പാവാക്ക് ബേ്ണ്ടി പലി ആയിര്‌ന്റാന്. അയാള്‌ത്തെ പെസഗെ നോമ്പിക്കുള്ള നമ്മ് കൊറ്യാഡ് കുട്ടി. 8 നമ്മ് പെസഗെ നോമ്പി എന്നുവാദ് ക്‌റ്‌സ്‌ത്ത് നമാന ബ്‌ഡ്‌സ്‌നാദ്‌ന നെനേക്കുവാദ്‌ത്തെ. അയി നോമ്പി കെ്ട്ടാദ്‌മ് ആഗാത്താദ്‌മാന പളാക്കഗാള്‌ന ബെത്ത് കൊണ്ടല്ല ഗേവാദ്. അത്തെ ഗേന്ത അദ് പള്യ പുളിര്‌ക്കുവ അഡേല് ഗേവ നോമ്പിത്തെ. അദ്‌ക്ക് ബദ്‌ല കീ്ട്ട്‌ഗ ഇല്ലാത്ത മനേസ്സ്‌ഗാറാര്‌മ് സത്ത്യത്തോഡാമ് ഇര്‌ക്ക്‌ന്റവാര്‌മ് ആയിത്തെ അയി നോമ്പി ഗേഡൊ. അദ്‌ത്തെ പുളില്ലാത്ത അഡേല് ഗേവ നോമ്പി. കെ്ട്ട കാര്യ ഗേവ ഏസ്സ്‌ഗാറാരോ എ്ണേഗ ബേ്ഡ 9 കേ്ഡ്‌ഗെ്ട്ട് ബേസ്യാഡി നഡാക്ക്‌ന്റവാരോഡ എ്ണേന്ത് നഡാക്ക ബേ്ഡ എന്റ് നാന് നിമാക്ക് മുദാല് എ്ള്‌ദിന്തേനല്ല. 10 അദ് ഉലഗാക്ക് പട്ടവാര്‌ല് ബേസ്യാഡ്‌ന്റവരോഡാഗൊ, ആസെപാഡ്‌ഗാറാരോഡാഗൊ, പ്‌ഡിങ്കിപറ്‌ക്ക്‌ന്റവാരോഡാഗൊ സെലെന കുമ്മുഡുന്റവാരോഡാഗൊ എ്ണേന്ത് നഡാക്ക ബേ്ഡ എന്നുവ അര്‌ത്താത്ത്‌ലല്ല എ്ള്‌ദ്‌നാദ്, അത്ത്യാനദാന നിമാക്ക് ഈ ഉലഗാന ബ്‌ട്ട് പോവ ഗെദി ബര്‌മല്ല. 11 ആന ഏസ്സ്‌ഗാറാന് എന്റ് പേരെ്ഡ്‌ത്ത ഒന്റൊരുത്താന് ബേസ്യാഡ്‌ന്റവാനൊ, ആസെപാഡ്‌ഗാറാനൊ, സെലെന കുമ്മുഡുന്റവാനൊ, നൊണ്ടു സൊല്ലി നഡാക്ക്‌ന്റവാനൊ, കുഡിഗാറാനൊ, പ്‌ഡിങ്കിപറ്‌ക്ക്‌ന്റവാനൊ ആനദാന അവാനോഡ എ്ണേന്ത് നഡാക്ക ബേ്ഡ എന്റ്‌ത്തെ നാന് അര്‌ത്ത മാഡ്‌നാദ്. അത്തെ ഇര്‌ക്ക്‌ന്റവാനോഡ ഒന്റായിന്ത് തീനി ഗുഡി തിന്ന ബേ്ഡ എന്റ്‌ത്തെ നാന് നിമാക്ക് എ്ള്‌ദുവാദ്. 12 ഈ ഉലഗാക്ക് പട്ടവാര്‌ന ബിദിക്കുവാദ് എന്ന് കാര്യല്ല, ഏസ്സ്‌ഗാറാര് കൂട്ടാത്ത്‌ല് ഇര്‌ക്ക്‌ന്റവാര്‌നാത്തെ നിമ്മ ബിദിക്കുഡൊ. അല്ലത്തവാര്‌ന സാമി ബിദിക്കുവാന്. 13 സാമി സൊല്ലുസുലാക്കാത്ത്‌ല് സൊല്ലിര്‌ക്കുവ പാസെ <<അയി കെ്ട്ടവാന്‌ന നിമ്മ് കൂട്ടാത്ത്‌ലിന്ത് മുഡിക്കി ബ്‌ഡ്‌ന്.>> |
New Life Computer Institute