1 കൊരിന്ത്യഗാറാര് 3 - സാമി സേദിഉലഗാത്ത്ലവാര് പെ്ളേക്കുവ പാസെ പെ്ളേക്കുവ ഏസ്സ്‌ഗാറാര് 1 എന്ന് ഏസ്സ്‌ഗാറാരെ, നാന് നിമ്മ് പട്ട്‌ല് ഇര്‌ക്കാട്ടി സാമിനിഗാല് നഡാത്ത്‌ന്റവാരോഡ നായനൊഡിവ പാസെ എനാക്ക് നിമ്മോഡ നായനൊഡ്യ മുഡ്യാലെ. അദ്‌ക്ക് ബദ്‌ല അവനവാന് ആസെപഡി പെ്ളേക്കുവ ഈ ഉലഗാത്ത്‌ല ആള്‌ഗാളോഡ നായനൊഡിവ പാസെത്തെ നിമ്മോഡ നായനൊഡിന്താദ്. അദ്‌താനേമല്ല ക്‌റ്‌സ്‌ത്ത്‌ന നമ്പി നഡാക്കുവ പെ്ളേപ്പ്‌ന പറ്റി ഇന്നാല്‌ത്തെ അറുവു ബെത്ത് ബരുവ ആള്‌ഗാളോഡ നായനൊഡിവ പാസേമ്‌ത്തെ നായ നൊഡിന്താദ്. 2 നാന് നിമാക്ക് ക്‌റ്‌സ്‌ത്ത്‌ന പറ്റി സൊന്ന ബുദ്ദിനായ പച്ചെപ്‌ള്ളേക്ക് പാലൂട്ടുവാദ്‌ക്ക് സമ ആയിന്ത്‌ദ്. ദൊഡ്ഡവാര് തിന്നുവ തീനിക്ക് സമ ആയിര്‌ക്കുവ നായഗാള്‌ന നാന് നിമാക്ക് സൊല്ലാലെ. ഇന്നാല്‌മ് നിമ്മ അത്തവ നായഗാള് സൊന്നദാന അദ്‌ന നെപ്പ് കെ്ഡേസുവാദ്‌ക്കുള്ള ആള്‌ഗാള് ആഗാദിര്‌ക്ക്‌ന്റ്‌റ്. 3 എന്ത്‌ക്കെന്റ് സൊന്ന ഇന്നാല്‌മ് നിമ്മ അവനവാന് ആസെപഡി പെ്ളേക്കുവ ഈ ഉലഗാത്ത്‌ലവാര്‌ന പാസെത്തെ പെ്ളേക്ക്‌ന്റ്‌റ്. നിമ്മ് പട്ട്‌ല് കണ്ണ്‌കഡിമ് ആങ്കീങ്ക് മല്ല്‌മ് ഇര്‌ക്കുവാദ്‌നാലെ അവനവാന് ആസെപഡി പെ്ളേക്കുവ ഈ ഉലഗാത്ത്‌ലവാര്‌ന പാസേമ് സാമിന തെര്യാത്ത ആള്‌ഗാള്‌ന പാസേമ്‌ത്തെ നിമ്മ പെ്ളേക്ക്‌ന്റ്‌റ് എന്നുവാദ്‌ന കാട്ട്‌ന്റ്. 4 നിമ്മ് കൂട്ടാത്ത്‌ല് ലേസ ആള്‌ഗാള് <<എമ്മ പവുലോസു സാരി ഇര്‌ക്ക്‌ന്റവാര്>> എന്റ്‌മ് ബേ്റെ ലേസ ആള്‌ഗാള് <<എമ്മ അപ്പലോസു സാരി ഇര്‌ക്ക്‌ന്റവാര്>> എന്റ്‌മ് സൊല്ലുഗാട്ടി നിമ്മ ഉലഗാത്ത്‌ല് ഇര്‌ക്കുവ ബേ്റെ ആള്‌ഗാള് ഗേവ പാസ്യല്ല ഗേവാദ്? സാമി കാഡ്‌മ് അദ്‌ല ഗിലാസഗാറാര്‌മ് 5 അപ്പലോസു അത്ത്‌റ ദൊഡ്ഡവാന? പവുലോസു എന്നുവ നാന് അത്ത്‌റ ദൊഡ്ഡവാന? അല്ല. നിമ്മ ഏസ്സ് ക്‌റ്‌സ്‌ത്തോഡ ബെത്ത്‌റ്‌ക്കുവ നമ്പിക്കേല് നിമാന ഒറേത്തവാര് മാഡ്യ ബേ്ണ്ടി നിമാന കയിതാങ്ക്യ ബെത്ത്‌റ്‌ക്കുവ ബെ്റ് നോട്ടഗാറാര്‌ത്തെ എമ്മ. ആണ്ടവാന് തന്ത ഗിലാസഗാള്‌നത്തെ എമ്മ ഒന്റൊന്റാള്‌മ് ഗേന്റേമ്. 6 സാമി കാഡ്‌ന പാസെത്തെ നിമ്മ. അയി കാഡ്‌ക്ക് ബെദേന നാട്ട്‌നവാന്‌ന പാസെത്തെ നാന്, അദ്‌ക്ക് നീര് നലേസ്‌നവാന്‌ന പാസെത്തെ അപ്പലോസു, ആന അയി ബെദേന ബളാത്ത്‌നാദ് സാമിത്തെ. 7 അദ്‌നാലെ നാട്ട്‌നവാനൊ, നീര് നലേസ്‌നവാനൊ ആര്‌മ് ദൊഡ്ഡവാരല്ല, സാമിത്തെ ദൊഡ്ഡവാന്. എന്ത്‌ക്കെന്റ് സൊന്ന സാമിത്തെ ബളാത്ത്‌നാദ്. 8 നാട്ട്‌ന്റവാന്‌മ് നീര് നലേസ്‌ന്റവാന്‌മ് ദൊഡ്ഡവാനൊ സ്‌ന്നവാനൊ എന്നുവ ബിത്ത്യാസ ഇല്ലെ, അവാര് ഒന്റേ പാസെത്തെ. ഒന്റൊന്റാള്‌ക്ക്‌മ് അവനവാന് ഗേന്ത ഗിലാസാക്ക് തഗ്‌ന്ത കൂലി കെ്ഡേക്ക്‌മ്. 9 നിമ്മാത്തെ സാമി കാഡ്, എമ്മ അദ്‌ല് സാമിക്ക് ബേ്ണ്ടി ഗിലാസ ഗേവ ബെ്റ് ഗിലാസഗാറാര്‌ത്തെ. നിമ്മാത്തെ സാമിബീ്ഡ്. സാമിബീ്ഡ്‌മ് കെ്ട്ട്‌ഗാറാര്‌മ് 10 സാമി പ്‌ണ്ണ്യാത്ത്‌ല് എനാക്ക് കെ്ഡേത്ത തിരമേല് നാന് അറുവുമു ബുദ്ദിമ് ഇര്‌ക്കുവ മുക്ക്യമാന ഒന്റു കെ്ട്ട് ഗിലാസഗാറാനായി ബേസ്‌മട്ട കെ്ട്ട്‌ന്റെ. ബേ്റൊന്റു ഗിലാസഗാറാന് അദ്‌ന കെ്ട്ടി ഉജാത്ത്‌ന്റാന്. ആന ഒന്റൊന്റു ഗിലാസഗാറാന്‌മ് താന് എത്തെ കെ്ട്ട് ഗിലാസ ഗേന്റാന് എന്റ് സൊക്കന നോഡുഡൊ. 11 എന്ത്‌ക്കെന്റ് സൊന്ന ഏസ്സ് ക്‌റ്‌സ്‌ത്ത്‌ത്തെ കെ്ട്ടിര്‌ക്കുവ ഒന്റേ ഒന്റു ബേസ്‌മട്ട. അദല്ലാദെ ബേ്റൊന്റു ബേസ്‌മട്ട കെ്ട്ട്യ ആര്‌ക്ക്‌മ് മുഡ്യാമാട്ട. 12 അയി ബേസ്‌മട്ട കുദ്ദാക്ക് ഒന്റൊന്റു കെ്ട്ട്‌ഗാറാര് പൊന്നൊ, ബെ്ള്ള്യൊ, ബെലെപെറ്റ കല്ലൊ, മരാഗൊ, പുല്ലൊ, നെല്ല് പുല്ലൊ ബെത്ത് കെ്ട്ട്‌ന്റാര്. 13 ആന ക്‌റ്‌സ്‌ത്ത് ബിദിക്ക്യ ബരുവ നാള്‌ല് ഒന്റൊന്റാള് ഗേന്ത ഗിലാസഗാള് എത്തവ ദിന്‌സ് എന്റ് എദ്‌ക്കാമ്. തീ താനെ അദ്‌ന എദ്‌ക്ക മാഡ്‌മ്, അദ്‌ന സോദണെ ഗേന്ത് എദ്‌ക്ക മാഡ്‌മ്. 14 ഒരുത്താന് കെ്ട്ട്‌ന കെ്ട്ട് ബെന്ത് പോഗാദെ അത്തേഗേ ഇന്തദാന അയാള്‌ക്ക് കൂലി കെ്ഡേക്ക്‌മ്. 15 ആന ഒരുത്താന് കെ്ട്ട്‌ന കെ്ട്ട് ബെന്ത് പോന അയാള്‌ക്ക് കെ്ഡേക്കുവ കൂലി നജ്‌ട്ടാമ്. ആനാല്‌മ് അയാള് തപ്പിസി കഡാക്കുവാന്, ആന ഒന്റാള് തീയിലിന്ത് തപ്പിസി കഡാക്കുവ പാസെത്തെ അയാള് തപ്പിസി കഡാക്കുവാദ്. നിമ്മ സാമി തങ്കുവ എ്ഡെ 16 സാമിബീ്ഡ് എന്നുവാദ് നിമ്മാത്തെ എന്റ്‌മ് സാമിനിഗാല് നിമ്മോഡ ഇര്‌ക്ക്‌ന്റ് എന്റ്‌മ് നിമാക്ക് തെരിമല്ല? 17 അദ്‌നാലെ ആരാറ്റ സാമിബീ്ഡ്‌ന കെ്ഡ്‌സ്‌നദാന സാമി അയാള്‌ന കെ്ഡ്‌സുവാന്. എന്ത്‌ക്കെന്റ് സൊന്ന സാമിബീ്ഡ് സാമിക്ക് ബേ്ണ്ടി അലാക്ക പ്‌റ്‌ത്ത് ബെത്ത്‌റ്‌ക്കുവ സുത്താപ്പുള്ള ബീ്ഡ്‌ത്തെ. അയി ബീ്ഡ് എന്നുവാദ് നിമ്മാത്തെ. മന്‌സാര്‌ഗാള്‌ന പറ്റി പെരിമെപഡാദേന് 18 നിമ്മ ആര്‌മ് നിമാന താനെ സദിക്കാദേന്. മന്‌സാന് കണ്ണ്‌മുന്നുക്കു <<നാന് ബുദ്ദിമ് അറുവുമ് ഉള്ളവാന്>> എന്റ് നിമ്മ ആരാറ്റ നെനേത്തദാന അയാള് ബുദ്ദിഗെ്ട്ടവാന് ആഡൊ. എന്റദാനത്തെ അയാള് സാമി കണ്ണ്‌മുന്നുക്കു ബുദ്ദിമ് അറുവുമ് ഉള്ളവാന് ആവാന്. 19 എന്ത്‌ക്കെന്റ് സൊന്ന മന്‌സാന് കണ്ണ്‌മുന്നുക്കു ബുദ്ദി എന്റ് നെനേക്കുവാദ് സാമി കണ്ണ്‌ക്ക് ബുദ്ദിഗെ്ട്ടാദ്‌ത്തെ. സാമി സൊല്ലുസുലാക്കാത്ത്‌ല്: <<അറിവാള്‌ഗാള്‌ന അവാര് ഗേവ തന്ത്‌റാത്ത്‌ല് സാമി സിക്ക്‌സ്‌ന്റാന്.>> 20 അദ്‌താനേമല്ല, <<അറിവാളിഗാള് നെനേക്കുവ നെനേപ്പ് ഉവഗര ഇല്ലത്താദ് എന്റ് ആണ്ടവാന്‌ക്ക് തെരിന്റ്>> എന്റ്‌മ് എ്ള്‌ദിര്‌ക്ക്‌ന്റല്ല. 21 അദ്‌നാലെ മന്‌സാര്‌ഗാള്‌ന പറ്റി ആര്‌മ് പെരിമെപഡാദേന്, എല്ലാമ് നിമാക്കുള്ളാദ്‌ത്തെ. 22 പവുലോസുമു, അപ്പലോസുമു, പത്ത്‌റോസുമു, ഈ ഉലഗാമ്, ഉജുരോഡ ഇര്‌ക്കുവാദ്‌മ്, സാവാദ്‌മ്, ഇന്നാലിര്‌ക്കുവാദ്‌മ്, ബര്യ ഇര്‌ക്കുവാദ്‌മ് എല്ലാമ് നിമാക്ക് ബേ്ണ്ടിത്തെ. 23 നിമ്മാഗൊ ക്‌റ്‌സ്‌ത്ത്‌ക്കുള്ളവാര്‌ത്തെ, ക്‌റ്‌സ്‌ത്ത് സാമിക്കുള്ളവാന്‌ത്തെ. |
New Life Computer Institute