1 കൊരിന്ത്യഗാറാര് 15 - സാമി സേദിഏസ്സ് ക്‌റ്‌സ്‌ത്ത് ഉജുര്‌ളാഗ്‌ന്റാന് 1 ഏസ്സ്‌ഗാറാരെ, നാന് നിമാക്ക് സൊന്ന നല്ല സേദിന പറ്റി നിമാക്ക് ഇന്നാല് നെനേവു ബര്‌സ്സ്യ നാന് ആസെപഡ്‌ന്റെ. നിമ്മ അയി സേദിന കേ്ട്ട് ഒറേപ്പായി നമ്പിര്‌ക്ക്‌ന്റ്‌റ്. 2 നാന് നിമാക്ക് സൊന്ന അയി നല്ല സേദിന ഒറേപ്പായിമ് നമ്പ്‌നദാന നിമ്മ തപ്പിസി കഡാക്ക്‌ന്റ്‌റ്, നമ്പാദെ പോന നിമ്മ് നമ്പിക്കെ ബെ്റ്‌ദ്യായി തള്ള്‌മ്. 3 നാന് കേ്ട്ടെ്ഡ്‌ത്ത് നിമാക്ക് സൊന്ന മ്‌ഗ്‌ന്ത കാര്യ എന്തെന്റ് സൊന്ന, സാമി സൊല്ലുസുലാക്കാത്ത്‌ല് മുന്നുക്കു താനെ സൊല്ലി ബെത്ത്‌റ്‌ക്കുവ പാസെ ക്‌റ്‌സ്‌ത്ത് നമ്മ ഗേവ പാവാക്ക് ബേ്ണ്ടി സത്താന്. 4 അയാള്‌ന അഡാക്കാമ് മാഡ്‌നാര്. സാമി സൊല്ലുസുലാക്കാത്ത്‌ല് മുന്നുക്കു താനെ സൊല്ലി ബെത്ത്‌റ്‌ക്കുവ പാസെ മൂറാവാദ് നാള് അയാള് ഉജുര്‌ളാഗ്‌നാന്. 5 പ്‌റ പത്ത്‌റോസു കണ്ണ്‌ക്ക്‌മ് പന്നന്റ് അപ്പോസുത്തലാര് കണ്ണ്‌ക്ക്‌മ് അയാള് കാട്ട്‌നാന്. 6 പ്‌റ അയാള് തനാന നമ്പി നഡാന്തിന്ത അയിനൂറ്‌ക്ക്‌മ് അദിഗ ആള്‌ഗാള് ഒന്റായി കൂഡിര്‌ക്കാട്ടി അവാര് കണ്ണ്‌ക്ക് ഒന്റേ ബെപ്പ്‌ല് കാട്ട്‌നാന്. അവാര്‌ല് എഞ്ചോ ആള്‌ഗാള് ഇന്നാല്‌മ് ഉജുരോഡ ഇര്‌ക്ക്‌ന്റാര്, ലേസ ആള്‌ഗാള് സത്താര്. 7 അദ്‌ക്ക് പ്‌റ അയാള് ആക്കോവു കണ്ണ്‌ക്ക്‌മ് പ്‌റ എല്ലാ അപ്പോസുത്തലാര് കണ്ണ്‌ക്ക്‌മ് കാട്ട്‌നാന്. 8 കഡേഗല, അളിത്ത് തള്ള്‌ന പ്‌ള്ളെന പാസെ ഇര്‌ക്കുവ എന്ന് കണ്ണ്‌ക്ക്‌മ് കാട്ട്‌നാന്. 9 എല്ലാ അപ്പോസുത്തലാര്‌ന ബ്‌ഡ നാന് സ്‌ന്നവാന്‌ത്തെ, സാമിക്ക് പട്ട ഏസ്സ്‌ഗാറാര് കൂട്ടന കൊഡിമെപഡ്‌സ്‌നാദ്‌നാലെ അപ്പോസുത്തലാന് എന്റ് പേരെ്ഡ്‌ക്ക്യ എനാക്ക് തഗ്‌ദിമില്ലെ. 10 ആന സാമി പ്‌ണ്ണ്യാത്ത്‌ല്‌ത്തെ നാന് അപ്പോസുത്തലാന് ആനാദ്. സാമി എനാക്ക് ഗേന്ത പ്‌ണ്ണ്യ ഉവഗര ഇല്ലത്താദ് ആഗാലെ. ബേ്റെ അപ്പോസുത്തലാര്‌ന ബ്‌ഡ നാന് മ്‌ഗ്‌ന്ത പാഡ്‌പട്ട്‌റ്‌ന്റെ. നാന് ഒരുത്താന് താനെ എന്തൊന്റു ഗേന്തേന് എന്റല്ല, സാമി പ്‌ണ്ണ്യാത്ത്‌ല്‌ത്തെ നാന് ഇദെല്ല ഗേന്താദ്. 11 അദ്‌നാലെ നാനാഡൊ അവാരാഡൊ എമ്മ ഒട്ടുക്കുമു ഒന്റേ കാര്യനത്തെ നിമാക്ക് സൊന്നാദ്, അദേ കാര്യനത്തെ നിമ്മ നമ്പുവാദ്‌മ്. സാവുലിന്ത് ഉജുര്‌ളാഗ്‌ന്റാന് 12 ക്‌റ്‌സ്‌ത്ത് സത്തവാര് പട്ട്‌ലിന്ത് ഉജുര്‌ളാഗ്‌നാന് എന്റ് എമ്മ സൊല്ലി നഡാക്ക്‌ന്റേമ്, ആന സത്തവാര് ഉജുര്‌ളാഗുവാദില്ലെ എന്റ് നിമ്മ് കൂട്ടാത്ത്‌ല് ലേസ ആള്‌ഗാള് സൊല്ലുവാദ് എത്തെ? 13 സത്തവാര് ഉജുര്‌ളാഗുവാദില്ലെ എന്റ് സൊല്ലുവദാന ക്‌റ്‌സ്‌ത്ത്‌മ് ഉജുര്‌ളാഗാലെ. 14 ക്‌റ്‌സ്‌ത്ത് ഉജുര്‌ളാഗാദെ ഇന്തദാന എമ്മ സൊല്ലുവ നായാമ് ബെ്റ്‌ദേത്തെ, നിമ്മ ക്‌റ്‌സ്‌ത്ത്‌ന നമ്പുവാദ്‌മ് ബെ്റ്‌ദേത്തെ. 15 സത്തവാര് ഉജുര്‌ളാഗുവാദ് ഇല്ലെന്റദാന ക്‌റ്‌സ്‌ത്ത്‌ന സാമി ഉജുര്‌ളാക്ക്‌നാന് എന്റ് എമ്മ സൊല്ലുവാദ് ഉറുട്ടുത്തെ. അത്തെ സാമി ഗേഗാത്ത കാര്യന ഗേന്താന് എന്റ് സൊല്ലുവാദ്‌നാലെ എമ്മ സാമി കണ്ണ്‌ക്ക് കുറ്റഗാറാര്‌ത്തെ. ആന നിമ്മ സൊല്ലുവാദ് സെര്യല്ല. 16 സത്തവാര് ഉജുര്‌ളാഗാദെ പോന ക്‌റ്‌സ്‌ത്ത്‌മ് ഉജുര്‌ളാഗാലെ. 17 ക്‌റ്‌സ്‌ത്ത് ഉജുര്‌ളാഗാദെ ഇന്തദാന നിമ്മ നമ്പുവ നമ്പിക്കേമ് ബെ്റ്‌ദേത്തെ, നിമ്മ ഇന്നാല്‌മ് നിമ്മ് പാവാക്ക് പൊറിമെ കെ്ഡേക്കാത്തവാര് ആയിത്തെ ഇര്‌ക്ക്‌ന്റ്‌റ്. 18 അത്ത്യായിന്തദാന ക്‌റ്‌സ്‌ത്ത്‌ന നമ്പി പെ്ളേത്ത് സത്തവാര്‌മ് ഇല്ലാദ്യായി തള്ള്‌നാര്. 19 നമ്മ ഈ ബൂമില പെ്ളേപ്പ്‌ക്ക് ബേ്ണ്ടിത്തെ ക്‌റ്‌സ്‌ത്ത്‌ന നെഞ്ചഡെ ബെത്ത്‌റ്‌ക്കുവദാന ക്‌റ്‌സ്‌ത്ത്‌ന നമ്പാത്തവാര്‌ന ബ്‌ഡ നമ്മ എത്ത്‌റാഗോ അറങ്കെ്ട്ടവാര്‌ത്തെ. 20 ആന സത്തവാര് ഉജുര്‌ളാഗുവാര് എന്നുവാദ്‌ക്ക് ഒറേപ്പ് കൊഡുത്തു കൊണ്ടു ക്‌റ്‌സ്‌ത്ത് സത്തവാര് പട്ട്‌ലിന്ത് മുമ്പാനായി ഉജുര്‌ളാഗ്‌നാന്. 21 മന്‌സാന്‌നാലെത്തെ സാവു ബന്താദ്. അദ്‌നാലെ സത്തവാര് ഉജുര്‌ളാഗുവാദ്‌മ് മന്‌സാന്‌നാലെത്തെ. 22 ആദാമ് കാല്‌കെ്ളേക്ക് പട്ട നമാക്ക് ആദാമ്‌ലിന്ത് സാവു ബന്ത പാസെ ക്‌റ്‌സ്‌ത്തോഡ എ്ണേന്ത്‌റ്‌ക്കുവ നമ്മ എല്ലാവാര്‌മ് സാവുലിന്ത് ഉജുര്‌ളാഗ്‌ന്റവാര് ആയാമ്. 23 ആന എല്ലാര്‌മ് ഒന്റേ ബെപ്പ്‌ല് അല്ല ഉജുര്‌ളാഗുവാദ്. ആദ്യ ക്‌റ്‌സ്‌ത്ത്‌ത്തെന്റ, പിന്നെ അയാള് ബര്‌ഗാട്ടി അയാള്‌ക്കുള്ളവാര് ഉജുര്‌ളാഗുവാര്, 24 പ്‌റ കഡേസി നാള്. അയി നാള്‌ല് സാമ്യോഡ പോട്ടിപ്‌ഡിത്ത്‌റ്‌ക്കുവ മാഗെ ലോഗാത്ത്‌ല എല്ലാ അദിഗാരിഗാള്‌നാമ് ഈ ഉലഗാത്ത്‌ല അദിഗാരിഗാള്‌നാമ് സക്‌തിഗാള്‌നാമ് ക്‌റ്‌സ്‌ത്ത് സോലുസി താന് ആളുവ നാഡ്‌ന അപ്പാന് സാമി കയിക്ക് ഒപ്പിസി കൊഡുക്കുവാന്. 25 എല്ലാ പോട്ടിഗാറാര്‌നാമ് സോലുസി തന്ന് കാല്‌കഡി മാഡമാട്ട്‌ക്ക് ക്‌റ്‌സ്‌ത്ത് രാജാവായി ആളുഡല്ല. 26 കഡേസി പോട്ടിഗാറാന് എന്നുവാദ് സാവുത്തെ. അദ്‌നാമ് ക്‌റ്‌സ്‌ത്ത് ഇല്ലാദെ മാഡുവാന്. 27 എന്ത്‌ക്കെന്റ് സൊന്ന <<എല്ലാദ്‌നാമ് അയാള് കാല്‌കഡി മാഡി ബെത്ത്‌റ്‌ന്റായി>> എന്റ് സാമി സൊല്ലുസുലാക്കാത്ത്‌ല് മുന്നുക്കു താനെ എ്ള്‌ദിര്‌ക്ക്‌ന്റ്. <<എല്ലാദ്‌നാമ്>> എന്റ് സൊല്ലിര്‌ക്കുവാദ്‌ല് എല്ലാദ്‌നാമ് ക്‌റ്‌സ്‌ത്ത് കാല്‌കഡി മാഡി കൊഡുത്ത സാമി പഡുവാദില്ലെ എന്റ് സൊക്കാന കാട്ടി തന്റ്. 28 ആന എല്ലാദ്‌നാമ് അയാള് കാല്‌കഡി മാഡ്‌ന പ്‌റ സാമി എല്ലാദ്‌ക്ക്‌മ് ദൊഡ്ഡവാന് ആയിര്‌ക്ക്യ ബേ്ണ്ടി മഗാന് താന്‌മ് എല്ലാദ്‌നാമ് തന്ന് കാല്‌കഡി മാഡി കൊഡുത്ത സാമിക്ക് കെ്ട്ട്‌പട്ട് ഇര്‌ക്കുവാന്. 29 സത്തവാര് ഉജുര്‌ളാഗുവാദ് ഇല്ലെന്റദാന പിന്നെ സത്തവാര്‌ക്ക് ബേ്ണ്ടി നീര്‌ക്ക് മുളുഗുന്റവാര് എന്ത് ഗേവാര്? സത്തവാര് ഉജുര്‌ളാഗുവാദ് ഇല്ലെന്റദാന പിന്നെ എന്ത്‌ക്ക് അവാര്‌ക്ക് ബേ്ണ്ടി നീര്‌ക്ക് മുളുഗുവാദ്? 30 ഈ സേദിക്ക് ബേ്ണ്ടി എമ്മാമ് ഒപ്പ ഉജുരുക്കു അഞ്ചുവാദ് എന്ത്‌ക്ക്? 31 ഏസ്സ്‌ഗാറാരെ, നമ്മ് ആണ്ടവാന് ഏസ്സ് ക്‌റ്‌സ്‌ത്തോഡ ഒന്റായിര്‌ക്കുവ നിമാന പറ്റി പെരിമെപഡുവ എനാക്ക് നാള്‌ക്ക്‌മ് ഉജുരുക്കു ആവാത്ത് ബന്റ് എന്റ് എനാക്ക് കണ്ടിപ്പായിമ് സൊല്ല്യ മുഡിമ്. 32 നാന് എപസോസുലു ബെത്ത് ബേ്ണ്ട്‌ഗാളോഡ ജുദ്ദ ഗേവ പാസെ അത്ത്‌റ പാഡ്‌പട്ടാദ് എന്ന് സൊന്ത കാര്യാക്ക് ബേ്ണ്ടി ആയിന്തദാന അദ്‌നാലെ എനാക്ക് എന്ത് ഉവഗരാറ്റ്? സത്തവാര് ഉജുര്‌ളാഗാദെ പോന <<തിന്ന്‌ന്, കുഡിന്, എന്ത്‌ക്കെന്റ് സൊന്ന നാളേക്ക് സാലാമല്ല>> എന്റ് മുന്തെലവാര് സൊല്ലുവ പാസെ പെ്ളേക്ക്‌ലാമല്ല. 33 നിമാന ഏമാത്ത്യ ആര്‌നാമ് ബ്‌ഡാദേന്. <<കെ്ട്ടവാരോഡ കൂട്ടു എ്ണേവാദ് നല്ലവാര്‌ന കെ്ഡ്‌സ്‌ന്റ്.>> 34 നല്ല നെനേവു ഉള്ളവാര് ആയി പാവ ഗേവാദ്‌ന തെ്റിന്ത് തള്ള്‌ന്. നാന് നിമാന നാണഗെ്ഡിസ്യ ബേ്ണ്ടി ഇത്തെ സൊന്റെ, നിമ്മ് കൂട്ടാത്ത്‌ല് ലേസ ആള്‌ഗാള്‌ക്ക് സാമിന പറ്റി ഒന്റു സുക്കുമു തെര്യ. ഉജുര്‌ളാഗ്‌ന സരിഗല 35 ആന <<സത്തവാര് എത്തെ ഉജുര്‌ളാഗുവാര്?>> എന്റ്‌മ് <<അവാര് സരിഗല എത്തവ ദിന്‌സ്‌ല് ഇര്‌ക്ക്‌മ്>> എന്റ്‌മ് സിലപ്പ ആരാറ്റ കേ്ള്‌ക്കുവാര്. 36 ബുദ്ദിഗെ്ട്ടവാനെ, നാട്ട്‌ന ബെദെ ഊത്തി ഒഡേഗാദിന്തദാന അദ് മറിസിമ് കൊഡിത്ത് ബളാരമാട്ട. 37 നീ ബെദേന നാട്ട്‌ഗാട്ടി അദ് ഉണ്ടായ പോവ സരിഗലന അല്ല നാട്ടുവാദ്. ഗോദിമ്പെ ബെദേനഗൊ ബേ്റെ എന്തൊന്റു ബെദേനഗൊത്തെ നാട്ട്‌ന്റായി. 38 ആന സാമി തനാക്ക് പ്‌ഡിത്ത പാസെ അദ്‌ക്ക് ഒന്റു സരിഗലനാമ് അദാദ് ബെദേക്ക് അദാദ് സരിഗലനാമ് കൊഡുക്കുന്റാന്. 39 എല്ലാ ഉജുരുകെ്ളെഗാള്‌ക്ക് ഇര്‌ക്കുവ സരിഗല ഒന്റേ ദിന്‌സല്ല. മന്‌സാന് സരിഗല ഒന്റു ദിന്‌സ് ആയിന്തദാന ബേ്ണ്ട്‌ഗാള് സരിഗല ബേ്റൊന്റു ദിന്‌സ്. പക്കിഗാള് സരിഗല ബേ്റെ, മീന്‌ഗാള് സരിഗല ബേ്റെ. 40 മേലോഗ സരിഗലഗാള്‌മ് ബൂലോഗ സരിഗലഗാള്‌മ് ഇര്‌ക്ക്‌ന്റ്, മേലോഗ സരിഗലഗാള്‌ക്ക് ഇര്‌ക്കുവ മദ്‌പ്പ് ബേ്റെ, ബൂലോഗ സരിഗലഗാള്‌ക്ക് ഇര്‌ക്കുവ മദ്‌പ്പ് ബേ്റെ. 41 നേരാക്ക് ഇര്‌ക്കുവ അളാഗ് ബേ്റെ, നിലാവുക്കു ഇര്‌ക്കുവ അളാഗ് ബേ്റൊന്റു ദിന്‌സ്, ബെ്ള്ളിഗാള്‌ക്ക് ഇര്‌ക്കുവ അളാഗ് ബേ്റൊന്റു ദിന്‌സ്‌ല്‌ത്തെ. ബെ്ള്ളിഗാള്‌ക്ക് ബെ്ള്ളിഗാള്‌ക്ക് ഇര്‌ക്കുവ അളാഗ് താനെ പല ദിന്‌സ് ഇര്‌ക്ക്‌ന്റ്. 42 അദ്‌നാലെ സത്തവാര് ഉജുര്‌ളാഗുവാദ്‌മ് ഇദേപാസെത്തെ ആയിര്‌ക്ക്‌മ്. അളിവ സരിഗലന മണ്ണ്‌ക്ക് പാത്ത്‌ന്റാമ്, അദ് അളിവില്ലാത്ത സരിഗലായി ഉജുര്‌ളാഗ്‌ന്റ്. 43 പാത്ത്‌ഗാട്ടി മോസാമ് നാറിമ് തള്ളുവാദ്‌നത്തെ പാത്ത്‌ന്റാമ്, ആന അദ് ഉജുര്‌ളാഗാട്ടി മദ്‌പ്പോഡാമ് സക്‌ത്യോഡാമ്‌ത്തെ ഉജുര്‌ളാഗ്‌ന്റ്. 44 പാത്ത്‌ഗാട്ടി ഈ ഉലഗാത്ത്‌ല സരിഗലനത്തെ പാത്ത്‌ന്റാമ്, ആന അദ് ഉജുര്‌ളാഗാട്ടി സാമിനിഗാല് തരുവ സരിഗല ആയി ഉജുര്‌ളാഗ്‌ന്റ്. ഈ ഉലഗാത്ത്‌ല സരിഗലാമ് ഇര്‌ക്ക്‌ന്റ്, സാമിനിഗാല് തരുവ സരിഗലാമ് ഇര്‌ക്ക്‌ന്റ്. 45 <<മുദാല് മന്‌സാന് ആദാമ് ഉജുരുള്ളവാനായി തീന്താന്>> എന്റ് സാമി ബൊക്കുലു എ്ള്‌ദിര്‌ക്ക്‌ന്റല്ല. ആന കഡേസില ആദാമ് ഉജുരുന കൊഡുക്കുന്റവാന് ആനാന്. 46 മുദാല് കെ്ഡേത്താദ് ഈ ഉലഗാക്ക് പട്ട സരിഗലത്തെ. ആന പ്‌റാത്തെ സാമിനിഗാല് തരുവ സരിഗല കെ്ഡേക്കുവാദ്. 47 ആന ഒണ്ണാവാദ് മന്‌സാന് ആദാമ് മണ്ണ്‌ലിന്ത് ഉണ്ടാനാവാന്‌ത്തെ. റണ്ടാവാദ് മന്‌സാനാന ക്‌റ്‌സ്‌ത്ത് മേലോഗാത്ത്‌ലിന്ത് ബന്താന്. 48 ഈ ലോഗാക്ക് പട്ടവാര് മണ്ണ്‌ല് ഉണ്ടാക്ക്‌നവാന്‌ന പാസേമ് മേലോഗാത്ത്‌ലവാര് മേലോഗാത്ത്‌ലിന്ത് ബന്തവാന്‌ന പാസേമ് ഇര്‌ന്റാര്. 49 നമ്മ മണ്ണ്‌ല് ഉണ്ടാനവാന് ഉരുവ എ്ഡ്‌ത്ത പാസെ മേലോഗത്ത്‌ലിന്ത് ബന്തവാന് ഉരുവാമ് എ്ഡ്‌ക്ക്‌ല. 50 ഏസ്സ്‌ഗാറാരെ, കറിസദേല്‌മ് സോരേല്‌മ് ഉണ്ടാക്കിര്‌ക്കുവ സരിഗലാക്ക് സാമി ആള്യ പോവ നാഡ്‌ല് പങ്ക് കെ്ഡേക്കമാട്ട. അളിവില്ലാത്ത പെ്ളേപ്പ്‌ന സൊന്ത മാഡ്യ ഈ അളിന്ത് പോവ സരിഗലാക്ക് മുഡ്യാമ്‌മാട്ട എന്റ് നാന് നിമാക്ക് സൊന്റെ. 51 നാന് നിമാക്ക് മറേന്ത്‌റ്‌ക്കുവ ഒന്റു സത്ത്യന സൊന്റെ, നമ്മ എല്ലാവാര്‌മ് സാഗമാട്ടാമ്. ആന നമ്മ ദ്‌ഡീരന ഉരുവ മാറ്‌ല. 52 കഡേസില ആലാപ്പ് ജദ്ദ കേ്ള്‌ക്ക്‌ഗാട്ടി ഇന്തമായാത്ത്‌ല് താനെ അദ് നഡാക്ക്‌മ്. സത്തവാര് അളിവില്ലാത്തവാരായി ഉജുര്‌ളാഗുവാര്, നമ്മ ഉരുവാമ് മാറ്‌ല. 53 അദ്‌നാലെ ഈ അളിവിര്‌ക്കുവ സരിഗല അളിവില്ലാത്ത ഉരുവ എ്ഡ്‌ക്കുഡൊ, ഈ സത്ത് പോവ സരിഗല സാഗാദിര്‌ക്കുവ ഉരുവ എ്ഡ്‌ക്കുഡൊ. 54 ഈ അളിവിര്‌ക്കുവ സരിഗല അളിവില്ലാത്താദ്‌മ് സത്ത് പോവ ഈ സരിഗല സാഗാത്ത സരിഗലാമ് ആയി തീര്‌ഗാട്ടി <<സാവു ഇല്ലാദെ ആയി ഗെലിസി കഡാന്ത്‌റ്‌ന്റാമ്>> എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്കുവാദ് നഡാന്ത് മുഡിമ്. 55 <<ഓ, സാവെ, നീ ഏദ്‌ല് ഗെലിസി ഇര്‌ക്ക്‌ന്റായി? ഓ, സാവെ, ബിജ എ്ഡ്‌സ്‌വ നിന്ന് മുള്ളു ഏദ്‌ല്?>> 56 പാവ ഗേവാദ്‌നാലെത്തെ നമാക്ക് സാവു ബരുവാദ്, മോസെ ബെത്ത സാമിസട്ട നമാക്ക് ഇര്‌ക്കുവാദ്‌നാലെത്തെ പാവ എന്തെന്റ് നമാക്ക് തെരിവാദ്. 57 ആന ആണ്ടവാന് ഏസ്സ് ക്‌റ്‌സ്‌ത്ത്‌നാലെ നമാന ഗെലിസി കഡാക്ക്യ ബെക്കുവ സാമിക്ക് നാന് നണ്ണി സൊന്റെ. 58 അദ്‌നാലെ ഏസ്സ്‌ഗാറാരെ, എനാക്ക് മെച്ച്‌പ്‌ഡിത്ത്‌റ്‌ക്കുവ നിമ്മ നമ്പിക്കേല് ഒറേപ്പുള്ളവാരായി അജ്‌ങ്കാദെ ഇര്‌ന്. ആണ്ടവാന്‌ക്ക് ബേ്ണ്ടി പാഡ്‌പഡുവാദ് ബെ്റ്‌ദ്യല്ല എന്റ് തെരിന്ത് ആണ്ടവാന്‌ക്ക് ബേ്ണ്ടി ഗേവ ഗിലാസാന സേത്തി സേത്തി ഗേന്റവാരാന്. |
New Life Computer Institute