1 കൊരിന്ത്യഗാറാര് 11 - സാമി സേദി1 നാന് ക്‌റ്‌സ്‌ത്ത്‌ന നോഡികൊണ്ടു പെ്ളേക്കുവ പാസെ നിമ്മാമ് എനാന നോഡികൊണ്ടു പെ്ളേന്. സാമി കുമ്മുഡുഗാട്ടി ഗേവ കാര്യഗാള് 2 നിമ്മ എനാന ഒപ്പ നെനേത്ത് കൊണ്ടുമു നാന് നിമാക്ക് സൊല്ലി തന്ത സട്ട്‌മെ്ട്ട്‌ക്ക് കെ്ട്ട്‌പട്ട് കൊണ്ടുമു നഡാക്ക്‌ന്റ്‌റ്. അദ്‌നാലെ നാന് നിമാന പെരിമെപഡ്‌ന്റെ. 3 ആന ഏദ് ഗണ്ട്‌ക്ക്‌മ് തലെവാന് ക്‌റ്‌സ്‌ത്ത്‌ത്തെ എന്റ്‌മ് ഏദ് പെ്ണ്ണ്‌ക്ക്‌മ് തലെവാന് ഗണ്ട്‌ത്തെ എന്റ്‌മ് ക്‌റ്‌സ്‌ത്ത്‌ക്ക് തലെവാന് സാമിത്തെ എന്റ്‌മ് നിമ്മ തെരിന്ത്‌റ്‌ക്കുഡൊ എന്റ് നാന് ആസെപഡ്‌ന്റെ. 4 തലേക്ക് സീലെ സൂഡി പരേസ്യൊ സാമി സേദിന സൊല്ല്യൊ ഗേവ ഏദ് ഗണ്ട്‌മ് തന്ന് തലേന താനെ മദ്‌സുവാദില്ലെ. 5 തലേക്ക് സീലെ സൂഡാദെ പരേസ്യൊ സാമി സേദിന സൊല്ല്യൊ ഗേവ ഏദ് പെ്ണ്ണ്‌മ് തന്ന് തലേന താനെ മദ്‌സുവാദില്ലെ. അദ് ഒരുത്തി തന്ന് തലേന മൊട്ടി കെരേത്ത് നാണഗെ്ട്ട പാസെത്തെ. 6 അവാള് തലേക്ക് സീലെ സൂഡാദെ പോന തലേന കത്താരിസി തള്ള്‌ഡൊ. കത്താര്‌സുവാദൊ മൊട്ടി കെരേക്കുവാദൊ നാണ ആനദാന അവാള് തലേക്ക് സീലെ സൂഡിര്‌ക്കുഡൊ. 7 ഗണ്ടാള്‌ഗാള് തലേക്ക് സീലെ സൂഡ ബേ്ഡ. എന്ത്‌ക്കെന്റ് സൊന്ന ഗണ്ടാള്‌ഗാള് സാമി ഉരുവാന പാസെ ഇര്‌ക്ക്‌ന്റവാര്‌മ് സാമിക്കിര്‌ക്കുവ മദ്‌പ്പ്‌ന കാട്ട്‌ന്റവാര്‌മ്‌ത്തെ. ആന പെ്ണ്ണ്‌മക്കാള് ഗണ്ടാള് മദ്‌പ്പ്‌ന കാട്ട്‌ന്റാര്. 8 ആദ്യ ഗണ്ട്‌ന ദ്‌ട്ട്‌സ്‌നാദ് പെ്ണ്ണ്‌ലിന്തല്ല, ഗണ്ട്‌ലിന്ത്‌ത്തെ പെ്ണ്ണ്‌ന ദ്‌ട്ട്‌സ്‌നാദ്. 9 പെ്ണ്ണ്‌ക്ക് ബേ്ണ്ടി ദ്‌ട്ട്‌സുവാനല്ല ഗണ്ട്, ഗണ്ട്‌ക്ക് ബേ്ണ്ടിത്തെ പെ്ണ്ണ്‌ന ദ്‌ട്ട്‌സ്‌നാദ്. 10 അദ്‌നാലെ ദൂദാര്‌ഗാള് നോഡികൊണ്ടു ഇര്‌ക്കുവാദ്‌നാലെ പെ്ണ്ണ് ആളാന്‌ക്ക് അഡി ഇര്‌ക്ക്‌ന്റവാള് എന്റ് കാട്ട്യ അവാള് തലേക്ക് സീലെ സൂഡുഡൊ. 11 ആന ഗണ്ട്‌മ് പെ്ണ്ണ്‌മ് ആണ്ടവാന്‌ലിന്ത് ഉണ്ടായിര്‌ക്കുവാദ്‌നാലെ ഗണ്ടില്ലാദെ പെ്ണ്ണ്‌മില്ലെ, പെ്ണ്ണില്ലാദെ ഗണ്ട്‌മില്ലെ. 12 പെ്ണ്ണ്‌ന ഗണ്ട്‌ലിന്ത് ദ്‌ട്ട്‌സ്‌ന പാസെ ഗണ്ട് പെ്ണ്ണ്‌ലിന്ത് ഉണ്ടാന്റാന്. ആന ഗണ്ട്‌നാമ് പെ്ണ്ണ്‌നാമ് സേത്തി അവാര്‌നെല്ല ഉണ്ടാക്ക്‌നാദ് സാമിത്തെ. 13 നിമ്മ താനെ നെനേത്ത് നോഡുനെ, ഒന്റൊരുത്തി തലേക്ക് സീലെ സൂഡാദെ സാമിന പരേസുവാദ് നല്ലാദ? 14 ഗണ്ട് തലെ നീ്ട്ടി ബളാത്ത്‌ന അദ് അയാള്‌ക്ക് മാനകേ്ഡ് എന്റ്‌മ് 15 പെ്ണ്ണ് തലെ ബളാത്ത്‌ന അദ് സീലെ സൂഡുവാദ്‌ക്ക് ബദ്‌ല ബെത്ത്‌റ്‌ക്കുവാദ്‌നാലെ അവാള്‌ക്ക് മാന എന്റ്‌മ് കാട്ട്‌ന്റല്ല? 16 ഈ കാര്യന പറ്റി ആരാറ്റ തറ്‌ക്ക്യ നെനേത്തദാന എമാക്ക്‌മ് സാമിഗാറാര് കൂട്ടാക്ക്‌മ് ഇര്‌ക്കുവ സട്ട്‌മെ്ട്ട് ഇത്തേത്തെ എന്റ് അയാള് നെനേക്കുഡൊ. ആണ്ടവാന് ജാമ തീനി 17 ഇന്നി സൊല്ല്യ പോവ കാര്യാത്ത്‌ല് നാന് നിമാന പെരിമെപഡമാട്ടെ. എന്ത്‌ക്കെന്റ് സൊന്ന നിമ്മ ഒന്റായി കൂഡുഗാട്ടി നല്ലാദ് ബരുവാദ്‌ക്കുള്ള കാര്യല്ല കെ്ട്ടാദ് ബരുവാദ്‌ക്കുള്ള കാര്യത്തെ നഡാക്ക്‌ന്റ്. 18 നിമാന പറ്റി നാന് സൊല്ലുവ ഒണ്ണാവാദ് കാര്യ എന്തെന്റ് സൊന്ന നിമ്മ കൂട്ട കൂഡുഗാട്ടി നിമ്മ് പട്ട്‌ല് ഒത്തിമെ ഇല്ലെന്റ് നാന് കേ്ട്ട്‌റ്‌ക്ക്‌ന്റെ, അദ്‌ല് ലേസ കാര്യഗാളെല്ല സെരിത്തെ എന്റ് നാന് നമ്പ്‌ന്റെ. 19 നിമ്മ് കൂട്ടാത്ത്‌ല് തഗ്‌ദ്യാന ആള്‌ഗാള് ആരെന്റ് തെര്യ കച്ചി പ്‌ഡിക്കുവാദ് ബേ്ഡ്‌മാന കാര്യത്തെ. 20 നിമ്മ കൂട്ട കൂഡി ബര്‌ഗാട്ടി ആണ്ടവാന് ബിര്‌ന്തല്ല നിമ്മ തിന്നുവാദ്. 21 എന്ത്‌ക്കെന്റ് സൊന്ന നിമ്മ ഒന്റൊന്റാള്‌മ് മുദാല് അവനവാന് തീനിന എ്ഡ്‌ത്ത് തിന്റ്‌റ്. അത്തെ ലേസ ആള്‌ഗാള് പജ്യോഡ ഇര്‌ന്റാര്, ലേസ ആള്‌ഗാള് കുഡിത്ത് ബോദേ്റി ഇര്‌ക്ക്‌ന്റാര്. 22 തിന്ന്യാമ് കുഡിക്ക്യാമ് നിമാക്ക് ബീ്ഡില്ലേഗ? ഇല്ലേ, സാമിഗാറാര് കൂട്ടാക്ക് ബെലെ ഇല്ലെന്റ് നെനേത്ത് ഏ്ളെഗാള്‌ന മാനഗെ്ഡ്‌സ്‌ന്റ്‌റ? ഈ കാര്യാത്ത്‌ല് നാന് നിമാന പറ്റി എന്ത് സൊല്ല്യ? നിമാന പറ്റി പെരിമെപഡ്‌ന്റെ എന്റ് സൊല്ല്യാഗ? ഇല്ലെ, ഈ കാര്യാത്ത്‌ല് നാന് നിമാന പറ്റി പെരിമെപഡാഗേ മാട്ടെ. ആണ്ടവാന് ബിര്‌ന്ത് സട്ട്‌മെ്ട്ട്‌ഗാള് 23 ആണ്ടവാന്‌ലിന്ത് കെ്ഡേസി നാന് നിമാക്ക് പഡിസി തന്താദ് എന്തെന്റ് സൊന്ന: ആണ്ടവാന് ഏസ്സ്‌ന കാട്ടി കൊഡുത്ത ജാമാത്ത്‌ല് അയാള് അഡേന എ്ഡ്‌ത്ത് 24 സാമിക്ക് നണ്ണി സൊല്ലി മുറുത്തു, <<ഇദ് നിമാക്ക് ബേ്ണ്ടി പലി കൊഡുക്ക്യ പോവ എന്ന് സരിഗല. എനാന നെനേക്ക്യ ബേ്ണ്ടി നിമ്മ ഇദേപാസെ ഗേന്>> എന്റ് സൊന്നാന്. 25 അദേപാസെ തീനി തിന്റ് തീന്ത പ്‌റ ഏസ്സ് ഊറബെത്ത മുന്തിരി സാര ഇര്‌ക്കുവ സെമ്പ്‌ന എ്ഡ്‌ത്ത്, <<ഈ സെമ്പ്‌ല് ഇര്‌ക്കുവ മുന്തിരി സാര സാമി മന്‌സാരോഡ ബെക്കുവ പുദ്യ ഒപ്പന്താക്കുള്ള എന്ന് സോരെന കാട്ട്‌ന്റ്, നിമ്മ ഇദ്‌ന കുഡിക്കാട്ട്യെല്ല എനാന നെനേക്ക്യ ബേ്ണ്ടി ഇദ്‌ന കുഡിന്>> എന്റ് സൊന്നാന്. 26 ഈ അഡേന തിന്ന്‌ഗാട്ടിമ് മുന്തിരി സാര കുഡിക്കാട്ടിമ് ആണ്ടവാന് ബരമാട്ട്‌ക്ക് നിമ്മ അയാള് സത്താദ്‌ന പറ്റി എല്ലാ ആള്‌ഗാള്‌ക്ക്‌മ് കാട്ടി കൊഡുക്കുന്റുറു. 27 അദ്‌നാലെ ആരാറ്റ തഗ്‌ദില്ലത്താവാനായി ഈ അഡേന തിന്റ് ഈ മുന്തിരി സാരന കുഡിത്തദാന അയാള് ആണ്ടവാന് സരിഗലാക്ക്‌മ് സോരേക്ക്‌മ് ബെലെ കൊഡുത്തക്കത്താദ്‌നാലെ അയാള് കുറ്റഗാറാന് ആന്റാന്. 28 ഒന്റൊന്റാള്‌മ് അവനവാന്‌ന താനെ സോദണെ ഗേന്ത് ബേ്ഡ്‌മ് ഈ അഡെനാമ് മുന്തിരി സാരനാമ് തിന്റ്‌കുഡിക്ക്യ. 29 എന്ത്‌ക്കെന്റ് സൊന്ന ആണ്ടവാന് സരിഗലാക്ക് മദ്‌പ്പ് കൊഡുക്കാദെ ആരാറ്റ ഈ അഡെനാമ് മുന്തിരി സാരനാമ് തിന്റ്‌കുഡിത്ത് ഗേന്തദാന തനാക്ക് കെ്ഡേക്കുവ ദെ്ണ്ടണെനത്തെ തിന്റ്‌കുഡിത്ത് ഗേന്റാന്. 30 ഇത്തെ ഗേന്താദ്‌നാലെത്തെ നിമ്മ് കൂട്ടാത്ത്‌ല എഞ്ചോ ആള്‌ഗാള് ഉജുരുപ്‌റാണി ഇല്ലത്തവാര്‌മ് നോയിഗാറാര്‌മ് ആവാദ്‌മ് എഞ്ചോ ആള്‌ഗാള് സാവാദ്‌മ്. 31 നമ്മ നമാന താനെ സോദണെ ഗേന്ത് കുറ്റ ഇല്ലത്തവാര് എന്റ് മുഡിവു മാഡ്‌ന ആണ്ടവാന് നമാന ദെ്ണ്ടിക്കമാട്ടാന്. 32 ഇത്തെ ആണ്ടവാന് നമാന ദെ്ണ്ടിത്ത് അഡിത്ത് പഡുസുവാദ് ഉലഗാത്ത്‌ല ആള്‌ഗാള്‌ന ആണ്ടവാന് ദെ്ണ്ടിക്കാട്ടി നമാനാമ് ദെ്ണ്ടിക്കാദിര്‌ക്ക്യ ബേ്ണ്ടിത്തെ. 33 അദ്‌നാലെ ഏസ്സ്‌ഗാറാരെ, നിമ്മ ആണ്ടവാന് ബിര്‌ന്ത്‌ക്ക് ഒന്റായി കൂഡുഗാട്ടി എല്ലാവാര്‌മ് ബന്തെജ്ജ്യ കാത്ത്‌റ്‌ന്. 34 നിമ്മ ഒന്റായി കൂഡ്യ ബര്‌ഗാട്ടി സാമി ദെ്ണ്ടണേക്ക് എ്ഡെ ആഗാദെ ഇര്‌ക്ക്യ ബേ്ണ്ടി ആര്‌ക്കാറ്റ പജിപ്‌ഡിത്തിന്തദാന അയാള് ബീ്ഡ്‌ല് താനെ തിന്റ് ബരുഡൊ. ഇന്ന്യുള്ള കാര്യഗാള്‌ന നാന് ബന്ത് സെരി മാഡ്‌ന്റെ. |
New Life Computer Institute