1 കൊരിന്ത്യഗാറാര് 1 - സാമി സേദിഈ എ്ള്‌ത്ത്‌ല തുഡാക്ക 1 സാമി ആസെപഡി ക്‌റ്‌സ്‌ത്ത് ഏസ്സ് അപ്പോസുത്തലാനായി എ്ഡ്‌ത്ത് ബെത്ത്‌റ്‌ക്കുവ പവുലോസു എന്നുവ നാന്‌മ് ഏസ്സ്‌ഗാറാനാന നമ്മ് സോസുത്തനോസുമു എ്ണേന്ത് 2 കൊരിന്ത്യ പട്ടണാത്ത്‌ല ഏസ്സ്‌ഗാറാര് കൂട്ടാക്ക് എ്ള്‌ദുവ എ്ള്‌ത്ത്. ക്‌റ്‌സ്‌ത്ത് ഏസ്സ്‌ന ബെത്ത് സാമി നിമാന സുത്താപ്പുള്ളവാര് മാഡി തനാക്ക് ബേ്ണ്ടി അലാക്ക പ്‌റ്‌ത്ത് ബെത്ത്‌റ്‌ന്റാന്. ഉലഗാത്ത്‌ല് എല്ലാ സാരിമ് ഏസ്സ് ക്‌റ്‌സ്‌ത്ത്‌ന പരേസുവ എല്ലാ ആള്‌ഗാളോഡൊപ്പത്തെ സാമി നിമാനാമ് തനാക്ക് സുത്താപ്പുള്ളവാര് ആയിര്‌ക്ക്യ ബേ്ണ്ടി തെരിന്തെ്ഡ്‌ത്താദ്. ഈ ഏസ്സ് ക്‌റ്‌സ്‌ത്ത് നമ്മ് ആണ്ടവാന്‌മ് അവാര് ആണ്ടവാന്‌മ്‌ത്തെ. 3 നമ്മ് അപ്പാന് സാമിമ് ആണ്ടവാന് ഏസ്സ് ക്‌റ്‌സ്‌ത്ത്‌മ് നിമാക്ക് പ്‌ണ്ണ്യാമ് ഗേഡൊ, നിമാന നിമ്മ്‌ദ്യായിമ് ബെക്കുഡൊ. ബാക്ക്‌വരാത്ത്‌ല് മ്‌ഗ്‌ന്ത ഏസ്സ്‌ഗാറാര് കൂട്ട 4 ക്‌റ്‌സ്‌ത്ത് ഏസ്സ്‌ന ബെത്ത് സാമി നിമാക്ക് തന്ത്‌റ്‌ക്കുവ ബാക്ക്‌വരഗാള്‌ന നെനേത്ത് നാന് എന്ന് സാമിക്ക് ഒപ്പ നണ്ണി സൊന്റെ. 5 അത്തെ ക്‌റ്‌സ്‌ത്ത് ഏസ്സ്‌നാലെ എല്ലാ കാര്യാത്ത്‌ല്‌മ് നിമ്മ മ്‌ഗ്‌ന്തവാര് ആന്‌റ്. മുക്ക്യമായിമ് എല്ലാ നായാത്ത്‌ല്‌മ് അറുവുലുമു നിമ്മ മ്‌ഗ്‌ന്തവാര് ആന്‌റ്. 6 അത്തെ നിമ്മ് ഈ മ്‌ഗ്‌ന്ത പെ്ളേപ്പ് കാട്ടുവാദ് എമ്മ ക്‌റ്‌സ്‌ത്ത്‌ന പറ്റി നിമാക്ക് സൊന്ന സേദി ഒറേപ്പുള്ളാദ് എന്റ്‌ത്തെ. 7 അത്തെ നിമ്മ സാമിനിഗാല് തരുവ ബാക്ക്‌വരഗാള്‌ല് ഒന്റുലുമു കൊറേവില്ലത്തവാര് ആയി നമ്മ് ആണ്ടവാന് ഏസ്സ് ക്‌റ്‌സ്‌ത്ത് ബരാവുക്കായി നിമ്മ കാത്ത്‌റ്‌ക്ക്‌ന്റ്‌റ്. 8 നമ്മ് ആണ്ടവാന് ഏസ്സ് ക്‌റ്‌സ്‌ത്ത് ബരുവ നാള്‌ല് നിമ്മ കുറ്റകൊറേവു ഇല്ലത്തവാര് ആയിര്‌ക്ക്യ ബേ്ണ്ടി അയാള് നിമാന കഡേസി മാട്ട്‌മ് ഒറേപ്പുള്ളവാര് മാഡി ബെക്കുവാന്. 9 തന്ന് മഗാന്‌മ് നമ്മ് ആണ്ടവാന്‌മ് ആയിര്‌ക്കുവ ഏസ്സ് ക്‌റ്‌സ്‌ത്ത്‌ക്ക് എ്ണേന്ത് അയാള്‌ക്ക് ഇര്‌ക്കുവ എല്ലാദ്‌ക്ക്‌മ് പങ്ക്‌ഗാറാര് ആയ ബേ്ണ്ടി നിമാന ബ്‌ളിത്ത്‌റ്‌ക്കുവ സാമി നമ്പ്യ മുഡിന്റവാന്‌ത്തെ. ഏസ്സ്‌ഗാറാര് കൂട്ടാത്ത്‌ല പഗെ 10 എന്ന് ഏസ്സ്‌ഗാറാരെ, നമ്മ് ആണ്ടവാന് ഏസ്സ് ക്‌റ്‌സ്‌ത്ത് തന്ത അദിഗരാത്ത്‌ല് നാന് നിമാക്ക് സൊന്റെ, നിമ്മ ആള്‌ക്കൊന്റൊന്റു നായ സൊല്ലി ആങ്കീങ്ക് പ്‌റ്‌ന്ത്‌റ്‌ക്കാദെ ഒന്റേ സൊല്ലുലു നഡാന്. നിമ്മ ഒന്റേ താരേല്‌മ് ഒന്റേ നെനേവുലുമു ഒത്തിമോഡ നഡാന്. 11 എന്ന് ഏസ്സ്‌ഗാറാരെ, നിമ്മ ആങ്കീങ്ക് പഗെ ഇര്‌ക്ക്‌ന്റ്‌റ് എന്റ് ഗുഡി ക്‌ളോവോഡ ഇര്‌ക്കുവ ലേസ ആള്‌ഗാള്‌ലിന്ത് എനാക്ക് സേദി കെ്ഡേത്ത്‌റ്‌ക്ക്‌ന്റ്. 12 നിമ്മ് കൂട്ടാത്ത്‌ല് ലേസ ആള്‌ഗാള്: <<എമ്മ പവുലോസു സാരി ഇര്‌ക്ക്‌ന്റവാര്>> എന്റ്‌മ് ബേ്റെ ലേസ ആള്‌ഗാള്: <<എമ്മ അപ്പലോസു സാരി ഇര്‌ക്ക്‌ന്റവാര്>> എന്റ്‌മ് ബേ്റെ ലേസ ആള്‌ഗാള്: <<എമ്മ പത്ത്‌റോസു സാരി ഇര്‌ക്ക്‌ന്റവാര്>> എന്റ്‌മ് ബേ്റെ ലേസ ആള്‌ഗാള്: <<എമ്മ ക്‌റ്‌സ്‌ത്ത് സാരി ഇര്‌ക്ക്‌ന്റവാര്>> എന്റ്‌മ് സൊന്റുറു എന്റ് നാന് കേ്ട്ട്‌റ്‌ക്ക്‌ന്റെ. 13 ക്‌റ്‌സ്‌ത്ത്‌ന ബാഗബാഗ മാഡിര്‌ന്റാര? പവുലോസു നിമാക്ക് ബേ്ണ്ടി കുരുസുലു സത്താന? പവുലോസു പേര്‌ന സൊല്ലി നിമാന ആരാറ്റ നീര്‌ക്ക് മുളുഗുസുനാര? ഇല്ലെഗേ ഇല്ലെ. 14 ക്‌റ്‌സ്‌പോസുനാമ് ഗായോസുനാമല്ലാദെ നിമാത്ത്‌ല് ആര്‌നാമ് നാന് നീര്‌ക്ക് മുളുക്കത്താദ്‌ക്ക് നാന് സാമിക്ക് നണ്ണി സൊന്റെ. 15 എന്ത്‌ക്കെന്റ് സൊന്ന, നാന്‌ത്തെ നിമാന നീര്‌ക്ക് മുളുഗുസ്‌നാദ് എന്റ് എന്ന് പേര്‌ന സൊല്ല്യ നിമാത്ത്‌ല് ആര്‌ക്ക്‌മ് മുഡ്യാമാട്ട. 16 ഓ ഓ സെര്യ, തെപാനോസു ബീ്ഡ്‌ഗാറാര്‌നാമ് നാന് നീര്‌ക്ക് മുളുഗുസിര്‌ന്റെ, അദല്ലാദെ ബേ്റെ ആരാറ്റ്‌ന നാന് നീര്‌ക്ക് മുളുഗുസ്‌നേന എന്റ് എനാക്ക് നെപ്പില്ലെ. 17 ക്‌റ്‌സ്‌ത്ത് എനാന സൊല്ലി ബ്‌ട്ടാദ് നീര്‌ക്ക് മുളുഗുസ്യല്ല, നല്ല സേദിന പറ്റി സൊല്ല്യാത്തെ സൊല്ലി ബ്‌ട്ടാദ്. കുരുസുലു സത്ത ക്‌റ്‌സ്‌ത്ത്‌ന പറ്റ്യുള്ള സേദിക്ക് ആള്‌ഗാള്‌ന കാപാറ്റുവ സക്‌തി ഇര്‌ക്ക്‌ന്റ്. അയി സക്‌തി ഇല്ലാദാഗാദെ ഇര്‌ക്ക്യ ബേ്ണ്ടി നല്ല നായഗാറാന് എന്നുവ തിരമേല് അല്ല നാന് അയി നല്ല സേദിന സൊന്നാദ്. കുരുസുലു സത്ത ക്‌റ്‌സ്‌ത്ത്‌ന പറ്റ്യുള്ള സേദി 18 കുരുസുലു സത്ത ക്‌റ്‌സ്‌ത്ത്‌ന പറ്റ്യുള്ള സേദി കെ്ട്ട് പോന്റവാര്‌ക്ക് ബുദ്ദിഗെ്ട്ട നായത്തെ. ആന തപ്പിസി കഡാക്കുവ നമാക്ക് അദ് സാമി സക്‌തിത്തെ. 19 <<അറിവാളിഗാള് അറുവുന നാന് കെ്ഡ്‌സുവെ ബുദ്ദിസാലിഗാള് ബുദ്ദിന ഒന്റുമല്ലത്താദ് മാഡുവെ>> എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്ക്‌ന്റല്ല. 20 അന്നാപ്പ് അറിവാളിഗാള് ആര് ഇര്‌ക്ക്‌ന്റാര്? ബേദബാത്ത്യനാമ്‌ഗാള് ആര് ഇര്‌ക്ക്‌ന്റാര്? ഈ ഉലഗാത്ത്‌ല് ബാദിക്ക്യ ഉക്കിമെ ഉള്ളവാര് ആര് ഇര്‌ക്ക്‌ന്റാര്? ആര്‌മില്ലെ. എന്ത്‌ക്കെന്റ് സൊന്ന ഉലഗാത്ത്‌ലവാര് അറുവുന സാമി ബുദ്ദിഗെ്ട്ട അറുവു മാഡ്‌നാനല്ല? 21 തമാക്കിര്‌ക്കുവ അറുവുലുമു ബുദ്ദില്‌മ് ഉലഗാത്ത്‌ല ആള്‌ഗാള്‌ക്ക് സാമിന നെപ്പ്‌കെ്ഡേസ്യ മുഡ്യാമാട്ട എന്റ് സാമി തന്ന് അറുവുലുമു ബുദ്ദില്‌മ് മുഡിവെ്ഡ്‌ത്താന്. അദ്‌നാലെ ബുദ്ദിഗെ്ട്ട നായ എന്റ് ആള്‌ഗാള് നെനേക്കുവ സേദിന നമ്പുവ ആള്‌ഗാള്‌ന കാപാറ്റ്യ സാമിക്ക് പിര്യ പ്‌ഡിത്ത്‌ദ്. 22 എഗുദാര് അദിസ്യമാന അഡ്യാളഗാള്‌ന പരാക്ക്‌ന്റാര്, ആന എവനഗാറാര് അറുവുനാമ് ബുദ്ദിനാമ് പരാക്ക്‌ന്റാര്. 23 ആന എമ്മാഗൊ, കുരുസുലു സത്ത ക്‌റ്‌സ്‌ത്ത്‌ന പറ്റിത്തെ സൊല്ലുവാദ്. അയി സേദി എഗുദാര്‌ക്ക് തൊന്തറെ മാഡുവാദ്‌മ് എഗുദാരല്ലാത്ത ജാദിഗാള്‌ക്ക് ബുദ്ദിഗെ്ട്ട നായാമ്‌ത്തെ. 24 ആന എഗുദാരാഡൊ എഗുദാര് അല്ലാത്ത ജാദിഗാളാഡൊ സാമി ബ്‌ളിത്ത്‌റ്‌ന്റവാര്‌ക്ക് ഒട്ടുക്കു ക്‌റ്‌സ്‌ത്ത്‌ത്തെ സാമി സക്‌തിമ് സാമി ബുദ്ദിമ് അറുവുമ്. 25 ആള്‌ഗാള് സാമി ബുദ്ദില്ലാദെ ഗേന്താന് എന്റ് നെനേക്കുവ കാര്യ ഗുഡി മന്‌സാര് ബുദ്ദിന ബ്‌ഡ ബുദ്ദ്യുള്ളാദ്‌ത്തെ. സാമി സക്‌തി ഇല്ലാദെ ഗേന്താന് എന്റ് നെനേക്കുവ കാര്യ ഗുഡി മന്‌സാര്‌ഗാള്‌ക്ക് ഇര്‌ക്കുവ സക്‌തിന ബ്‌ഡ സക്‌തി ഉള്ള കാര്യത്തെ. 26 എന്ന് ഏസ്സ്‌ഗാറാരെ, സാമി നിമാന ബ്‌ളിത്ത ഗളിഗേല് നിമ്മ എത്തവ ആള്‌ഗാള് ആയിന്ത്‌റ് എന്റ് നെനേത്ത് നോഡുനു. മന്‌സാന് കണ്ണ്‌ക്ക്, നിമ്മ് പട്ട്‌ല് അറിവാളിഗാള് എഞ്ചാള് ഇന്താര്? മുക്ക്യമാന ആള്‌ഗാള് എഞ്ചാള് ഇന്താര്? മദ്‌പ്പ്‌മ് ബെലേമ് ഇര്‌ക്കുവ കുലാത്ത്‌ല് പ്‌റാന്തവാര് എഞ്ചാള് ഇന്താര്? ഒന്റു ലേസ താനെത്തെ ഇന്താരല്ല? 27 ആന അറിവാളിഗാള് എന്റ് നെനേക്ക്‌ന്റവാര്‌ന നാണഗെ്ഡിസ്യ ബേ്ണ്ടി സാമി മന്‌സാര് കണ്ണ്‌ക്ക് ബുദ്ദിഗെ്ട്ടാദ്‌മ് അറുവുഗെ്ട്ടാദ്‌മ് ആനാദ്‌ന തെരിന്തെ്ഡ്‌ത്താന്. സക്‌തി ഇര്‌ക്ക്‌ന്റവാര് എന്റ് നെനേക്ക്‌ന്റവാര്‌ന നാണഗെ്ഡിസ്യ ബേ്ണ്ടി മന്‌സാര് കണ്ണ്‌ക്ക് സക്‌തി ഇല്ലത്താദ്‌ന സാമി തെരിന്തെ്ഡ്‌ത്താന്. 28 മന്‌സാര് കണ്ണ്‌ക്ക് മ്‌ഗ്‌ന്താദ് എന്റ് നെനേക്കുവാദ്‌ന ഒന്റുമല്ലത്താദ് മാഡ്യ ബേ്ണ്ടി സാമി ആര്‌മ് ഗെരേഗാത്തവാര്‌നാമ് ആള്‌ഗാള് സറ്‌പ്പ്‌ഗാള് എന്റ് നെനേക്ക്‌ന്റവാര്‌നാമ് ഒന്റു ബെലേമ് ഇല്ലാത്ത ആള്‌ഗാള്‌നാമ് തെരിന്തെ്ഡ്‌ത്താന്. 29 മന്‌സാര് ആര്‌മ് സാമി മുന്നുക്കു പെരിമെപഡാദിര്‌ക്ക്യ ബേ്ണ്ടിത്തെ സാമി ഇത്തെ ഗേന്താദ്. 30 സാമി നിമാന ക്‌റ്‌സ്‌ത്ത് ഏസ്സോഡ ഒന്റാക്കി ബെത്ത്‌റ്‌ന്റാന്. ക്‌റ്‌സ്‌ത്ത്‌ത്തെ നമാക്ക് അറുവുവു ബുദ്ദിമ് ആയി തീന്താദ്. ക്‌റ്‌സ്‌ത്ത്‌ത്തെ നമാനാമ് സാമിനാമ് രാജി കൂഡുസുനാദ്. ക്‌റ്‌സ്‌ത്ത്‌ത്തെ നമാന സുത്താപ്പുള്ളവാര്‌മ് കുറ്റകൊറെ ഇല്ലത്തവാര്‌മ് മാഡ്‌നാദ്. ക്‌റ്‌സ്‌ത്ത്‌ത്തെ നമാന നമ്മ് പാവാത്ത്‌ലിന്ത് ബ്‌ഡ്‌സ്‌നാദ്. 31 അദ്‌നാലെത്തെ സാമി സൊല്ലുസുലാക്കാത്ത്‌ല് <<പെരിമെപഡ്‌ന്റവാന് ആണ്ടവാന് ഗേന്ത കാര്യന പറ്റി പെരിമെപഡുഡൊ>> എന്റ് സൊല്ലിര്‌ക്കുവാദ്. |
New Life Computer Institute