Zekhariah 9 - Zanniat Bible

A Cingkim Miphunte Hnenah Thukhanhnak

¹ Hemi tu Bawipa ai thuhlup i: Hadrak ram le Damascus khuapui cawh tuhin amah in ruatcat zo i. Israel miphunte lek ilo in Syria ram khuapui khai Bawipa ai i.

² Hadrak ramri ai a umhnak Hamath khua khai amah ai i ai ciabang thotho in Tyre khua le Sidon khuate khai amahte thilthiamhnak thawn Bawipa ai ciang i.

³ Tyre khua tu amah caah vingpui a roh ngai in bawn dekdo hlaiah sui le ngun tampui khawl ai a tam ze manin hnawmborh bangin cang i.

⁴ Ikhalselai Bawipa in Tyre khua ai a naihnak hmuahhmuah lang sah tuh sek i. A lianhnak hmuahhmuah tifingriat songah lon sah tuhai cia khua tu mai in a ziam tian tai tuh i.

⁵ Ciami thu khiah Ashkelon khua in hmu tuhai lau tuh biakbo i. Gaza inkhai hmu tuhai hlawng tuh i. Ciabang thotho in Ekron khua inkhai hmu tuhai a umlamhnak pairal tuh sek i. Gaza kumpibawi khai pairal tuhai Ashkelon khua tu khing tuh ruahro i.

⁶ Ashdod khua ah miphun zaroih um tlang tuh i. Bawipa in, “Hemi a puarmi Filistin mite tu nau tuhin ṭhum tuh i.

⁷ A thisan thawn sa khai ai tuh nawn lo i. A tangsunte tu kaimah miphun ah tel tuh ve ai Judah phun songah phun khat bang i tuh ve i. Jebus mite bangin Ekron khai i miphun ah cang tuh i.

⁸ I ram tu kaimah in kilkhawl tuhai a songin aisu ralkapte khai vak thil tuh lo i. Ninghiohnak nai lo ram uktu aisu inkhai i miphun cawh tuh nawn lo i. I minungte ai a tuar zia tu hmu zo sek ing,” ti i.

A Hleng Tuh Kumpibawi

⁹ Ning lungawi tu ih, Zion mite, lungawi tu ih! Lungawi in au tu dekdo ih, Jerusalem mite! Sik tu ih, ning kumpibawi a kawi laitak i! Nehtu i ai nehhnak thawn kawi i; Ikhalselai lungnemmi i ai laak vuman kawi i; Laakniu, laakpui ai faniu to in kawi i.

¹⁰ Bawipa in, “Israel ram an raltawnghnak siphuhleng lon tuh ing; Jerusalem an raltawnghnak siphuhte kaimah in lang sah tuhai, Raltawnghnak lite tu siatsuah tuh sek ing. Ning kumpibawi in miphun cangcang thawn daphnak le remhnak bawn tuh i. Khatlam tifingriat in khat lam tifingriat tian uk tuh i. Euphrates Runpui in vanhamtong tian uk tuh i,” ti i.

Pathian Ai Minungte Letlehhnak

¹¹ Bawipa in, “Hibawlhnak thisan thawn nemhngethnak na hnenai i thukham bangin, Na minungte tu luatruai tuh ing; Saltanghnak tidap um lo khur songin luatruai tuh ing.

¹² Let leh tu ih, umlamhnak a naitu saltang pawl! Himhnak hmun ning ramah tlung tu ih; Tunah ning rel ing: harhnak ning tuar manin a let hnih in hmuifu ning pe tuh ing.

¹³ Judah tu ralkap ai li bangin hmang tuh ing, Israel tu conkiang bangin hmang tuh ing, Zion mite tu ralvang bangin hmang tuh ing. Greek mite tawng tuhin,” ti i.

¹⁴ Bawipa tu a minungte vumah lar tuh i, A thalte vantlingtleleuh bangin sai tuh i. Cungnungber Bawipa in a thirhlung tum tuh i; Hlang lam khuahu songin feh tuh i.

¹⁵ Cungnungber Bawipa in a minungte hup tuh i. A ralte siatsuah tuh sek i, Lungher septute in fon tuh dek i; Raltawnghnak ah zuri bangin au tlang tuh dekdo ai, A ralte in thisan suah tuh i. Ciami thisan tu puleng ai umhnak hleng songin a bunghnak hibawlhnak thisan bangin luang tuh i.

¹⁶ Cia nia a khim fangin tuukhal in a tuurual thinlauhnak songin a hup bangin, Bawipa in a minungte hup tuh i; Sui lukhuk vumai lungvar bangin, a ram songah tleu tuh i.

¹⁷ Zaitluk ram pha le ram mawi i tuh i! Nimden in tlangval hatruai tuhai, Cabit in fenute khai hatruai tuh i.