Zekhariah 8 - Zanniat Bible

Jerusalem Tung Leh Tuh Bawipa Ai Thukham

¹ Cungnungber Bawipa ai thu tu Zechariah hnenah hetihin hleng i:

² Jerusalem mite i ithnak tu a thuk ngai ai Jerusalem khuapui bawm tuh tu i hiam ngai i; kaimah in ha manin a ralte vumah thin i raw i.

³ Kaimah let tuhai i khuapui thianghlim Jerusalem ah um tuh ing. Rinsantlak khuapui tiin ling tlang tuhai Cungnungber Bawipa ai mual tu mual cianghlim tiin ko tuh i.

⁴ Faikiang khun in a vaktu nutar le patarte khai khuasong misenpui tawkdunhnak hmunah to tlang leh tuh hluahhlo i.

⁵ Khuapui lampui tluanah naupang tualleng pawl tu nupang ituseh pasal ituseh lungawi aipuang in sal tlang tuh miahmo i.

⁶ “Ciatihin i tihnak tu he miphun songin a tangtute ca ahcen thil cang thil lo bang tuh i, ikhalselai kai ca ahcen thil cang thil lo ilo i.

⁷ I minungte a hoihmun ramte ah kaimah in hup tuhai,

⁸ nisuah lam le nitlak lamin hoi leh tuhai Jerusalem ah um tlang leh tuh i. Anite tu i minung i tuhai kai tu amahte Pathian i tuh ing; rinsantlak le dikcang ngai in uk tuh ing.

⁹ Ralphahnak nai tu ih! Biakinn tungding leh tuhin ham a pan tlang awng laiah prophette in a rel awnghnak ponkam tu tunah za lehsal i si.

¹⁰ Ciahlan ahcen aisu inkhai minung ituseh, sumhnam ituseh naper tuhin lang thil lo i, a zawng khai thil lo i; ral nai ai huphimhnak um hrimhrim lo i. Mi pakhat le pakhat ral dun tuhin kaimah in sualso ing.

¹¹ Ikhalselai tun tu he ram songah a tangsun mite i sikhnak tu a phundang i.

¹² Lungmuang in a hlaici cing thil tuh ihang. Amahte cabit kuang in a thai thai tuh i, laipua in rong suak tuhai ruah tampui in si tuh i. I miphun songin a tangsun mite vumah hebang hmuifu pe tuh ing.

¹³ Judah mi le Israel mite! Tun hlan ahcen ramdang mite pakhat le pakhat cukcam dun fangin ‘Judah mi le Israel mite vumah a hleng awnghnak hnophnak ning vumah hleng tu ve seh,’ ti dun i. Ikhalselai kaimah in ning o tuhai ciafangin ramdang mite in “Judah mi le Israel mite ai cohnak hmuifu co tu ve hram law,’ tiin pakhat le pakhat ti dun tuh i. Ciamanin ning ralpha tu ilai zaikhai lau mah ih,” tiin ti i.

¹⁴ Cungnungber Bawipa in, “Ning pupate in thin i rawruai fangin kaimah in anite hnawmral tuh tum ai zaikhai thinlung thlenghnak um loin i tumhnak bangin bawn ing.

¹⁵ Ikhalselai tun tu Jerusalem le Judah mite hmuifu pe tuhin tum ing. Ciamanin lauhnak zaikhai nai mah ih!

¹⁶ Hetihin bawn tu sawn ih: pakhat le pakhat ning pon dun fangin thudik rel tu ih. Thukhanhnak hmunah thudik suakruai tu ih; daphnak le remhnak suakruaitu thudik khiah!

¹⁷ Midang hnawmhnak tuh ngaisung mah ih. A dik lomi tetti thawn cukcamhnak bawn mah ih. Thudonrelhnak, dikcang lohnak le thazang thawn midang hnawmcanhnak bawn heh i hua i,” tiin ti i.

¹⁸ Cungnungber Bawipa thu tu Zechariah hnenah hetihin hleng i:

¹⁹ “Hla lihnak, hla ngahnak, hla sarihhnak le hla hrahnak ai bawn dehnak rong ulhnak tu Judah mite caah lungawi aipuanghnak puai ah cang tuh ihang. Thudik le daphnak tu daih tu ih,” tiin ti i.

²⁰ Cungnungber Bawipa in, “Khua tampui in mi tampui Jerusalem ah a kawi can hleng dawn ihang.

²¹ Khuapui pakhat in a kawitute in khuapui dang ai a kawitute hnenah, ‘Cungnungber Bawipa bia tlang tuhai a hmuifu ngen tlang tuh i ing. Kin hnenah tel tu ve ih,’ ti tuh i.

²² Minung tampui le miphun hat ngaingai pawl Jerusalem ah kawi tlang tuhai Cungnungber Bawipa bia tuh i, a hmuifu ngen in sawngen tuh i.

²³ Ciafangin Judah mi pakhat hnenah ramdang mi pahra kawi tlang tuhai, ‘Na nun khuasakhnak ah um ve le tel ve kin nuam i, zaimantifangin Pathian tu na hnenah um i, ti ling zo i ing,’ ti tuh i,” tiin ti i.