Zekhariah 4 - Zanniat Bible

Maikhuat Tohhnak Hmu I

¹ I hnenai a pongtu hnelhno vancungmi khiah kawi lala ai mitmu phawr bangin i phawr i.

² “Ziang hmu pa si? tiin i zawt i. Kai in, “Sui in bawnhnak maikhuat khuam hmu ing. A vumah maiti dahhnak hleng um i. Maikhuat khuam vum ahcen maikhuat pasarih um ai maikhuat pakhat in mica thunhnak a kua pasarih nai ṭen i.

³ Maikhuat tohhnak hiangah olive thingkung kung sarih, a sir veve ah a um hmu ing,” tiin ti i.

⁴ Cen vancungmi khiah, “Hemi thilte ai a sullam ziang i, bawipa,” tiin zawt ing.

⁵ Ani in, “A sullam ling lo i sim?” i ti i. Kai in, “Bawipa, ling lo ing,” tiin ti ing.

Zerubbabel Hnenah Pathian Thukham

⁶ Vancungmi in Bawipa hnenin a hlenghnak thu tu Zerubbabel rel tuhin ruai i. Bawipa in, “Ralthuam hathnak le na thazang hathnak in ilo in i rauhla sawn in hlawh na tling tuh i.

⁷ Na hmaiah khamtu tlang tia a um inrin pai tuh sek i. Biakinn tu nangmah in din leh tuhai Biakinn sahnak a hnuataber lungto na tiang fangin mi senpui in, ‘Mawi ze i, mawi ze i,’ tiin au tuh i,” tiin ti i.

⁸ Bawipa ai thu tu i hnenah hleng lala ai,

⁹ “Biakinn ham tu Zerubbabel in tiang pan zo ai sa ben tuh sio i. Ciami a khim ngaingai fangin i minungte in amahte hnenah nangmah a hlattu heh kaimah ing ti khiah i ling tuh i.

¹⁰ Amahte Biakinn sa naperhnak sawt lo i ti a ling fangin thinnau roh i. Ikhalselai Zerubbabel in Biakinn khiah zuam ṭenṭo in sa thliahthlo i ti khiah a hmu fangin ang tlang tuh i,” tiin ti i. Vancungmi in, Maikhuatte pasarih tu laivum khuahacang a hmu siotu Bawipa ai mitte pasarih tica i,” tiin ti i.

¹¹ Cen kai in, “Maikhuat khuam sir ai um olive thingkungte kung hnih a sullam tu ziang tica ini?

¹² Olive thau luanghnak sui in bawnhnak dawngte pahnih hiangai olive thingkakte kak hnih ai sullam tu ziang tica i?” tiin zawt lala ing.

¹³ Ani in, “A sullam ling lo isim?” i ti i. Kaimah in, “Bawipa, ling lo ing,” tiin ti ing.

¹⁴ Ciafangin ani in, “Hemite tu laivum pumpuhluk ai Bawipa Pathian in a rilmi le thau a pawhmi minungte pahnih i,” i ti i.