Zekhariah 2 - Zanniat Bible

Thil Tehhnak Ri Hmu Ing

¹ Larhnak dang pakhat ah mi pakhat tehhnak ri a kut ah awh hmu ing.

² “Akonah feh tuh isi?” tiin zawt ing. Ani in, “Jerusalem khuapui heh zaicam sau ai zaitluk kau i ti ling nuam in teh tuh ing,” ti i.

³ Cen i hnenai a pong hnelhnotu vancungmi khiah hmaiah suak ai a dang vancungmi pakhat in a hmuak khiah hmu ing.

⁴ A hmasa vancungmi in a hnuata hnenah, “Dawp tulai, tehhnak ri a awhtu tlangvalpa heh Jerusalem khua ah minung le kawlpaw tam leh tuh ngai ai a tam ze manin ving in kulh cawk tuh lo i.

⁵ Bawipa in thukham zo ai Bawipa amah tu khuapui cingkim ah khuapui huptu mai vingpui i tuhai ciata ah songlawihnak thawn um tuh i, ti ta tu,” tiin ti i.

^6-7 Bawipa in a minungte hnenah, “Kaimah in laivum khuahacang ah ning piakruai sek ing. Ikhalselai tun tu Babylon ram an suak tu ilai, Jerusalem ah let tu ih, ningmah saltang mite!

⁸ Ningmah ning cawhtute in ning dai fangin kaimah ai mitfang dai i,” ti i. Ciamanin Cungnungber Bawipa in kaimah heh a minungte a roktu miphunte hnenah he thu rel tuhin i hlat i.

⁹ “Bawipa kaimah rori in ning tawng tuhai ning sal cang awngtute in ning rok thun tuh ve ihang,” tiin Bawipa in ti i. Ciami a khim fangin Cungnungber Bawipa ai hlathnak ing ti khiah aisusu inkhai i ling tuh i.

Saltangte Ko Leh I

¹⁰ Bawipa in, “Aw Jerusalem mite, lungawi in la sa tu ih. Ning hnenah um tuhin a kawi laitak ing,” ti i.

¹¹ Ciafangin mi tampui Bawipa hnenah kawi tuhai a minung ah cang tuh i. Ning lakah um tuhai ning hnenah a hlatmi ing ti khiah i ling tuh i si.

¹² Ciafangin he a ram thianghlim songah Judah tu a hlaice in amah ai cang tuhai Jerusalem tu khua dang hmuahhmuah tahin a daihhnak ber khuapui i tuh i.

¹³ Bawipa umhnak hmun ahcen aisu khai dap niu in um tu ih; zaimantifangin a umhnak hmun thianghlim in a kawi lai i.