Zekhariah 11 - Zanniat Bible

Uktu Pha Lo Pawl Hnawm I

¹ Aw Lebanon, na dawngkhamte hong tu, Na cedar thingkungte mai in kang tusek seh.

² Tufar thingte, kap tu ih, Cedar kungte tlu zo sek i; Thing songlawi pawl siatsuah zo sek i. Bashan ramai khil thingte kap in ai tu ih, Tupui a rul ngai tu vawng zo sek i.

³ Uktute lungsia in kap in ai i; A songlawihnak bo zo i. Chintitte huk tlang thliahthlo i, Ngai tucuk ih! Jordan Run kamai amahte inn tupui tu siatsuah zo sek i.

Tuukhalte Pahnih

⁴ Bawipa i Pathian in i hnenah, “A ro tuhhnak tuute a khaltu ai nuncan khiah cung tucuk.

⁵ A naitute in tuu ro i, ikhalselai anite tu aisu inkhai mawhhluk lo i. Tuusa zuar in, ‘Bawipa tu thangphat in um tuseh! Kin lian zo i,’ ti i. Tuukhalte inrin amahte tuu vumah ninghiohnak nai lo i.

⁶ Bawipa in, “Laivum ah aisu khai ninghio tuh nawn lo ing. Kaimah rori in mi zongzong a uktute ai kut songah thunlut tuh sek ing. Ciami uktute in laivum tu hnawmcan tuh sek i, ikhalselai amahte thil tibenhnak huham songin aisu khai o tuh lo ing,” ti i.

⁷ Tuu laitu le zuartute in amahte napertu tuhin kaimah i lang ai a ro tuhhnak tuute khaltu ah i cang i. Fungkekte pahnih lang ing: pakhat tu, “Ninghiohnak,” tiin ti ai a dang pakhat tu “Komdunhnak,” ti ing. Ciatihin tuurual heh kilkhawl ing.

⁸ Kaimah i huatu tuukhalte pathum vum ahcen thin i sau thil nawn lo i, or cawk nawn lo ai hlakhat songah amahte pathum in hnawt sek ing.

⁹ Cen tuurual hnenah, “Ning khaltu i tuh nawn lo ing. A thi tuh pawl tu thi tuhang seh, siatsuah tuh pawl tu siatsuah tuseh. A tanghnak tu pakhat le pakhat a sa ai dun tusek seh,” ti ing.

¹⁰ Cen, “Ninghiohnak,” tihnak fungkek lang ai, Bawipa in miphun hmuahhmuah thawn a bawnhnak thukham bal tuh sek in ek lio ing.

¹¹ Ciatihin cia nia ah thukham bawn awng ciahnak heh bal sek i. Tuu laitu le zuartute in i sik liang i; Thil i bawnhnak heh Bawipa ai relhnak i, ti khiah ling tlang i.

¹² Amahte hnenah, “Lung ning khim lekhaw i nihlawh i pe tu ih. Lung ning khim hlahle poi lo i, ningmah in nai tu ih,” tiin ti ing. Ciamanin i nihlawh tuhin ngun tangka sawmthum i pe i.

¹³ Bawipa in i hnenah, “Hemi tangka tu Biakinn tangka tuhin dah tu,” i ti i. Ciamanin ngun tangka sawmthum, i man ai amahte ruathnak tangka songlawi bik heh kaimah in lang ai Biakinn tangka dahhnak ah dah ing.

¹⁴ Cia hnuaah a pahnihhnak fungkek “Komdunhnak,” tihnak tu ek lala ing; ciatihin Judah le Israel komdunhnak tu phiat ing.

¹⁵ Cen Bawipa in i hnenah, “Tun ṭum tu zai ahkhai santlai lo tuukhal pa ai nuncan cung tu.

¹⁶ I tuurual kiltu tuhin tuukhal pakhat dah ing; ikhalselai pairalhnak a tawk dawntu tuute hup nuam lo i; a paimi tuute khai si nuam lo i; hmaihma naimi tuu khai tuamhlawm lo ai a cakmi a tangsun tuute khai rong pe lo i. A thau ber tuusa ai in a ketin tianin hawk sah sek sawn i.

¹⁷ Ciami tuukhal pa tu a lampui pit ai a bo ihang! A tuute hlum zo i. A hathnak hmuahhmuah ral in siatsuah tuh sek i. A ban rocar tuhai a kiahhan lam mit caw tuh i,” ti i.