Zekhariah 1 - Zanniat Bible

Bawipa In A Minungte Ko I

¹ Dairus in Persia ram kumpibawi a canghnak kum hnihhnak kum, hla riat hla ah, Iddo ai fasuan, Berechiah ai fapa prophet Zechariah hnenah Bawipa ai thu tu hetihin hleng i.

² Cungnungber Bawipa in Zechariah khiah Israel mite hnenah hetihin rel tuhin ruai i. “Kaimah, ning Bawipa heh ning pupate vumah thin i raw bik i;

³ Ikhalselai tunah ning hnenah hetihin ning rel ing. I hnenah let tu ilai ning hnenah let tuh ve ing.

⁴ Ning pupate bang imah ih. Hlanlai ai prophette in i thu rel ai sualhnak bawn tuh loin le thil sual bawn tuh loin rel i. Ikhalselai i thu ngai nuam lo i, a hlun khai hlun nuam lo i.

⁵ Ciami prophette le ning pupate tu nung nawn lo i.

⁶ I sal prophette hmang in i thu le i thukham khiah ning pupate pe ing, ikhalselai zaikhai siar lo i; ciamanin harsahnak tampui tawk i. Cen cawh tlak a imanin cawh tuhin a tumtu heh Cungnungber Bawipa kaimah ing ti khiah ling ai sir leh i,” ti i.

Prophet In Larhnak In Siphuhte Hmu I

⁷ Dairus in kumpimangbawi a canghnak kum hnihhnak kum, hla hlaikhat hla (Shebat hla), ni kul hluanli zan ah Bawipa in larhnak in thu i rel i.

⁸ Siphuh san vum a totu Bawipa ai vancungmi pakhat, phairawn ai hlenhmui kung lakah com ai a hnuaah a dang siphuhte um i: a san, a ngan le a ngo i.

⁹ “Bawipa, he siphuhte tu ziang tica i?” tiin zawt ing. Vancungmi in, “A sullam na rel tuh ing.

¹⁰ Laivum pumpuhluk hleng tuh sio le sik tuhin Bawipa in i hlat i,” tiin ti i.

¹¹ Siphuhte in, “Vancungmi hnenah, “Laivum khuahacang ah hleng zo sio ai laivum pumpuhluk tu dap niu in le hlamuang niu in um i, ti hmu zo i ing,” tiin rel i.

¹² Ciafangin vancungmi in, “Cungnungber Bawipa, Jerusalem le Judah khuapuite vumah kum sawmsarih song na thinraw zo i si. Amahte hnenah ninghio thinpemhnak na nai hlan song, zaikom tian hetihin um tuhlai i si?” tiin zawt i.

¹³ Bawipa in vancungmi khiah thinhnemhnak ponkam in sawn ai,

¹⁴ Ciami Cungnungber Bawipa ai ponkam tu tlangaupui tuhin vancungmi ruai i. “I khuapui thianghlim Jerusalem caah ithnak le ngaihharhnak tampui nai ing.

¹⁵ Ikhalselai hlamuanghnak le daphnak a ngahtu miphunte vumah i thin sup hnelhno napui cia miphunte in i minungte ai tuarhnak tu rohruai amam i.

¹⁶ Ciamanin Jerusalem khuapui vumah i ninghiohnak larruai tuhin let ing. I Biakinn tu saleh tuhai Jerusalem khuapui tu tungding leh tuh i,” tiin ti i.

¹⁷ Vancungmi in i hnenah, “Cungnungber Bawipa in, ‘I khuate tu khangso leh tuh ngai ai Jerusalem khuapui khiah bawm tuhai kaimah ai i tiin ti leh tuh ing,’ ti i. Ciami tu tlangaupui rih tu,” tiin ti i.

Kite Larhnak

¹⁸ Larhnak pakhat um lehthio ai kawlpawcang kite pali hmu ing.

¹⁹ I hnenah a pongtu vancungmi hnenah, “Hemi kite ai a sullam tu ziang tica i?” tiin zawt ing. Ani in, “Judah mi, Israel mite le Jerusalem mite khuahacang ah a piakruaitu miphunte aiawh i,” ti i.

²⁰ Cen Bawipa in haibul thawn napertute pali i hmuh i.

²¹ “Hemite tu ziang bawn tuhin hleng tlang i?” tiin zawt ing. Ani in, “Hemite tu Judah ram a piakruaitu le a minungte a piakruai siotu miphunte hring tuhin le lon tuh sio in kawi tlang i,” tiin i sawn i.