Zefaniah 3 - Zanniat Bible

Jerusalem Sualhnak Le Luangtlanhnak

¹ Jerusalem tu a bo ihang! Khia khuapui ningrim le raltho nuam khuapui, mah ai minung a cawh hnelhnotu minung khiah!

² Bawipa ai ponkam ngai nuam lo ai a nunthutiamhnak khai ngai nuam lo i. A rinsanhnak tu Bawipa hnenah dah lo i; Bawipa ai bawmhnak khai ngen lo i.

³ A bawite tu a huk hnelhnotu chintit bang i; a thureltu bawite tu mehleng rikam bang i; a rong ak ze in thangha tian amahte dawphnak tlawmniu khai khawi thil lo pawl i.

⁴ A prophette tu zulhzau ai a nungtute i. A suangbawite in a zarh tihnak khiah bal ai Pathian dan khiah amahte daihdan in her betbo i.

⁵ Ikhalselai khuapui songah Bawipa tu um i. A dikcang ian bawn i; A pha lo bawn awng lo i. Zing siar in pelh loin a minungte hnenah dikcanghnak hlengruai i. Ikhalselai miphalote incen thil sual bawn thotho ai zak khai thi tlang lo i.

⁶ Bawipa in, “Miphun tampui hnawmruai sek zo i. A khuapuite kaimah in siatsuah sek ai a vingpui le ralvilhnak inndonsangte tu hnawmborh pumhnak ah cangruai zo ing. Khuapuite piak i, khuapui lampuite khing ruahro i; aisu khai tang nawn lo i.

⁷ Hemi bang hnua ahcen i minugte in i upat i, i kihzah tuhai i nunzirhhnak khai pom tuhai i thuzirhhnakte hai tuh nawn lo i tiin ruat ing. Ikhalselai a hlan kel in amahte nuncan sia thotho i.

⁸ “Iang tlang rih tu ih! Miphunte mawh i hlukhnak nia tian iang rih tu ih. Miphun tampui le ukhnak tampui i thinrawhnak a rohdan a linghnak tuhin hmunkhat ah khawm tlang tuhin ruatcat zo ing. I thinrawhnak in laivum pumpuhluk heh mai bangin kang tuh sek i.

⁹ “Cen miphun cangcang ai hmurka khiah thleng sah tuhai hmurka thiang thawn i hnenah sawngen tuh i. Amahte veksen in i thu ngai tuh i.

¹⁰ Ram hlapui Ethiopia ram tipui ral inrin a piakmi i minungte in i hnenah thil pe tuh keng tuh i.

¹¹ Ciafangin ning i minungte, kaimah i ralcai awng manin zakthi in um tuh nawn lo i si. Mihngal le mipuar hmuahhmuah pairalruai tuh sio ai ningmah in i tlang thianghlim vumah i ralcai tuh nawn lo i si.

¹² Ciata ah milungnem le hniatacuh mite, Bawipa ai hming a rinsantute dah tuh ing.

¹³ Israel mite a tangsunte in aisu hnen ahkhai thilsual bawn tuh nawn lo i; thudonrel tlang tuh nawn lo i; a hmurka le a lai inkhai mizawl tuh tum tuh nawn lo i. Daphnak le himhnak thawn nun khuasa tlang tuhai aisu khai kih tuh nawn lo i,” tiin ti i.

Anghnak La

¹⁴ Aw Israel mite, Ang in au tu ilai la sa tu ih. Aw Jerusalem fanu, Na thinlung veksen thawn lungawi in um tu.

¹⁵ Bawipa ai na cawhhnak khiah com zo i; Na ralte lon zo sek i. Bawipa, Israel ai kumpibawi tu ning hnenah um i; thinlau tuh zaikhai um nawn lo i.

¹⁶ Can hleng tuhai Jerusalem hnenah: “Aw Zion khuapui, zaikhai lau mah; Na kut khai na lau manin zong maseh.

¹⁷ Bawipa na Pathian tu na hnenah um i, A hathnak huham in nehhnak na pe i. Bawipa tu na vumah a lungawi tuh i, A ithnak manin nunhnak thar ning pe tuh i. La sa tuhai ning vumah a lungawi tuh i.

¹⁸ Puai bawn can ai anghnak bangin,” ti tuh i. Bawipa in, “Na harsahnak can tu bo zo i; Na zakthihnak tu lon zo teu ing.

¹⁹ Can hleng tuhai, Na naunehtute khiah cawh tuh ing; Kebai mite tu kaimah in o tuhai Ralpom thawngtlate tlun leh tuh ing. A mualphohnak khiah upa cohnak ah cangruai tuh ing, Laivum mi zongzong in thangphat tuh i

²⁰ Can hleng tuhai, a piakmi na minungte tu hoi leh tuh ing. Laivum pumpuhluk ai hmingthang ah na bawn tuhai, Mi nainung na bawn leh tuh ing; Ciami tu na mit in hmu tuh isi,’ tiin ti i. Bawipa in pong zo i.