Zefaniah 1 - Zanniat Bible

¹ Amon ai fapa Josiah in Judah kumpibawi a cang awng laiah Bawipa ai thu tu Zephaniah hnenah hleng i. Zephaniah tu kumpibawi Hezekiah tesinfa i ai a pupate tu Amariah, Gedaliah le Cushi i.

Bawipa Ai Thukhanhnak Nia

² Bawipa in, “Laivum ai zaizongza heh siatsuah tuh sek ing,

³ minung ituseh, ramsa ituseh, vaniute le nga tianin hnawmcan tuh sek ing. Mihrokhrawl pawl duk tuhai tlok tuh sek i. Minung tu cihmit tuhai pakhat khai luat tuh lo i. Bawipa kaimah in pong zo ing.

⁴ “Judah mi le Jerusalem mite cawh tuh ing. Baal khuavang a biahnak a tangsun mi khai pairalruai tuhai Baal khuavang naruaihtu sakhua suangbawite khiah aisu inkhai ling tuh nawn lo i.

⁵ Inn vumah kai in ni le hlapui le arsi biatute khiah siatsuah tuh sek ing. Kaimah i biatu le i hming rinsan in cukcamtu ikhalselai Milkom khuavang hming in a cukcamtu lala khiah siatsuah tuh ing.

⁶ Kaimah i zam ai i hlun nawn lotu le i hnenah kawi loin thu i ron lotute tu hnawmcan tuh sek ing,” tiin ti i.

⁷ Bawipa ai thukhanhnak nia tu nong ihang. Ciamanin a hmaiah dap niu in um tu ih. Bawipa in a miphunte tu hibawlhnak ah sel tuhin tum ai Judah ram siatsuah tuhin ralte sawm i.

⁸ Bawipa in, “Hibawlhnak sel nia ahcen kumpibawi ai fapate le bawite le miphun dang ai pupadan a hluntute tu cawh tuh ing.

⁹ Lawki mite bangin khuavang a biatu le amahte bawipa inn songah thilri a dim in a umthilhnak tuhin mi a rektu le ru a kotute tu cawh tuh ing.

¹⁰ “Cia nia ahcen Jerusalem ai Nga Kotka ah kaphnak thawm za tuh i si. Bawn tharhnak khuapui bialthar ah aihramhnak thawm za tuhai tlang vumah ri durdo in a tluhnak thawm za tuh i si.

¹¹ Ciami ning za fangin ningmah khai kap tlang tu ilai rung tu hnelhno ih; ning khuapui hnia lamai a umtute; zaimantifangin sumpaitute tu thi tuh sek i.

¹² “Cia can ah maikhuat awh in Jerusalem tu si tuh ing. Mah veve um dun bik le lungmuang niu in a umtute, ‘Bawipa in zaikhai bawn awng lo i; a pha khai bawn lo i, a hnawm khai bawn lo i,’ a titute tu cawh tuh ing.

¹³ Amahte lianhnak tu long tuh sio ai a innte khiah hnawm sah tuh sio i. Amahte sahnak thliahthlo innte tu hluh tuh awng lo ai amahte birhnak thliahthlo cabit kung ai cabitti khiah ding tuh awng lo i,” ti i.

¹⁴ Bawipa ai nia tu nong zo i; nong ze zo ai a rai hlanah hleng cing tuh i. Cia nia tu hnawmhnak nia i tuh i, zaimantifangin ralkap ralpha ber rin a thinpit in kap tuh i.

¹⁵ Cia nia tu thintok nia i tuh i, harsahnak le vansanglam in um nia, siatsuah nia le pairal nia, thimhnak nia le thinpit nia, ni thim le khuanim nia i tuh i.

¹⁶ Raltawnghnak thawmvang le thirhlung aw in a dim nia, ralkapte in vingpui ai kulhhnak khuapui le ralvilhnak innsangte tawng tuhai tawng kong ai auhnak aw in dim nia i tuh i.

¹⁷ Bawipa in, “Minung vumah hnawmral i hlengruaihnak tu roh tuh ze ai mi zongzong mitcaw bangin vak tlang tuh i. I vumah sual ze manin amahte thisan tu ti bangin bung tuhai mithi ruangte khiah laipua ah uih ai hmon tuh i,” tiin ti i.

¹⁸ Cia nia, Bawipa in a thinrawhnak a larruai nia ahcen a sui le ngun in aisu khai o thil tuh lo i. A thinrawhnak mai in laivum pumpuhluk heh kang tuh i. Laivum ai a ummi hmuahhmuah heh mangrinlo in a nunhnak boruai tuh i.