Titas 3 - Zanniat Bible

Khristian Ziaza

¹ Uktu bawi le thunaitu upate ai hniaah thinniam in amahte thu ngai tu; cen thilpha bawn tuhin pai cia in um tu ih, tiin na minungte rel tu.

² Aisu khai relsia mah; dap niu le rualrem niu in pawlkom dun tu ilai mi zongzong hnenah lungnemhnak le umdan thiamhnak larruai tu ṭio ih, tiin rel tu.

³ Zaimantifangin kinmah rin tun hlan ahcen kin voi awng i, thu ngai awng lomi ising ai kin khelh i. Taksa hiamhnak le Tisa nuamhnak a phunphun ai salte ising. Mi iksikhnak le umhlahhnak in kin can hmang awng ising. Mi in kin hua ai kin inkhai hua ve ising.

⁴ Ikhalselai kin otu kin Bawipa ai ninghiohnak le ithnak a lar fangin,

⁵ kin tu kin o zo i. Kinmah in thilpha bawn manin ilo ai amah ai ninghiohnak manin nun kin o ai piangthar le nuntharhnak kin petu Rauhla Thianghlim ai somcianghnak manin i.

⁶ Kin otu Jesuh Khrih songin Rauhla Thianghlim heh kin vumah semkhim liang in Pathian in burh i;

⁷ ciami tu a ninghiohnak manin Pathian thawn kin rem dun thil tuhin le kin umlamhnak kumkhua nunhnak heh kinmah ai a cang thil tuhin i.

⁸ Hemi thu tu thudik i. Hemi thute heh thupui ngai i tiin a hlaice in ruat tuhin i daih i. Zaimantifangin Pathian a sangtute in thilpha bawnhnak ah amahte can hmang tuh i. Ciami tu mi zongzong caah a phathnem le a santlai i.

⁹ Ikhalselai voithu thu eldunhnak, pupa hming laibu sau ngaingai thu eldunhnak, haudunhnak le dan thu eldunhnakte heh pial tu. Ciamite tu hnempuihnak le man naihnak zaikhai um lo i.

¹⁰ Khekdunhnak a suakruaitu heh ralringhnak a tlawm ber in vel hnih pe tu; cia hnuaah a kom khai kom nawn mah.

¹¹ Ciabang minung tu mi ningrim le misual i ti ling ai sualhnak in hnawlmi cangruai i.

Hnuataber Thucah

¹² Na hnenah Artemas, ihlahle Taikhikas i feh ruai sawng fangin Nikopolis ah rang ngai in i tawk tu. Zaimantifangin ciata ah khuasik cu song um tuh ing.

¹³ Apollos le Shini Zenas khualtlawng pan fangin bawm tulai amahte kulhnak hmuahhmuah tawlrel sah tu.

¹⁴ Kin minungte tu thilpha bawnhnak ah amahte can hmang tuseh; ciatihin bawn lekhaw a kulhnak cangcang ah mi bawm ben tlang tuh i. Santlaihnak nai loin um tuh menma ilo i.

¹⁵ I hnenai a um mite in hnuk ning sat i. Sanghnak songai kin ittute heh hnuk i sat sah tu law. Ning veksen hnenah Pathian ninghiohnak um tu hram seh.