Titas 1 - Zanniat Bible

¹ Pathian cengfa le Jesuh Khrih ai nalang kaimah Paul in lai ning kuat ing. Pathian ai rilhnak a minungte sanghnak khoruai tuhin le kin biahnak thutak songah hoi tuhin Pathian in i ril ai i hlat i.

² Ciami kin biahnak tu kumkhua nunhnak umlamhnak songah hamtohhnak i. Thudon a rel awng lomi Pathian in he nunhnak tu laivum sem hlan in kin hnenah thukham zo i ai,

³ a can khim fangin ciami tu a thuhluphnak songin larruai i. Ciami tu i hnenah i pe ai kin otu kin Pathian ai thupehnak bangin phuang ing.

⁴ Sanghnak bangvek kin naihnak songah i fa ngaingai Titus na hnenah he lai heh ngan ing. Kin Pa Pathian le kin otu Khrih Jesuh in ninghiohnak le daphnak ning pe tuseh.

Crete Tikulh Ai Titus Naperhnak

⁵ Crete ah bawn kulhnak tepawl bawn tuhin le khua cangcang ah pawlpui upa dah tuhin Crete tikulh ah na tangruaihnak i. I thuzirhhnak heh hih tu ngio law.

⁶ Pawlpui upa tu mawhhluk pha nai lomi ituseh; nupui pakhat lek a naimi ituseh, a fate tu sangtu i tu selai hngalhnak le thu ngai lohnak lamah thangsia lomi ituseh.

⁷ Pawlpui hoitu heh Pathian naṭuan ah ṭuanvo naitu imanin mawhhluk pha um lomi ituseh. Mi hngal le mi thincom, zu ri hmangmi, mi awrsia le paisa duhham mi i tuh lo i.

⁸ Mikhual le sualeng sik thiamtu i tuhai thilpha daihtu i tuh i. Amah lala uk dun bentu i tuh i; midikcang, mi thiang le ziaza phami i tuhai sup benhnak naimi i tuh i.

⁹ Kin sanghnak hampui thawn a bangdunhnak le rintlak kin thuhluphnak heh kho ngai in a pomtu i tuh i. Ciatihin midangte kin zirhdunhnak thudik thawn thazang pe ben tuhai ciami thudik eltute ai khelhhnak khai larruai tuh i.

¹⁰ Uk thilh lomi tam ze um ai ciamite tu Judah biahnak in Khristian biahnak ah a lutmi songin tam cuang i. Ciamite tu pongtam pawl i ai thudon thu in mi tampui zawl tlang i.

¹¹ Ciamite tu kham kul i; zaimantifangin zirh tuh lohnak zirh tlang manin innsang tampui buaitiar ai ciatihin amahte zirhhnak tu zakthikul paisa daihhnak menma manin i.

¹² Amah Crete mi lala prophet in, “Crete mi tu thudonreltute i, ramsa bang mihrokhrawl, thazawng le rongak i,” ti awng ai,

¹³ ciatih ai a tihnak tu a dikmi i. Ciamanin anite tu rohpui in hau tulai ciatihin sanghnak dik nai tlang tuh i.

¹⁴ Ciafang ian in Judah mite ai naihnak tluanthu menma le thudik a hnawltute ai a koihhnak minung ai thupehnakte heh zaikhai siar tuh nawn lo i.

¹⁵ Mithiangte ca ahcen zaizongza heh thiang sio i; ikhalselai miningrim le sang lotute ca ahcen, amahte thinlung ningrim manin zaikhai a thiangmi um lo i.

¹⁶ Amahte incen Pathian lingtute i ing ti dun i; ikhalselai amahte perhnak le bawnhnak in hlun sual zo i. Hmuhheh kul in nung i, zai thu khai ngai tlang lo ai zaibang thilpha bawntu tuhin khai tlak lo i.