Tirhthalahle 9 - Zanniat Bible

Paul Thinthlenghnak

¹ Cia can dungah Saul in Bawipa ai hnuahlunte rek tuhin hring thliahthlo i. Suangbawi Sang hnenah feh ai,

² Damascus khua ai synagogue inn uktute in amah a linghnak tuhin lai ken tuhin ngen i. A tumtekhnak tu ciata ah Bawipa ai lampui a hluntu um lekhaw nupang pasal tilo pom in Jerusalem ah fehpui tuh khiah i.

³ Saul tu Damascus khua a hleng dawn fangin vancung in tleuhnak thawn a cingkim ah rinlopui in det surso i.

⁴ Saul tu tlu ai, “Saul, Saul, zaimanin i reem isi?” tiin aw pakhat za i.

⁵ Saul in, “Bawipa, Aisu isi?” tiin zawt i. Cia aw in, “Na reem mi Jesuh ing.

⁶ Tho tulai khuapui songah feh tu; na bawn kulhnak khiah na rel tlang tuh i,” tiin ti i.

⁷ Saul thawn khual a tlawngtute tu com tlang sio ai kamkhat khai pong tlang lo i; aw tu za napui aisu khai hmu tlang lo i.

⁸ Saul khai laipua lakin tho ai a mit thak i, ikhalselai zaikhai hmu thil nawn lo i. Ciamanin a kut in awh ai Damascus khua songah fehpui i.

⁹ Ni thum song khua hmu thil lo i; cia ni thum songah zaikhai ai lo i, ti khai ding lo i.

¹⁰ Damascus khua ah Ananias tihnak hnuahluntu pakhat um i. Bawipa in larhnak hmuh ai, “Ananias!” tiin ko i. Ananias in, “Bawipa heta ah um ing,” ti i.

¹¹ Bawipa in, “Na thuam pai tulai lampui cang tihnak ah feh tu. Judas inn ah Tarsus khuami Saul tihnak pa um aw im, tiin zawt tu. Ani tu sawngen lai thliahthlo i;

¹² ani inkhai larhnak hmu ai cia larhnak songah a mit khua hmu leh thil tuhin Ananias tihnak pa lut ai a lu vumah a kut suan khiah hmu ing,” tiin ti i.

¹³ Ananias in, “Bawipa, mi tampui in hemi pa ai thu heh i rel zo ai Jerusalem ai na minungte vumai thil pha lo a bawnhnak tepawl khai i rel i.

¹⁴ Cen tun inkhai suangbawi upate ai thunaihnak thawn nangmah na biatute hmuahhmuah pom tuhin Damascus ah hleng i,” tiin ti i.

¹⁵ Bawipa in a hnenah, “Feh tu! Zaimantifangin ani tu Gentile mite hnen le kumpibawite hnen le Israel mite hnenah i hmingthangruai tuhin le i ruaihtu tuhin ril zo ing.

¹⁶ Kaimah in i ca ai a tuar tuh heh kaimah in hmuh tuh ing,” tiin ti i.

¹⁷ Ciamanin Ananias khai feh ai Saul umhnak inn songah lut i. Saul ai lu vumah a kut suan in, “Unau pa Saul, Helam na kawi fangin lamlak ah na hnenah a lartu Jesuh amah rori in na hnenah i hlat i. Khua hmu leh thil tuhin le Rauhla Thianghlim thawn na dim tuhin na hnenah i hlat i,” tiin ti i.

¹⁸ Cia sawngpah in Saul ai mit in ngakep bang tlok ai khua hmu thil leh i. Cen Saul khai tho ai baptisma lang i.

¹⁹ Cen rong ai ai tha nai leh i. Saul tu Damascus khua ai hnuahlunte hnenah ni tlawmniu song um i.

²⁰ Pumkhawmhnak synagogue innte ah feh ai Jesuh tu Pathian ai Fapa i, tihnak thu rel i.

Damascus Khua Ah Saul In Thurel I

²¹ A thu zatute hmuahhmuah ngaihsunur tlang roh ai, “Jerusalem ah Jesuh a sangtu hmuahhmuah a siatsuahtu heh amah ilo im? Ciabang thotho in heta ahkhai thu sangtute pom in suangbawi upate hnenah hlenpui tuhin hleng ilo im?” tiin zawt dun murhmo i.

²² Ikhalselai Saul ai thurelhnak tu a ru nai deuhdeuh i; Jesuh tu Messiah rori i tiin a relhnak heh mi thinlung songah fiang ngai in a lut manin Damascus khua ai a umtu Judah mite in a thu sawn ben tlang lo i.

²³ Ni tam thah a rai fangin Judah mite taikhawm ai Saul rek tuhin khuakhan tlang i.

²⁴ Ikhalselai ciatih ai amahte khuakhanhnak heh a reltu um ai Saul in za i. Amah rek nuam in khuapui ai kotkate khiah sun le zan in kil tlang liang i.

²⁵ Ikhalselai Saul a hluntute in zan khat ah Saul heh bawm songah thun ai khuapui kulhhnak vingkulh awngkua in pualam ah hla tlang i.

Jerusalem Ah Saul Hleng I

²⁶ Saul tu Jerusalem ah feh ai hnuahlunte lakah tel tum ve i. Ikhalselai anite in hnuahlun ve ihang ti sang tlang lo ai amahte veksen in lau lehlam i.

²⁷ Cen Barnabas in ṭanpui ai nalangte hnenah fehpui i. Barnabas in anite hnenah Damascus lampui ah Bawipa a tawkhnak le Bawipa in a hnenah a ponghnak tepawl fiang ngai in rel i. Cen Saul in Jesuh ai hming khiah Damascus khua ah ralpha ngai in Thuthangpha a phuanghnak thu khai rel i.

²⁸ Ciamanin Saul tu amahte hnenah um ai Jerusalem khuasong nuamhmuncang ah feh ai ralpha ngai in Jesuh hmingin thu rel i.

²⁹ Greek pong a hmangtu Judah mite hnen ahkhai thu rel ai thu khai el dun tlang i, ikhalselai anite incen rek tum i.

³⁰ Ciami thu heh sangtute in za fangin Saul tu Ceasarea ah fehpui ai Tarsus ah hlat i.

³¹ Ciatihin Judea ram, Galilee ram le Samaria ram song pawlpuite tu muang niu in um tlang i. Pawlpui tu Rauhla Thianghlim bawmhnak in hat amam ai mi khai pungzai amam i. Pathian kihzah in um tlang i.

Lidda Le Joppa Ah Peter Tlawng I

³² Peter tu khuahacang ah tlawng ai vaikhat ah Lidda khua ai umtu Pathian awitute tlawng tuhin feh i.

³³ Ciata ah Aenias tihnak pa tawk i. Aenias tu mize i ai kum riat song khuahluan in a tho ben lomi i.

³⁴ Peter in, “Aenias, Jesuh Khrih in na cakruai i. Tho tulai na ihphah zual tu,” tiin ti i. Cia sawngpah in Aenias heh tho i.

³⁵ Lidda le Sharon ai a umtu hmuahhmuah in Aenias hmu manin Bawipa lamah thinlung nai sek i.

³⁶ Joppa khua ah Tabitha tihnak nu um ai Jesuh sangtu i. (A Greek hming tu Dorcas i ai a sullam tu “Kiho,” tica i). A can hmuahhmuah thilpha bawnhnak ah le mifarah bawmhnak ah hmang i.

³⁷ Cialaitak ah cia nu tu a roh ngai in ur ai thi i. A ruang khiah som tlang sio ai vumta khan ah dah i.

³⁸ Joppa khua tu Lidda khua in a nong niu i. Cen Joppa ai a umtu sangtute in Lidda ah Peter a um heh ling fangin mi pahnih hlat ai, “Rang ngai in kin hnenah kawi tu hram law,” tiin cah i.

³⁹ Ciamanin Peter khai tho ai ciamite heh hlun i. A hleng tlang fangin Peter tu vumta khan ah kaipui i. Ciata ah hmaitongte kawi tlang ai kap kongin Dorcas cak lai ai a tak awnghnak angki le hnikponte khiah hmuh tlang i.

⁴⁰ Peter in khan songai minungte suakruai sio ai, a khuk caicin in sawngen i; cen Dorcas luang lam hoi in, “Tabitha, tho tu!” tiin ti i. Dorcas tu a mitthak ai Peter a hmu fangin to i.

⁴¹ Peter in a kut san ai dingruai i. Cen hmaitongte le sangtute hmuahhmuah ko ai nung zo i tiin anite hnenah hmuh i.

⁴² Cia thu tu Joppa khuasong hmuahhmuah ah thang ai mi tampui in Bawipa sang tlang i.

⁴³ Peter tu Joppa khua ah saphaw naper pertu Simon ai inn ah ni raipui cam i.