Tirhthalahle 4 - Zanniat Bible

Council Hmaiah Peter Le John

¹ Peter le John in mizapui hnenah thu rel kawm laitak ah suangbawi hrekkhat le biakinn kilkhawltu hotu bawi le Sadusite hrekkhat hleng tlang i.

² Mithite nung leh tuh i ti fiangruaihnak ah Jesuh tu thihhnak in tho leh i tiin nalangte pahnih in phuang kawm manin anite tu thinraw roh i.

³ Ciamanin cia nalangte pahnih khiah pom ai khua hnua zo hang manin thawng ah a thangha tian toh i.

⁴ Ikhalselai amahte thurelhnak a zatu tampui in sang i; a sangtute tu karhzai amam ai thawng nga tha khim ihang.

⁵ A thangha fangin Judah mi hotute, upate le Danthiam mite tu Jerusalem ah taikhawm i.

⁶ Ciata ah Suangbawi Sang Annas tawk i; cen Caiaphas, John, Alexander le Suangbawi Sang ai a dang songkhatte thawn taikhawm tlang i.

⁷ Nalangte pahnih khiah amahte hmaiah dingruai ai, “Hemi thil canghnak heh akontih in bawn kawm i si? Ziang huham nai ai aisu hming hmang i si?” tiin zawt i.

⁸ Peter tu Rauhla Thianghlim in dim ai anite hnenah, “Mizapui hotute le upate,

⁹ tunnia ah he ke ze pa a cakhnak thu le a vumai thilpha bawnhnak kin zawt ile i sikhaw,

¹⁰ ning ling tuhhnak le Israel mite hmuahhmuah in ling tuh siohnak heh hemi ihang: ning hmai ai a dingtu pa a cakcianghnak heh Nazareth mi, thinglamteh vumai ning rekhnak mi, thihhnak in Pathian in thoruai leh mi Jesuh hming thawmin i, tihnak i.

¹¹ Jesuh thu ah Lai Thianghlim in: ‘Inn satute in ning hnawlhnak lungto tu a thupui ber lungto ah cang zo i,’ tiin ti i.

¹² Nunohnak tu amah song ian ah um i; zaimantifangin Pathian ai omi cangthilhnak tuhin laivum vanhang hniaah minung hnenah pehnak hming dang aisu khai um lo i,” tiin ti i.

¹³ Council upate in Peter le John tu fimthiamhnak a nai lomi mi menma inapui zaitlukin ralpha kawm i, ti khaih hmu fangin multing tlang ngai i. Cen anite tu Jesuh ai rualpuite i, ti khiah hih tlang leh i.

¹⁴ Ikhalselai amahte cakruai mi pa tu Peter le John hiangah ding ngio manin pong thilhnak zaikhai nai fawn lo i.

¹⁵ Ciamanin a thurelhnak khan in sumpua ah suakruai ai amahte lekin khan songah thu rel tlang i.

¹⁶ Pakhat le pakhat, “Akontih in bawn tuh ising? Aisu inkhai bawn thil lo ngaihsunurkul thil mak bawn i, ti khiah Jerusalem khua songai a ummi hmuahhmuah in ling zo sio ai aisu inkhai el thil nawn lo i.

¹⁷ Ikhalselai he thu heh mizapui hnenah a zai tuh loin Jesuh hming in aisu hnen ahkhai thu rel nawn mah ih, ti tuh ising,” tiin ti i.

¹⁸ Cen ko tlang leh ai, Jesuh hming in aisu khai zirh tuh lo le aisu hnen ahkhai thu rel tuh hrimhrim loin kham i.

¹⁹ Ikhalselai Peter le John in, “Ningmah ai thu hlun maw Pathian ai thu hlun heh Pathian hmaiah dik sawn ini, ningmah in thukhan tu ih.

²⁰ Zaimantifangin kinmah rori in kin hmuhnak le kin zahnak tu rel loin um thil lo i ing,” tiin ti kawm i.

²¹ Ciamanin Council upate in roh amam in ralringhnak pe ai hlat i. Mi zongzong in amahte lakai thil canghnak hmu ai Pathian thangphat tlang manin nalangte cawh tuh heh a cang thil lo i, ti khiah ling i.

²² Ngaihsunurkul ai cakhnak a ngahtu pa tu kum sawmli vum dung i.

Ngamhnak Tuh Sawngen Tlang I

²³ Peter le John tu a luat sawng fangin a rualpuite hnenah let kawm ai suangbawi le upate ai relhnak thute rel salawn i.

²⁴ Ciami heh sangtute in za fangin hmunkhat niu in Pathian hnenah sawngen tlang ai, “Aw Cungnungber Bawipa, lai le van, tipuithuanthum le a songai a umhnak hmuahhmuah a bawntu Bawipa,

²⁵ Na Rauhla Thianghlim hmang in na cengfa kin pu David hnenin thurel ai: ‘Zaimanin Gentile mite heh thinraw tlang ini? Zaimanin minung in phathnem lo engsanhnak bawn tlang ini,

²⁶ Bawipa le Messiah ralcai tuhin, laivum kumpibawite pai tlang cialep ai, Uktu bawite thawn hmunkhat ah taikhawm tlang i,’ tiin ti isi.

²⁷ Zaimantifangin Herod le Pontius Pilat in Messiah ai na rilhnak na Cengfa Thianghlim Jesuh tawngcai tuhin he khuapui songah Gentile mite le Israel mite thawn taikhawm tlang ngaingai i.

²⁸ Na huham le na tumtekhnak in cang leh tuh i, ti ai na thiah cia awnghnak khimruai tuh sio in taikhawm tlang i.

²⁹ Aw Bawipa, tunai amahte in kin hringhnak hnelhno khai nangmah in ling tu hram lai kinmah na salte khai na thu ralpha ngai in kin rel thil tuhin kin bawm tu hram law.

³⁰ Mi cakhnak tuhin na ban pharh tulai na a Thianghlim Cengfa Jesuh hming in ngaihtamkul le ngaihsunurkul thilte bawnthilhnak kin pe tu hram law,” tiin ngen tlang i.

³¹ Sawngen ben fangin ciata ai amahte pumkhawm hmun inn heh hlin sio i. Rauhla Thianghlim in dim tlang ai Pathian thu khiah ngam ngai in rel i.

Sangtute Thil Hlawmhnak

³² Sangtute tu ruathnak khat le thinlung khat in um tlang i. Aisu inkhai a naihnak thilri heh, ‘Kaimah bul ai i,’ ti lo i; amahte naihnak hmuahhmuah khiah pakhat le pakhat hlawm dun i.

³³ Bawi Jesuh tholehhnak thu tu nalangte in a thawmlian huham thawn rel tlang ai Pathian in amahte veksen vumah hmuifu tampui burh i.

³⁴ Amahte lakah aisu khai mi hlawhsam um lo i. Lo a naitu le inn a naitute in amahte lo le inn zuar tlang ai ngahhnak paisa heh,

³⁵ nalangte kut ah pe i. Cen ciami paisa tu amahte kulhnak bangin zem tlang i.

³⁶ Ciatih bangin Cyprus tikulh ai a suaktu Levi mi Joseph in,

³⁷ a lo zuar ai a ngahhnak tangka heh nalangte ai kut songah pe i. Joseph tu nalangte in Barnabas tiin ko i. (Barnabas tihnak tu “Thazang petu,” tica i).