Tirhthalahle 2 - Zanniat Bible

Rauhla Thianghlim Hleng I

¹ Pentecost nia hleng fangin sangtute veksen in thinlung khatniu in hmunkhat ah taikhawm in um tlang i.

² Cammalak ah van in khuahu aw bangin hleng ai amahte tohnak khan heh dim sio i.

³ Cen lai bang mailiau suak zutzo ai cia khan songai a umtute hmuahhmuah cia mailiau in tong ṭen i.

⁴ Amahte veksen in Rauhla Thianghlim in dim tlang ai Rauhla in pongthilhnak a pe bangin pong dangdang in pong tlang i.

⁵ Jerusalem khua songah lailung vum khuahacang in a hlengtu Judah mite a um laitak i ai biahnak lamah khai a zuam ngaingai mite i.

⁶ Cia pong dangdang ai ponghnak za tlang fangin miburpui kawi tlang i. Sangtute ai ponghnak tu a hlengtute in amahte pon ṭen in za tlang fangin ngaihsunur tlang roh i.

⁷ Aican le multing in, “Hetih ai a pongtu hnelhno mite heh Galilee mite ilo im?

⁸ Akontih in kinmah pon ṭen pong bangin za ini sing?

⁹ Kin tu Parthia ram, Media ram, Elam ram, Masopotamia ram, Judea ram le Kappadosia ram, Pontas ram, Asia ram,

¹⁰ Phrygia ram, Pamphylia ram, Egypt ram le Libya ram song Cyrene khua hiang in a hlengtute ising. Mihrekkhat tu Rome khua in a hlengtute ising ai,

¹¹ Judah mi le Gentile mi Judah biahnak ai a lut mite ising. Mihrekkhat tu Crete tikulh le Arabia ram in kawi tlang ising. Ikhalselai Pathian in a huham thawn ngaihtamkul a bawnhnak tu amahte pong in relhnak khiah kinmah pong ṭen in za tlang ising,” tiin ti tlang i.

¹² Multing le aican in, “Hemi heh a sullam ziang tica ini?” tiin pakhat le pakhat ti dun tlang murhmo i.

¹³ Ikhalselai midangte in sangtute tu hnihsan tlang ai, “Hemite tu zu ri i!” tiin ti tlang i.

Peter Ai Thurelhnak

¹⁴ Cen Peter tu a dang nalangte hlaikhat kawm in ding ai misenpui hnenah aw cawm ngai in thu rel i: ‘Kin phunpui Judah mi le Jerusalem ah a umtute, ning veksen in ngai tu ilai, he thil heh a sullam ning rel tuh ing.

¹⁵ Ning ruathnak bang ilo i; hemite tu zu ri lo i; zing lam nazi pakua lek lai i.

¹⁶ Ziang i tifangin prophet Joel ai a relciahnak a khim sawn i. Prophet Joel ai relciahnak tu:

¹⁷ ‘Pathian in, ni hnuata lamah tu hetihin bawn tuh ing; Mi zongzong vumah i Rauhla burh tuh ing; Ning fapate le ning fanute in i thu phuang tlang tuh i; Ning tlangvalte in larhnak hmu tlang tuh i; Ning patarte in mang man tlang tuh i;

¹⁸ I, i salnu le i salpate vum ahkhai cia nia ahcen I Rauhla burh tuhai, I thu rel tlang tuh i.

¹⁹ Van vum lamah ngaihsunurkul bawn tuhai, Hnia lam lailung vumah khai ngaihtamkul bawn tuh ing. Thisan le mai, maikhu sah ngai um tuh i.

²⁰ Ni thim tuhai, hlapui khai thisan bangin san tuh i; Bawipa ai Ni, ni thawmlian le ni songlawi a hleng hlan deuh ah,

²¹ Bawipa hnenah bawmhnak ngen in a autu heh nunohnak ngah tuh i,’ ti i.

²² “I miphun Israel mite, he thu i relhnak heh ngai tu ih! Nazareth mi Jesuh tu minung inapui Pathian ai thunaihnak nai i, ti khiah amah hnenin Pathian in a huham thawn thil ngaihsunurkul le tintaihhnak a bawnhnak tepawl in larruai zo i. Hemi tu ningmah rori in ning linghnak i, zaimantifangin ning lakai thil a cang awnghnak i.

²³ Pathian amah ai khuakhanhnak bangin ning kut songah Jesuh pe tuh khiah a ruatcathnak i. Misualte ai forhhnak in Jesuh tu thinglamteh ah khen ai rek tlang i si.

²⁴ Ikhalselai Pathian in thihhnak in thoruai leh ai thihnak huham songin luatruai zo i, zaimantifangin ani tu thihhnak in hen thil mi ilo i.

²⁵ David in amah ai thula hetihin rel i: ‘Bawipa tu i hmaiah hmu ṭiode ing; I hiangah um manin i lau tuh lo i.

²⁶ Ciamanin lungawihnak i dim ai, I ponkam tu nunnuamhnak in dim i, Ciamanin kaimah heh a thi thai minung inapui, umlamhnak songah muang ngai in cawlum tuh ing.

²⁷ Zaimantifangin mithi khua ah i zam tuh lo ai, rintlak na salpa heh hlan kua songah uih le hmon ai ziamral tuh menma in i siang tuh lo isi.

²⁸ Nunhnak lampui khiah i hmuh zo ai i umpui manin anghnak in i dim tuh i,’ ti i.

²⁹ U le naute kin pu mi hmingthang kumpibawi David ai thu le la tu ning hnenah fiangniu in rel i nuam i. David tu thi ai phum i; a hlan heh tunnia tian kin hnenah um i.

³⁰ Ani tu prophet i ai Pathian ai thu a kham ciazo ling i; David bangin David ai tesinfa pakhatkhat heh kumpibawi cang tuhin Pathian in thutiam i.

³¹ Pathian in hmai lam can ah ziang bawn tuh i, ti David in hmu cia i; ciamanin Messiah a tho leh tuh tu hetihin rel i: ‘Mithi khua ah ani tu zam lo ai, a taksa ruangpui hlan songah uih le hmon in ziamral tuh zel lo i,’ tiin ti i.

³² Pathian in hemi Jesuh rori heh thihhnak in thoruai leh ai ciami lingpuitute tu kinmah i ing.

³³ Pathian a Pa ai kiahhan lamah songlawi bik in hlengruai zo ai thu a kham ciazo bangin Rauhla Thianghlim heh a pa hnenin ngah zo i. Tunai ning hmuhnak le ning zahnak tu kin vumai a burhhnak amah ai lehsawng i.

³⁴ Zaimantifangin vancung ai a hlengtu heh David ilo i; David amah in: ‘Bawipa in i Bawipa hnenah, na ralte na ke hniaah,

³⁵ Na hniaphah ai i cangruai hlan tian I kiahhan lamah to tu, ti i,’ tiin ti i,

³⁶ “Israel mite, thinglamteh vumah ning rekhnak Jesuh heh Pathian in Bawipa le Messiah ah bawn zo i, tiheh fiang ngai in ling ning kul hrimhrim i,” tiin ti i.

³⁷ Cia thu za fangin amahte thinlung zul tlang ngai ai Peter in a dang nalangte heh, “U le naute, ziang bawn tuh ising?” tiin zawt i.

³⁸ Peter in anite hnenah, “Ning veksen in sualsir tu ilai Jesuh Khrih hming in baptisma lang tu ih; ciatihin ning sualhnak ning ngaithiam tuhai Pathian ai lehsawng Rauhla Thianghlim ngah tuh i si.

³⁹ Zaimantifangin Pathian thukhamhnak tu ningmah le ning fate hnenah le Pathian thawn a hla duntute inapui ai Bawipa kin Pathian ai a ko mi hmuahhmuah hnenah i,” tiin ti i.

⁴⁰ Peter in thu tampui zirh ai forh i. “Mihrokhrawl vumah a hlenghnak cawhhnak in luat tuhin zuam tu ih,” tiin ti i.

⁴¹ Peter ai relhnak heh mi tampui in sang ai baptisma lang tlang i; cia nia ni khat ah a pawlpui tu mi thawng thum tluk in karhzai i.

⁴² Amahte veksen in nalangte hnenin zir tlang ai, ti le rong aihnak le sawngenhnak thawn pawlkomhnak nai tlang ṭiode i.

Sangtute Ai Nundan

⁴³ Nalangte in ngaihsunurkul le ngaihtamkul bawn tlang manin mi zongzong ai thinlung songah lauhnak le hmaizahhnak in dim tlang i.

⁴⁴ Sangtute hmuahhmuah pawlkom tlang ai thinkhat niu in amahte thil naihnak tepawl khai kawm tlang i.

⁴⁵ Amahte thilri naihnak le hlawnthilte khai zuar tlang ai a ngahhnak tangka heh amahte kulhnak bangin sem tlang i.

⁴⁶ Ni khat hnua ni khat thinkhat niu in Biakinn songah khawm tlang i; amahte inn ah rongkawm tlang ai thinniamhnak le ang ngai in ai tlang i.

⁴⁷ Pathian thangphat tlang ai mi zongzong hnenin mithmai pha ngah tlang i. Cen nisiar in Bawipa in amahte pawlpui ah nunohnak ngahtu bet amam i.