Tirhthalahle 1 - Zanniat Bible

I rual Theofilas

¹ I laibu hmasa songah Jesuh in naper ham a pan nia in vancung ah a lang lehsal nia tian,

² a thil bawnhnak hmuahhmuah le a thuzirhhnak hmuahhmuah ngan ing. Vancung ah a lang lehsal hlanah amah ai a rilmi a nalangte tu Rauhla Thianghlim hathnak huham thawn phatak niu in thuzirh i.

³ A thi hnuaah ni sawmli song anite hnenah vel tampui lar ai nung leh i, ti khiah aisu inkhai el thil tuh loin phun tampui in larruai i. Amah hmu tlang ai ani in Pathian Ukhnak thu khiah anite hnenah rel i.

⁴ Cen hmunkhat ah a tawk dun lai ah, anite hnenah hetihin thupe i: “Jerusalem an a konteng ah khai feh mah ih. I Pa in lehsawng ning pe tuh i, ti ai i relciahnak khiah iang tu sawn ih.

⁵ John in tidap in baptisma pe i; ikhalselai ni rai hlanah Rauhla Thianghlim thawn baptisma pehnak co tuh i si,” tiin ti i.

Jesuh Vancung Ah Lang I

⁶ Nalangte tu Jesuh thawn tawk dun tlang fangin anite in, “Bawipa, tun can ah Israel mite hnenah Ukhnak khiah pe leh tuh isim?” tiin zawt tlang i.

⁷ Jesuh in anite hnenah, “Ciami can le nihla tu i Pa ai thunaihnak in thiahhnak i ai ning lingkulhnak ilo i.

⁸ Ikhalselai ning hnenah Rauhla Thianghlim a hleng fangin hathnak huham thawn ning dim tuhai Jerusalem le Judea ram le Samaria ram hmuahhmuah le lailung a tong tian kaimah ai tetti i tuh i si,” tiin ti i.

⁹ Ciatihin a rel ben fangin Jesuh tu amahte mithmuh rori ah van ah lang teu ai mairo in hup ai hmu thil tlang nawn lo i.

¹⁰ Ciatih ai a honkaihnak van heh cuan tlang cuahco laitak ah pon var siltu mite pahnih amahte hiangah ding kawm vut ai,

¹¹ “Aw Galilee mite, zaimanin van hlir in ding tlang cuahco i si? Ning hnenin van a kaitu Jesuh heh van ah a kai laitak ning hmu bang rori in zuktolh leh tuh i,” tiin ti i.

Judas Aiawhtu Rilhnak

¹² Nalangte tu Olive in Jerusalem ah let tlang lehsal i. Olive Mual tu Jerusalem an peng hrek tluk hla i.

¹³ Khuapui songah feh tlang ai amahte umhnak vumta khan ah lut tlang i. Anite tu Peter le John, Jeams le Andrew, Philip, Thomas, Bartholomeo, Matthew le Alphaeus ai fapa Jeams, Phunṭantu Simon, Jeams ai fapa Judas i.

¹⁴ Hmunkhat ah sawngen tlang tuhin tawk dun tlang de ai nupangte le Jesuh ai nu Mary le Jesuh ai naute khai tel tlang i.

¹⁵ Ni tlawmniu a rai hnuaah sangtute pumkhawm tlang ai minung za le kul dung i. Peter tu ding ai,

¹⁶ “U le naute, Rauhla Thianghlim in David ai hmurka hmang in a relciahnak Jesuh a pomtute hoitu Judas ai thu tu Lai Thianghlim songah nganciahnak bangin khim kul i.

¹⁷ Judah tu kin naperpui songah tel tuh ve in rilmi imanin kin pawl songah songtel i ve i,” tiin ti i.

¹⁸ (Judas in thilsual a bawn man ai a ngahhnak tangka in lo pakhat lai ai cia lo songah bah ai thi i; a pum khoi ai a songril hmuah phut sio i.

¹⁹ Cia thu tu Jerusalem ai a umtu hmuahhmuah in za ai amahte pong in cia lo khiah Akeldama ti i: a sullam tu, “Thisan Lo,” tica i).

²⁰ Peter in, “Zaimantifangin Saam laibu songah, ‘A inn tu lawng tu selai A songah aisu khai um maseh,’ ti ai nganciahnak um i. Cen hmundang ah, ‘Midang in a naper lang tuseh,’ tiin um fawn i.

^21-22 “Ciatih imanin Bawi Jesuh tholehhnak thulingtu ah pakhatkhat in i telpui kul i si. Ani tu Bawi Jesuh kin hnenah khual a tlawng song hmuahhmuah kinmah lakah tel ai, John in baptisma thu a relhnak ai panin Jesuh kin hnenin van ah lang lehsal nia tian, kinmah lakah a tel ve mi i tuh i,” tiin ti i.

²³ Ciamanin mi pahnih ai hming pe i. Anite tu Barsabbas ti ai kohnak Joseph, (Justus ti inkhai kohnak) le Matthias i.

²⁴ Cen sawngen tlang ai, “Bawipa, nang in mi thinlung song ling sio isi; hemite pahnih lakah aisu deuh ril isi ti larruai tu law;

²⁵ a co tuhhnak hmunah kin fehsantu Judas aiawh ah na nalangte lakah ṭuanvo lang tuhin na rilmi heh fiangruai tu law,” tiin ti tlang i.

²⁶ Cen anite pahnih lakah aisu nalang cang tuh i ti linghnak ah camciafung duk kawm ai Matthias in ngah i. Matthias tu nalangte hlaikhat hnenah siarcih i.