Thuṭhentule 1 - Zanniat Bible

Judah le Semeon Hinte In Adonibezek Pom I

¹ Joshua a thi hnuaah Israel mite in, “Kinmah lakah Canaan mite tawng tuhin aisu hinte feh hmasaber tuh i ing? tiin Bawipa zawt tlang i.

² Bawipa in, “Judah hinte feh hmasaber tuseh. Hemi ram tu amahte hnenah pe zo ing,” tiin ti i.

³ Cen Judah mite in a unau Simeon mite hnenah, “Bawipa in a kin zemhnak ramah kinmah thawn hmunkhat in feh ngasing khaw Canaan mite khiah tawng tlang ngasing. Cia hnuaah a zemhnak ramah feh leh ngasing,” tiin sawm i. Ciamanin Semeon mite le,

⁴ Judah mite tu hmunkhat ah raltawng tlang i. Canaan mite le Perizz mite vumah nehhnak Bawipa in pe ai Israel mite in Bezek ah mi thawng hra rek i.

⁵ Ciata ah kumpibawi Adonibezek um ai tawng tlang i. Canaan mite le Perizz mite khiah neh i.

⁶ Adonibezek tu tlan i; ikhalselai hnawh tlang ai a pom ngah fangin a kut zungpui le a ke zungpui tan sek i.

⁷ Ciafangin Adonibezek in, “Kut zungpui le ke zungpui i tan sah awnghnak kumpibawite sawmsarih in i cabuai hniaah rong theh khul tlang awng de i. Tunah anite vumai i bawn bangin Pathian in i vumah bawn ve i,” tiin ti i. Amah tu Jerusalem ah fehpui ai cia khua ah thi i.

Jerusalem le Hebron khua Neh I

⁸ Cen Judah mite in Jerusalem tawng ai lang i. Khuasong mite a rek berh hnuaah khua heh mai in tai i.

⁹ Cia hnuaah tlang vum ram, Negev ram le zawllai ramai um Canaan mite tawng tuhin feh tlang i.

¹⁰ Judah mite in a hlanai Kiriath Arba khuapui tihnak Hebron khua ai um Canaan mite khiah tawng ai Sheshai, Ahiman le Talmai khai neh i.

Othniel In Debir Khuapui Neh I

¹¹ Ciata in Judah mite tu feh ai a hlanai Kiriath Sepher tihnak Debir khua khiah tawng i.

¹² Cen amahte songai mi pakhat Kaleb in, “Kiriath Sepher a nehtu heh i fenu Aksah pe tuh ing,” tiin ti i.

¹³ Ciafangin Kaleb nau pa Kenaz ai fapa Othniel in Debir khuapui heh neh ai ciamanin Kaleb in a fanu Aksah khiah a nupui tuhin pe i.

¹⁴ A hnen a hleng fangin a pasal Othniel in a pa hnenin loram pakhat ngen tuhin ruai i. Ciamanin a pa Kaleb hnenah feh ai laak vuman a tolh fangin a pa in, “Ziang na kul i?” tiin zawt i.

¹⁵ Ciafangin a fanu Aksah in, “Thil na ngen ing. Negev ram ramro ah i umruai manin tikhur kin kul ai ning kin hio tu,” tiin ti i. Ciamanin a pa in sak lam tikhur le hlang lam tikhur pe i.

Judah le Benjamin Hinte Ai Nehhnak

¹⁶ Moses nupui ai pa, a pu Ken ai tesinfate tu Judah mite thawn Ung kung Khuapui a tihnak Jericho in Judah ram Arad hlang lamai umhnak ramro lamah feh ai ciata ah Amalech mite lakah um i.

¹⁷ Cen Judah mite tu Semeon mite thawn feh tlang ai Zephath khua ai umtu Canaan mite khiah neh ai rek berh i. Cia khua khiah cukcam ai siatsuah i; cen Hormah tiin a hming bawn i.

¹⁸ Cen Gaza khua, Ashkelon khua, le Ekron khuate tu a ukhnak ramte thawn lang sek i.

¹⁹ Judah mite tu Bawipa in bawm manin tlang vum ram khai lang sio i. Ikhalselai tipui kamai umtute tu thir siphuhlengte nai manin neh thil lo i.

²⁰ Moses ai thupeciahnak bangin Hebron khua tu Kaleb hnenah pe i. Cen Kaleb in Anak ai fapate pathum khiah Hebron in hnawt i.

²¹ Ikhalselai Benjamin hinte in Jerusalem khua ai umtu Jebus mite tu hnawt lo i. Ciamanin Jebus mite le Benjamin hinte tu Jerusalem ah tun san tianin um tlang i.

Joseph Hinte In Bethel Neh I

^22-23 Joseph hin Epharaim le Manasseh hinte in Luz ti ai kohnak Bethel khuapui tawng i. Amahte hnenah Bawipa khiah um i. Bethel khuapui ah micultute hlat ai,

²⁴ khua songin mi pakhat a suak hmu ai a hnenah, “Hemi khuapui songah lutthilhnak kin rel tucuk; zaikhai na ti tuh lo i ing,” tiin ti i.

²⁵ Ciatihin rel ai ciami pa le a innsang veksen siarlo Joseph hinte in Bethel khuasong minung hmuahhmuah rek berh i.

²⁶ Ciapa tu Hit mite ramah feh ai khuapui pakhat sat ai Luz tiin a hming ko i. Tun san tianin ciami khua hming tu Luz tiin ko lai i.

Israel mite Ai Hnawt Lo Mite

²⁷ Manasseh hinte in Beth Shan khua, Tanaah khua, Dor khua, Ibleam khua, Megiddo khua le a hiang khuatenau song um Canaan mite tu hnawt sek lo i. Tun tianin cia khua ah um lai i.

²⁸ Israel mite a hat deuhdeuh fangin Canaan mite tu per lo thil loin naper ruai i; ikhalselai a hnawt tu hnawt lo i.

²⁹ Epharaim hinte in Gezer khua ai umtu Canaan mite khiah hnawt sek lo manin tun san tian ciata ah um tlang hlen i.

³⁰ Zebulun hinte in Kitron le Mahalol khuapui songai umtu Canaan mite khiah hnawt lo manin ciata ah tun san tianin um lai i. Zebulun hinte in a naper har pertu tuhin umruai i.

³¹ Asher hinte in Akko khua, Sidon khua, Ahlab khua, Akzib khua, Helbah khua, Aphek khua, le Rehob khuapuite ai umtu Canaan mite khiah hnawt sek lo i.

³² Ciatihin hnawt sek lo manin ciata ah Asher mi le Canaan mite tu um tlang i.

³³ Naphtali hinte in Beth Shemesh le Beth Anath khuapui ai umtu Canaan mite khiah hnawt sek lo manin hmunkhat ah um tlang i. Ikhalselai Canaan mite tu Naphtali hinte naper har pertu tuhin umruai i.

³⁴ Amor mite in Dan hinte tu tlang vum ramah hnawt ai zawllai ram tolh tuh kham tlang i.

³⁵ Cen Amor mite tu Heres tlang, Aijalon le Shaalbim ah um tlang thotho i; ikhalselai Joseph hin Epharaim le Manasseh tesinfate in uk ai naper har perruai i.

³⁶ Amor mite ai ramri tu Akrabbim Tlangkawn in Sela in sak lam tian hleng i.