Thusimtu 9 - Zanniat Bible

¹ Hemi thil hmuahhmuah heh a rohpui in ruat dekdo ai midikcang le mifim le a thil bawnhnak hmuahhmuah heh Pathian kut songah um i. Ithnak le huahnak a naihnak khai a kut songah um i. I hmai lamah ziang um i ti aisu inkhai ling lo i.

² Mi zongzong vumah khualairel bangvek ṭen hleng i. Midikcang ituseh, misual ituseh, mipha ituseh, mihrokhrawl ituseh, mi cianghlim ituseh mi cianghlimlo ituseh, hibawlhnak a seltu ituseh hibawlhnak a sel lomi ituseh, amahte tawkhnak a bangvek ṭen liang i. Mipha tu mihrokhrawl tahin miat cuang lo i. Thukhamtu heh thukhamlotu tahin miat cuang lo i.

³ Ciami heh khuaza vanhang hnia ai a pha lober ihang. Mi zongzong caah khualairel a bangvek ṭen hleng i. Minung thinlung tu a nun songah voihnak le phatlohnak in dim i. Cia hnuaah mipha pawl hnenah hleng i.

⁴ Ikhalselai minung i ti ai siarcih mite ca ahcen umlamhnak um lai i, zaimantifangin a thi sa chintit tahin a nungmi uico pha sawn i.

⁵ A nung mite incen thi leh tuh i, ti tal ling i; ikhalselai a thi mite incen zaikhai ling nawn lo i. Anite caah lehsawng um nawn lo i; pum hai in hai tlang i.

⁶ A mi ithnak, a mi huahnak le tumtekhnakte heh thihpui zo sek i. Laivum ai naperhnak songah telthilhnak zaikhai nai nawn lo i.

⁷ Feh tulai na rong heh ang ngai in ai tu, na cabitti khai thinnuam ngai in ding tu! Pathian in na bawnhnak heh lung na khimpui zo i.

⁸ Na hnikpon khiah ciangvarruai tu ngio lai na lu khai thau pawh tu ṭio.

⁹ Vanhang hniaah Pathian in can comniu na pe songah na daihhnak na nupui thawn nunnuam ngai in um kawm tu ih, zaimantifangin laivum na nun songah ciami heh na naper man lehsawng i.

¹⁰ Na tawkhnak naper hmuahhmuah heh na thazang naihnak hmuahhmuah in bawn tu; zaimantifangin na hleng tuhhnak Sheol ahcen naperhnak ituseh, ruathnak ituseh, linghnak ituseh, fimhnak ituseh zaikhai um nawn lo i.

¹¹ Ni hniaah thil dang pakhat hmu lehthio ing: dawpzuamhnak ah mi hat ber in neh cuang lo i, raltawnghnak ah ral pha ber in neh cuang lo i. Mifim lekin rong ngah cuang lo i, mifim lek milian i cuang lo i, thilthiam hnen lek ah hlawhtlinghnak um cuang lo i; a can a khim fangin bawngsiahnak in a veksen man pah sio i.

¹² Minung in a tikcucan ling awng lo i. Nga tu sur in a pom bangin le vaniu tu thang in a awk bangin minung khai mangrinlo in hnawmcanhnak a vumah hleng i.

Fim Le Voihnak Vumah Ruathnak

¹³ Ni hniaah fimhnak santeh tlak pakhat hmu ai ciami tu thupui ngai in ruat ing.

¹⁴ Khua pakhat um ai khua songmi tu a tlawmniu i; kumpibawi a hat ngai in tawng ai a kulh sio hlaiah ciami khua a langthilhnak tuhin a rohpui in zuam i.

¹⁵ Cia khua ah mifarah napui mifim ngai pakhat um i; ciami pa lekin a fimhnak thawn cia khua hup thai tuh napui aisu inkhai ciami pa heh hih tlang lo i.

¹⁶ Ciamanin, “Fimhnak tu hathnak tahin pha sawn i,” ti ing. Ikhalselai mifarah pa ai fimhnak tu zai ahkhai siar lo ai a ponkam heh aisu inkhai ngai nuam lo i.

¹⁷ Mivoite a taikhawmhnak hmunah a hotu pa a au hnelhnohnak aw ngai tahin mifim ponkam nem ngai pha sawn i.

¹⁸ Fimhnak tu ralthuam tahin pha sawn ai misual pakhat in thil pha tampui hnawmcan thai i.