Thusimtu 8 - Zanniat Bible

¹ Hemi thute ling thil tuhin aisu mifim um i? Thilte ai sullam heh aisu in ling thil i? Fimhnak in minung mithmai varruai ai a mithmai siahnak khai pairuai i.

Kumpibawi Thu Ngai Tu Ih

² Pathian hmaiah thu na kham zo manin kumpibawi relhnak heh bawn tu.

³ Kumpibawi incen a nuamnuam in thil bawn thai i, ciamanin a mithmuh in a rang ngai in tlan tu, ciabang kihkul hmunah um nuam mah.

⁴ Kumpibawi thu tu a sang ber imanin amah khiah aisu in, “Ziang bawn isi?” tiin zawt ngam tuh i.

⁵ Amah thu a hluntu in harsahnak in luat tuh i. Mifim in zai can fangin naper tuhai zaitin per tuh ing, ti ling thiam i.

⁶ Zaimantifangin thil hmuahhmuah in can remcang nai ṭen i. Kin linghnak heh a tlawm ze lawmlam i.

⁷ Hmai lamah zai cang tuh i ti aisu inkhai ling lo i. A rel bentu midang khai um lo i.

⁸ Aisu khai thihhnak in a hup dun ben um lo ai thi nia thawnbentu khai um lo i. Ciami ral in aisu khai luat thil lo i. Thudon relhnak in luat thil lo i.

Mipha Le Mihrokhrawl

⁹ Vanhang hnia ai thil bawnhnak hmuahhmuah i thinlung in i ngaisung hnuaah i hmuhnak tu hemi i! Mi hrekkhat in midang vumah thu nai ai mi hrekkhat tu a tuartu i.

¹⁰ Mihrokhrawl pawl hlanmual ah a phum hmu ing. Ikhalselai hlanmual in kin let lamah phatlohnak a bawn awnghnak khuasong rori ah mi in thangphat tlang dekdo i. Hemi khai zaikhai ilo, thulovang i.

¹¹ Mihrokhrawl pawl vumai cawhhnak heh a rang ngai in cawh lo manin sualhnak ralpha ngai in bawn i.

¹² Misual in thil sual heh vel zakhat a bawn hnua ahkhai nung thotho lai i. Ikhalselai Pathian kihzahtute caah amah kihzah manin a tawphnak ahcen thil pha tuh sio i, ti ling ing.

¹³ Ikhalselai hrokhrawl mite ca ahcen ciatih bangin pha tuh sio lo i; a nun khai sau tuh lo i; a nunhnak tu nihlim bang lek i, Pathian a kihzah lo manin.

¹⁴ Laivum ah thulovang thil pakhat um i! Midikcang in mihrokhrawl tuar tuhhnak tuar ai mihrokhrawl in midikcang ai ngah tuhhnak a ngah khiah i. Hemi khai zaikhai sullam nai lo i.

¹⁵ Ciamanin nuamhnak heh thilpha i ti ing, zaimantifangin laivum minung caah ai le ding le lungawi tahin a pha deuh zaikhai um lo i. Vanhang hnia, Pathian pehnak can comniu a nai songah ciami heh a naper harsa lakah a thinlung nuamruaitu lehsawng i.

¹⁶ Fimhnak nai tuhin le laivum ai thil a bawnhnak hmuahhmuah heh a sullam ling tuhin i thinlung hmang ai mitmu loin a sun a zan in ruat ing.

¹⁷ Zaizongza heh Pathian ai thu in cang sio i; minung in laivum ai thil a canghnakte heh zaikhai ling thil tuh lo i; zaitlukin zuam in thakol khalselai ling tuh cuang lo i. Mifim in ling thil ing, ti khalselai ling tuh cuang lo i.