Thusimtu 10 - Zanniat Bible

¹ Thothi thi in rimhmui rim hnawmruai i; Tlawmniu voihnak in fimhnak lianpui phiat thai i.

² Mifimte ruathnak tu kiahhan lamah feh i, Mivoi ruathnak tu kekeh lamah peng i.

³ Lampui ah a vak lak ahkhai hniatacuhhnak nai lo i, Mi zongzong hnenah a voihnak phuang betbo i.

⁴ Bawi pakhat na vumah thin a raw fangin, Na naper in suak mah. Hniatacuh in khelhhnak tampui cakruai i.

⁵ Ni hniaah thil sual i hmuhnak um i, Uktu amah khelhhnak manin i;

⁶ Mivoite in upa naper per ai, miliante tu hmun nauta co i.

⁷ Salte tu siphuh vumah to ai, Bawite tu sal bangin ke in vak hmu ing.

⁸ Khur a cotu heh a songah amah tlok tuh i, Bangkhang a baltu heh rul in cik tuh i.

⁹ Lungto a cotu heh maliamhnak tawk tuh i. Thing vawngtute caah kihkulhnak um i.

¹⁰ Haihpui a tong ze ai tat cia hlah lekhaw, Thazang tampui hmang kul i. Fimhnak nai selai hlawhtling tuh deuh i.

¹¹ Dawi in a molh hlanah rul in cik ta lekhaw Rul dawi thiamtu um heh zai hnempui i?

¹² Mifim tu a ponkam in ninghio hlawh i, Mivoi tu amah hmurka in siatsuah i.

¹³ Thudon puipui a ka songin suak ai a pong tawphnak tu voihnak pittawp ihang.

¹⁴ Mivoi tu a pong tam i; A rel tuhhnak thu aisu inkhai ling lo i. Amah hnuaah ziang cang tuh i ti rel thil lo i.

¹⁵ Mivoi in thidawn in naper i, Khuapui fehhnak lampui rin ling lo i.

¹⁶ Ram uktu kumpibawi mi dawnniu i ai, ram hotute zanvar in puai bawn i; Cia ram tu hmai lam umlamhnak zaikhai nai lo i.

¹⁷ Ikhalselai ram kumpibawi miphun u i ai, Pasal thurel thiam a i hlaiah, Ram song hotute can hmanniu in ti le rong ai in, Suphnak nai ai zu khai ri lohnak ram tu, bawngpha i.

¹⁸ Dauzal manin innbo rop i, Thazawng manin innphu zun i.

¹⁹ Rong tu mi hniruaitu i, cabit tu mi angruaitu i, Ikhalselai tangka loin zaikhai ti thil lo i.

²⁰ A thupniu inrin kumpibawi heh sawi mah. Na ithmun khan ah rin miliante relsia mah, Zaimantifangin hlivua lakah vaniu in na aw zuanpui tuhai Ko naitute in na ponghnak rel tuh i.