Thusimtu 1 - Zanniat Bible

Nunhnak Tu Thulovang I

¹ Jerusalem kumpibawi, David ai fapa Thureltu ai relhnak tepawl:

² Thureltu in hetihin ti i, Thulovang i, thulovang i; Thil hmuahhmuah heh thulovang i;

³ Minung in laipua vum a nun song a naperhnak le a rimsuhnak hmuahhmuah heh ziang hnempuihnak ngah i?

⁴ Sankhat liam ai san dang suak i, Ikhalselai laivum tu kho ngio hlen i.

⁵ Ni khai suak ai tla leh i, Cen a suakhmun lamah let ai suak lala i.

⁶ Hli tu hlang lamah zuang ai sak lam ahkhai zuang i; Hel betbo ai a panhnak hleng lehthio i.

⁷ Runpui ti hmuahhmuah tifingriat ah luang i, Ikhalselai tifingriat tu dim cuang lo i; Runpui tu a hnar lamah let ai, A luang kel in luang lehthio i.

⁸ Thil hmuahhmuah heh thinlung rimsuruaitu i; Minung ka in rel cawk tuh lo i. Mit in thil a hmuhnak heh kham ti um lo i, Bil inkhai a zahnak heh kham ti um lo i.

⁹ Thil a um zohnak heh um leh tuh thio i; Thil bawn sa heh bawn tuh lala i; Vanhang hniaah thil thar zaikhai um lo i.

¹⁰ Aisu tal in, “Sik tu ih, hemi heh thil thar i!” tithilhnak um awng awm? Um lo i, Kin sem hlanpui ai a umciahnak lek i.

¹¹ Hlanlai san khiah aisu inkhai ling nawn lo ihang; A hleng tuhhnak san khai lehhnua ai sante in ling tuh nawn cuang lo i.

Thureltu Ai Hmuhnak

¹² Kaimah thureltu heh Jerusalem ah Israel kumpibawi cang awng ing.

¹³ Cen vanhang hnia ai thil umdan hmuahhmuah heh fimhnak hmangin lingfelhnak le hmusuak tuhin i thinlung in ruat ing. Pathian in minung vumah harsa a pehnak heh i sik fangin lungsiahnak ngaingai i.

¹⁴ Lailung vumai thil bawnhnak hmuahhmuah heh hmu zo ing. Sik tu ih, zaikhai ilo i; hlivua hnawh selai ciabang menma i.

¹⁵ A kawn sa heh cangruai leh thil lo i, A um lomi tu siar thil lo i.

¹⁶ Kaimah le kaimah tu: “I hlanai Jerusalem uktu hmuahhmuah tahin fimhnak tamsawn nai ing. I thinlung in fimhnak le linghnak a thawmlian nai ing,” ti dun ing.

¹⁷ Ciatihin i thinlung tu fimhnak ling tuhin le voihnak le tawhnak khai ling tuhin hmang ing. Ciami khai zaikhai i cuang lo i; hlivua hnawh hnelhno bang thotho i.

¹⁸ Fimhnak a tam fangin buaihnak tam i, Linghnak a tam fangin lungsiahnak tam i.