Thupphuan 7 - Zanniat Bible

Israel Mi Ting Khat Le Thawng Sawm Li Le Thawng Li

¹ Cia hnuaah laivum ningli ah a dingmi vancungmite pali hmu ing. Cia vancungmite pali in laivum ah le tifingriat ah le thingkung ah khuahu zuang tuh loin kham tlang i.

² Nisuah lamin a nungmi Pathian ai hnikhnaihhnak tacikte pali a awhtu a dang vancungmi pakhat a suak khiah hmu ing. Pathian in laipua le tifingriat siatsuah benhnak thu a pehnak vancungmite pali khiah aw cawm ngai in ko i.

³ Vancungmi in, “Kin Pathian ai cengfate cal ah hnikhnaihhnak tacik khen ben sek hlan ahcen laipua le tifingriat le thingkungte siatsuah rih mah ih,” tiin ti i.

⁴ Cen Pathian ai hnikhnaihhnak tacik in amahte cal ai khen cia mite tu ting khat le thawng sawmli le thawng li i, tiin i rel i. Ciami tu Israel miphunte hlaihnih songin i.

⁵ Judah hin in thawng hlaihnih, Reuben hin in thawng hlaihnih, Gad hin in thawng hlaihnih,

⁶ Asher hin in thawng hlaihnih, Naphtali hin in thawng hlaihnih, Manasseh hin in thawng hlaihnih,

⁷ Simeon hin in thawng hlaihnih, Levi hin in thawng hlaihnih, Issakhar hin in thawng hlaihnih,

⁸ Zebulun hin in thawng hlaihnih, Joseph hin in thawng hlaihnih, Benjamin hin in thawng hlaihnih i.

Siarcawk Lo Miburpui

⁹ Cia hnuaah i sik fangin miburpui tampui hmu ing; aisu inkhai siar cawk lo miburpui i. Anite tu miphun, hin, pong phun cangcang in a hlenghnak mite i ai bawi tohkham le Tuufa hmaiah ding tlang i; pon ngo sil tlang ai amahte kut in fuhfau hnah awh tlang ṭen i.

¹⁰ “Nunohnak tu bawi tohkham vumai a totu kin Pathian le Tuufa hnenin hleng i,” tiin cawm ngai in au tlang i.

¹¹ Vancungmi hmuahhmuah bawi tohkham le upate le thilnungte pali cingkim ah ding tlang i. Bawi tohkham hmaiah bok tlang ai Pathian bia tlang i;

¹² “Amen! Thangphathnak, songlawihnak, fimhnak, anghnak, upathnak, huham le hathnak tu kumzangza in kin Pathian ai ituseh. Amen!” tiin ti tlang i.

¹³ Upate kul hluanli lakai pakhat in, “Hemi pon ngo a siltute tu aisute i? A konteng in hleng tlang i?” tiin i zawt i.

¹⁴ “Bawipa, ling lo ing. Nang in ling tuh sawn isi,” tiin ti ing. Cen ani in, “Hemite tu cawhhnak a roh ngai songin cak le him in a suaktute i. Amah pon tu Tuufa thisan songah sawp ai ngoruai zo i.

¹⁵ Ciamanin Pathian ai bawi tohkham hmaiah ding tlang ai biakinn songah a naper heh a sun a zan in per tlang i. Bawi tohkham vumai a totu in umpui tuhai ciami a umpuihnak tu a himhnak i tuh i.

¹⁶ Rikam tlang tuh nawn lo ai ti khai hal tuh nawn lo i; ni sa tuar tlang tuh lo ai thinpit vansang khai um tuh nawn lo i.

¹⁷ Zaimantifangin bawi tohkham laiteng ai a ummi Tuufa tu anite khaltu i tuhai nunhnak petu cirhti umhnak ah fehpui tuh i. Cen amahte mithli hmuahhmuah heh Pathian in nul sah tuh sek i,” tiin ti i.