Thupphuan 6 - Zanniat Bible

Tacikte

¹ Cen Tuufa in tacik pasarih lakah pakhat hawk khiah hmu ai thilnung palai lakai pakhat in, a aw khuari thawm bangin, “Kawitu,” tiin a ti za ing.

² I sik fangin siphuh ngo pakhat hmu ing. A vumah a totu in li pakhat awh ai bawi lukhuk khai pe tlang i. Mi nehtu in neh tuhin a vak bangin vak i.

³ Cen Tuufa in a tacik pahnihhnak hawk ai thilnung pahnihhnak in, “Kawitu,” a ti za ing.

⁴ Siphuh dang pakhat suak ai siphuh san i. A vumah a totu hnenah laivum ah pakhat le pakhat rekdunhnak ral pan tuhin thupe tlang i. Ralvang lianpui khai pe i.

⁵ Cen Tuufa in tacik pathumhnak hawk ai thilnung pathumhnak in, “Kawi tu” a ti khiah za ing. I sik fangin siphuh hang pakhat hmu ing. A vumah a totu in cuai tehhnak zazu pakhat a kut in awh i.

⁶ Thilnung pali lakin aw bang thawm za ai, “Nikhat hlawhman ah sangvut pawng khat, ni khat hlawhman ah barley pawng thum i. Ikhalselai olive thingkung le cabit vuandum tu siatsuah mah,” ti i.

⁷ Cen tuufa in tacik palihnak hawk ai thilnung palihnak in, “Kawitu,” a ti khiah za ing.

⁸ I sik fangin siphuh a taksa a daumi pakhat hmu ing. A vumai a totu a hming ah Thihhnak i ai Hell in a hnua lam nong niu in hlun i. Anite tu laivum mi ai seu li seu khat khiah raltawnghnak, riantlunghnak, urhnak le sahrang ai tuahmawhhnak in rek tuhin thupehnak mite i.

⁹ Cen Tuufa in tacik pangahnak hawk i. Pathian thu rel tlang manin le rintlak ze in phuang ngam tlang manin rek a tuartute ai rauhla tu hi bawl hmun hniaah hmu ing.

¹⁰ Cawm roh in au tlang ai, “A thianghlimmi le a dikmi Hmualnaiber Bawipa, laivum minung kin thisan a luangruaitute heh zaikom tian phuzul loin le cawh loin zuah tuh isi?” ti tlang i.

¹¹ Anite tu pon ngo pakhat ṭen pe i ai, “Ningmah bangin rek a tuar tuh mi ning unau le ning cengfa pui tepawl a khim hlanlo can comniu song com rih tu ih,” tiin rel tlang i.

¹² Cen Tuufa in tacik parukhnak a hawk khiah hmu ing. Roh bik in hlinhlin ai ni tu ponher hang bangin hang ai hlapui tu thisan bangin san sio i.

¹³ Cen arsite khai khuahu in thai kuruh a hmuthnak bangin laipua ah theh sek i.

¹⁴ Van tu laihnahzual bangin zual ai mual le tikulh hmuahhmuah amahte umhnak in thawn tlang sek i.

¹⁵ Cen laivum kumpibawite le ram uktu bawite le ralbawite, milian le thunaitute le midang hmuahhmuah, sal le miluat thawn, khukua song le tlang vum lungkhu hniaah relh tlang i.

¹⁶ Mual le lungpuite hnenah, “Kin net tu ilai bawi tohkham ai a totu mithmai le Tuufa thinrawhnak in kin thup tu hram ih.

¹⁷ Amahte thinrawhnak a hleng nia, tihikkul nia hleng zo ai aisu in tuar ben tuh i?” tiin au tlang i.